យ៉ាងហោចណាស់ក៏មានស្ត្រីប្រមាណជា ៥០លាននាក់ ក្នុងទ្វីបអាស៊ី កំពុងប្រថុយប្រថាននឹងការឆ្លងមេរោគ អេច.អាយ.វី ដែលនាំឲ្យកើតជំងឺអេដស៍ពីស្វាមី និងពីដៃគូស្នេហារបស់គេ ហើយដែលអ្នកទាំងនោះចូលចិត្តស្វែងរកការសប្បាយខាងផ្លូវភេទនៅខាងក្រៅ ហើយពុំបានប្រើស្រោមអនាម័យការពារ។
ការអះអាងនេះបានត្រូវបញ្ចេញឲ្យដឹងក្នុងរបាយការណ៍របស់កម្មវិធីអេដស៍នៃអង្គការសហប្រជាជាតិ ហៅកាត់ថា UNAIDS នៅក្នុងសន្និសីទលើកទី៩ ស្តីពីការរីករាលដាលនៃជំងឺអេដស៍ នៅទ្វីបអាស៊ី និងប៉ាស៊ីហ្វិក កាលពីថ្ងៃទី ៩ ដល់ ១៣ ខែសីហា កន្លងមកនេះ នៅក្នុងប្រទេសឥណ្ឌូណេស៊ី។
របាយការណ៍របស់ UNAIDS បន្តថា ក្នុងចំណោមស្ត្រីកើតអេដស៍ចំនួន ១លាន៧សែននាក់ នៃចំនួនអ្នកកើតអេដស៍សរុប ៥លាននាក់ក្នុងទ្វីបអាស៊ី មានជាង ៩០% ឆ្លងពីស្វាមី ឬសង្សាររបស់គេ ហើយដែលអត្រានេះបានកើនឡើងពី ១៧% កាលពីឆ្នាំ ១៩៩០ មក ៣៥% ក្នុងឆ្នាំ ២០០៨។
លោកវេជ្ជបណ្ឌិត ទៀ ផល្លា ប្រធានអាជ្ញាធរជាតិប្រយុទ្ធប្រឆាំងនៃជំងឺអេដស៍ នៃរាជរដ្ឋាភិបាលកម្ពុជា បានមានប្រសាសន៍ថា អត្រានៃអ្នកឆ្លងជំងឺអេដស៍បានចុះពី ២% នៅឆ្នាំ ១៩៩៨ មកត្រឹម ០,៩% នៅក្នុងឆ្នាំ ២០០៦ ហើយថាក្នុងចំណោមអ្នកកើតអេដស៍សរុបជាង ៦ម៉ឺននាក់ ដែលមានអាយុចន្លោះពី ១៥ឆ្នាំ ទៅ ៤៩ឆ្នាំ គឺចំនួនជាងពាក់កណ្តាលជាស្ត្រី។
លោកវេជ្ជបណ្ឌិត ទៀ ផល្លា មានប្រសាសន៍ដូច្នេះ ៖ «យើងឃើញថាចំនួនសរុបនៃអ្នកផ្ទុកមេរោគអេដស៍នៅក្នុងស្រុកយើងមានចំនួន ៦១.៤០០នាក់ សរុបទាំងបុរសនិងស្ត្រី ហើយបើគិតតែស្ត្រីមាន ៣២.២០០នាក់ បុរសមាន ២៩.២០០នាក់»។
លោកវេជ្ជបណ្ឌិត ទៀ ផល្លា មានប្រសាសន៍បន្តថា ភាគច្រើនការឆ្លងអេដស៍នៅកម្ពុជា គឺបណ្តាលមកពីស្វាមីចម្លងរោគមកភរិយានិងសង្សារ ៖ «គេរកឃើញថា បុរស ១៤% មានដៃគូរួមភេទច្រើន ប្រហែលជា ៤សែននាក់ ហើយបុរសទាំងនោះនឹងអាចបន្តចម្លងមកភរិយាខ្លួន ក្នុងបុរសអាយុ ១៥ ទៅ ៤៩ឆ្នាំហ្នឹងគាត់មានប្រពន្ធ បើគិតជាមធ្យមគឺប្រហែលជា ៥៤% អ៊ីចឹងគឺ ៤សែននាក់ បើគិតទៅ ៥៤% គឺមានប្រហែលជាជាង ២សែននាក់ ស្ត្រីអាចប្រឈមមុខនឹងការចម្លងពីប្ដីដែលមានដៃគូច្រើន។ នេះជាទិដ្ឋភាពរួមដែលយើងមាន ហៅថាអតុល្យភាពយេនឌ័រ គឺថា កាលលើកមុនស្រ្តីជាធំ ស្រ្ដីជាមេ មានឈ្មោះជាមេផ្ទះមែន ប៉ុន្តែសិទ្ធិអំណាចនៅក្នុងការការពារខ្លួនចំពោះមេរោគអេដស៍នេះ មិនប្រាកដប៉ុន្មានទេ ពីព្រោះស្រ្តីជាទូទៅមិនអាចនិយាយអំពីភាពដែលប្រឈមមុខរបស់ប្ដី ហើយដែលនាំចម្លងដល់ប្រពន្ធ»។
