អាស៊ានទទួលស្គាល់សារសំខាន់នៃវិស័យឯកជន គឺជាការធានាភាពជោគជ័យលើការអនុវត្តកម្មវិធីសហប្រតិបត្តិការផ្សេងៗ នៅក្នុងតំបន់អាស៊ាន។ វិស័យឯកជនត្រូវបានគេចាត់ទុកជាក្បាលម៉ាស៊ីន នៃកំណើនសេដ្ឋកិច្ចអាស៊ាន និងក្នុងដំណើរការអភិវឌ្ឍសេដ្ឋកិច្ចអាស៊ាន។ ប៉ុន្តែរាជរដ្ឋាភិបាលកម្ពុជា ហាក់យកចិត្តទុកដាក់តិចតួចលើវិស័យនេះ។
ការអភិវឌ្ឍវិស័យឯកជនដែលផ្ដោតលើសហគ្រាសខ្នាតតូចនិងមធ្យម បានក្លាយជា កម្លាំងមួយសម្រាប់ធានាកំណើនសេដ្ឋកិច្ចនៅក្នុងរង្វង់អាស៊ាន និងការបង្កើតការងារ។ តាមរយៈសក្ដានុពលនេះ ប្រទេសសមាជិកទាំងអស់បានកំពុងប្រឹងប្រែងអភិវឌ្ឍយកចិត្តទុកដាក់ខ្ពស់ដើម្បីទប់ស្កាត់ការធ្លាក់ចុះវិស័យឯកជន។ បញ្ហានេះក្រុមអ្នកជំនួញនៅប្រទេសសមាជិកអាស៊ានទាំងអស់ បានជួបប្រជុំពិភាក្សាជាច្រើនលើកដើម្បីស្វែងការគាំពារពីថ្នាក់ដឹកនាំប្រទេសនីមួយៗ និងជៀសវាងការប្រកួតប្រជែងដោយមិនស្មើភាពគ្នា។ ការស្វែងយន្តការ ការពារចំពោះវិស័យឯកជន គឺជាគ្រឹះយ៉ាងសំខាន់ដើម្បីជំរុញការអភិវឌ្ឍសេដ្ឋកិច្ចរបស់ប្រទេសសមាជិកអាស៊ានដែលមានការអភិវឌ្ឍទាបទៅជាសេដ្ឋកិច្ចដែលមានកំណើនខ្ពស់ ស្របតាមតាមផែនការនៃ សមាហរណកម្មសេដ្ឋកិច្ច ដែលគ្រោងនឹងបង្កើតជាសហគមន៍តែមួយនៅឆ្នាំ២០១៥។
រដ្ឋលេខាធិការនៃក្រសួងឧស្សាហកម្មនិងសិប្បកម្ម លោក ហេង សុខគុណ មានប្រសាសន៍នៅក្នុងកិច្ចពិភាក្សាលើការរៀបចំយុទ្ធសាស្ត្រអភិវឌ្ឍវិស័យសហគ្រាសនៅក្រោយឆ្នាំ២០១៥ នៅខេត្តសៀមរាប នៅថ្ងៃទី២៥ វិច្ឆិកា ថា ការបង្កើតពិភាក្សានេះ គឺជាការស្វែងរកការឆ្លើយតបរបស់វិស័យឯកជន ដើម្បីរៀបចំផែនការជាក់លាក់មួយក្នុងការការពារវិស័យឯកជន នៅពេលដែលអាស៊ានបង្កើតជាតំបន់តែមួយនៅឆ្នាំ២០១៥។
លោកបញ្ជាក់ថា ភាពរីកចម្រើននៃវិស័យសហគ្រាសខ្នាតតូចនិងមធ្យម បានមកបីបរិយាកាសវិនិយោគមានភាពប្រសើរឡើង និងការកើនឡើងនៃសមត្ថភាពផលិត។ ការអភិវឌ្ឍកត្តាទាំងពីរនេះ គឺជាភាពចាំបាច់របស់សហគ្រាសផលិតកម្មទាំងអស់ត្រូវពង្រឹងនៅក្នុងបរិបទនៃការប្រកួតប្រជែងនៅកម្រិតតំបន់។ ការបង្កើតសហគមន៍សេដ្ឋកិច្ចអាស៊ាន នឹងផ្ដល់ឱកាសសម្រាប់ផ្នែកឯកជន និងឧស្សាហកម្មនៅតំបន់នៅឆ្នាំ២០១៥។
កិច្ចប្រជុំនោះបានសន្និដ្ឋានយុទ្ធសាស្ត្រសំខាន់ ៥ សម្រាប់រៀបចំផែនការអភិវឌ្ឍវិស័យសហគ្រាសនៅក្រោយឆ្នាំ២០១៥។ ទីមួយ ការបង្កើនផលិតភាពផលិតកម្មបច្ចេកវិទ្យា និងការស្រាវជ្រាវបង្កើតផលិតផលថ្មី ទីពីរ លទ្ធភាពទទួលបានកម្ចីពីគ្រឹះស្ថានហិរញ្ញវត្ថុ ទីបី ការពង្រីកទីផ្សារ ទីបួន ការបង្កើនច្បាប់ និងគោលនយោបាយការពារវិស័យឯកជន និងកត្តាសំខាន់ទី៥ គឺការបង្កើនសហគ្រិនភាព រួមទាំងការអភិវឌ្ឍធនធានមនុស្ស។
