ការលើកដូច្នេះ នៅស្របពេលដែលអង្គជំនុំជម្រះវិសាមញ្ញក្នុងតុលាការកម្ពុជា បានបើកឱកាសឲ្យដើមបណ្ដឹងរដ្ឋប្បវេណីក្នុងសំណុំរឿងលេខ០០២ ជាខ្មែរកម្ពុជាក្រោម បានចូលរួមផ្ដល់សក្ខីកម្មនៅក្នុងពេលជំនុំជម្រះកាលពីពេលថ្មីៗនេះ។
សហចៅក្រមអន្តរជាតិ មិនទាន់ប្រកាសជាសាធារណៈនៅឡើយអំពីសំណុំរឿងលេខ០០៤ ក៏ប៉ុន្តែសហចៅក្រមអន្តរជាតិ បានបង្ហាញទីតាំងស៊ើបអង្កេតមួយចំនួនទាក់ទងនឹងសំណុំរឿងលេខ០០៤ នៅលើគេហទំព័រសាលាក្ដីខ្មែរក្រហម។
ក្នុងចំណោមទីតាំងស៊ើបអង្កេតទាំងនោះភាគច្រើន សហចៅក្រមអន្តរជាតិ បង្ហាញទីតាំងខ្មែរក្រោមត្រូវបានសម្លាប់នៅក្នុងរបបកម្ពុជាប្រជាធិបតេយ្យច្រើនជាងទីតាំងសម្លាប់ប្រជាពលរដ្ឋទូទៅនៅក្នុងបណ្ដាខេត្តមួយចំនួន។
ទាក់ទងនឹងបញ្ហានេះ នាយកប្រតិបត្តិអង្គការការពារជនជាតិភាគតិច លោក អាង ចាន់រិទ្ធិ មានប្រសាសន៍ថា តាមការវិភាគរបស់លោកទៅលើសេចក្ដីប្រកាសរបស់សហចៅក្រមអន្តរជាតិ និងផ្អែកលើរបាយការណ៍របស់លោកជាង ១០០ទំព័រ ដែលក្រុមស្រាវជ្រាវរបស់លោកបានសិក្សាអំពីការសម្លាប់ខ្មែរក្រោមនៅក្នុងរបបខ្មែរក្រហមនោះ និងបានបញ្ជូនឲ្យសហចៅក្រមស៊ើបសង្កេតកន្លងមកនោះ គឺសំណុំរឿង០០៤ នេះ សហចៅក្រមស៊ើបអង្កេតនឹងធ្វើការស៊ើបអង្កេតប្រមាណ ៧០% លើទីតាំងខ្មែរក្រហមសម្លាប់ខ្មែរក្រោម។
លោក អាង ចាន់រិទ្ធិ បានអះអាងថា ការសម្លាប់ខ្មែរក្រោមនៅក្នុងរបបកម្ពុជាប្រជាធិបតេយ្យ ជារឿងអាថ៌កំបាំងមួយអស់រយៈពេលជាង ៣០ឆ្នាំមកនេះ។ លោកបញ្ជាក់ថា នៅក្នុងសំណុំរឿង០០៤ នេះ ទោះបីជាសហចៅក្រមមិនទាន់បង្ហាញជនជាប់ចោទនៅក្នុងរបបខ្មែរក្រហមក្ដី ប៉ុន្តែសំណុំរឿងនេះសហចៅក្រមស៊ើបអង្កេតនឹងបន្តធ្វើកិច្ចការនេះ ដើម្បីរកយុត្តិធម៌ជូនខ្មែរក្រោមដូចនឹងប្រជាពលរដ្ឋខ្មែរទូទៅដែរ។
សហចៅក្រមស៊ើបអង្កេតអន្តរជាតិ បានចេញសេចក្ដីប្រកាសរបស់ខ្លួននៅលើគេហទំព័រសាលាក្ដីខ្មែរក្រហម បានបង្ហាញទីតាំងឧក្រិដ្ឋកម្មបន្ថែមនៅក្នុងសំណុំរឿងលេខ០០៤ ដែលជាទីតាំងសម្លាប់ខ្មែរក្រោមនោះ មាននៅខេត្តពោធិ៍សាត់ គឺរណ្ដៅទួលសេះញ៉ូវ និងវាលពិឃាតព្រៃក្របៅ ស្ថិតនៅក្នុងឃុំរំលេច ឃុំខ្នារទទឹង និងទីតាំងគុកភូមិវាល ស្ថិតនៅឃុំតាឡូ និងនៅគុកស្វាយជ្រុំ ហៅគុកភូមិថ្គោល និងគុកបឹងបាតកណ្ដាល ហៅត្រាចក្រោល ស្ថិតនៅឃុំបឹងបាតកណ្ដាល។ ទីតាំងទាំងនេះស្ថិតនៅស្រុកបាកាន ខេត្តពោធិ៍សាត់។
