ក្នុងទំព័រវ៉ឹបសាយថ៍នៃក្រសួងសុខាភិបាលសហរដ្ឋអាមេរិក ដែលមានអាសយដ្ឋាន www.womenshealth.gov/menopause បានឲ្យដឹងថា ការបរិភោគអាហារមានជីវជាតិគ្រប់គ្រាន់ត្រឹមត្រូវ និងការហាត់ប្រាណទៀងទាត់មុននិងក្រោយស្ត្រីអស់រដូវជាអចិន្ត្រៃយ៍នោះ នឹងជួយឲ្យស្ត្រីរក្សាទម្ងន់មិនឲ្យធាត់ខ្លាំងពេក ដែលកត្តាទាំងអស់នោះនឹងជំរុញឲ្យស្ត្រីមានសុខភាពល្អ និងកាត់បន្ថយរោគសញ្ញានានា ដែលងាយទទួលរងនូវជំងឺតម្កាត់ជាច្រើន នៅពេលស្ត្រីមានវ័យកាន់តែចាស់ទៅៗ។
ការបន្តធ្វើសកម្មភាពជាប្រចាំផ្នែករូបរាងកាយ នឹងធ្វើឲ្យអារម្មណ៍បានល្អប្រសើរផ្នែកសុខភាពផ្លូវចិត្ត ធ្វើឲ្យលោកអ្នកគេងលក់ស្កប់ស្កល់ មានកម្លាំងពលំ និងមានគំនិតវៃឆ្លាតរហ័សរហួន។
លោកស្រីវេជ្ជបណ្ឌិត វង ដាវី ប្រធានគ្លីនិកសមាគមថែទាំសុខភាពគ្រួសារកម្ពុជា ហៅកាត់ថារ៉ាក់ (RHAC) បានមានប្រសាសន៍ថា ស្ត្រីនៅពេលជិតអស់រដូវ ឬក្រោយអស់រដូវរហូត ត្រូវបរិភោគអាហារដែលមានអត្ថប្រយោជន៍សម្រាប់រូបរាងកាយ ហើយបរិមាណអាហារត្រូវមានកម្រិត។
លោកស្រីវេជ្ជបណ្ឌិត វង ដាវី មានប្រសាសន៍ដូច្នេះ ៖ «ស្ត្រីគ្រប់រូបត្រូវទទួលទានរបបអាហារត្រឹមត្រូវ កុំឲ្យច្រើនពេក ញ៉ាំពពួកអាហារសំបូរដោយវីតាមីនច្រើន មានវីតាមីបេ សេ និងដេ ហើយអាហារសំបូរដោយជាតិកាល់ស្យូមច្រើន មានកំពឹស ក្តាម ខ្យង ថ្លើម ឬញ៉ាំអាហារមានបន្លែពណ៌បៃតង លឿង ឲ្យបានច្រើន និងញ៉ាំផ្លែឈើឲ្យបានច្រើនដែរ។ ប៉ុន្តែកាត់បន្ថយជាតិស្ករនិងអំបិលឲ្យបានច្រើន»។
ទាក់ទងនឹងម្ហូបអាហារប្រចាំថ្ងៃដែលប្រជាពលរដ្ឋខ្មែរបរិភោគ លោកស្រីវេជ្ជបណ្ឌិត អៀម មុន្នី ប្រធានផ្នែកសុខភាពបន្តពូជនៃអង្គការសម្ព័ន្ធសុខភាពកុមារនិងសុខភាពបន្តពូជ ហៅកាត់ថាអង្គការរ៉ាក់ឆា (RACHA) បានមានប្រសាសន៍បញ្ជាក់នូវមុខបន្លែផ្លែឈើដែលមានសម្បូរនៅស្រុកខ្មែរយ៉ាងនេះថា ៖ «ផ្លែឈើ ត្រូវហូបពី២ទៅ៤មុខក្នុងមួយថ្ងៃ មានចេកទុំ ស្វាយទុំ ក្រូចពោធិ៍សាត់ ល្ហុង ម្នាស់ជាដើម។ បន្លែពី៣មុខទៅ៤មុខដែរ មានខាត់ណា ផ្កាខាត់ណា ស្ពៃក្តោប ស្ពៃខ្មៅ ត្រកួន ននោង ផ្ទី ស្លឹកបាស់ជាដើម ។ បន្លែទាំងនោះ សម្រួលក្នុងការបត់ជើងធំ និងកាត់បន្ថយជំងឺមហារីកពោះវៀនធំ»។
បន្ថែមពីមុខបន្លែផ្លែឈើ ដែលលោកអ្នកគួរបរិភោគខាងលើនេះ លោកស្រីវេជ្ជបណ្ឌិត អៀម មុន្នី ក៏បានមានប្រសាសន៍ផងដែរថា សាច់មាន់និងត្រីគឺល្អជាទីបំផុត ៖ «សាច់មាន់ ត្រីតូចៗ កង្កែប ខ្យង ឬសាច់ត្រី និងសាច់មាន់ជាដើម ហើយសាច់ត្រូវបន្ថយខ្លាញ់ ព្រោះខ្លាញ់ច្រើនពេកនាំឲ្យមានបញ្ហាសុខភាព។ អាហារមានជាតិផ្សែងត្រូវជៀសវាង ដូចជាត្រីឆ្អើរ និងអាហារផ្អាប់ត្រូវជៀសវាងដែរ មានសាច់ក្រកជាដើម»។
