ជោគជ័យនៃគម្រោងអភិវឌ្ឍន៍របស់អង្គការនៅខេត្តតាកែវ

ដោយ សាន សុវិទ្យ

2008-08-24

កសិករខ្មែរដែលភាគច្រើនលើសលប់បានឆ្លងកាត់សេចក្តីលំបាកវេទនាពីសង្គ្រាមច្រើនទសវត្សរ៍នោះ មានមួយចំនួនបានទទួលការជួយអនុគ្រោះពីអង្គការក្រៅរដ្ឋាភិបាលក្នុងវិស័យកសិកម្មនិងបសុសត្វ ។ ក្នុងនាទីកសិកម្មថ្ងៃនេះ លោក សាន សុវិទ្យ សូមណែនាំអំពីជោគជ័យនៃគម្រោងអភិវឌ្ឍន៍របស់អង្គការសិលអាហ្រ្គិដ និងហីហ្វ័រនៅខេត្តតាកែវ ។

«ខ្ញុំអត់មានទេមុនដំបូង ទៅរៀនតស៊ូជិះកង់សុទ្ធ និយាយពីប្រវត្តិខ្ញុំ ។ ឥឡូវជីវភាពខ្ញុំធូរធារមានបានម៉ូតូ ០៧ មួយ ហើយមានម៉ាស៊ីនបូមទឹក មានទូរទស្សន៍ មានម៉ាញ៉េអី មានគ្រប់» ៖ នេះគឺសំឡេងលោក ទុយ បូ មេគ្រួសារកសិករមួយរូបនៅភូមិក្រោម ឃុំសន្លុង ស្រុកទ្រាំង ខេត្តតាកែវ ដែលបានចូលជាសមាជិកសហគមន៍អភិវឌ្ឍន៍រៀបចំដោយមជ្ឈមណ្ឌលអភិវឌ្ឍន៍ការចិញ្ចឹមសត្វ និងកសិកម្ម ហៅកាត់ថា សិលអាហ្គ្រិដ (CelAgrid) សហការជាមួយអង្គការហីហ្វ័រអន្តរជាតិ។
ជីវិតរបស់លោក ទុយ បូ និងភរិយាអ្នកស្រី នេត្រ ថូ ព្រមទាំងកូនៗ ៦នាក់ បានធូរធារស្រួលបួលជាងមុន ព្រោះតែមានអន្តរាគមន៍ពីសិលអាហ្គ្រិដ និងអង្គការហីហ្វ័រនេះ ។
សហគមន៍អភិវឌ្ឍន៍ភូមិក្រោមទើបនឹងបានត្រូវបង្កើតឡើងកាលពីមិនប៉ុន្មានឆ្នាំមុននេះប៉ុណ្ណោះ ៖ «ក្នុងសហគមន៍របស់ខ្ញុំហ្នឹង ឆ្នាំ ២០០៦ ។ សហគមន៍ខ្ញុំដំណើរការក្រោយគេ» ។
ក៏ប៉ុន្តែសមាជិកសហគមន៍ ដែលក្នុងដំណាក់កាលដំបូងមានគ្នាជាង ២០គ្រួសារ មានកម្រិតជីវភាពប្រសើរឡើងយ៉ាងគួរឲ្យកត់សម្គាល់ ។
ខ្ញុំបានសួរលោក ទុយ បូ ថា តើសហគមន៍បានទទួលអ្វីខ្លះពីការចូលរួមក្នុងគម្រោងអភិវឌ្ឍន៍របស់សិលអាហ្គ្រិដ និងអង្គការហីហ្វ័រ លោក ទុយ បូ រៀបរាប់ប្រាប់ដូច្នេះ ៖ «ក្នុងសហគមន៍ហ្នឹង មុនដំបូងបានជ្រូក បន្ទាប់មកបានមាន់ ។ មុននឹងបានជ្រូក បានពូជដំណាំ ពូជត្រី ហើយបានមាន់ អង្គការជួយជាថវិកាធ្វើជាទ្រុងមាន់ ព្រោះអីការពារជំងឺផ្ដាសាយបក្សី ។ ហើយផ្ដល់ជាកូនគោ ហើយឥឡូវថ្មីៗនេះ ជួយជាទុនស្រូវ ថិវកាឲ្យខ្ចីដោយអត់យកថវិកាទេ» ។