រីឯនៅខេត្តតាកែវ ទីតាំងសម្លាប់ខ្មែរក្រោមនោះ គឺកន្លែងសម្លាប់ព្រៃសុខុន និងមន្ទីរឃុំឃាំងវត្តអង្គសិរីមុនី ស្ថិតនៅឃុំធ្លាប្រជុំ ស្រុកកោះអណ្ដែត និងនៅទីតាំងព្រៃភូមិស្លែង វត្តអង្គុញ កន្លែងសម្លាប់ភូមិព្រាល ភូមិសោម និងគុកវត្តសុបិន ស្ថិតនៅឃុំគោកព្រេច និងឃុំកំពែង ស្រុកគីរីវង់ និងនៅមន្ទីរសន្តិសុខក្រាំងតាចាន់ ខេត្តតាកែវ។
ទាក់ទងនឹងបញ្ហានេះ មន្ត្រីនាំពាក្យសាលាក្ដីខ្មែរក្រហម លោក នេត្រ ភក្ដ្រា មានប្រសាសន៍ថា ទីតាំងមួយចំនួនដែលសហចៅក្រមអន្តរជាតិបានបង្ហាញនេះ ប្រសិនបើសាក្សី ឬជនរងគ្រោះណាដែលមានព័ត៌មានទាក់ទងនឹងទីតាំងឧក្រិដ្ឋកម្មទាំងនេះ និងទីតាំងផ្សេងៗទៀត អាចទាក់ទងមកអង្គភាពគាំពារជនរងគ្រោះនៃសាលាក្ដីខ្មែរក្រហម ដើម្បីទទួលព័ត៌មានបន្ថែមអំពីភស្តុតាង និងលក្ខខណ្ឌដែលអាចដាក់ពាក្យធ្វើជាដើមបណ្ដឹងរដ្ឋប្បវេណី។
ទោះបីជាយ៉ាងណាក៏ដោយ សំណុំរឿងលេខ០០៣ និង ០០៤ ជាសំណុំរឿងដ៏ចម្រូងចម្រាសមួយរវាងសហចៅក្រមជាតិ និងសហចៅក្រមអន្តរជាតិ ដែលសហចៅក្រមជាតិ បានអះអាងថា សំណុំរឿង០០៣ បានបញ្ចប់ការស៊ើបអង្កេតហើយ ក៏ប៉ុន្តែសហចៅក្រមអន្តរជាតិ លោក ម៉ាក ហាមុន (Mark Hamon) បានប្រកាសថា សំណុំរឿងទាំងពីរនេះនៅតែបន្តធ្វើការស៊ើបអង្កេត។
ទាក់ទងនឹងបញ្ហានេះ លោក អាង ចាន់រិទ្ធិ មានជំនឿថា សាលាក្ដីខ្មែរក្រហមនៅតែបន្តនីតិវិធីស៊ើបអង្កេតលើសំណុំរឿងលេខ០០៤ នេះបាន ទោះបីជាមានការជំទាស់ពីសមភាគីជាតិក៏ដោយ ពីព្រោះថា ភាគីអន្តរជាតិមានលទ្ធភាពអាចជំរុញឲ្យមានការស៊ើបអង្កេតបាន និងជាសំណុំរឿងប្រវត្តិសាស្ត្រ ហើយសាលាក្ដីមានភស្តុតាងគ្រប់គ្រាន់ក្នុងការបន្តធ្វើការស៊ើបអង្កេត។
