ស្ត្រីដែលមានអាយុពាក់កណ្តាលមនុស្ស ពោលគឺអាយុចាប់ពី៥០ឆ្នាំឡើងទៅ ជាទូទៅត្រូវបានគេចាត់ទុកថា ជាអំឡុងពេលដែលស្ត្រីងាយទទួលរងនូវភាពតានតឹងច្រើនខាងផ្លូវចិត្ត មានអារម្មណ៍ធុញថប់ ពិបាកក្នុងខ្លួន មានជំងឺតម្កាត់យាយីជាច្រើន ដែលកត្តាទាំងអស់នោះ គឺបណ្តាលមកពីភាពប្រែប្រួលជាធម្មតានៃរូបរាងកាយនិងផ្លូវចិត្ត ក្រោយដែលស្ត្រីអស់រដូវជាអចិន្ត្រៃយ៍។
ក្នុងទំព័រវ៉ឹបសាយថ៍នៃក្រសួងសុខាភិបាលស.រ.អា ដែលមានអាសយដ្ឋាន www.womenshealth.gov/menopause បានឲ្យដឹងថា វិធីព្យាបាលនានាចំពោះស្រ្តីដែលអស់រដូវ គឺមានន័យថា ជាការស្វែងរកមធ្យោបាយដើម្បីកាត់បន្ថយនូវរោគសញ្ញាមួយចំនួន ដូចជាក្តៅមុខភាយៗ បែកញើសពេលយប់ គេងមិនលក់ មានអារម្មណ៍ឆាប់ខឹងមួម៉ៅ និងជាការរកវិធីការពារនូវជំងឺជាច្រើនទៀត មានជំងឺពុកឆ្អឹង ជំងឺបេះដូង និងជំងឺមហារីកជាដើម។
លោកស្រីវេជ្ជបណ្ឌិត អៀម មុន្នី ប្រធានផ្នែកសុខភាពបន្តពូជ នៃអង្គការសម្ព័ន្ធសុខភាពកុមារ និងសុខភាពបន្តពូជ ហៅកាត់ថា អង្គការរ៉ាក់ឆា (RACHA) បានមានប្រសាសន៍អំពីរោគសញ្ញាមួយចំនួន ដែលស្ត្រីគួរពិគ្រោះជាមួយគ្រូពេទ្រ។
លោកស្រីវេជ្ជបណ្ឌិត អៀម មុន្នី មានប្រសាសន៍ដូច្នេះ ៖ «ស្ត្រីដែលអស់រដូវ ត្រូវជួបគ្រូពេទ្យ បើសិនជាមានរោគសញ្ញាដូចជា ឈឺសន្លាក់ដៃជើង ឈឺចង្កេះ រោយស្រពន់ដៃជើង ដើម្បីជៀសវាងកុំឲ្យពុកឆ្អឹង ឬជំងឺផ្សេង ដូចជាជំងឺមហារីកមាត់ស្បូន ជំងឺដុំដោះ កុំឲ្យទុកដល់ធ្ងន់ ពិបាកព្យាបាល»។
លោកស្រីវេជ្ជបណ្ឌិត វង ដាវី ប្រធានគ្លីនិកសមាគមថែទាំសុខភាពគ្រួសារកម្ពុជា ហៅកាត់ថា រ៉ាក់ (RHAC) បានមានប្រសាសន៍ថា ស្ត្រីនៅពេលជិតអស់រដូវ ឬក្រោយអស់រដូវរហូត គេត្រូវតែទៅជួបគ្រូពេទ្យដើម្បីពិនិត្យតាមដានសុខភាពរបស់ខ្លួន យ៉ាងហោចណាស់ក្នុងមួយឆ្នាំម្តង។
លោកស្រីវេជ្ជបណ្ឌិត វង ដាវី មានប្រសាសន៍ថា ៖ «តាមដានមើលសម្ពាធឈាម គេស្រាវជ្រាវរកមើលជាតិខ្លាញ់ក្នុងឈាម រកមើលវាស់ឆ្អឹង ថាតើមានជំងឺពុកឆ្អឹង ថតឆ្លុះដោះ តាមដានក្រែងលោមានជំងឺមហារីកដោះ យើងមានវិភាគរុករកមើលកោសិកាមហារីកនៅមាត់ស្បូន មើលជាតិស្ករក្នុងឈាម ក្រែងមានទឹកនោមផ្អែម ហើយការព្យាបាលទៅតាមជំងឺនីមួយៗ»។
លោកស្រីវេជ្ជបណ្ឌិត វង ដាវី ប្រធានគ្លីនិករ៉ាក់ មានប្រសាសន៍បន្ថែមថា ក្រោយពិនិត្យរកឃើញរោគសញ្ញាណាមួយហើយ គ្រូពេទ្យនឹងពិភាក្សាពីជម្រើសរបស់ស្ត្រី ក្នុងការទទួលការព្យាបាលដោយផ្អែកលើអាយុ លក្ខខណ្ឌសុខភាពទូទៅ និងការប្រើប្រាស់ថ្នាំព្យាបាលជាប្រចាំរបស់ស្ត្រី។
