បច្ចេកទេសដាំបន្លែប្លែកៗ ដោយមិនមានប្រើជាតិដី គឺដាំតែពីលើអេប៉ុង ដែលជក់ទឹក ឬដាំនៅលើប្រព័ន្ធទុយយោទឹក ក៏អាចធ្វើឲ្យបន្លែស្លឹកនោះផ្ដល់ចំណូលបានច្រើនដែរ។
អ្នកជំនាញកសិកម្មពីមួយថ្ងៃទៅមួយថ្ងៃ បានស្រាវជ្រាវបង្កើតបច្ចេកទេសថ្មីៗ ដើម្បីជំរុញដល់ការដាំដុះជាអាជីវកម្មខ្នាតតូច ធានាសុវត្ថិភាព ស្បៀងអាហារ។ ការដាំបន្លែបង្ការនាសម័យចុងក្រោយនេះ ទោះបីតំបន់គ្មានដីក៏ដោយ ឲ្យតែមានទឹកក៏អាចដាំបន្លែបានដែរ។
លោក ម៉ាន់ សុផល រស់នៅភូមិថ្មី ឃុំតាខ្មៅ ស្រុកតាខ្មៅ ខេត្តកណ្ដាល។ លោកជាអ្នកនាំចូលនូវបច្ចេកទេសដាំបន្លែលើបំពង់ទឹកយកមកពីប្រទេសថៃ ដោយមិនមានប្រើដីក្នុងការដាំដុះឡើយ។
លោកជម្រាបជូនថា ការដាំបន្លែលើទឹក មិនរើសទីតាំងសម្រាប់ដាំទេ។
វត្ថុសម្រាប់ដាំបន្លែលើប្រព័ន្ធទឹក ដូចជាទុយយោមានចោះរន្ធស្រាប់ អេប៉ុង កញ្ច្រែងជ័រ ជីឈ្មោះអាបេ ដែលផលិតនៅប្រទេសថៃ៖ «ការដាំបន្លែលើទឹក បើប្រើធៀបការដាំបន្លែលើដី គឺគ្រាន់តែវាងាយស្រួលជាងការដាំលើដី។ ឧទាហរណ៍៖ បើសិនផ្ទះនៅភ្នំពេញ ដែលចាក់សាប រៀបការ៉ូអស់ អត់មានទីធ្លា អត់មានដីសម្រាប់ដាំ យើងអាចដាំបន្លែបាន ដោយសារការដាំលើប្រព័ន្ធទឹក»។
លោកបន្តថា ការដាំបន្លែលើប្រព័ន្ធទឹក មុនដំបូងត្រូវរៀបកន្លែងដាំ ដូចជាទិញទុយយោ មានមុនកាត់ទំហំ ៧៥សង់ទីម៉ែត្រ ទិញអេប៉ុង ដូចអេប៉ុងលាងចានឆ្នាំង មកកាត់ជាកង់ៗ រាងបួនជ្រុងស្មើ យកទំហំ ២សង់ទីម៉ែត្រក្នុងមួយកង់។ កាត់រួចយកវាទៅដាក់ពីលើថាសរាបស្មើ ចាក់ទឹកក្នុងថាសនោះទុកឲ្យអេប៉ុងបឺតយកទឹកពីថាសឲ្យសើមល្មម។ ចំណែកទុយយោ ត្រូវចោះរន្ធយកទំហំប៉ុនពែងតែ ទុកគម្លាតពីរន្ធមួយទៅមួយប្រវែងចំអាម។ បន្ទាប់មកយកទុយយោទៅរៀបជាធ្នើរ ចងដូចស្នួហាលខោអាវ ទើបបញ្ចូលទឹកទៅក្នុងទុយយោ ឲ្យទឹកវារត់ស្មើក្នុងទុយយោនោះ។
