ការទាមទារនេះ ដោយសំអាងថា នាងពុំបានប្រព្រឹត្តកំហុសដូចការចោទប្រកាន់ឡើយ។ យុទ្ធនាការទាមទារដោះលែងលោកស្រី យ៉ោម បុប្ផា កំពុងទាក់ទាញការចាប់អារម្មណ៍ពីសហគមន៍អន្តរជាតិ ជាពិសេសស្ថាប័នការពារសិទ្ធិមនុស្ស និងជំរុញដំណើរការប្រជាធិបតេយ្យ។
«សំឡេងទាមទារដោះលែង យ៉ោម បុប្ផា»
សម្រែកទាមទារអោយដោះលែងលោកស្រី យ៉ោម បុប្ផា បានជំរុញអោយអង្គការជាតិ និងអន្តរជាតិប្រមាណ១០០ មកពី ៤០ប្រទេសក្នុងពិភពលោក បានគាំទ្រញត្តិដែលមានខ្លឹមសារទាមទារសេរីភាពដល់សកម្មជនការពារសិទ្ធិដីធ្លីរូបនេះ ដោយសំអាងថា នាងគឺជាស្ត្រីមេផ្ទះមានទោសដោយសារការពារសិទ្ធិដីធ្លី។
ញត្តិទាំងនោះ ត្រូវតំណាងសកម្មជនជាតិ និងអន្តរជាតិខាងសិទ្ធិមនុស្ស និងលទ្ធិប្រជាធិបតេយ្យប្រគល់អោយតំណាងសហគមន៍បឹងកក់ ដើម្បីផ្ញើជូនស្ថាប័នពាក់ព័ន្ធ រួមមានរដ្ឋសភា ទីស្ដីការគណៈរដ្ឋមន្ត្រី និងក្រសួងការបរទេស។
តំណាងអង្គការជាតិ និងអន្តរជាតិ ដែលបានចុះហត្ថលេខាគាំទ្រអោយដោះលែងលោកស្រី យ៉ោម បុប្ផា និងជាលេខាធិការប្រតិបត្តិគណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សនៅកម្ពុជា លោក សួន ប៊ុនសក្តិ មានប្រសាសន៍ថា អ្នកដែលបានចុះហត្ថលេខាគាំទ្រញត្តិ ចាត់ទុកភាពក្លាហានក្នុងការងើបឡើងតស៊ូការពារសិទ្ធិ គឺជាគំរូល្អមួយសម្រាប់ពលរដ្ឋក្នុងប្រទេសប្រជាធិបតេយ្យ។
ញត្តិដែលក្រុមអ្នកគាំទ្របានចុះហត្ថលេខានោះ បានសរសេរថា សកម្មជនការពារសិទ្ធិមនុស្សនៅពាសពេញពិភពលោក អំពាវនាវអោយដោះលែងលោកស្រី យ៉ោម បុប្ផា ដែលជាសកម្មជនការពារសិទ្ធិមនុស្សនៅកម្ពុជា ជាបន្ទាន់ដោយគ្មានលក្ខខណ្ឌ។ ពួកគេនឹងគាំទ្រកម្ពុជា ក្នុងការតតាំងដើម្បីសិទ្ធិមនុស្ស និងលទ្ធិប្រជាធិបតេយ្យ។
ស្របពេលនេះ អង្គការលើកលែងទោសអន្តរជាតិ បានចាត់ទុកលោកស្រី យ៉ោម បុប្ផា ថាជាអ្នកទោសមនសិការ និងគ្រាន់តែជាស្ត្រីមេផ្ទះតតាំងដើម្បីការពារផ្ទះសម្បែងដីធ្លី។