លោកវេជ្ជបណ្ឌិត ទៀ ផល្លា បានមានប្រសាសន៍ឲ្យដឹងផងដែរថា វិបត្តិសេដ្ឋកិច្ចពិភពលោកបច្ចុប្បន្ននេះ បានជំរុញឲ្យកម្មការិនីខ្មែរជាច្រើនម៉ឺននាក់បាត់បង់ការងារ ហើយមានស្ត្រីជាច្រើនងាកមកប្រកបរបររកស៊ីខាងសេវាកំសាន្តនានា និងសេវាផ្លូវភេទ ហើយដែលបញ្ហានេះ លោកមានការព្រួយបាម្ភខ្លាចមានការរាលដាលជំងឺអេដស៍ទៅថ្ងៃអនាគតថែមទៀត។
លោកវេជ្ជបណ្ឌិត ទៀ ផល្លា មានប្រសាសន៍ឲ្យដឹងដូច្នេះ ៖ «ក្នុងអ្នកដែលមានដៃគូច្រើន ១៤% ហ្នឹង គឺមាន ៦% ដែលជាបុរសទិញដូរសេវាកម្មផ្លូវភេទ ហើយឥឡូវនេះស្ត្រីរកស៊ីផ្លូវភេទមានការកើនឡើងច្រើនជាងមុន តួលេខដែលបានទទួលអាចមានដល់ទៅពី ២ម៉ឺនទៅ៣ម៉ឺននាក់ ហើយសំបូរបែបនៅក្នុងផ្ទះបនតិចមែនទែន គឺស្ថិតនៅក្នុងក្រៅផ្ទះបន។ គឺមានន័យថា ខារ៉ាអូខេ បៀរហ្កាឌិន សំបូរបែបច្រើន។ អត្រាផ្ទុកមេរោគអេដស៍នៅក្នុងស្រុកយើងនេះ គឺជារួមបានថយចុះ យើងចាត់ទុកដូចរលកទី១ ប៉ុន្តែយើងមានការព្រួយបារម្ភមិនអាចធៀបនូវរលកទី២ មានន័យថាកើនឡើងវិញ នៅពេលដែលបុរសមានដៃគូច្រើន ហើយមិនបានប្រើប្រាស់ស្រោមអនាម័យ។ បញ្ហានេះក៏មានទាក់ទងជាមួយនឹងរឿងបុរសរួមភេទជាមួយបុរស បញ្ហាធំដែរទៅខាងមុខទៀត គឺយើងឃើញថាក្រុមបុរសដែលរួមភេទនឹងបុរសគឺសឹងតែ ១សែននាក់ហើយ...។ អ៊ីចឹងគឺថ្ងៃមុខថ្ងៃក្រោយទៀត ក្រុមបុរសដែលស្រលាញ់បុរសនោះក៏អាចមានការរីករាលដាល ហើយធ្វើឲ្យផ្ទុះចេញជារលកទី២ទៀតបាន»។
ទាក់ទងនឹងសន្និសីទលើកទី៩ ស្តីពីជំងឺអេដស៍នៅតំបន់អាស៊ីនិងប៉ាស៊ីហ្វិក ដែលបានប្រារព្ធធ្វើនៅក្រុងបាលី នេះ លោកស្រីវេជ្ជបណ្ឌិត Jean D' Cunha នាយិកាអង្គការUNIFEM ប្រចាំតំបន់អាស៊ីខាងត្បូង បានថ្លែងថា ការរើសអើងនិងអំពើហិង្សាលើស្ត្រី និងកុមារី អតុល្យភាពនៃយេនឌ័រ និងអាកប្បកិរិយារបស់បុរសនោះហើយ គឺជាកត្តាចម្បងដែលជំរុញឲ្យមានការរីករាលដាលនៃជំងឺអេដស៍ទៅលើស្ត្រី។
សូមជម្រាបជូនថា ក្នុងរបាយការណ៍នៃអង្គការ UNAIDS ដដែលនោះ ក៏បានលើកឡើងនូវគន្លឹះសំខាន់ៗ ៤ចំណុច ដើម្បីការពារនិងកាត់បន្ថយការរីករាលដាលនៃជំងឺអេដស៍ ដែលក្នុងនោះរួមមានទី១ បង្កើនកម្មវិធីការពារការឆ្លងជំងឺអេដស៍ដល់ក្រុមបុរសរួមភេទជាមួយបុរស ដល់ក្រុមអ្នកប្រើគ្រឿងញៀនដោយការប្រើម្ជុល និងក្រុមស្ត្រីរកស៊ីផ្លូវភេទ។ ទី២ ផ្តួចផ្តើមកម្មវិធីជួយដល់ស្ត្រីដែលងាយរងគ្រោះ និងបុរសដែលជាដៃគូរួមភេទរបស់់ពូកគេ។ ក្នុងនោះរូមមានការពង្រីកបន្ថែមនូវសេវាថែទាំសុខភាពផ្នែកបន្តពូជរបស់ស្ត្រីនិងបុរសទាំងនោះ។ ទី៣ បង្កើនកម្មវិធីការពារទុកជាមុននៃការឆ្លងជំងឺអេដស៍ក្នុងចំណោមអ្នកធ្វើចំណាកស្រុក ក្នុងនោះរួមទាំងដៃគូស្នេហារបស់ពួកគេផង។ ហើយទី៤វិញ គឺធ្វើការស្រាវជ្រាវបន្ថែម ដើម្បីស្វែងយល់ឲ្យបានប្រសើរជាងមុន អំពីការរីករាលដាលនៃជំងឺអេដស៍ក្នុងចំណោមគូស្វាមីភរិយានិងដៃគូស្នេហា៕