លោកវេជ្ជបណ្ឌិត លី ចេងហ៊ុយ ផ្នែកកែសម្ផស្សនៅមន្ទីរពេទ្យព្រះកេតុមាលា និងជាប្រធានទស្សនាវដ្ដីសុខភាពនៅក្នុងប្រទេសកម្ពុជា បានមានប្រសាសន៍ថា ដើម្បីទទួលបានសុខភាពល្អមានកម្លាំងពលំ មនុស្សម្នាក់ៗត្រូវការទទួលទានអាហារគ្រប់មុខ មានបន្លែផ្លែឈើ សាច់សុទ្ធ ឬត្រី ហើយនិងមានអារម្មណ៍រីករាយសប្បាយចិត្ត។
លោកវេជ្ជបណ្ឌិត លី ចេងហ៊ុយ មានប្រសាសន៍ដូច្នេះ ៖ «ការទទួលទានអាហារគឺជាការថែរក្សាសុខភាពមួយ ប៉ុន្តែអាហារមិនអាចដើរតួនាទីជួយឲ្យមនុស្សមានសុខភាពល្អបាន ១០០% នោះទេ។ មនុស្សត្រូវការថែខ្លួន ថែសុខភាពតាមរបៀបផ្លូវចិត្ត ផ្លូវកាយ មានហាត់ប្រាណ ឬលេងកីឡា។ ផ្លូវចិត្ត គឺទាក់ទងនឹងរឿងរ៉ាវក្នុងគ្រួសារជាដើម។ សុខភាពរបស់ស្ត្រីមានកត្តាផ្សេងៗទៀតគ្របដណ្ដប់លើគាត់»។
លោកវេជ្ជបណ្ឌិត លី ចេងហ៊ុយ មានប្រសាសន៍រៀបរាប់អំពីម្ហូបអាហារនៅប្រទេសកម្ពុជា យ៉ាងដូច្នេះ ៖ «របបអាហាររបស់យើងត្រូវការសារធាតុចិញ្ចឹមជាច្រើន។ បងប្អូនស្ត្រីមានធ្លាក់ឈាមរដូវ ត្រូវការជាតិរ៉ែដែក វីតាមីន ឌី។ និយាយរួម ស្ត្រីធ្លាក់ឈាមអាចជួយឲ្យឈាមក្រហមឡើងមកវិញ។ បន្លែមានត្រកួន ស្ពៃ ផ្ទី ទ្រប់ ត្រឡាច ផ្លែឈើមាន ល្ហុង ចេក ម្នាស់។ ពួកគាត់ត្រូវទទួលទានគ្រប់មុខ ការទទួលទាន ៣ពេល និងទៀងទាត់ពេល ក្នុងមួយថ្ងៃជាការត្រឹមត្រូវ។ ក្នុងមួយថ្ងៃអាចទទួលទានសាច់មួយដង កុំពិសាប្រៃ និងជាតិខ្លាញ់ច្រើនពេក»។
ចំពោះសំណួរថា តើស្ត្រីគ្រប់ៗគ្នាចាប់ពីអាយុ ៤០ឆ្នាំឡើងទៅ គួរប្រើប្រាស់ថ្នាំវីតាមីន ឬចាក់ថ្នាំកម្លាំងបន្ថែមដែរ ឬទេ?
លោកវេជ្ជបណ្ឌិត លី ចេងហ៊ុយ បានមានប្រសាសន៍បកស្រាយយ៉ាងដូចនេះ ៖ «ការចាក់ ឬក៏ការប្រើថ្នាំវីតាមីនបន្ថែមនេះ ការពិតគឺពុំមានផលប៉ះពាល់អ្វីធំដុំទេ ប៉ុន្តែបើស្ត្រីបរិភោគគ្រប់គ្រាន់ត្រឹមត្រូវ ការប្រើប្រាស់វីតាមីន គេមិនចាំបាច់ទេ។ ប៉ុន្តែផ្ទុយទៅវិញ វីតាមីននាំឲ្យខ្លួនរបស់យើងខំធ្វើ មូតាប៊ូលីហ្ស កាន់តែច្រើនឡើង ដើម្បីឲ្យសារធាតុវីតាមីនបញ្ចេញពីក្នុងខ្លួនមកក្រៅខ្លួនវិញ»។
