ជីវប្រវត្តិសង្ខេបនិងសកម្មភាពការងាររបស់លោកស្រី គឹម ណាតស៊ីម

ដោយ ម៉ៅ សុធានី

2008-07-03

លោកស្រី គឹម ណាតស៊ីម អាយុ៥៥ឆ្នាំ ឈរឈ្មោះជាតំណាងរាស្ត្ររបស់គណបក្សសមរង្ស៊ីចំនួន៣អាណត្តិមកហើយ រាប់ទាំងនៅក្នុងការបោះឆ្នោតជាតិអាណត្តិទី៤នេះទៀត ។ ក៏ប៉ុន្តែលោកស្រីពុំដែលបានជាប់ជាតំណាងរាស្ត្រទេ កាលពីក្នុងការបោះឆ្នោតជាតិ២អាណត្តិមកហើយនេះ គឺនៅឆ្នាំ១៩៩៨ និង ២០០៣ ។

លោកស្រី គឹម ណាតស៊ីម បានឲ្យដឹងថា ៖ «...ខ្ញុំឈរបេក្ខភាពតំណាងរាស្ត្រលើកទីបីហើយ ។ លើកទី១នៅខេត្តព្រះវិហារ លើកទី២នៅកំពង់ស្ពឺ ហើយលើកទី៣នេះគឺនៅក្នុងខេត្តកំពង់ស្ពឺទៀត...» ។

សូមជម្រាបជូនថានៅក្នុងការបោះឆ្នោតជាតិអាណត្តិលើកទី៤ នាថ្ងៃ២៧ ខែកក្កដាខាងមុខនេះ លោកស្រី គឹម ណាតស៊ីម គឺជាស្ត្រីតំណាងរាស្ត្រតែម្នាក់គត់របស់គណបក្សសមរង្ស៊ី ឈរឈ្មោះក្នុងលំដាប់លេខ៦ ក្នុងចំណោមបេក្ខជនពេញសិទ្ធិ៦នាក់នៅមណ្ឌលខេត្តកំពង់ស្ពឺ ។ កាលពីអាណត្តិបោះឆ្នោតជាតិឆ្នាំ២០០៣ លោកស្រីបានឈរលំដាប់លេខ៥តែពុំបានជាប់ទេ ។

យោងតាមការអះអាងរបស់សកម្មជននៃគណបក្សនយោបាយមួយចំនួនដែលចូលរួមប្រកួតប្រជែងក្នុងការបោះឆ្នោតជាតិនាថ្ងៃទី២៧ ខែកក្កដាខាងមុខនេះ បានឲ្យដឹងថាបេក្ខជនឬបេក្ខនារីឈរឈ្មោះជាតំណាងរាស្ត្រត្រូវមានថវិកាផ្ទាល់ខ្លួនដើម្បីប្រើប្រាស់ក្នុងការចំណាយសម្រាប់ធ្វើការឃោសនារកសន្លឹកឆ្នោតគាំទ្រពីប្រជាពលរដ្ឋ ហើយលំដាប់លេខរៀងរបស់បេក្ខភាពទាំងនោះ គឺអាស្រ័យទៅតាមថវិកាដែលមានច្រើនឬតិច ។

លោកស្រី គឹម ណាតស៊ីម បានមានប្រសាសន៍បន្តថាបើទោះបីជាលោកស្រីមិនបានជាប់ជាតំណាងរាស្ត្រលើកនេះក្តី លោកស្រីនៅតែបន្តជួយគណបក្សសមរង្ស៊ីរហូតដល់បានទទួលជ័យជម្នះ ។

