វេជ្ជបណ្ឌិតណែនាំពីវិធីការពារការឆ្លងមេរោគផ្ដាសាយធំនៅដើមរដូវវស្សា
2017.05.18
មន្ត្រីជាន់ខ្ពស់ក្រសួងសុខាភិបាល បានអំពាវនាវឲ្យប្រជាពលរដ្ឋប្រុងប្រយ័ត្នចំពោះការឆ្លងមេរោគដែលនាំឲ្យកើតជំងឺផ្ដាសាយធំ ព្រោះរដូវភ្លៀងធ្លាក់បានមកដល់ហើយ ព្រោះថាគ្រាន់តែចូលដល់ដើមខែពិសាខ ភ្លាម គឺនៅដើមខែឧសភា នេះ ពលរដ្ឋជាង ២០០នាក់នៅស្រុកកោះញែក ខេត្តមណ្ឌលគិរី បានផ្ទុះជំងឺផ្ដាសាយធំ។ មន្ត្រីសុខាភិបាលបានចុះទៅទប់ស្កាត់បញ្ហានេះ។
តើលោកអ្នកត្រូវធ្វើដូចម្ដេចខ្លះ ដើម្បីទប់ស្កាត់ជំងឺផ្ដាសាយធំ?
នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានស្រាវជ្រាវរកឃើញថា ក្នុងប្រទេសកម្ពុជា នៅក្នុងរដូវភ្លៀង គឺជារដូវដែលនាំឲ្យឆ្លងជំងឺផ្ដាសាយច្រើន ដែលបង្កឡើងដោយមេរោគផ្ដាសាយ ដែលហៅជាភាសាអង់គ្លេសថា ស៊ីសិនណល អិនហ្លូអិនសា (Seasonal Influenza)។
ប្រធាននាយកដ្ឋានប្រយុទ្ធនឹងជំងឺឆ្លង និងជាអ្នកនាំពាក្យក្រសួងសុខាភិបាល លោកវេជ្ជបណ្ឌិត លី សូវ៉ាន់ មានប្រសាសន៍ថា រោគសញ្ញាជំងឺគ្រុនផ្ដាសាយធំ រួមមាន គ្រុនក្ដៅលើសពី ៣៨,៥អង្សាសេ មានក្អក ឬឈឺក និងករណីខ្លះអាចវិវឌ្ឍន៍ទៅជាហត់ធ្ងន់ធ្ងរ ជាដើម៖ «ត្រូវហើយខែនេះ គឺជាខែដែលបង្កឡើងដោយផ្ដាសាយធំ នៅតំបន់ត្រូពិក នៅរដូវធ្លាក់ភ្លៀងតែងតែបង្កឡើងដោយមេរោគគ្រុនផ្ដាសាយ មានគ្រុនក្ដៅអ៊ីចឹង។ យើងរកឃើញដូចករណីកោះញែក អ៊ីចឹងប៉ុណ្ណោះអត់មានប៉ះពាល់ដល់អាយុជីវិតទេ។ យើងព្យាបាលបានធូរស្បើយច្រើន ប៉ុន្តែយើងនៅតែតាមដាន»។
ទន្ទឹមនឹងគ្នានេះ លោកវេជ្ជបណ្ឌិតបានរៀបរាប់ថា ជាទូទៅ ពលរដ្ឋតែងមានការភាន់ច្រឡំថា ជំងឺផ្ដាសាយបានកើតមានឡើងតែពេលរដូវត្រជាក់ គឺពុំដូច្នោះទេ។ ផ្ទុយទៅវិញ ជំងឺផ្ដាសាយនៅរដូវត្រជាក់ គឺបណ្ដាលមកពីការផ្លាស់ប្ដូរអាកាសធាតុ នាំឲ្យរាងកាយពុំមានភាពស៊ាំ ឬហៅថាប្រតិកម្ម។ លោកវេជ្ជបណ្ឌិតពន្យល់ដូច្នេះ៖ «យើងតែងមានការយល់ច្រឡំថាផ្ដាសាយកើតឡើងនៅពេលរងា តាមពិតការសិក្សារបស់នាយកដ្ឋាន គឺផ្ដាសាយដែលបង្កមេរោគ គឺភាគច្រើនក្នុងរដូវធ្លាក់ភ្លៀង។ ចំពោះនៅរដូវត្រជាក់ដូចជានៅក្នុងខែ១២ ខែ១ ខែត្រជាក់ហ្នឹង គឺយើងពុំឃើញបង្កឡើងដោយមេរោគទេ គឺយើងមិនត្រូវនឹងអាកាសធាតុទៅវិញទេ»។
