គន្លឹះជាមូលដ្ឋានសំខាន់បីដើម្បីធ្វើឲ្យប្រសើរឡើងនូវសុខភាពផ្លូវភេទ

ដោយ ម៉ៅ សុធានី

2008-10-03

វេជ្ជបណ្ឌិតជំនាញខាងសុខភាពផ្លូវភេទបានអះអាងថា ស្វាមី និងភរិយាគួរតែស្វែងយល់ដឹងនូវចំណុចសំខាន់ៗបី ដែលជាមូលដ្ឋានចម្បង ដើម្បីធ្វើឲ្យទំនាក់ទំនងស្នេហាក្នុងគ្រួសារ មានលក្ខណៈប្រសើរ មានសុវត្ថិភាព និងប្រកបដោយសុភមង្គល។

តាមការអះអាងរបស់លោកស្រីវេជ្ជបណ្ឌិត ចុង វណ្ណដារ៉ា មន្ត្រីទទួលបន្ទុកកម្មវិធី សុខភាពបន្តពូជយុវវ័យ និងអេច.អាយ.វី អេដស៍ របស់អង្គការមូលនិធិសហប្រជាជាតិសម្រាប់ប្រជាជន UNFPA បានឲ្យដឹងថា ដើម្បីធ្វើឲ្យសុខភាពផ្លូវភេទមានលក្ខណៈល្អប្រសើរ មានសុវត្ថិភាព និងធ្វើឲ្យគ្រួសារនោះមានសុភមង្គល គឺគេពឹងផ្អែកទាំងស្រុងលើចំណុចសំខាន់ៗបីជាមូលដ្ឋាន។

លោកស្រីវេជ្ជបណ្ឌិត ចុង វណ្ណដារ៉ា មានប្រសាសន៍ឲ្យដឹងដូច្នេះ ៖ «ទីមួយមានចំណេះដឹង ទី២ មានឥរិយាបថល្អ និងទីបី យើងមានជំនាញក្នុងការយល់ដឹង និងការអនុវត្តផងដែរ។ អ៊ីចឹងបើយើងមានបីយ៉ាងហ្នឹង គឺយើងអាចធ្វើឲ្យសុខភាពផ្លូវភេទយើងមានប្រសិទ្ធភាព មានសុវត្ថិភាព និងសុភមង្គល ហើយបើយើងនិយាយពីទេសជាតិវិញ គឺវារីកចម្រើន»។

សូមជម្រាបជូនថា អង្គការមូលនិធិសហប្រជាជាតិសម្រាប់ប្រជាជន UNFPA មានកម្មវិធីផ្សព្វផ្សាយ និងចុះអប់រំបង្រៀននៅតាមសហគមន៍នានា ស្តីអំពីសុខភាពបន្តពូជ ការការពារជំងឺកាមរោគ និងជំងឺអេដស៍ជាដើម ហើយលោកស្រីវេជ្ជបណ្ឌិត ចុង វណ្ណដារ៉ា ក៏បានថ្លែងផងដែរថា លោកស្រីមានការលំបាកក្នុងការពន្យល់ ឬណែនាំអំពីបញ្ហាសុខភាពផ្លូវភេទនេះ។

លោកស្រីវេជ្ជបណ្ឌិត ចុង វណ្ណដារ៉ា មានប្រសាសន៍ដូច្នេះ ៖ «ខ្ញុំមានការលំបាកណាស់ដើម្បីធ្វើឲ្យ ស្ត្រីទាំងនោះយល់ថា រឿងផ្លូវភេទពុំមែនជារឿងអាសអាភាសទេ។ ពិតជាការលំបាកណាស់ ខ្ញុំមិនដឹងថា ផ្នត់គំនិតខ្មែរយើង ពេលណាដែលខ្មែរយើងបើកទូលាយ បើកចំហ បើកចិត្តឲ្យទូលាយដើម្បីជជែកគ្នា។ ប៉ុន្តែនៅស្រទាប់ខ្មែរយើងជាច្រើន រួមទាំងអ្នកមានចំណេះវិជ្ជាផង មានការពិបាកក្នុងការនិយាយគ្នា»។

បន្ថែមពីការលំបាកក្នុងការផ្លាស់ប្តូរផ្នត់គំនិតខ្មែរយើង ដែលតែងតែចាត់ទុកថារឿងផ្លូវភេទ គឺជារឿងលាក់លៀម ជារឿងផ្ទាល់ខ្លួន និងជារឿងកេរ្តិ៍ខ្មាស ដែលពុំគួរនិយាយ ឬជជែកនោះ លោកស្រីវេជ្ជបណ្ឌិត វណ្ណដារ៉ា បានមានប្រសាសន៍អំពីអារម្មណ៍របស់លោកស្រីយ៉ាងដូច្នេះ ៖ «ខ្ញុំមានអារម្មណ៍ថា ខ្ញុំជាមនុស្សប្លែកខុសពីគេនៅក្នុងសង្គមខ្មែរ សូម្បីតែជាមួយសហសេវិក ធ្វើការជាមួយគ្នា ដែលគាត់ជាស្ត្រីដែរ ហើយពេលខ្លះយើងបានរៀនសូត្រជាមួយគ្នា នៅពេលដែលខ្ញុំបង្ហាញ អំពីការប្រើប្រាស់ស្រោមអនាម័យ ធ្វើយ៉ាងម៉េចៗ ដាក់ជើងយ៉ាងម៉េចៗ រហូតមកដល់ឥឡូវនេះ គេនៅតែសើចអំពីខ្ញុំ»។

