ឯកសារនៃវិទ្យាស្ថានជាតិស្តីពីការបំពានគ្រឿងញៀននៅសហរដ្ឋអាមេរិក (National Institute on Drug Abuse) បានឲ្យដឹងថា នៅសហរដ្ឋអាមេរិកគ្រឿងញៀនខុសច្បាប់មួយប្រភេទគឺកញ្ឆា បានត្រូវគេលួចលាក់ប្រើច្រើន។
ឯកសារបន្តថា ពេលដែលគេជក់កញ្ឆានោះ គឺភ្លាមៗអ្នកជក់ចាប់ផ្តើមទទួលផលវិបាកអាក្រក់។ ផលវិបាកអាក្រក់នោះនៅជាប់ក្នុងរវាងពី១ម៉ោងទៅ៣ម៉ោង។
ចំពោះការបរិភោគអាហារដែលមានដាក់ជាតិកញ្ឆាវិញនោះ គឺអ្នកបរិភោគ មិនទាន់ទទួលផលវិបាកអាក្រក់ភ្លាមៗទេ គឺមួយរយៈពេលយូរបន្ទាប់ពីការបរិភោគទើបចាប់ផ្តើមទទួលអានុភាពនៃកញ្ឆា ក៏ប៉ុន្តែជាទូទៅវានៅជាប់យូរ។
ផលវិបាកអាក្រក់រយៈពេលខ្លីរបស់កញ្ឆាមាន អារម្មណ៍សប្បាយ វិញ្ញាណមានការប្រែប្រួលខុសពីភាពដើម ទាំងចក្ខុប្រសាទ ស្នូរសំឡេង ពេលវេលា ការប៉ះពាល់។ល។ មានផលអាក្រក់ទាក់ទងការចងចាំនិងការរៀនសូត្រ បាត់បង់ការសហការ ស្មុគស្មាញក្នុងការគិតគូរនិងក្នុងការដោះស្រាយបញ្ហា បង្កើនឲ្យបេះដូងដើរញាប់។
លោកវេជ្ជបណ្ឌិត មាស វីរិទ្ធ ប្រធានមន្ទីរពិសោធន៍នៃអាជ្ញាធរជាតិប្រយុទ្ធប្រឆាំងគ្រឿងញៀនមានប្រសាសន៍អំពីសញ្ញាមួយចំនួនបន្ទាប់ពីការប្រើប្រាស់កញ្ឆា ៖ «ជាធម្មតា វាស្ថិតនៅលើការពុលស្រវឹង លើបរិមាណរបស់កញ្ឆាដែលយើងបានហូបចូលទៅ។ បើយើងហូបច្រើនវាមានលក្ខណៈពុលស្រវឹង។ បើសិនជាពុលស្រវឹង ទី១ គឺប៉ះពាល់ទៅលើគឺថា ការពុលស្រវឹងក្នុងរយៈពេលខ្លី មានរោគសញ្ញាសម្ដែងឲ្យឃើញដូចជា ការចូលចិត្តនិយាយច្រើន វង្វេងវង្វាន់មិនដឹងម៉ោងពេល ខ្វះការឃុំគ្រងលើខ្លួនឯង ហើយនិងពេលខ្លះទៅជាងងុយគេង»។
ជួនកាលការប្រើកញ្ឆាក៏អាចឲ្យមានការថប់បារម្ភ ការខ្លាច ការមិនទុកចិត្ត ឬការស្លន់ស្លោផងដែរ។ចំពោះផលវិបាករយៈពេលវែងរបស់កញ្ឆាមានច្រើន ៖ «ផលប៉ះពាល់រយៈពេលវែង វាប្រហាក់ប្រហែលគ្នា គ្រាន់តែថា ខុសគ្នាប្រសិនបើអ្នកនោះប្រើប្រាស់កញ្ឆាច្រើនវាអាចធ្វើឲ្យរបាំងការពាររាងកាយចុះខ្សោយ ហើយនិងអាចកើតជំងឺមហារីកសួត ឬក៏រលាកផ្លូវដង្ហើមរ៉ាំរ៉ៃ»។