លោកស្រី គឹម ណាតស៊ីម ៖ «អារម្មណ៍ខ្ញុំ ខ្ញុំនឹកឃើញថាខ្ញុំបម្រើជាតិមាតុភូមិខ្ញុំលុះត្រាតែខ្ញុំបានជោគជ័យ ប្រសិនបើលោក សម រង្ស៊ី គាត់ឈប់ធ្វើមេខ្ញុំ គាត់ឈប់ ព្រោះខ្ញុំចាស់ហើយខ្ញុំបម្រើជាតិខ្ញុំបានត្រឹមតែប៉ុណ្ណេះ ។ តាំងពី៧៩រហូតដល់ប៉ុណ្ណេះខ្ញុំបានបម្រើជាតិតាមរយៈក្រសួងសាធារណការ ក៏ដូចជាចូលបម្រើនៅក្នុងគណបក្សសមរង្ស៊ីដោយឥតលម្អៀង ។ ខ្ញុំបានយកចិត្តទុកដាក់នឹងប្រជាពលរដ្ឋដែលគាត់មានទុក្ខលំបាក យល់ទុក្ខធុរៈ ដូចជានៅសង្កាត់ភ្នំពេញថ្មីក៏ដូចជាប្រជាពលរដ្ឋនៅខេត្តកំពង់ស្ពឺ ក៏ដូចជាប្រជាពលរដ្ឋនៅជិតខាងផ្ទះទោះបីមានធុរៈអ្វីៗក៏ខ្ញុំយកគោលជំហរនិងគោលនយោបាយរបស់គណបក្សទៅនិយាយ ជាពិសេសគឺយើងចេះស្រឡាញ់ជាតិស្នេហាជាតិ បំផុសឲ្យស្រ្តីហ្នឹងគាត់យល់ដឹងអំពីអ្វីដែលគាត់មានទុក្ខមានលំបាក» ។

លោកស្រី គឹម ណាតស៊ីម កើតនៅក្នុងស្រុកកងមាស ខេត្តកំពង់ចាម បច្ចុប្បន្នរស់នៅក្នុងសង្កាត់ភ្នំពេញថ្មី ខណ្ឌឫស្សីកែវ ។ មុនចូលនិវត្តន៍នៅឆ្នាំ២០០១ លោកស្រីធ្វើការជាមន្ត្រីនៃក្រសួងសាធារណការនិងដឹកជញ្ជូនខាងផ្នែកអយស្ម័យយាន ធ្វើការពីឆ្នាំ១៩៧៩ រហូតដល់បានចូលនិវត្តន៍នៅឆ្នាំ២០០១ ។

នៅឆ្នាំ១៩៩៥ លោកស្រី គឹម ណាតស៊ីម បានចូលរួមប្រឡូកក្នុងឆាកនយោបាយជាមួយនឹងគណបក្សសមរង្ស៊ី ហើយតាំងពីពេលនោះមក លោកស្រីក៏បានទទួលភារកិច្ចចាត់ចែងការងារជាច្រើនទាំងកិច្ចការស្ត្រីផង ដើម្បីផ្សព្វផ្សាយអំពីគោលនយោបាយរបស់បក្ស ។

លោកស្រី គឹម ណាតស៊ីម បានមានប្រសាសន៍ថា ៖ «...តាំងពីចូលគណបក្សសមរង្ស៊ីមក ខ្ញុំកាន់តំណែងជាអនុប្រធាននៃចលនាស្ត្រី និងជាគ្រូបង្គោល ។ នៅឆ្នាំ២០០២បានជាប់ឆ្នោតជាចៅសង្កាត់រងទី១ នៅសង្កាត់ភ្នំពេញថ្មី ហើយបោះឆ្នោតក្រុមប្រឹក្សាឃុំសង្កាត់ឆ្នាំ២០០៧ អត់ឈរទេតែមកធ្វើការនៅទីស្នាក់ការកណ្តាលវិញ មានតួនាទីជាគ្រូបង្គោលនិងអនុប្រធាននៃចលនាស្ត្រី...» ។

លោកស្រី គឹម ណាតស៊ីម ប្រឡងជាប់មធ្យមសិក្សាបត្រទុតិយភូមិឬបាក់ឌុប នៅឆ្នាំ១៩៦៧ ។ នៅឆ្នាំ១៩៦៨ លោកស្រីបានទៅធ្វើការនៅទីស្តីការរដ្ឋមន្ត្រីរហូតដល់ឆ្នាំ១៩៧០ ក៏បានស្ម័គ្រចិត្តចូលធ្វើជាទាហាន ។

លោកស្រី គឹម ណាតស៊ីម បានឲ្យដឹងថា ៖ «...ខ្ញុំជាប់បាក់ឌុបនៅឆ្នាំ១៩៦៦/១៩៦៧ រួចមកទៅធ្វើការនៅទីស្តីការនាយករដ្ឋមន្ត្រី ។ ឆ្នាំ១៩៧០ ចូលធ្វើជាទាហានហើយគេឲ្យទៅហាត់នៅកំបូលរួចមកបញ្ជូនទៅខេត្តកំពង់ឆ្នាំងទៀត...» ។

