ក្រសួងកសិកម្មបង្កើតក្រុមការងារតាមដានដោះស្រាយបញ្ហាផលិតកម្មកសិកម្មនិងរកទីផ្សារ
2016.09.07
ចម្ការពោតរបស់ចម្ការបន្លែធម្មជាតិសរីរាង្គ (Eco Agri Farm) នៅខេត្តកោះកុង កាលពីថ្ងៃទី៣១ ខែកក្កដា ឆ្នាំ២០១៦។ RFA/Brach Chev
RFA/Brach Chev
ក្រសួងកសិកម្ម រុក្ខាប្រមាញ់ និងនេសាទ បានសម្រេចបង្កើតក្រុមការងារតាមដាន និងដោះស្រាយបញ្ហាផលិតកម្មកសិកម្ម និងការរកទីផ្សារកសិផលដែលមានសមាសភាពចំនួន ១៩រូប។ ក្រសួងកសិកម្ម ថាក្រុមការងារនេះនឹងផ្សព្វផ្សាយព័ត៌មានអំពីគោលនយោបាយទីផ្សារ ដើម្បីជំរុញឲ្យកសិករផលិតប្រកបដោយគុណភាព និងសុវត្ថិភាពកសិផលខ្ពស់។
សេចក្ដីជូនដំណឹងរបស់លោក វេង សាខុន រដ្ឋមន្ត្រីថ្មីនៃក្រសួងកសិកម្ម រុក្ខាប្រមាញ់ និងនេសាទ អះអាងថា ក្រុមការងារនេះមានតួនាទីដោះស្រាយបញ្ហាប្រឈមលើផលិតកម្មកសិកម្ម និងការរកទីផ្សារកសិផល ដើម្បីលើកទឹកចិត្តកសិករ និងកាត់បន្ថយការនាំចូលផលិតផលកសិកម្មពីក្រៅប្រទេស។
សេចក្តីជូនដំណឹងដែលបានផ្សព្វផ្សាយនៅថ្ងៃទី១ ខែកញ្ញា ឲ្យដឹងទៀតថា ក្រុមការងារតាមដាន និងដោះស្រាយបញ្ហាលើផលិតកម្មកសិកម្ម និងការរកទីផ្សារកសិផលដែលមានសមាសភាពចំនួន ១៩រូប ដែលសុទ្ធតែជាថ្នាក់ដឹកនាំគ្រប់អង្គភាពក្រោមឱវាទរបស់ក្រសួងកសិកម្ម។ ក្រុមនេះ មិនត្រឹមតែផ្សព្វផ្សាយព័ត៌មានពីគោលនយោបាយសំខាន់ៗរបស់ក្រសួងប៉ុណ្ណោះទេ ថែមទាំងជួយឆ្លើយតប ព្រមទាំងដោះស្រាយរាល់សំណូមពររបស់ប្រជាពលរដ្ឋ ពាក់ព័ន្ធនឹងបញ្ហាទីផ្សារថែមទៀតផង។
នៅក្នុងសេចក្តីសម្រេចស្ដីពីការបង្កើតក្រុមការងារតាមដាន និងដោះស្រាយបញ្ហាលើផលិតកម្មកសិកម្ម និងការរកទីផ្សារកសិផល រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាឲ្យក្រុមការងារទាំង ១៩រូបនេះ ត្រូវមានភារកិច្ចដូចជា តាមដានការងារគ្រប់គ្រង និងត្រួតពិនិត្យគុណភាព និងសុវត្ថិភាពកសិផល ជំរុញកំណើនផលិតភាពកសិកម្មតាមរយៈការអនុវត្តកសិកម្មល្អប្រកបដោយភាពវៃឆ្លាត តាមដានការត្រួតពិនិត្យគុណភាព និងសុវត្ថិភាពធាតុចូលកសិកម្ម រិះរកមធ្យោបាយដើម្បីជំរុញឲ្យកសិករចេះធ្វើការវិភាគ តាមរយៈការកាត់បន្ថយថ្លៃដើម ការបង្កើនចំណូលដល់កសិករ និងតម្លៃបន្ថែមលើកសិផល តាមដាន និងអន្តរាគមន៍ដោះស្រាយឲ្យបានទាន់ពេលវេលានូវបញ្ហាប្រឈមលើផលិតកម្មកសិកម្ម និងទីផ្សារកសិផល ពិសេសត្រូវរាយការណ៍ជូនរដ្ឋមន្ត្រីក្រសួងកសិកម្ម ក្នុងករណីចាំបាច់។