ចំពោះផលវិបាកអាក្រក់ទៅលើសួត ឯកសារខាងលើបានឲ្យដឹងដែរថា ជក់កញ្ឆាទោះជាមិនញឹកញាប់ក្តីអាចបង្កឲ្យឈឺផ្សាមាត់និងបំពង់ក ហើយបង្កឲ្យក្អកធ្ងន់ធ្ងរ។
អ្នកវិទ្យាសាស្ត្របានរកឃើញថា អ្នកជក់កញ្ឆាអាចជួបបញ្ហាផ្លូវដង្ហើមដូចគ្នានឹងអ្នកដែលជក់បារីនោះដែរ រួមមាន ក្អកមានស្លេស្មរាល់ថ្ងៃ ឈឺទ្រូងធ្ងន់ធ្ងរកាន់តែញឹកញាប់ កំណើនគ្រោះថ្នាក់បង្ករោគនៅសួត រាំង បង្អាក់ផ្លូវដកដង្ហើម។
ផ្សែងកញ្ឆាមានផ្ទុកសារធាតុគ្រោះថ្នាក់ដល់សុខភាពឈ្មោះ carcinogenic hydrocarbons ច្រើនជាងផ្សែងបារី។ តាមធម្មតាអ្នកជក់កញ្ឆា បឺត ហឺតផ្សែងកញ្ឆាចូលជ្រៅជាង ហើយផ្សែងនោះនៅក្នុងសួតយូរជាងផ្សែងបារីរបស់អ្នកជក់បារី ហេតុនេះសួតទទួលសារធាតុ carcinogenic យូរជាងផងដែរ។
ការសិក្សាមួយនៅអាមេរិកបានរកឃើញថា អ្នកជក់កញ្ឆាទំនងជាអាចកើតមហារីកនៅក្បាល ឬនៅក៣ដងខ្ពស់ជាងអ្នកដែលមិនជក់។ អ្នកស្រាវជ្រាវជាច្រើនជឿថា ផ្សែងកញ្ឆាគ្រោះថ្នាក់ដល់សួតច្រើនជាងផ្សែងបារី។ ឯកសារបន្តថា សារធាតុសកម្មផ្សំនៅក្នុងកញ្ឆាមាន delta-9 tetrahydrocannabinol or (THC)។
នៅពេលប្រើប្រាស់កញ្ឆាច្រើនជាមួយការបរិភោគអាហារជាប្រចាំ អ្នកប្រើកញ្ឆានោះអាចជួបសញ្ញាដូចតទៅ ៖ រវើរវាយឃើញអ្វីៗផ្ដេសផ្ដាស ឃើញតែម្នាក់ឯង ការភ័ន្តវិញ្ញាណឬគំនិត សតិស្មារតីចុះខ្សោយ ការរកទិសមិនត្រឹមត្រូវ។
ចំពោះផលវិបាកអាក្រក់ទៅលើបេះដូង ឯកសារនានាជាច្រើនបានលើកឡើងថា ក្នុងរវាង២-៣នាទីបន្ទាប់ពីការជក់កញ្ឆា បេះដូងចាប់ផ្តើមលោតលឿនជាងធម្មតា ហើយជាមួយនេះបង្កបញ្ហាដល់សម្ពាធឈាមដែរ។ កញ្ឆាក៏អាចបង្កឲ្យបេះដូងដើរលឿនក្នុងល្បឿនលោត២០ទៅ៥០ដងក្នុង១នាទី ហើយអាចបង្កើនល្បឿនលើសពីនេះទៀតផងប្រសិនណាបើបុគ្គលនោះ បានប្រើគ្រឿងញៀនដទៃទៀតក្នុងពេលតែមួយជាមួយកញ្ឆា។
