ច្បាប់ស្ដីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មលើផ្លូវភេទ ដែលរដ្ឋសភាប្រទេសកម្ពុជា បានអនុម័ត កាលពីខែធ្នូ ឆ្នាំ២០០៧ កន្លងទៅ បានរៀបរាប់យ៉ាងលំអិតពីប្រភេទបទល្មើស ដែលជនល្មើសអាចប្រព្រឹត្ត និងការផ្ដន្ទាទោស ចំពោះអ្នកប្រព្រឹត្តដៃដល់ ឬហៅថា ចារី។
ប្រទេសកម្ពុជា ជាប្រទេសមួយ ដែលមានសកម្មភាព ជួញដូរមនុស្ស និងការធ្វើអាជីវកម្មលើផ្លូវភេទមនុស្សជាច្រើនករណី។
នៅក្នុងរបាយការណ៍ប្រចាំឆ្នាំ ២០១១ របស់ក្រសួងការបរទេសអាមេរិក ទាក់ទងការជួញដូរមនុស្ស ដែលចេញផ្សាយ កាលពីថ្ងៃទី ២៧ មិថុនា ឆ្នាំ ២០១១ កន្លងទៅ បានវាយតម្លៃថា ប្រទេសកម្ពុជា នៅមិនទាន់បាន ចាត់ការតាមផ្លូវច្បាប់ឲ្យបានតឹងរ៉ឹង ដោយដាក់ទោសឲ្យបានធ្ងន់ចំពោះក្រុមហ៊ុនជ្រើសរើសពលករ ដែលមានជាប់ពាក់ព័ន្ធនឹងការជួញដូរពលកម្ម ដូចជា បង្ខាំងពលករទុកក្នុងមណ្ឌល បោកប្រាស់ពលករដោយបង្កើនប្រាក់បំណុល និងជ្រើសរើសពលការិនី ក្រោមអាយុជាដើម៕