របៀបផលិតថ្នាំពុលពីវត្ថុធាតុដើមធម្មជាតិបណ្ដេញសត្វល្អិត
2014.08.24
នៅពេលដែលរដូវរាំងស្ងួតអូសបន្លាយយូរខែ ដំណាំស្រូវតែងតែសំបូរសត្វល្អិតយាយី។ កសិករជាច្រើននាំគ្នាទិញថ្នាំគីមីមកបាញ់សម្លាប់សត្វទាំងនោះចេញពីដើមស្រូវ។ ប៉ុន្តែសារធាតុគីមីនោះធ្វើឲ្យប៉ះពាល់ច្រើនដល់ជីវចម្រុះក្នុងដី និងសត្វមានប្រយោជន៍ការពារស្រូវ និងបង្កកំណើតស្រូវ។ ដើម្បីឲ្យដីស្រែល្អមានជីវចម្រុះ សត្វល្អិតមានប្រយោជន៍និងជួយការពារដើមស្រូវកសិករគួរប្ដូរទៅប្រើថ្នាំពុលធម្មជាតិជំនួសវិញ។
កសិករ រស់ ម៉ៅ នឹងបង្រៀនពីរបៀបផលិតថ្នាំពុលពីវត្ថុធាតុដើមធម្មជាតិបណ្ដេញសត្វល្អិតមានក្រា និងដង្កូវពីដើមស្រូវ។
ជារឿយៗកសិករតែងតែជួបការលំបាកដោយសារសត្វល្អិតបំផ្លាញស្រូវក្នុងស្រែ នារដូវវស្សា ជាពិសេសក្នុងពេលដែលអាកាសធាតុផ្លាស់ប្ដូរធ្វើអោយតំបន់ធ្វើស្រែមួយចំនួនខ្វះទឹក និងស្រែតាមតំបន់មាត់ទន្លេមួយចំនួនត្រូវទឹកជន់លិច។
កសិករ រស់ ម៉ៅ នៅភូមិចមពល ឃុំតាភេម ស្រុកត្រាំកក់ ខេត្តតាកែវ ស្ទាត់ជំនាញផលិតថ្នាំពុលពីធម្មជាតិ បានថ្លែងលើកទឹកចិត្តកសិករកុំឲ្យអស់សង្ឃឹមត្រូវខំប្រមូលវត្ថុធាតុដើមពីធម្មជាតិ មកផលិតថ្នាំបង្ក្រាបសត្វស៊ីស្រូវ៖ «ខ្ញុំធ្លាប់ពិសោធន៍មើល បើយើងប្រើថ្នាំពុលគីមីច្រើន ប្រើដល់ណាគឺអាសត្វបំផ្លាញគីវាកើតដល់ហ្នឹង។ បើប្រើច្រើនណាស់ សត្វនឹងកាន់តែកើតច្រើនណាស់ ដោយសារតែគេបញ្ចូលសារធាតុគីមីចូលក្នុងហ្នឹងហើយៗ។ ឥឡូវបើមិត្តអ្នកស្ដាប់មិនជឿខ្ញុំ បើមានសំបកកំប៉ុងថ្នាំពុលប្រើពីយូរហើយ កំប៉ុងដឺរ៉ា បើមាននៅសល់បងប្អូនជីកដីត្រឹម ៣តឹក រួចយកចំបើង ឬស្រកីដូងដាក់ចូលក្នុងហ្នឹងឲ្យពេញ ចាក់ទឹកចូលបន្តិច ដាក់ថ្នាំនឹងបន្តិច ហើយលុបដីទៅ ៥ថ្ងៃទៅ ១អាទិត្យ ទៅកាយមើលគឺដង្កូវពេញទាំងអស់។ អ៊ីចឹងគេធ្វើឲ្យបាត់មួយភ្លែតតែវាធ្វើឲ្យកើតច្រើន បានន័យថា យើងបាញ់ភ្លាម គឺបាត់ ហើយងាប់អស់រលីង ប៉ុន្តែបាញ់ងាប់ ១ប៉ុន្តែកើត៧»។
ក្រោយពីលោក រស់ ម៉ៅ បង្ហាញពីផលវិបាកនៃការប្រើប្រាស់សារធាតុគីមីក្នុងការកម្ចាត់សត្វល្អិតយាយីដំណាំស្រូវមក លោកក៏បានណែនាំឲ្យផលិតថ្នាំពុលធម្មជាតិ ប្រើក្នុងការបណ្ដេញសត្វក្រា និងដង្កូវពីដំណាំស្រូវ៖ «ហើយថ្នាំផ្សំពីរុក្ខជាតិនេះ បើនិយាយទៅវាមិនមែនដាក់ទៅបាត់ដូចរបស់គេទេ ប៉ុន្តែដាក់ទៅគេហៅថា បណ្ដេញ ដល់ពេលយូរទៅគឺវាលែងស៊ីហើយ។ ដូចខ្ញុំរាល់ថ្ងៃនេះ មិនមែនថា ត្រឹមដំណាំស្រូវទេ ដំណាំនៅក្នុងផ្ទះខ្ញុំទាំងអស់ គឺអត់មានដង្កូវស៊ីទេ អត់មានក្រា ហើយអត់មាន កណ្ដាំ ចៃ នោះទេ ដោយសារអីខ្ញុំអត់ប្រើគីមី ដល់យូរៗទៅវាបាត់អស់ គឺវាអត់មាន»។
លោក រស់ ម៉ៅ បន្តថា វិធីផ្សំថ្នាំពុលពីរុក្ខជាតិសម្រាប់ប្រើប្រាស់លើដំណាំស្រូវ បណ្ដេញដង្កូវមូរស្លឹក សម្លាប់ដង្កូវដួងក្នុងដើមឈើ បណ្ដេញ ចៃ ឬកណ្តាំ ឬង៉ម ពីបន្លែ និងបណ្ដេញសត្វទិច ផ្លែឈើ ត្រូវប្រមូលវត្ថុធាតុដើមពីរុក្ខជាតិយកមកផ្សំ ដូចជា សំបកស្តៅ ១គីឡូ មើមល្មៀត ២ខាំ មើមខ្ទឹមស ២ខាំ ម្ទេសទុំ២ខាំ ទឹកនោមសត្វ ៥លីត្រ លាមកមេគោស្រស់ ១គីឡូ ទឹក ៥លីត្រ៖ «វិធីធ្វើ យើងយកសំបកស្ដៅ ឬមួយស្លឹកស្តៅបុកវាឲ្យម៉ត់ទុកមួយអន្លើ បន្ទាប់មកយើងយកខ្ទឹម ល្មៀត ហើយនិងម្ទេស គឺបុកឲ្យម៉ត់ បុកហើយបានយើងយកសារធាតុទាំងអស់ហ្នឹងមក យកមកដាក់ក្នុងធុង ទើបយកទឹក ៥លីត្រ ទឹកនោមគោ ៥លីត្រ អាចម៍គោ ១គីឡូ យើងយកដល់ដាក់ចូលគ្នាហើយបានយើងកូរៗ បញ្ចូលគ្នាហើយ ទុកបានរយៈពេល ១៥ថ្ងៃ ហ្នឹងគឺប្រើបានហើយ»។
វិធីទី១
ប្រើទឹកថ្នាំពុលផ្សំបានបាញ់បណ្ដេញដង្កូវមូរស្លឹកស្រូវ គឺយកទឹកមេថ្នាំ ១លីត្រ លាយទឹកធម្មតា ៣លីត្រ បាញ់បណ្ដេញសត្វល្អិតស៊ីស្រូវ មានដង្កូវស៊ីស្លឹក ដង្កូវមូរស្លឹក ដង្កូវយោលដៃ ដង្កូវយោលទោង ជាដើម៖ «សុំបញ្ជាក់ថា ដង្កូវមូរស្លឹកហ្នឹង បើយើងបាញ់ដំណាំស្រូវវិញ គឺយើងត្រូវការយករពាក់ដូចជាបន្លាអីផ្សេងៗ យើងយកមកអូសវាសិន ព្រោះអាហ្នឹងវាមានសំបុកវា វាមូរនៅក្នុងហ្នឹងហើយ កាលណាយើងបាញ់ថ្នាំ វាអត់ចេញ គឺវាអត់ងាប់ទេ។ អ៊ីចឹងគឺយើងត្រូវអូសវាសិន អូសដើម្បីឲ្យវាបែកចេញពីសំបុកវាសិន ហើយបានយើងបាញ់ថ្នាំ។ បើបាញ់ស្រូវហ្នឹង គឺសុំហាមបន្តិច គឺថាធ្វើម៉េចយើងស្លៀកខោវែង ហើយពាក់ម៉ាស់ផង ដោយសារអី? គឺវាអត់ប៉ះពាល់អីទេ ប៉ុន្តែអាពពូកហ្នឹងវាសុទ្ធតែជាតិក្តៅ ដូចជាម្ទេសអីហ្នឹងតែប៉ះភ្លៅអី វារលាក អ៊ីចឹងយើងសុំការពារប៉ុណ្ណឹង»។