លោកវេជ្ជបណ្ឌិត ចន អូខននែល (John O'Connell) នាយកមជ្ឈមណ្ឌលជំងឺបេះដូងនាវិទ្យាស្ថាន Bluhm ផ្នែកសរសៃឈាមបេះដូងនៅមន្ទីរពេទ្យ Northwestern Memorial អាមេរិក មានប្រសាសន៍ថា ៖ "ពេលដែលយើងរកមើលមូលហេតុនៃជំងឺបេះដូងរបស់មនុស្សវ័យកណ្តាល យើងតែងសួរគេថា តើមានប្រើប្រាស់គ្រឿងញៀនឬទេ? តាមពិតករណីមួយចំនួនស្តីពីការប្រើប្រាស់គ្រឿងញៀនគឺមានផលវិបាកអាក្រក់ប្រាកដណាស់ទៅលើបេះដូង។ គ្រឿងញៀនកញ្ឆាដែលបានត្រូវគេប្រើរាលដាលក្នុងសង្គមយើងនោះ វាបង្កនិងបង្កើនឲ្យមានករណីបេះដូងដើរញាប់ និងធ្វើឲ្យសម្ពាធឈាមឡើង។ ចំពោះអ្នកខ្លះដែលមានសម្បទាទោរទៅរកជំងឺបេះដូងផងនោះ បុគ្គលនោះអាចត្រូវយាយីដល់ជីវិត ហើយពិតណាស់ថា ការប្រើកញ្ឆាជាធម្មតាដោយមានការបង្កើនចង្វាក់ជីពចរបេះដូងលោតនិងធ្វើឲ្យសម្ពាធឈាមឡើងជារឿយៗនោះ ប្រាកដណាស់ថា នឹងអាចទទួលផលវិបាកអាក្រក់ធ្ងន់ធ្ងររយៈពេលយូរ"។
ចំពោះបរិមាណអ្នកប្រើប្រាស់កញ្ឆានៅកម្ពុជា ៖ «មកដល់ពេលនេះគឺមិនទាន់ឃើញមានអ្នកដែលញៀនកញ្ឆាហ្នឹងមកចូលទទួលយកសេវាព្យាបាលពីមជ្ឈមណ្ឌលព្យាបាលនិងស្តារនីតិសម្បទាអ្នកញៀនទេ មកដល់ពេលនេះ។ ដំណាំកញ្ឆានៅកម្ពុជា ក៏មានការថយចុះគួរឲ្យកត់សម្កាល់។ ខ្ញុំគិតថា ការដាំដំណាំកញ្ឆាក្នុងផ្នែកពាណិជ្ជកម្មគ្រឿងញៀនគឺគ្មានទេ។ តែអាចមានការដាំតិចតួចដែលការប្រើប្រាស់នោះគឺជាទម្លាប់ក្នុងការព្យាបាលសត្វ»។
យោងតាមព័ត៌មាននានា ជនបរទេសឬភ្ញៀវទេសចរបរទេសអាចរកទិញកញ្ឆាបានដោយលួចលាក់នៅក្រុងភ្នំពេញ។
យោងតាមឯកសារផ្សាយដោយអាជ្ញាធរជាតិប្រយុទ្ធប្រឆាំងគ្រឿងញៀន គឺកាលពីថ្ងៃទី២០ ខែសីហា ឆ្នាំ២០០៩ នៅកណ្តាលក្រុងបាត់ដំបង កញ្ឆាស្រស់ចំនួន១១៦ដើមដែលគេលួចដាំនៅភូមិកំពង់សីមា ក្រុមទី៤ សង្កាត់វត្តគរ ហើយនិងជ្រញ់ហាន់កញ្ឆា បំពង់កញ្ឆា បានត្រូវរកឃើញហើយបានត្រូវអាជ្ញាធរកម្ទេចចោល៕