ជាលទ្ធផលតើខណៈនេះផ្ទះលោក ទុយ បូ បានទទួលអ្វីខ្លះទៅ ? លោក ទុយ បូ បានប្រាប់ដូច្នេះ ៖ «ឥឡូវនេះគោមាន ៦ក្បាល ជ្រូកមាន ២ក្បាល ខ្ញុំលក់ថ្ងៃមុនអស់ហើយ នៅសល់២ ហើយមាន់នៅ ប្រហែលជា ២០ក្បាល ។ និយាយពីជ្រូក កាលកើតមកខ្ញុំផ្ទេរទៅសហគមន៍វិញ បានជ្រូក២ ។ ខ្ញុំនៅជាប់ចំណងសងសហគមន៍ ជ្រូក២ទៀត ហើយគោទើបផើម ដល់កូន ខ្ញុំត្រូវផ្ទេរបន្តទៅប្រជាជន ក្រោយៗទៀត ក្នុងសហគមន៍ហ្នឹង» ។
យោងតាមការអធិប្បាយរបស់លោកទុយ បូ គេអាចយល់បានថា គម្រោងអភិវឌ្ឍន៍នេះមានដាក់ លក្ខខណ្ឌដល់សមាជិក។ តើលក្ខខណ្ឌនោះមានអ្វីខ្លះ? លោក ទុយ បូ បានឲ្យដឹងដូច្នេះ ៖ «លក្ខខណ្ឌគោទី១ ផ្ទេរទៅឲ្យសហគមន៍របស់យើង ដល់គោទី២ យើងម្ចាស់ទទួលទុន យើងត្រូវយកកូនគោ ហើយដល់កូនទី៣ យើងត្រូវផ្ទេរទៅឲ្យអង្គការ ។ អង្គការហ្នឹង បន្ទាប់ពីបានកូនគោហ្នឹងហើយ យកទៅលក់ ឧទាហរណ៍បាន ១លានរៀល គាត់យក ៦០ម៉ឺនរៀល ហើយទុក ៤០ម៉ឺនរៀល ប្រគល់មកឲ្យសហគមន៍យើង សម្រាប់ទុកដាក់ជាប្រាក់សន្សំខ្លួនឯង» ។
សិលអាហ្គ្រិដដែលសហការជាមួយស្ថាប័នស្រាវជ្រាវនិងអភិវឌ្ឍន៍ ផ្នែកកសិកម្មនៅច្រើនប្រទេសដូចជាសកលវិទ្យាល័យក្រុងខនកែន និងឈាងម៉ៃប្រទេសថៃ សកលវិទ្យាល័យក្រុងវ៉េ និងកាន់ធើព្រមទាំសកលវិទ្យាល័យកសិកម្ម និងវនសាស្ត្រ ប្រទេសយៀកណាម វិទ្យាស្ថានជាតិស្រាវជ្រាវផ្នែកព្រៃឈើនិងកសិកម្មប្រទេសលាវ សកលវិទ្យាល័យវិទ្យាសាស្ត្រកសិកម្មប្រទេសស៊ុយអែដ និងវិទ្យាស្ថានស្រាវជ្រាវការចិញ្ចឹមសត្វអន្តរជាតិ ។ល។ បានទទួលកិច្ចឧបត្ថម្ភខាងផ្លូវហិរញ្ញវត្ថុពីអង្គការសមាគម ក្រសួង ស្ថាប័នបរទេស និងអន្តរជាតិមួយចំនួនធំទៀតដែរ ។
គម្រោងបង្កើតសហគមន៍អភិវឌ្ឍន៍ មិនមែនមាននៅតែឃុំសន្លុង ខេត្តតាកែវនោះទេ គឺមានគម្រោងដូចគ្នានេះ នៅខេត្តកណ្តាល និងពោធិ៍សាត់ ហើយនឹងបន្តពង្រីកទៅកាន់ខេត្តផ្សេងៗជាបន្តបន្ទាប់ ។
ចំពោះសហគមន៍ភូមិក្រោមដែលមានសភាពប្លែកបន្តិច ព្រោះមានចំនួនសមាជិកច្រើនជាងកម្រិត លោក ទុយ បូ ឲ្យដឹងថា បានទទួលជោគជ័យច្រើន ៖ «មានជោគជ័យច្រើន ព្រោះឥឡូវបានគោហ្នឹង អង្គការហីហ្វ័រកម្ពុជា ផ្ដល់ឲ្យ១២ ឥឡូវបាន ១៥ហើយ ។ ហើយជ្រូក កាលផ្ដល់ឲ្យបានតែ ១០គ្រួសារ ឥឡូវបានជ្រូក២០ ប៉ុន្តែឈ្មោលៗ គេលក់អស់ ។ ឥឡូវបានផ្ដល់ឲ្យបាន ៥គ្រួសារ ចំនួនជ្រូក១០ ហើយ បានកូនជ្រូកផ្ដល់ឲ្យ ឥឡូវមានផើមបន្តបន្ទាប់ទៀត» ។