ទាក់ទងនឹងការព្យាបាលជំងឺផ្ដាសាយធំ លោកវេជ្ជបណ្ឌិត លី សូវ៉ាន់ ផ្ដល់ឱវាទថា ការព្យាបាល គឺត្រូវប្រើថ្នាំបញ្ចុះកម្ដៅ ផឹកទឹកឲ្យបានច្រើន សម្រាកឲ្យលក់ស្កប់ស្កល់ កាត់បន្ថយការហាត់ប្រាណ ទទួលទានអាហារសម្បូរជីវជាតិ ជាពិសេសវីតាមីនសេ (C)។ លោកបញ្ជាក់ថា ការប្រើថ្នាំផ្សះ គឺគ្មានប្រសិទ្ធភាពដើម្បីសម្លាប់មេរោគនេះឡើយ ថែមទាំងនាំឲ្យសុខភាពរបស់លោកអ្នកកាន់តែចុះទ្រុឌទ្រោម និងមិនងាយជាពីជំងឺផ្ដាសាយថែមទៀតផង។ ក្រសួងសុខាភិបាល មានឱសថសម្រាប់ព្យាបាលសម្លាប់មេរោគផ្ដាសាយនេះ គឺមានឈ្មោះថា តាមីហ៊្លូ (Tamiflu)។ លោកថា បើការព្យាបាល ៣ថ្ងៃមិនធូរស្រាល ឫវិវឌ្ឍន៍ទៅជាហត់ខ្លាំង សូមប្រញាប់ទៅពិគ្រោះជំងឺជាមួយគ្រូពេទ្យជាបន្ទាន់៖ «ឱសថដែលព្យាបាលតាមរោគសញ្ញា បញ្ចុះកម្ដៅញ៉ាំទឹកឲ្យបានច្រើន ឲ្យគាត់គេងឲ្យបានច្រើន បង្ការកុំឲ្យឆ្លងទៅអ្នកដទៃ។ អ្នកឈឺត្រូវពាក់ម៉ាស់ លាងជាមួយសាប៊ូ បើចាំបាច់ត្រូវផ្អាកពីការងារសម្រាកនៅផ្ទះសិនទៅ។ អ្នកដែលមិនឈឺ ត្រូវនៅឲ្យឆ្ងាយពីពួកគាត់លើសពីមួយម៉ែត្រ សំណូមពរឲ្យគាត់សម្រាកសិនចុះ បើសិនជាធ្វើការសូមឲ្យគាត់ពាក់ម៉ាស់ ការពារកុំឲ្យក្អក កណ្ដាស់ទៅអ្នកដទៃ ឧស្សាហ៍លាងដៃជាមួយសាប៊ូនឹងទឹក ដើម្បីបង្ការកុំឲ្យគាត់កាន់បង្វិលទ្វារ ឬតុ អ្នកផ្សេងទៅកាន់នឹងឆ្លងមកដែរ»។
មន្ត្រីសុខាភិបាលដដែលបានអំពាវនាវឲ្យប្រជាពលរដ្ឋប្រុងប្រយ័ត្នពីការឆ្លងជំងឺផ្ដាសាយធំ ព្រោះរដូវភ្លៀងធ្លាក់បានមកដល់ហើយ។ នេះជាស្ពតពាណិជ្ជកម្មរបស់ក្រសួងសុខាភិបាល អប់រំពីជំងឺផ្ដាសាយ។
«សំឡេងស្ពត»
នៅរដូវវស្សា ក្រសួងសុខាភិបាល តែងប្រកាសឲ្យប្រជាពលរដ្ឋប្រុងប្រយ័ត្នមូសខ្លាខាំ ខ្លាចមានជំងឺគ្រុនឈាម តែពេលនេះគឺជាករណីថ្មីដែលមន្ត្រីសុខាភិបាល កំពុងមានការព្រួយបារម្ភពីជំងឺគ្រុនផ្ដាសាយធំ។
ករណីមានអាការផ្ដាសាយ សូមប្រញាប់ទៅពិគ្រោះជំងឺជាមួយគ្រូពេទ្យ និងទទួលឱសថ ហើយបើមានករណីសង្ស័យណាមួយ សូមផ្ដល់ព័ត៌មានបន្ថែម ឬរាយការណ៍ពីជំងឺគ្រុនក្ដៅច្រើនក្នុងភូមិ ក្នុងសាលារៀន ឬកន្លែងធ្វើការ សូមទាក់ទងទៅលេខទូរស័ព្ទបន្ទាន់ ឬហតឡាញ (Hotline) ១១៥ ដើម្បីផ្ដល់ដំណឹង ឬរាយការណ៍ជូនមន្ត្រីជំនាញនៃនាយកដ្ឋានប្រយុទ្ធនឹងជំងឺឆ្លងជាប្រញាប់ ដែលលេខទូរស័ព្ទនេះ លោកអ្នកនឹងមិនអស់សេវាហៅចេញនោះទេ៕