លោកស្រីវេជ្ជបណ្ឌិត វង ដាវី មានប្រសាសន៍បន្ថែមដូច្នេះ ៖ «គ្រូពេទ្យគេអាចផ្តល់ជាថ្នាំខ្លះព្យាបាលទៅតាមរោគសញ្ញារបស់គាត់ដែលមានកើតឡើង។ មួយទៀត គឺវិធីព្យាបាលបង្ការ យើងត្រូវជួបគ្រូពេទ្យ បើសិនជាមានរោគសញ្ញាធ្ងន់ធ្ងរ។ មួយទៀតត្រូវពិនិត្យសុខភាពយ៉ាងហោចណាស់ មើលស្បូន មើលឈាម មើលដោះ ហើយត្រូវប្រុងប្រយ័ត្នក្នុងការប្រើប្រាស់ថ្នាំផ្តេសផ្តាស ព្រោះថ្នាំខ្លះវានាំឲ្យមានការរំខានដល់ការលូតលាស់ឆ្អឹង»។
ទាក់ទងនឹងវិធីព្យាបាលនិងការពារជំងឺពុកឆ្អឹង ក្នុងរបាយការណ៍របស់ Women's Healthcare Forum បានបង្ហាញថា ស្ត្រីអស់រដូវត្រូវទទួលទានអាហារមានជាតិកាល់ស្យូមឲ្យបាន១៥០០មីលីក្រាម និងវីតាមិ D ឲ្យបាន៤០០IU ក្នុងមួយថ្ងៃ តាមរយៈការពិសាទឹកដោះគោ ទឹកសណ្តែក ទឹកក្រូច ឬការប្រើថ្នាំ។ ចំណែកឯជំងឺបេះដូងវិញ ដែលគេសង្កេតឃើញថា មានកើតឡើងច្រើនទៅលើស្ត្រីអស់រដូវ និងជាកត្តាចម្បងនៃការស្លាប់របស់ស្ត្រីនោះ។
ប្រភពដដែលបន្តថា ស្ត្រីត្រូវរក្សាទម្ងន់ជាធម្មតាកុំឲ្យធាត់ខ្លាំងពេក ពិនិត្យសម្ពាធឈាមឲ្យបានទៀងទាត់ ពិនិត្យរកមើលជំងឺទឹកនោមផ្អែម ជៀសវាងការជក់បារី ការពិសាស្រាច្រើន ជៀសវាងការបរិភោគអាហារមានជាតិខ្លាញ់ កាត់បន្ថយជាតិកាហេ្វអ៊ីន និងធ្វើលំហាត់ប្រាណ ដូចជាដើរជាដើម ឲ្យបានកន្លះម៉ោងក្នុងមួយថ្ងៃ ហើយយ៉ាងតិច៥ដងក្នុងមួយសប្តាហ៍។
បន្ថែមពីនេះ ស្ត្រីដែលមានអារម្មណ៍មួម៉ៅខឹងច្រើន កើតទុក្ខពិបាកចិត្ត ត្រូវព្យាយាមគេងឲ្យបានគ្រប់គ្រាន់ កុំនៅស្ងៀមអសកម្ម ជជែកជាមួយមិត្តភក្ដិ ញាតិសន្តានដែលខ្លួនទុកចិត្ត ប្រសិនបើមានបញ្ហាណាមួយ ពិភាក្សាជាមួយវេជ្ជបណ្ឌិតជំនាញ និងអ្នកផ្តល់ដំបូន្មានផ្នែកចិត្តសាស្ត្រ ដើម្បីកាត់បន្ថយបញ្ហាផ្លូវចិត្តទាំងនោះ។
លោកស្រីវេជ្ជបណ្ឌិត អៀម មុន្នី មានប្រសាសន៍ផ្តល់ដំបូន្មានបន្ថែមយ៉ាងនេះទៀតថា ៖ «ធ្វើម៉ាស្សាអាចនៅក្បាល មុខ ដៃជើងនិងដងខ្លួន។ ត្រូវបរិភោគចំណីអាហារឲ្យបានគ្រប់គ្រាន់ មានបន្លែ ផ្លែឈើ សាច់ត្រីល្អ បន្ថយសាច់ជ្រូក សាច់គោ ហើយកុំបរិភោគជាតិខ្លាញ់ច្រើន បន្ថែមសាច់ ត្រូវហូបពពួកវីតាមីនឲ្យបានគ្រប់មុខ មួយទៀតដែលល្អនោះ កុំពិបាកចិត្តច្រើនកុំគិតច្រើន ដើរលំហែកាយកំសាន្ត»។
តាមការស្រាវជ្រាវក្នុងទំព័រវ៉ឹបសាយថ៍ជាច្រើនទាក់ទងនឹងMenopause បានឲ្យដឹងថា ការអស់រដូវ គឺជាដំណើរការធម្មជាតិនៃការវិវត្តរូបរាងកាយរបស់ស្ត្រី ហើយវិធីព្យាបាលរោគសញ្ញាណាមួយទាក់ទងនឹងការអស់រដូវ គឺមានលក្ខណៈខុសគ្នាទៅនឹងវិធីព្យាបាលជំងឺផ្សេងៗទៀត។ ស្ត្រីខ្លះរោគសញ្ញាដែលមានទាំងនោះ ត្រូវបាត់ទៅវិញដោយមិនចាំបាច់ព្យាបាល។ ប៉ុន្តែវេជ្ជបណ្ឌិតជំនាញរោគស្រ្តីបានផ្តល់ដំបូន្មានថា ជាការល្អបំផុត។ ស្ត្រីបើសិនជាដឹងថា ខ្លួនជិតអស់រដូវ គួរតែពិគ្រោះជាមួយគ្រូពេទ្យ ដើម្បីថែរក្សាសុខភាពឲ្យបានល្អ តាមរយៈវិធីធម្មជាតិ ដោយមិនចាំបាច់ប្រើថ្នាំ និងការពារកុំឲ្យមានរោគសញ្ញាធ្ងន់ធ្ងរណាមួយកើតមានឡើង៕