វិធីទី២
ប្រើទឹកថ្នាំពុលធម្មជាតិផលិតបាននេះ បាញ់បណ្តេញសត្វទិចដំណាំលោក រស់ ម៉ៅ ឲ្យដឹងថា សត្វទិចដំណាំគឺវាធ្វើឲ្យដើមដំណាំ មានពណ៌អុចខ្មៅៗ ដើមស្រូវអន់ ហើយខ្លោចដើម។ វិធីប្រើត្រូវយកទឹកមេថ្នាំ ១លីត្រ លាយទឹកធម្មតា ៣លីត្រ លាយបន្ថែម ស្លឹកក្រូចសើច ២ ទៅ ៣ខាំ បុកឲ្យម៉ត់ ច្រោះកាកចេញ យកទឹកក្រូចសើចទៅលាយជាមួយទឹកល្បាយថ្នាំពុល បាញ់បណ្តេញសត្វទិច គឺសត្វទិចចាញ់ក្លិន វាអត់ទិចដំណាំស្រូវ និងបន្លែមានផ្លែនោះទៀតទេ។ ល្បាយទឹកថ្នាំពុល មានលាយស្លឹកក្រូចសើចនេះ អាចបាញ់សម្លាប់ដួងស៊ីដើមឈើ ដូចជាដង្កូវដួងក្នុងដើមធុរេន ដើមស្វាយ ដើមខ្នុរ គឺបាញ់ទៅដង្កូវដួង វាងាប់ដែរ។
លោក រស់ ម៉ៅ៖ «អ៊ីចឹងបើវាស៊ីស្វាយ ស៊ីខ្នុរ ដួងស៊ី យើងធ្វើម៉េចយើងចោះ យើងយកកាំបិតកាប់វាឲ្យឃើញរន្ធវាហ្នឹងហើយ យើងយកអាថ្នាំយើង បាញ់មានសឺរ៉ាំង មានអីហ្នឹង បាញ់បញ្ចូលក្នុងហ្នឹងហើយ បានយើងយកអាចម៍គោស្រស់ និងភក់លាយទឹកតិចៗ ហើយយកមកប៉ាតវិញមក គឺវាងាប់អស់ហើយ ដួងហ្នឹង ហើយដើមឈើវាដុះសាច់ជិតវិញ។ បទពិសោធន៍នេះ គឺខ្ញុំធ្វើទៅបានជោគជ័យច្រើនណាស់»។
វិធីទី៣
ប្រើទឹកថ្នាំពុលបណ្ដេញចៃ ឬកណ្តាំ ឬង៉ម និងទាកគូ។ លោក រស់ ម៉ៅ ឲ្យដឹងថា សត្វល្អិតទាំងនេះវាមានស្រោមការពារខ្លួនវា បើថ្នាំពុលធម្មតាបាញ់សម្លាប់វា គឺមិនងាយមានប្រសិទ្ធភាពទេ។ ដើម្បីឲ្យការបាញ់ថ្នាំបំពុលសត្វទាំងនោះ មានជោគជ័យ លោកឲ្យយកទឹកថ្នាំពុល១លីត្រ លាយទឹកធម្មតា ៣លីត្រ លាយសាប៊ូម្សៅ ១ស្លាបព្រាបាយ។ កូរចូលគ្នាឲ្យសព្វ យកទៅបាញ់សត្វនោះ នៅពេលមេឃមិនមានកម្ដៅថ្ងៃទើបទឹកល្បាយមានប្រសិទ្ធភាពលើសត្វល្អិតយាយីដំណាំ។