បុគ្គលិកជាន់ខ្ពស់នៃលេខាធិការដ្ឋានក្រុមការងារពិសេសសិទ្ធិលំនៅឋាន កញ្ញា ឡុង គឹមហ៊ាង មានប្រសាសន៍ថា ប្រសិនបើពុំមានដំណោះស្រាយសម្រាប់លោកស្រី យ៉ោម បុប្ផា ទេ សកម្មជនការពារសិទ្ធិមនុស្សជាតិ និងអន្តរជាតិ នឹងបន្តយុទ្ធនាការថ្មីមួយទៀត។
កាលពីខែធ្នូ ឆ្នាំ២០១២ លោកស្រី យ៉ោម បុប្ឆា និងប្ដីឈ្មោះ លួស សាខន ត្រូវតុលាការដំបូងរាជធានីភ្នំពេញ ផ្ដន្ទាទោសឲ្យជាប់ពន្ធនាគារ ៣ឆ្នាំ និងបង់ប្រាក់ជំងឺចិត្តចំនួន ៦០លានរៀល ក្រោមការចោទប្រកាន់ប្រើហិង្សាដោយចេតនា ដែលមានស្ថានទម្ងន់ទោស ចំពោះការវាយទៅលើអ្នករត់ម៉ូតូឌុបពីរនាក់ឲ្យរងរបួស។ បច្ចុប្បន្ន លោកស្រី យ៉ោម បុប្ផា កំពុងជាប់ឃុំនៅពន្ធនាគាររាជធានីភ្នំពេញ ប៉េស៊ី (PJ) បន្ទាប់ពីបានផ្លាស់ចេញពីមណ្ឌលអប់រំកែប្រែទី២ ឬហៅកាត់ថា (ម២) ដោយសារចង្អៀតខ្លាំង។
តំណាងសហគមន៍ លោកស្រី ទេព វន្នី បានអរគុណដល់បណ្ដាអង្គការជាតិ និងអន្តរជាតិ ដែលគាំទ្រសកម្មភាពតស៊ូមតិរបស់ស្ត្រីមេផ្ទះក្នុងតំបន់បឹងកក់។
មិនខុសគ្នានេះដែរ ស្ត្រីនៅបឹងកក់ លោកស្រី បូ ឆវី ចាត់ទុកញត្តិគាំទ្រអោយដោះលែងលោកស្រី យ៉ោម បុប្ផា ថាជាកម្លាំងជំរុញទឹកចិត្តអោយពួកគាត់កាន់តែមានការតស៊ូបន្តទៀត។
សាលាឧទ្ធរណ៍បានកំណត់យកថ្ងៃទី៥ ខែមិថុនា ខាងមុខ ដើម្បីបើកសវនាការបណ្ដឹងទាស់របស់លោកស្រី យ៉ោម បុប្ផា។ អ្នកបឹងកក់ បានគ្រោងទុកជាមុនស្រេចហើយថា នឹងបន្តការទាមទារ ដើម្បីសេរីភាពរបស់សកម្មជនដីធ្លីរូបនេះ។
តំណាងអ្នកបឹងកក់ ម្នាក់ទៀត កញ្ញា សុង ស្រីលាភ មានប្រសាសន៍ថា នាងដឹងពីភាពឈឺចាប់របស់លោកស្រី យ៉ោម បុប្ផា ដែលពុំបានប្រព្រឹត្តកំហុសសោះ ប៉ុន្តែបែរជាត្រូវជាប់ពន្ធនាគារដោយអយុត្តិធម៌។ ស្រីលាភ បញ្ជាក់ថា ការតស៊ូដើម្បីសេរីភាពរបស់លោកស្រី យ៉ោម បុប្ផា គឺជាការចូលរួមដើម្បីជំរុញអោយតុលាការយកចិត្តទុកដាក់ផ្ដល់យុត្តិធម៌ ដល់ពលរដ្ឋគ្រប់គ្នា មិនថាអ្នកមានអ្នកក្រ ឬគ្មានអំណាចអ្វី ក្នុងន័យធានាថា តុលាការបានឈរលើគោលការណ៍ឯករាជ្យ។