រដ្ឋមន្ត្រីក្រសួងកសិកម្ម ក៏បានណែនាំឲ្យគ្រប់សមាជិកទាំងអស់នៃក្រុមការងារនេះ ត្រូវអនុវត្តភារកិច្ចតាមការចាត់តាំង និងចូលរួមប្រជុំតាមការអញ្ជើញរបស់ប្រធាន ហើយត្រូវទទួលបន្ទុកអនុវត្តសេចក្តីសម្រេចនេះតាមភារកិច្ចរៀងៗខ្លួនចាប់ពីថ្ងៃចុះហត្ថលេខាតទៅ។
ការចេញសេចក្តីសម្រេចរបស់ក្រសួងកសិកម្ម រុក្ខាប្រមាញ់ និងនេសាទ នៅពេលនេះ ធ្វើឡើងបន្ទាប់ពីកសិករ និងសង្គមស៊ីវិល បានបង្ហាញក្តីបារម្ភពីលទ្ធភាពទទួលបានទីផ្សារលក់កសិផលកសិកម្មនៅតែជាឧបសគ្គបន្តប្រឈមដល់ជីវភាពកសិករ ដែលអាចនឹងបង្កជាក្តីបារម្ភដល់កង្វះលទ្ធភាពក្នុងការផ្គត់ផ្គង់ស្បៀងអាហារ និងអាចប៉ះពាល់ដល់ការអភិវឌ្ឍវិស័យកសិកម្មនៅកម្ពុជា។
ទន្ទឹមគ្នានេះ កសិករក៏បានអះអាងថា បញ្ហាខ្វះទីផ្សារនេះបានធ្វើឲ្យកសិករ ពិសេសកសិករខ្នាតតូចជាច្រើន បង្ខំចិត្តបោះបង់ការងារកសិកម្ម រួចនាំគ្នាចំណាកស្រុកទៅធ្វើការនៅក្រៅប្រទេស។ មិនតែប៉ុណ្ណោះ ដោយសារខ្វះអន្តរាគមន៍ពីរដ្ឋាភិបាល និងស្ថាប័នពាក់ព័ន្ធក៏បានធ្វើឲ្យកសិករខ្លះក្លាយជាកូនបំណុលធនាគារ ឬគ្រឹះស្ថានមីក្រូហិរញ្ញវត្ថុ។ ជាងនេះទៀត ទោះបីជាកសិផលកសិកម្ម ដូចជា ពោត សណ្ដែក ដំឡូង ស្រូវ និងទិន្នផលកសិកម្មផ្សេងទៀតជាដើមរបស់កសិករលក់មិនចេញ។
ទាក់ទិននឹងចំណាត់ការរបស់រដ្ឋមន្ត្រីក្រសួងកសិកម្ម នៅពេលនេះដែរ អគ្គលេខាធិការសម្ព័ន្ធសហគមន៍កសិករកម្ពុជា លោក ថេង សាវឿន គាំទ្រចំពោះការបង្កើតក្រុមការងារតាមដាន និងដោះស្រាយបញ្ហាលើផលិតកម្មកសិកម្ម និងការរកទីផ្សារកសិផលកសិកម្ម បើទោះជាក្រុមការងារនេះយឺតយ៉ាវបន្តិចក្តី។ លោកបញ្ជាក់ថា មូលហេតុដែលបណ្ដាលឲ្យផលិតកម្មកសិកម្ម និងខ្វះទីផ្សារលក់កសិផលកម្ពុជា មកពីកង្វះគោលនយោបាយលើកទឹកចិត្តកសិករ ខ្វះប្រព័ន្ធធារាសាស្ត្រ ថវិកាជាតិចំណាយមិនចំគោលដៅ និងមិនមានការបែងចែកអំណាចដល់ថ្នាក់មូលដ្ឋាន ជាដើម។