ស្តីពីសំណួរដែលចង់ដឹងថា តើនៅក្នុងប្រទេសកម្ពុជា ប្រសិនបើស្ត្រី ឬយុវនារីចង់ដឹងព័ត៌មាននានាអំពីសុខភាពផ្លូវភេទ តើគេអាចរកសៀវភៅអានអំពីសុខភាពផ្លូវភេទដែរ ឬទេ?

លោកស្រី ជា វណ្ណាត អតីតប្រធានអង្គការអភិវឌ្ឍន៍សង្គម បានមានប្រសាសន៍ថា តាមលោកស្រីដឹងមានការបោះពុម្ពសៀវភៅខ្លះៗដែរ តែមិនមានការផ្សព្វផ្សាយទូលាយបានច្រើនទេ ៖ «មានសៀវភៅរបៀបជាពេទ្យដូចជា គេពន្យល់អំពីជំងឺកាមរោគ វាមានអ្វីខ្លះៗ ហើយវាមានលក្ខណៈយ៉ាងម៉េច។ ប៉ុន្តែការផ្សព្វផ្សាយពុំបានទំលំទូលាយទេ គឺមានមនុស្សភាគតិចទេ ដែលអាចមានសៀវភៅនោះទៅអានដើម្បីស្វែងយល់ ហើយមិនបានអប់រំជាសាធារណៈតាមសាលា ឬតាមគ្រួសារអីដែរ»។

ទោះជាក្នុងមូលហេតុណាក៏ដោយ លោកស្រីវេជ្ជបណ្ឌិត វណ្ណដារ៉ា បានផ្តល់យោបល់ថា មធ្យោបាយដ៏មានប្រសិទ្ធភាពដើម្បីផ្សព្វផ្សាយ និងអប់រំអំពីបញ្ហាសុខភាពផ្លូវភេទ គឺតាមរយៈវិទ្យុ ៖ «មធ្យោបាយងាយស្រួលគឺតាមវិទ្យុ ព្រោះផ្ទះនីមួយៗ គឺគេមានវិទ្យុ។ ចំណែករឿងឯកសារ ឬសៀវភៅគឺទាក់ទងនឹងការអាន។ ហើយឥឡូវនេះ មានអង្គការក្រៅរដ្ឋាភិបាល និងរដ្ឋាភិបាល បានចុះទៅដល់មូលដ្ឋានហើយដែរ ដូច្នេះនេះជាឱកាសក្នុងការទទួលបានព័ត៌មាន»។

សូមរំឭកជូនថា កាលពីដើមខែឧសភា ឆ្នាំ២០០៨ កន្លងមកនេះ ភ្នាក់ងារសហរដ្ឋអាមេរិកសម្រាប់ ការអភិវឌ្ឍន៍អន្តរជាតិ USAID និងភ្នាក់ងារចក្រភពអង់គ្លេស សម្រាប់ការអភិវឌ្ឍន៍អន្តរជាតិ DFID បានចេញសេចក្តីថ្លែងការណ៍ ប្រកាសនូវកម្មវិធីរួមគ្នាថ្មីមួយ ដែលនឹងចំណាយថវិកាអាចដល់ ២៧លានដុល្លារអាមេរិក សម្រាប់រយៈពេល ៥ឆ្នាំ ផ្តើមពីថ្ងៃ៦ ខែឧសភា ឆ្នាំ២០០៨ ក្នុងគោលដៅកាត់បន្ថយអត្រានៃអ្នកឆ្លងមេរោគអេច.អាយ.វី អេដស៍ អត្រាកុមារស្លាប់ និងធ្វើឲ្យប្រសើរឡើងនៃសុខភាពបន្តពូជ និងសុខភាពផ្លូវភេទនៅកម្ពុជា។

នេះមានន័យថា តាមរយៈកម្មវិធីថ្មីនេះ ប្រជាពលរដ្ឋខ្មែរគ្រប់ស្រទាប់វណ្ណៈ មិនថាមាន ឬក្រនៅទូទាំងប្រទេសកម្ពុជា នឹងអាចទទួលបានព័ត៌មាន និងសេវាសុខភាពបន្តពូជ និងសុខភាពផ្លូវភេទ៕

បោះពុម្ព អ៊ីម៉េល

ឧបករណ៍រឿង

	ស្តាប់សំឡេង
	ថតសំឡេង
	អ៊ីម៉េល
	ព្រឹត្តិបត្រព័ត៌មាន
	បោះពុម្ព