លោក ម៉ាន់ សុផល៖ «ការដាំលើទឹក ទី១ ការសាបឬបណ្ដុះ។ មុនដំបូងយើងបណ្ដុះនៅលើថាសប្រើអេប៉ុង យើងដាក់គ្រាប់ពូជនៅក្នុងអេប៉ុង។ ក្នុងអេប៉ុងមួយ យើងដាក់ ១គ្រាប់។ អេប៉ុងកែច្នៃ បើសិននៅយើង គេអត់មានម៉ាស៊ីនកាត់ ប៉ុន្តែយើងអាចកែច្នៃ យកមកកាត់ឲ្យទំហំវាអាចថា ១ហ៊ុនកន្លះបួនជ្រុង តែបើសិនអេប៉ុងទិញពីគេមក គេកាត់ហើយស្រាប់ យើងគ្រាន់តែយកមកបេះ យើងយកពូជសាលាដនឹងដាក់មួយគ្រាប់ៗទៅក្នុងអេប៉ុងហ្នឹង ច្របាច់ឲ្យវាជក់ទឹក យើងយកក្រណាត់គ្រប ២យប់២ថ្ងៃវាដុះហើយ យើងបកក្រណាត់ចេញ បន្ទាប់ពីហ្នឹងមក ១ថ្ងៃទៀតយើងយកទៅបង្ហាញពន្លឺថ្ងៃ ដើម្បីឲ្យវាឈ្នះកម្ដៅថ្ងៃ កុំឲ្យវាដាំទៅ វាចាញ់កម្ដៅថ្ងៃ»។
វិធីបណ្ដុះគ្រាប់ពូជត្រូវយកគ្រាប់ពូជបន្លែដែលចង់ដាំទៅកប់ក្នុងអេប៉ុង មានទឹកជក់ក្នុងនោះស្រាប់។ កប់រួចយកក្រណាត់សើមទៅគ្របពីលើ ទុកវាចោល ២ថ្ងៃ។ បើក្រណាត់គ្របពីលើស្ងួត ត្រូវបាញ់ទឹកពីលើក្រណាត់ ដើម្បីឲ្យវាសើមល្មម។ ក្រោយពីផ្អាប់គ្រាប់ពូជ ក្នុងអេប៉ុងបាន ៤៨ម៉ោង បើកក្រណាត់គ្របពីលើវាចេញ មើលគ្រាប់ពូជ វាដុះក្នុងអេប៉ុងនោះ ទើបយកវាទៅហាលពន្លឺថ្ងៃ នៅពេលព្រលឹម ដើម្បីឲ្យកូនបន្លែទទួលកាំរស្មីព្រះអាទិត្យ នៅពេលព្រឹក។
លោក ម៉ាន់ សុផល៖ «ទី១ បើសិនជាកូនបន្លែវាខ្ចី យើងអាចគ្រាន់តែបង្ហាញ ពេលព្រឹក១ម៉ោង ឬ ២ម៉ោងអ៊ីចឹង ពេលដែលក្តៅខ្លាំងយើងយកមកចូលម្លប់វិញ ឲ្យកូនហ្នឹងវាបានអាយុ ៥ថ្ងៃមានកម្លាំងហើយ ពេលហ្នឹងចាំយើងដាក់ពីព្រឹកដល់ល្ងាច ហើយគ្រាន់តែបាញ់ទឹកឲ្យសើមធម្មតាទៅ។ អាយុវាគ្រប់ ៧ថ្ងៃ ទៅ ១០ថ្ងៃ មើលឫសវាចេញផុតពីអេប៉ុងមក ពេលនោះយើងចាប់អេប៉ុងមួយទៅដាក់ក្នុងកញ្ច្រែងខ្មៅសម្រាប់ដាំ ហើយពេលនោះបានយើងរៀបចំប្រព័ន្ធទឹកនៅលើទុយយោនោះហើយបានយើងដាំនៅពីលើប្រព័ន្ធទឹកនោះជាការស្រេច។ បំពង់ទុយយោដែលយើងរៀបចំហើយ យើងអាចនិយាយថាថ្នាល។ ប្រភេទកញ្ច្រែងត្រូវដាំហ្នឹង គឺវាធ្លុះៗនិយាយទៅមានសាច់ខ្លះសម្រាប់តែទប់អេប៉ុងទេ តាមពិតអាចថា ឲ្យវាលនៅបាតកញ្ច្រែង»។