ប៉ុន្តែយ៉ាងណាលោកចង់ឃើញក្រុមការងារនេះ អនុវត្តការងារមានប្រសិទ្ធភាព មិនមែនគ្រាន់តែបង្កើតឲ្យល្អមើលប៉ុណ្ណោះទេ៖ «សម្រាប់ខ្ញុំ ខ្ញុំគិតថា រដ្ឋាភិបាលត្រូវតែលើកទឹកចិត្តកសិករ ពិសេសអ្នកផលិត ពិសេសរដ្ឋាភិបាលត្រូវតែពិនិត្យមើលថវិកាជាតិ ពិសេសដំឡើងថវិកាជាតិសម្រាប់ឆ្នាំ២០១៧ ខាងមុខ ហើយបញ្ជូនធនធានមនុស្ស ពិសេសមន្ត្រីកសិកម្មទៅបណ្តុះបណ្តាលកសិករឲ្យចេះផលិត»។
កាលពីពេលកន្លងទៅ រដ្ឋមន្ត្រីនៃក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ក៏ធ្លាប់បានថ្លែងថា លោកមានការឈឺចាប់ក្នុងនាមជាកូនខ្មែរមួយរូប នៅពេលឃើញកម្ពុជា នាំចូលផលិតផលបន្លែត្រីសាច់រាប់តោនពីប្រទេសជិតខាងជារៀងរាល់ថ្ងៃ គ្រាដែលកម្ពុជា មានទឹកមានដី និងមានធនធានមនុស្សជាច្រើនអាចបង្កបង្កើនផល ចិញ្ចឹមសត្វ និងចិញ្ចឹមត្រី ដើម្បីផ្គត់ផ្គង់ទីផ្សារបានដោយខ្លួននោះ។
ក្នុងបទសម្ភាសន៍ឲ្យសារព័ត៌មានក្នុងស្រុក លោក វេង សាខុន ក៏បានប្រកាសប្រឹងប្រែងផ្តល់នូវបច្ចេកទេសដាំដុះខ្ពស់ដល់ប្រជាកសិករខ្មែរ ព្រមទាំងស្វែងរកប្រភពទុនពីម្ចាស់ជំនួយ ជួយបង្កើនលទ្ធភាពក្នុងការដាំដុះ។ ជាងនេះទៀត ដើម្បីបង្កើនផលិតផលបន្លែផ្លែផ្ការបស់ប្រជាកសិករខ្មែរ លោក វេង សាខុន បានបញ្ជាក់ថា លោកបានណែនាំដល់មន្ត្រីឲ្យចុះជួយពង្រីកការដាំដុះរបស់ប្រជាពលរដ្ឋពីសួនបន្លែ។ ចំណែកឯការងារស្វះស្វែងរកទីផ្សារដើម្បីកសិផលរបស់ខ្មែរ លោកនឹងខិតខំដោះស្រាយឲ្យបានប្រសើរឡើង។
បើទោះជាយ៉ាងណាក៏ដោយ អ្នកជំនាញកសិកម្មយល់ថា ការបង្កើតក្រុមការងារនេះ នឹងគ្មានប្រសិទ្ធភាព ប្រសិនបើបង្កើតឡើងគ្រាន់តែល្អមើល ឬគ្មានយន្តការច្បាស់លាស់។ ជាងនេះទៀត អ្នកជំនាញកសិកម្មបានផ្តល់អនុសាសន៍ទៅរដ្ឋមន្ត្រីក្រសួងកសិកម្ម ថា ដើម្បីជំរុញវិស័យកសិកម្មឲ្យរីកចម្រើន ពិសេសដោះស្រាយបញ្ហាទីផ្សារកសិផលជូនកសិករកម្ពុជា ឲ្យមានប្រសិទ្ធភាព រដ្ឋាភិបាលត្រូវដោះស្រាយឲ្យបានឆាប់រហ័សរាល់ឧបសគ្គក្នុងវិស័យកសិកម្ម សំខាន់គឺកង្វះទុន កង្វះទឹក និងកង្វះទីផ្សារ ដែលជាកត្តារាំងស្ទះចម្បងដល់ដំណើរការផលិតកម្មកម្ពុជា។ ជាងនេះទៀត រដ្ឋាភិបាលគួរតែបញ្ជូនមន្ត្រីជំនាញទៅបណ្តុះបណ្តាល និងដឹកនាំកសិករដល់មូលដ្ឋានផ្ទាល់ឲ្យចេះសហការគ្នា និងចេះផលិតទាន់តម្រូវការទីផ្សារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