លោកស្រី គឹម ណាតស៊ីម រៀបការនៅឆ្នាំ១៩៧២ មានកូនចំនួន៤នាក់ ស្រី២ ប្រុស២ ។ កូនស្រីទាំងពីររបស់លោកស្រីបានរៀបការហើយ ។ កូនប្រុសច្បងអាយុ២៩ឆ្នាំពិការ និងកូនប្រុសពៅអាយុ១៨ឆ្នាំកំពុងនៅរៀន ។

នៅក្នុងរបបខ្មែរក្រហមដោយសារស្វាមីរបស់លោកស្រីដែលធ្វើជាមន្ត្រីខាងរទេះភ្លើង មេដឹកនាំខ្មែរក្រហមមិនបានជម្លៀសចេញពីក្រុងទេ តែទុកឲ្យធ្វើការជួយបង្រៀនបុគ្គលិកអយស្ម័យយាននៅក្នុងរបបខ្មែរក្រហម ។

លោកស្រី គឹម ណាតស៊ីម បានបញ្ជាក់ថា ៖ «នៅជំនាន់ប៉ុលពតគឺខ្ញុំមានសំណាងជាងគេដោយសារខ្ញុំជាកម្មកររទេះភ្លើងគេទុក្ខជាកម្មករ ។ ប្ដីរបស់ខ្ញុំគាត់ធ្វើការនៅរទេះភ្លើង អ៊ីចឹងពេលដែលប៉ុលពតចូលមកមន្ត្រីរទេះភ្លើងទាំងអស់ ប៉ុលពតបានដាក់ទុកជាកម្មករសហជីព អ៊ីចឹងគេអត់ជម្លៀសទេ គេឲ្យរស់នៅភ្នំពេញ២ឆ្នាំ បន្ទាប់មកគេឲ្យរស់នៅបាត់ដំបង បន្ទាប់មកគេឲ្យនៅកំពង់ស្ពឺ គេគិតតែពីជម្លៀសដើម្បីយកទៅធ្វើស្ពាន ។ គេយកកម្មករចាស់ទៅបង្រៀនពួកក្មេងៗប៉ុលពតហ្នឹងឲ្យធ្វើផ្លូវធ្វើអី» ។

ទាក់ទងនឹងសំណួរដែលចង់ដឹងអំពីគម្រោងទៅថ្ងៃអនាគត លោកស្រី គឹម ណាតស៊ីម បានមានប្រសាសន៍ដូច្នេះ ៖ «ខ្ញុំនៅតែបន្តសកម្មភាពលុះណាតែបានជោគជ័យថ្វីត្បិតតែខ្ញុំអាយុប៉ុណ្ណឹងមែន ប៉ុន្តែសុខភាពខ្ញុំនៅល្អខ្ញុំនៅតែបន្តការតស៊ូ ជាពិសេសចូលរួមជាមួយនឹងគណបក្សសមរង្ស៊ី លុះណាតែខ្ញុំដូចថាបានជោគជ័យហើយ ទាល់តែខ្ញុំចាស់ទៅខ្ញុំមិនចូលគណបក្សខ្ញុំនៅផ្ទះរកស៊ីមុខរបរអីផ្សេងៗទៅតាមកម្លាំងរបស់ខ្ញុំ» ។

សូមរំឭកជូនថាចំនួនបេក្ខនារីឈរឈ្មោះជាតំណាងរាស្ត្ររបស់គណបក្សនយោបាយនានាដែលចូលរូមប្រកួតប្រជែងក្នុងការបោះឆ្នោតជាតិអាណត្តិទី៤នេះ មានតែ១៩%ប៉ុណ្ណោះ ហើយបើប្រៀបធៀបការបោះឆ្នោតជាតិអាណត្តិទី៣ នៅឆ្នាំ២០០៣ គឺមានបេក្ខនារីតំណាងរាស្រ្តដល់ទៅចំនួន២៨% ។ ហើយក្នុងបញ្ជីផ្លូវការនៃគ.ជ.ប.បេក្ខភាពតំណាងរាស្ត្ររបស់គណបក្សសមរង្ស៊ីសរុបមាន១២៣នាក់ ក្នុងនោះបុរស១០៦នាក់និងស្រ្តី១៧នាក់ ៕

បោះពុម្ព អ៊ីម៉េល