ភ្ជាប់ទៅនឹងបញ្ហានេះ សាលាក្ដីខ្មែរក្រហមបានអនុញ្ញាតឲ្យដើមបណ្ដឹងរដ្ឋប្បវេណីចំនួនពីរនាក់ជាខ្មែរកម្ពុជាក្រោម គឺលោក ចៅ នី និងលោក សឺន សុវណ្ណឌី ក្នុងចំណោមដើមបណ្ដឹងរដ្ឋប្បវេណីទាំងអស់ជាង ១៣០នាក់ ឡើងផ្ដល់សក្ខីកម្មនៅក្នុងសវនាការកាលពីពេលថ្មីៗនេះ ក្នុងអង្គជំនុំជម្រះក្នុងសំណុំរឿងលេខ០០២ និងបើកឱកាសឲ្យសួរសំណួរជាច្រើនទៅកាន់មេដឹកនាំជាន់ខ្ពស់ក្នុងរបបកម្ពុជាប្រជាធិបតេយ្យ គឺលោក ខៀវ សំផន។
នាយកមជ្ឈមណ្ឌលឯកសារកម្ពុជា លោក ឆាំង យុ មានប្រសាសន៍ថា ខ្មែរក្រោមមានលក្ខណៈខុសពីប្រជាពលរដ្ឋទូទៅ ដោយសារតែភាសានិយាយ និងនាមត្រកូលរបស់ពួកគាត់មានការខុសប្លែកពីគេ ដូច្នេះខ្មែរក្រហមបានដៅសម្លាប់ខ្មែរក្រោមច្រើនដែរ បន្ទាប់ពីជនជាតិភាគតិចចាម។ លោកបញ្ជាក់ថា ខ្មែរក្រហមបានលាបពណ៌ និងដាក់ការសង្ស័យជាច្រើនលើខ្មែរក្រោម ដូចជា ខ្មែរក្រហមបានចោទប្រកាន់ខ្មែរក្រោមជាចារកម្មរបស់វៀតណាម ជាដើម។
ភ្ជាប់ទៅនឹងបញ្ហានេះ លោក អាង ចាន់រិទ្ធិ បានលើកឡើងប្រហាក់ប្រហែលនឹងលោក ឆាំង យុ ដែរថា ខ្មែរក្រោមជាជនរងគ្រោះក្នុងចំណោមជនរងគ្រោះដទៃទៀត ដែលនៅតំបន់ខ្លះខ្មែរក្រហមបានដៅសម្លាប់ខ្មែរក្រហមផុតពូជ។
ឯកសារស្រាវជ្រាវរបស់មជ្ឈមណ្ឌលឯកសារកម្ពុជា បានសរសេរថា ក្នុងចំណោមគុកចំនួន១៩៦ របស់ខ្មែរក្រហម មជ្ឈមណ្ឌលឯកសារកម្ពុជា បានរកឃើញឯកសារខ្មែរក្រហមបានសម្លាប់ខ្មែរកម្ពុជាក្រោមនៅមន្ទីរសន្តិសុខក្រាំងតាចាន់ ស្ថិតនៅក្នុងស្រុកត្រាំកក់ ខេត្តតាកែវ ដែលមានប្រជាពលរដ្ឋខ្មែរទូទៅស្លាប់ក្នុងគុកនេះចន្លោះពី ១ម៉ឺន ទៅ ២ម៉ឺននាក់ ក្នុងនោះក៏មានខ្មែរកម្ពុជាក្រោមត្រូវខ្មែរក្រហមសម្លាប់ច្រើនដែរ។
ខ្មែរក្រោមដែលខ្មែរក្រហមសម្លាប់ច្រើនជាងគេនៅក្នុងខេត្តពោធិ៍សាត់ ពិសេសនៅក្នុងស្រុកបាកាន នៅខេត្តតាកែវ និងខេត្តបាត់ដំបង ជាដើម។ ខ្មែរក្រោមចំនួន ១៣២នាក់ ជាដើមបណ្ដឹងរដ្ឋប្បវេណីនៅក្នុងសំណុំរឿង០០២។ សំណុំរឿង០០៣ និង ០០៤ មានចំនួនជាង ១៣០នាក់ផ្សេងទៀតបានតាំងខ្លួនជាដើមបណ្ដឹងរដ្ឋប្បវេណី ដើម្បីឲ្យរកយុត្តិធម៌ជូនពួកគាត់ រហូតមកទល់ពេលនេះ សាលាក្ដីខ្មែរក្រហមនៅតែបន្តទទួលជនរងគ្រោះ និងសាក្សី ដើម្បីតាំងខ្លួនជាដើមបណ្ដឹងរដ្ឋប្បវេណីសម្រាប់សំណុំរឿង០០៤៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។