លោក រស់ ម៉ៅ៖ «ក្នុងស្រូវ ១ហិកតារ ត្រូវបាញ់ ៤០០លីត្រថ្នាំពុល បើយើងលាយ១ និង ៣ វាឡើង ១.២០០លីត្រហើយ នេះបាញ់ក្នុង ១ហិកតារ។ បើបងប្អូនចង់បែងចែកជាអារ ជាការ៉េអី គឺបែងចែកតាមនោះទៅ ហើយបាញ់តាមរូបមន្តហ្នឹង។ ៤០០លីត្រលីត្រ គឺយើងបាញ់មួយអាទិត្យមិនមែនបាញ់ម្តងទេ គឺបាញ់មួយអាទិត្យ។ ១អាទិត្យនេះគឺបាញ់ឲ្យបាន ២ ទៅ ៣ដង ព្រោះថា ថ្នាំនេះកាលណាយើងបាញ់ហើយ ស្រាប់តែអត់បាត់ បងប្អូនយកទៅបាញ់កន្លះខែអី បានបាញ់ម្តង ហើយលែងប្រើទៀត អាហ្នឹងគឺអត់មានប្រសិទ្ធភាពទេ យើងធ្វើម៉េចព្យាយាមឧស្សាហ៍ ហើយបើមិនបាត់ទេ អាហ្នឹងជួយថ្នាំមួយទៀតបានវាឆាប់ គឺបាតដៃយើងហ្នឹង ជួយបេះផង ជួយបូតអីផងទៅ អាហ្នឹងវាបាត់ហើយ»។
លោកណែនាំពីវិធីបាញ់ថ្នាំពុលលើដំណាំស្រូវ ត្រូវមើលទឹកក្នុងស្រែ បើមានទឹកច្រើន ត្រូវបង្ហូរទឹកនោះចេញសិន ចាំបាញ់ថ្នាំពុលនោះទៅ ទើបមានប្រសិទ្ធភាព។ វិធីផ្សំថ្នាំពុលកម្ចាត់ក្រា វត្ថុធាតុដើមផ្សំ គឺប្រេងកាត កន្លះស៊ី មើមខ្ទឹមស ២ខាំ ម្សៅសាប៊ូ ១ស្លាបព្រា៖ «វិធីធ្វើគឺយើងយកខ្ទឹមហ្នឹងបកសំបកវាចេញ ហើយបុកឲ្យម៉ត់ បន្ទាប់មកយើងយកប្រេងកាតកន្លះស៊ីហ្នឹង យកខ្ទឹមទៅញាត់ចូលដបទឹកសុទ្ធ កូរក្រឡុក ធ្វើម៉េចឲ្យសព្វ។ ក្រឡុកឲ្យបាន ៥នាទី ហើយកូរឲ្យបាន ៥នាទី កូរទៀតទៅ ធ្វើម៉េចឲ្យសព្វ ព្រោះថា ជាតិប្រេងនិងទឹកវាអត់ងាយចូលគ្នាទេ យើងទុកវាឲ្យបានរយៈពេល ២៤ម៉ោងប្រើបានហើយ»។
វិធីប្រើថ្នាំពុលកម្ចាត់ក្រា
ត្រូវយកវត្ថុផ្សំបានទៅច្រោះនឹងក្រណាត់ស យកទឹកនោះលាយទឹកធម្មតា ១លីត្រ ហើយថែមសាប៊ូម្សៅ ១ស្លាបព្រាបាយទៀត។ កូរចូលគ្នាឲ្យសព្វ មិនមានថែមទឹកទៀតទេ ទើបយកទៅបាញ់លើដំណាំដែលមានស្លឹកក្រាស់ ដូចជាទៀប ក្រូច មៀន ដែលមានក្រាស៊ី។ យកទឹកនោះទៅបាញ់ សត្វក្រាឆាប់ងាប់ ព្រោះចាញ់ក្លិនប្រេងកាត និងខ្ទឹម ហើយពុលនឹងសាប៊ូ។ ប៉ុន្តែបើយកទឹកថ្នាំពុលបាញ់លើស្លឹកសណ្ដែកកួរ ម្ទេស ជាដើម យកទឹកថ្នាំពុលនោះទៅលាយទឹកធម្មតា ៥លីត្រទៀត ទើបយកល្បាយនោះទៅចាញ់បន្ថើរៗពីលើសត្វក្រាកំពុងរោម។ លោកថា ថ្នាំពុលលាយប្រេងកាត និងសាប៊ូ ហាមបាញ់លើបន្លែហូបស្លឹក ដូចជាស្ពៃ ស្លឹកខ្ទឹម ជាដើម នាំឲ្យស្លឹកវាខ្លោច និងមិនអាច
ទទួលទានបាន។
ប្រសិនបើលោកអ្នកនាងចង់ចេះបន្ថែម សូមទាក់ទងលោក រស់ ម៉ៅ តាមទូរស័ព្ទដៃគាត់មានលេខ ០១៧ ៦៥ ៩៧ ៧៥ និងលេខ ០៩៧ ៥២ ៩៥ ២៨៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