លោកវេជ្ជបណ្ឌិតបានផ្ដល់ដំបូន្មានថា មុនសម្រេចធ្វើអ្វីមួយ ដូចជាប្រើថ្នាំវីតាមីន ឬចាក់ថ្នាំ ស្ត្រីគួរតែទៅពិគ្រោះជាមួយវេជ្ជបណ្ឌិតជំនាញជាមុនសិន ៖ «ជាទូទៅមានតែគ្រូពេទ្យទេ ដែលអាចប្រាប់ថា គួរតែប្រើ ហើយប្រើក្នុងរយៈពេលប៉ុន្មាន។ អ៊ីចឹងអ្វីដែលសំខាន់ បងប្អូនត្រូវទទួលទានសារជាតិទាំងអស់នោះ ល្មមៗគ្រប់គ្រាន់។ មានស្ត្រីខ្លះយល់ថា ការចាក់ថ្នាំធ្វើឲ្យសាច់ល្អ ស្បែកថ្លា ប៉ុន្តែតាមលក្ខណៈវេជ្ជសាស្ត្រ មិនចាំបាច់ធ្វើដូចនេះទេ លើកលែងតែអ្នកខ្លះដែលពេទ្យតម្រូវឲ្យប្រើថ្នាំបន្ថែម»។
តាមការស្រាវជ្រាវនៃមជ្ឈមណ្ឌលព័ត៌មានអំពីម្ហូបអាហារនៅអាស៊ី (AFIC) បានឲ្យដឹងថា មនុស្សគ្រប់ៗគ្នាគួរបរិភោគចំណីអាហារគ្រប់មុខរាល់ថ្ងៃ ក្នុងនោះមានត្រី សាច់សុទ្ធគ្មានខ្លាញ់ សាច់មាន់ ឬគ្រាប់ធញ្ញជាតិ ដូចជាគ្រាប់សណ្ដែក គ្រាប់ល្ងជាដើម និងបរិភោគបន្លែផ្លែឈើឲ្យបានច្រើន។ ពិសាទឹក ពិសាទឹកដោះគោ ទឹកសណ្ដែក និងបរិភោគផលិតផលធ្វើពីទឹកដោះគោ បរិភោគអាហារ ដែលសំបូរជាតិកាល់ស្យូម មានបន្លែបៃតងជាដើម។ កុំពិសាអំបិលច្រើនពេក ហើយត្រូវប្រើអំបិលដែលមានជាតិអ៊ីយ៉ូដ។
ប្រភពដដែលបន្តថា បន្ថែមពីការបរិភោគចំណីអាហារសម្រាប់ចិញ្ចឹម ឬផ្ដល់អត្ថប្រយោជន៍ដល់រាងកាយនោះ ការហាត់ប្រាណទៀងទាត់ ការគេងសម្រាកគ្រប់គ្រាន់ និងជៀសវាងការពិសាបារី គឺនឹងជួយជំរុញឲ្យលោកអ្នកមានសុខភាពល្អ។ ចំពោះសុរាវិញ ប្រភពដដែលបញ្ជាក់ថា អាចទទួលទានស្រាបន្តិចបន្តួច។
លោកវេជ្ជបណ្ឌិត លី ចេងហ៊ុយ ផ្នែកកែសម្ផស្សនៅមន្ទីរពេទ្យព្រះកេតុមាលា និងជាប្រធានទស្សនាវដ្ដីសុខភាពនៅក្នុងប្រទេសកម្ពុជា បានមានប្រសាសន៍ផ្កាំផ្ញើថា ប្រជាពលរដ្ឋខ្មែរ គួរតែចាប់ផ្ដើមថែទាំសុខភាពចាប់ពីវ័យក្មេងទៅ គឺមានសារសំខាន់ណាស់។
លោកវេជ្ជបណ្ឌិត លី ចេងហ៊ុយ មានប្រសាសន៍ដូច្នេះ ៖ «វិធីការពារប្រសើរជាជាងការព្យាបាល។ បើសិនការថែទាំសុខភាពត្រឹមត្រូវតាំងពីមានរដូវដំបូង បន្ទាប់មកមានកូនរហូតដល់អស់រដូវ ធ្វើបានត្រឹមត្រូវ ដោយផ្អែកតាមសុខភាពរាងកាយ សម្រស់ សុខភាពផ្លូវចិត្ត។ ដូច្នេះបើយើងដាក់ចិត្តថែទាំសុខភាពតាំងពីក្មេង យើងក្លាហានស្វែងរកព័ត៌មាន ក្លាហានទៅជួបគ្រូពេទ្យ ដើម្បីថែទាំសុខភាពគឺជាការប្រសើរ ហើយបើធ្វើបានដូចនេះ ស្ត្រីអាចមានសុខភាពល្អដោយមិនចំណាយប្រាក់ច្រើន និងអាចមានអាយុវែង»។
យោងតាមស្ថិតិជំរឿនប្រជាពលរដ្ឋខ្មែរឆ្នាំ២០០៨ បានបង្ហាញថា អាយុកាលរបស់ប្រជាពលរដ្ឋខ្មែរ ជាមធ្យមគឺបុរសអាយុ ៥៩ឆ្នាំ ស្ត្រីអាយុ ៦៣ឆ្នាំ ហើយចំណែកអត្រាទារកស្លាប់វិញ ក្នុងចំណោមទារក ១ពាន់នាក់ដែលកើត គឺមានទារក ៥៨នាក់បានត្រូវស្លាប់៕