ប៉ុន្តែការស្រាវជ្រាវជាច្រើនបានរកឃើញថា អាស៊ានមាន ចំណុចប្រឈមជាច្រើន ចំពោះការអភិវឌ្ឍសហគ្រាសខ្នាតតូច ដូចជាការទទួលបានឥណទាន កម្មវិធីសម្រាប់អភិវឌ្ឍជំនាញ ព័ត៌មានអំពីឧកាសវិនិយោគនិងពាណិជ្ជកម្មរវាងអាស៊ាន និងព័ត៌មាននៃការអភិវឌ្ឍសហគ្រិនភាពរវាងអាស៊ានជាដើម។ ផ្ទុយទៅ វិញ ការស្រាវជ្រាវដដែលបានលើកឡើងថា ដើម្បីអភិវឌ្ឍវិស័យសហគ្រាសខ្នាតតូច និងមធ្យមនេះ ប្រកបដោយភាពជោគជ័យ គឺប្រទេសសមាជិកអាស៊ានទាំងអស់ចូលរួមដោះស្រាយបរិយាកាសវិនិយោគ លទ្ធភាពទទួលបានឥណទាន និងភាពងាយស្រួលនៃចុះបញ្ជីរបស់សហគ្រាស។
ការរកឃើញរបស់សកលវិទ្យាល័យជាតិសិង្ហបុរី អំពីភាពប្រកួតប្រជែងអាស៊ានប្រចាំឆ្នាំ២០១២ បានបង្ហាញថា សហប្រតិបត្តិការអាស៊ានក្នុងការបង្កើនភាពប្រកួតប្រជែងសហគ្រាសធនតូចនិងមធ្យម គឺត្រូវមានផែនការសកម្មភាពជាក់លាក់មួយសម្រាប់ការអភិវឌ្ឍផ្នែកនេះ តាមរយៈការបង្កើតវិធានការដែលអាចទទួលបានឥណទានសម្របសម្រួលពាណិជ្ជកម្ម ការផ្សព្វផ្សាយ និងអភិវឌ្ឍបច្ចេកវិទ្យា និងការអភិវឌ្ឍធនធានមនុស្សជាដើម ហើយផែនការសកម្មភាពបានបង្កើតឡើងដោយក្រុមការងារសហគ្រាសធនតូច និងមធ្យមរបស់អាស៊ាន រួមទាំងដំណាងប្រទេសសមាជិក និងវិស័យឯកជនរវាងតំបន់អាស៊ាន។
របាយការណ៍ដដែលបានបង្ហាញទៀតថា សហគ្រាសខ្នាតតូចនិងមធ្យម ជាឆ្អឹងខ្នងសម្រាប់កំណើនសេដ្ឋកិច្ចអាស៊ាន ដោយសារតែជាង ៩៦% នៃសហគ្រាសសរុបរបស់អាស៊ាន បានចូលរួមបង្កើតការងារ និងចូលរួមកំណើនសេដ្ឋកិច្ចអាស៊ាន។ ម៉្យាងវិញទៀត វិនិយោគិនជាច្រើនចង់ធ្វើការវិនិយោគខ្នាតតូចនេះ ច្រើនជាងការវិនិយោគខ្នាតធំ ហើយទិសដៅសំខាន់ដែលវិនិយោគិនសម្លឹងឃើញនោះ គឺនៅក្នុងតំបន់អាស៊ាន។
ប្រធានសម្ព័ន្ធសមាគមសហគ្រាសខ្នាតតូចនិងមធ្យមកម្ពុជា លោកឧកញ៉ា តែ តាំងប៉ មានប្រសាសន៍ថា កម្ពុជានៅមានបញ្ហាលើលទ្ធភាពបង្កើនភាពប្រកួតប្រជែង នៅពេលដែលសហគមន៍សេដ្ឋកិច្ចអាស៊ានបើកចំហនៅឆ្នាំ២០១៥នោះ។ លោកបញ្ជាក់ទៀតថា ការជួយជ្រោមជ្រែងពីរាជរដ្ឋាភិបាលលើវិស័យនេះ នៅមានកម្រិតទាបនៅឡើយ បើធៀបនឹងសហគ្រាសខ្នាតធំ។
ឆ្លើយតបទៅនឹងការលើកឡើងបញ្ហានេះ រាជរដ្ឋាភិបាលកម្ពុជា ស្នើឲ្យអាជីវករនិងអ្នកធុរកិច្ចទាំងអស់ ត្រូវតែបង្ហាញភាពស្មោះត្រង់ និងការទទួលខុសត្រូវចំពោះការបង់ពន្ធជូនរដ្ឋាភិបាល។ បញ្ហានេះ លោកនាយករដ្ឋមន្ត្រី ហ៊ុន សែន ធ្លាប់បានបញ្ជាក់ថា រាជរដ្ឋាភិបាលមិនមានសមត្ថភាពលើការឧបត្ថម្ភធនឡើយ ប៉ុន្តែអ្វីដែលរាជរដ្ឋាភិបាលអាចធ្វើបាននោះ គឺការបង្កើតគោលនយោបាយគាំពារសហគ្រាសតាមរយៈនីតិវិធីបង្កើតសហគ្រាស និងការអនុគ្រោះការបង់ពន្ធ។
អ្នកវិភាគសេដ្ឋកិច្ចវិញបានលើកឡើងថា នៅបរិបទទីផ្សារកាន់តែធំដែលសម្បូរទៅដោយការប្រកួតប្រជែងនោះ និន្នាការនៃអ្នកធ្វើអាជីវកម្មគឺត្រូវធានាឲ្យមានវិមាត្រសេដ្ឋកិច្ច មានន័យថា ត្រូវធ្វើអាជីវកម្មឲ្យពង្រីកកាន់តែធំដើម្បីកាត់បន្ថយថ្លៃដើមផលិត និងបង្កើតផលិតភាព។ បច្ចុប្បន្ន វិស័យខ្នាតតូចនិងមធ្យមដែលមានផលិតភាពខ្ពស់នៅតំបន់អាស៊ាន គឺប្រទេសថៃ និងវៀតណាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។