លោកស្រី យ៉ោម បុប្ផា ដែលគេឃើញតវ៉ាដើម្បីប្រយោជន៍សហគមន៍បឹងកក់ គឺជាម្ដាយរបស់កុមារអាយុ ៩ឆ្នាំម្នាក់ ដែលពេលនេះក៏បានចូលរួមក្នុងយុទ្ធនាការទាមទារដោះលែងម្ដាយខ្លួនដែរ។ កុមារា លួស លីហួរ បានអោយដឹងថា រូបគេត្រូវការម្ដាយថ្នាក់ថ្នម និងបានស្នើអោយលោកនាយករដ្ឋមន្ត្រី ហ៊ុន សែន ពិចារណាអន្តរាគមន៍ផ្ដល់សេរីភាពដល់ម្ដាយរបស់គេឡើងវិញ ព្រោះគេដឹងថា ម្ដាយរបស់គេពុំមានកំហុសឡើយ។
យ៉ាងណា កាលលោកនាយករដ្ឋមន្ត្រី ហ៊ុន សែន បានថ្លែងកាលពីថ្ងៃទី១៩ ខែមីនា ដោយសំដៅទៅលើស្ត្រីម្នាក់ដែលកំពុងជាប់ក្នុងពន្ធនាគារ ថាជាករណីដែលមានភាព «អយុត្តិធម៌» ចំពោះរដ្ឋាភិបាល។
លោក ហ៊ុន សែន បានថ្លែងថា ស្ត្រីនៅបឹងកក់ ម្នាក់នោះ វាយគេសោះ ប៉ុន្តែត្រូវបានដាក់ងារជាសកម្មជនដីធ្លីនៅបឹងកក់ ទៅវិញ៖ «វាទៅជារឿងអយុត្តិធម៌មកលើរដ្ឋាភិបាល ឃើញស្រីបឹងកក់ ម្នាក់នេះ ឃើញព័ត៌មានចុះផ្សាយ ប៉ះទង្គិចក្រុមម្ខាងទាមទារដោះលែងស្រីហ្នឹង និងក្រុមម្ខាងទៀតទាមទារឲ្យកាត់ទោសស្រីហ្នឹង ក្រុមម្ខាងហ្នឹង គឺក្រុមម៉ូតូឌុប វាយគេជាប់ទោសព្រហ្មទណ្ឌ វាក្លាយជាសកម្មជនដីធ្លី វាទៅជាអ៊ីចេះទៅរួច»។
តាមចម្លើយរបស់លោក វ៉ាត ថៃសេង និងលោក ង៉ែត ចិត្ត ដែលអះអាងថាជាជនរងគ្រោះដោយអំពើហិង្សា បាននិយាយថា ក្រុមគ្រួសាររបស់លោកស្រី យ៉ោម បុប្ផា មានចេតនាចង់សម្លាប់ពួកគាត់ ដោយប្រើពូថៅ និងទួរណឺវីស ដោយចោទប្រកាន់ថា ពួកគេបានលួចកញ្ចប់រថយន្តរបស់លោកស្រី យ៉ោម បុប្ផា។
ការចោទប្រកាន់ទាំងនោះ ត្រូវទាត់ចោល ដោយលោកស្រី បុប្ផា និងក្រុមគ្រួសារ។
លោក លួស សាខន ប្ដីលោកស្រី យ៉ោម បុប្ផា មានប្រសាសន៍ថា ប្រសិនបើតុលាការយុត្តិធម៌មែន អាចចុះស៊ើបអង្កេតដល់កន្លែង នឹងបានដឹងការពិតថាការចោទប្រកាន់លើលោកស្រី យ៉ោម បុប្ផា គ្រាន់តែជាការបំភ្លៃការពិត ទម្លាក់កំហុសដាក់ក្រុមគ្រួសាររបស់លោកប៉ុណ្ណោះ។
ទាំងក្រុមគ្រួសារអ្នកបឹងកក់ និងអង្គការមិនមែនរដ្ឋាភិបាល រំពឹងថា លោកស្រី យ៉ោម បុប្ផា នឹងត្រូវដោះលែងអោយមានសេរីភាព ដោយចាត់ទុកថា ដោះលែងលោកស្រី យ៉ោម បុប្ផា គឺមានន័យថាគោរពសិទ្ធិស្ត្រី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។