នៅពេលដែលឫសបន្លែដុះកាត់អេប៉ុងវែង ហើយការដុះឫសរបស់វាបានអាយុពី ៧ ទៅ ១០ថ្ងៃ គេលើកអេប៉ុងទៅដាក់ក្នុងកញ្ច្រែងជ័រដែលធ្លុះបាត ទើបយកកញ្ច្រែងជ័រនោះទៅដាក់ចូលក្នុងទុយយោទឹកដែលបានរៀបចំទុករួចនោះ៖ «ពីថ្ងៃបណ្ដុះប្រភេទសាលាដពូជយកមកពីបរទេស ពីថ្ងៃបណ្ដុះរហូតដល់ប្រមូលផល អាយុវា៤០ ទៅ ៤៥ថ្ងៃ យើងប្រមូលផលហើយ។ បើសិនប្រភេទស្ពៃខ្មៅ ស្ពៃក្រញាញ់របស់ខ្មែរយើង ពីថ្ងៃបណ្ដុះមកប្រមូលផល អាយុវា ២៥ មិនលើស ៣០ថ្ងៃទេ ហើយការបណ្ដុះពីថ្ងៃទី១ ដល់យើងដាំហ្នឹង មួយអាទិត្យទៅ ១០ថ្ងៃ ពេលនោះយើងអត់មានប្រើសារធាតុជីចិញ្ចឹមអីទេ យើងគ្រាន់តែបណ្ដុះជាមួយទឹកស្អាតយើងធម្មតា។ បន្ទាប់មកពេលយើងដាំបានលាយជាមួយជីឈ្មោះ អាបេ។ យើងលាយដាក់ក្នុងធុង ហើយយើងប្រើម៉ូទ័រមួយឲ្យវាបូមទៅបូមមកនៅក្នុងប្រព័ន្ធទុយយោទឹកហ្នឹង គិតពីថ្ងៃយើងដាំមកដល់ប្រមូលផលវា ១ខែ បូកយើងបណ្ដុះ ១០ថ្ងៃទៀតវា៤០ថ្ងៃ»។
ការថែទាំត្រូវដាក់ជីអាបេ ក្នុងទឹកទុយយោ បើទឹក ១០លីត្រ ត្រូវលាយជីអាបេ ៣០សេសេ អាចដាក់ជីទៅតាមទំហំថ្នាល និងចំនួនគុម្ពដែលមានក្នុងទុយយោនោះ។ ចំពោះការដាក់ជីចិញ្ចឹមដើមសាលាដ គឺដាក់តែម្ដង ចាប់ពីសាលាដដុះបាន ១៥ថ្ងៃ រហូតដល់ពេលប្រមូលផល ៤០ ទៅ ៤៥ថ្ងៃ។
ការថែទាំសត្វបំផ្លាញ គឺការដាក់មុងដែលការពារកុំឲ្យសត្វចូលទៅទិចស្លឹកសាលាដ និងការពារស្រមោចកុំឲ្យវាស៊ីគ្រាប់ពូជកំពុងបណ្ដុះជាការស្រេច៖ «និយាយទៅការដាំបន្លែអត់ប្រើដីនេះ ទី១ យើងរាងពិបាកថែកូន ពេលដែលយើងបណ្ដុះបន្តិច។ ពេលដែលយើងបណ្ដុះហើយ យើងយកទៅដាំក្នុងប្រព័ន្ធទុយយោ ការថែទាំវាងាយ ដោយសារការដាំបន្លែអត់ប្រើដីនេះ ទី១ យើងអត់ស្រោចទឹក ទី២ អត់មានសត្វល្អិត យើងអត់ភ័យព្រួយរឿងបាញ់គីមីសម្លាប់សត្វល្អិត ហើយទី៣ ពេលដែលយើងប្រមូលផលហើយ យើងគ្រាន់តែសំអាតថ្នាលឲ្យស្អាត ប្ដូរទឹកជីរាល់ពេលដាំម្ដង យើងត្រូវដូរទឹកចោល លាង ហើយលាយជីសាថ្មី។ ដើម្បីឲ្យមានអុកស៊ីហ្សែនខ្លះ នៅក្នុងបំពង់ទុយយោដាំហ្នឹង ទី១ បើសិនបណ្ដោយថ្នាលត្រឹមតែ ៨ម៉ែត្រ មិនចាំបាច់បង្កើតអុកស៊ីហ្សែនទេ។ បើសិនបណ្ដោយលើស ១២ម៉ែត្រ យើងត្រូវបង្កើតអុកស៊ីហ្សែន តាមទុយយោ ហើយមួយទៀតដើម្បីឲ្យបន្លែធំធាត់លឿន ខ្ញុំមានធ្វើដេវ៉ូនៅកន្លែងទឹកចេញ»។
ចំពោះការកម្ចាត់សត្វស្រមោចពីបន្ថែសាលាដ ត្រូវយកថ្នាំជក់ ១គីឡូ លាយទឹក ២០លីត្រ យកទៅស្ងោឲ្យពុះ ចេញជ័យថ្នាំច្រើន ទើបទុកឲ្យវាត្រជាក់ ច្រោះវាឲ្យស្អាតយកទឹកនោះទៅបាញ់ពីក្រោមស្លឹកសាលាដ។ បើមានស្រមោចរោមលើស្លឹក បាញ់ពីលើស្លឹកសាលាដ ក៏វាមិនខូចសាលាដទេ គឺថ្នាំនោះវាបណ្ដេញសត្វ និងមិនប៉ះពាល់សុខភាពអ្នកទទួលទានសាលាដនោះទេ។
លោក ម៉ាន់ សុផល៖ «តាមធម្មតាសត្វល្អិត មិនជាមានអីទេ បើសិនមានដូចជាស្រមោច។ វិធីកម្ចាត់ងាយៗ ដូចជាថ្នាំជក់ បារីអី ខ្ញុំបញ្ជាក់ថា ក្នុង១គីឡូថ្នាំជក់ យើងលាយទឹក ២០លីត្រ យកទោដាំឲ្យពុះមែនទែន ហើយយើងយកមកទុកឲ្យត្រជាក់ ដល់ពេលទុកឲ្យត្រជាក់ហើយ យើងត្រងវាឲ្យស្អាត យកទៅបាញ់នៅលើថ្នាលហ្នឹង បាញ់ឲ្យសព្វ កម្ចាត់ប្រភេទសត្វល្អិត ដូចជាស្រមោចបានរយៈពេល១ខែ។ ហើយថ្នាំជក់ យើងអត់គីមីដោយសារចាស់ៗ គាត់យកមកហូបបារី យើងអាចបាញ់ភ្លាមទៅ ដកហូបបានភ្លាម អត់ពាក់ព័ន្ធគីមីអីទេ ហើយការថែទាំ បើសិនយើងដាក់ដាំនៅក្នុងថ្នាលហើយ យើងព្យាយាមយ៉ាងម៉េចឲ្យទឹកក្នុងទុយយោត្រជាក់ ហើយនិងកាត់បន្ថយកម្ដៅពេលដែលវាក្តៅ»។
ប្រសិនបើលោកអ្នកនាង មានចំណាប់អារម្មណ៍ចង់ដាំបន្លែលើប្រព័ន្ធទុយយោទឹក ឬចង់ចេះបន្ថែម សូមទាក់ទងលោក ម៉ាន់ សុផល តាមរយៈទូរស័ព្ទលេខ ០១១ ៩៩ ៩៨ ៨០ និងលេខ ០៩៧ ៣៣ ៤០ ៩៩៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។