ទាំងលោកស្រីវេជ្ជបណ្ឌិត វង ដាវី ប្រធានគ្លីនិករ៉ាក់ និងលោកស្រីវេជ្ជបណ្ឌិត អៀម មុន្នី ប្រធានផ្នែកសុខភាពបន្តពូជនៃអង្គការសម្ព័ន្ធសុខភាពកុមារនិងសុខភាពបន្តពូជ បានទទួលស្គាល់ថា ស្រ្តីអស់រដូវមានស្បែកជ្រីវជ្រួញនិងស្ងួតខ្លាំង ដូចនេះគេគួរតែបរិភោគទឹកសាបធម្មតាឲ្យបានច្រើន។
លោកស្រីវេជ្ជបណ្ឌិត វង ដាវី ឲ្យដឹងដូច្នេះ ៖ «ទឹកផឹកពី២ទៅ៣លីត្រក្នុងមួយថ្ងៃ ហើយហូបទឹកសណ្តែកសៀង ព្រោះអាចការពារជំងឺពុកឆ្អឹងនិងមហារីកដោះ ហើយកុំឲ្យផ្អែមពេក ព្រោះនាំឲ្យកើតជំងឺទឹកនោមផ្អែម ឬលើសឈាម។ បើមានលទ្ធភាព ទឹកផ្លែឈើស្រស់និងទឹកដោះគោ តែកុំដាក់ស្ករ»។
ចំណែកឯលោកស្រីវេជ្ជបណ្ឌិត វង ដាវី ប្រធានគ្លីនិករ៉ាក់ មានប្រសាសន៍បន្ថែមថា ការហាត់ប្រាណជាប្រចាំ វានឹងជួយកាត់បន្ថយជាតិខ្លាញ់ ជាតិកូឡេស្តូរ៉លនៅក្នុងឈាម ៖ «ស្ត្រីត្រូវធ្វើលំហាត់ប្រាណជាប្រចាំ ហាត់ប្រាណធ្វើឲ្យជាតិខ្លាញ់ ជាតិកូឡេស្តូរ៉លក្នុងឈាមថយចុះ យាងហោចណាស់៣០នាទី ៣ដងក្នុងមួយសប្តាហ៍ មួយទៀតពិនិត្យទម្ងន់កុំឲ្យឡើងខ្ពស់ឬអត់»។
លោកស្រីវេជ្ជបណ្ឌិត អៀម មុន្នី ប្រធានផ្នែកសុខភាពបន្តពូជនៃអង្គការរ៉ាក់ឆាវិញ បានប្រសាសន៍ផ្តាំផ្ញើដល់ស្ត្រីខ្មែរគ្រប់រូបថា ការថែទាំសុខភាពទាំងការហូបចុក អនាម័យ និងការហាត់ប្រាណ គឺជួយស្ត្រីដែលជិតអស់រដូវនិងអស់រដូវជាអចិន្ត្រៃយ៍មានសុខភាពល្អ និងមានអាយុយឺនយូរ។
លោកស្រីវេជ្ជបណ្ឌិត អៀម មុន្នី មានប្រសាសន៍ដូច្នេះ ៖ «ការថែទាំខ្លួនប្រាណគឺជាការសំខាន់ណាស់ គឺគាត់ត្រូវមានអនាម័យ សម្អាតខ្លួនប្រាណ ហាត់ប្រាណ ធ្វើឲ្យសុខភាពល្អ ត្រូវថ្ងៃគឺវាមានវីតាមីនដេ ជួយឲ្យឆ្អឹងរឹងមាំ ការហូបចុកសំខាន់ជាងការលេបថ្នាំ។ ជៀសវាងការប្រើប្រាស់ថ្នាំដោយចិត្តឯង បើសិនជាមានបញ្ហាសុខភាពណាមួយ ត្រូវទៅពិគ្រោះជាមួយគ្រូពេទ្យជំនាញ»។
បន្ថែមពីគុណភាពអាហារដែលលោកអ្នកត្រូវបរិភោគ ការហាត់ប្រាណជាប្រចាំ មានដើរ រត់តិចៗ ហែលទឹក ជិះកង់ជាដើមនោះ វេជ្ជបណ្ឌិតជំនាញបានឲ្យដឹងផងដែរថា ស្ត្រីដែលអស់រដូវត្រូវគេងឲ្យបានគ្រប់គ្រាន់ យ៉ាងហោចណាស់ឲ្យបាន៧ម៉ោងក្នុងមួយយប់។ ហាមជក់បារី ហាមពិសា ស្រាច្រើនហួសហេតុ កាត់បន្ថយជាតិកាហ្វេ បន្ថយការគិតច្រើន ធ្វើឲ្យមានភាពស្មុគស្មាញក្នុងចិត្ត ហើយត្រូវសម្រាកឲ្យបានច្រើន ដើរលេងកំសាន្តនៅកន្លែងរមនីយដ្ឋាននានា ដើម្បីលំហែចិត្ត ធ្វើឲ្យអារម្មណ៍សប្បាយរីករាយ៕