ក្រៅពីនេះ សហគមន៍ប្រភេទនេះ នៅមានគុណប្រយោជន៍ដូចតទៅ ៖ «ទី១ យើងបានពូជសត្វដែលអង្គការផ្ដល់ជូនយើងហ្នឹង ទី២ យើងបានជាប្រាក់ក្រុមជួយខ្លួនឯង ពេលដោះទ័លកូនឈឺអី យើងអាចមកខ្ចីប្រាក់ក្រុមជួយខ្លួនឯងហ្នឹង ហើយបានបទពិសោធន៍ពីចំណេះដឹង ការចិញ្ចឹមសត្វ» ។
ផ្ទាល់ខ្លួនលោក លោក ទុយ បូ បានទទួលជីវភាពធូរធារ ហើយគុណភាពជីវិតរបស់លោកក៍បានល្អប្រសើរជាងមុន ៖ «ពី១៩៨៥ អី ខ្ញុំនៅវ័យទាហាន កាលណោះប្រទេសនៅប្រទាញប្រទង់គ្នា ដល់ពេលស្រុកបានសុខសប្បាយ ចប់ពីទាហានទៅ មិនដឹងរកមុខជំនាញអី ដោយសារមានកម្មវិធីរបស់អង្គការស្រុកទ្រាំងហ្នឹង បានឲ្យខ្ញុំទៅរៀន ផ្ដល់ចំណេះដឹងបានចេះបន្តិចបន្តួច ហើយមានអង្គការសិលអាហ្រ្គិត បានជួយឧបត្ថម្ភមក ហៅទៅរៀនបណ្ដុះបណ្ដាល ផ្ដល់ដើមទុនសម្ភារៈ ថ្នាំពេទ្យថ្នាំអីយកមកជួយ ។ ខ្ញុំបានជីវភាពធូរធារច្រើន ហើយកាត់បន្ថយអំពើហិង្សាទៀត ។ កាលមុនខ្ញុំដូចថាចិត្តមួហ្មង ឥឡូវដូចថាបានស្គាល់ចំណេះដឹងទៅ គឺអត់សូវមានអំពើហិង្សាក្នុងគ្រួសារ» ។
សួរថាតើត្រូវមានលក្ខណៈសម្បត្តិយ៉ាងណាទើបអាចចូលជាសមាជិកគម្រោងអភិវឌ្ឍន៍នេះបាន ?តើចាំបាច់ត្រូវប្តូរសាសនាដែរឬទេ?
លោក ទុយ បូ ថា អង្គការទាំងពីរគ្មានពាក់ព័ន្ធនឹងប្រព័ន្ធសាសនា ឬផ្នែកនយោបាយណាឡើយ ៖ «អង្គការហ្នឹងគាត់អត់មានប្រកាន់ថា សាសនាព្រះពុទ្ធ សាសនាអី គាត់ជួយទាំងអស់ អង្គការហីហ្វ័រ និងអង្គការសិលអាហ្រ្គិត ឲ្យតែជនជាតិចិត្តចង់ចូលរួមគាត់អត់មានប្រកាន់សាសនា អត់មានប្រកាន់បក្សពួក ប្រកាន់បក្សណាៗ អត់មាននយោបាយអីទេ» ។
ក្នុងចំណោមគោលការណ៍ទាំង១២របស់អង្គការហីហ្វ័រ លោក ទុយ បូ រំឭកបានមានប្រសាសន៍ថា ៖ «ការផ្ទេរបន្ត ការទទួលខុសត្រូវ... ត្រូវការចាំបាច់ ហើយពង្រឹងស្មារតី និងផ្លូវចិត្ត ការចូលរួមយ៉ាងពេញលេញ ការកែលម្អបរិស្ថាន ការផ្ដល់ចំណេះដឹង» ។
ទោះជាយ៉ាងណាក្តី ក្រៅពីមានជំនួយពីខាងក្រៅហើយ កសិករខ្មែរដូចលោក ទុយ បូ អ្នកស្រុកទ្រាំង ខេត្តតាកែវ ក៏ចាំបាច់ត្រូវជួយខ្លួនឯងផងដែរ ដោយការប្រព្រឹត្តតាមគន្លងនៃគោលការណ៍ទាំងឡាយខាងលើនេះ និងអនុវត្តទ្រឹស្តីរពឹសដៃផ្ទៃឆ្អែតថែមទៀតផង ៕

បោះពុម្ព អ៊ីម៉េល

ឧបករណ៍រឿង

	ស្តាប់សំឡេង
	ថតសំឡេង
	អ៊ីម៉េល
	ព្រឹត្តិបត្រព័ត៌មាន
	បោះពុម្ព