ស្ត្រីខ្មែរត្រៀមខ្លួនប្រកួតប្រជែងក្នុងការបោះឆ្នោតសកល
ដោយ ម៉ៅ សុធានី
2008-04-19
ស្ត្រីគ្រូបង្គោល ៣៥រូប មកពីគណបក្សធំៗបី ដែលមានអាសនៈនៅសភា ក្រោយពីបានចូលរួមវគ្គបណ្តុះបណ្តាល ៣ថ្ងៃ កាលពីដើមខែមិនា កន្លងមកនេះ ដែលរៀបចំឡើងដោយវិទ្យាស្ថានជាតិប្រជាធិបតេយ្យសម្រាប់កិច្ចការអន្តរជាតិ ឬហៅកាត់ថា NDI បានសម្តែងក្តីសុទិដ្ឋិនិយមថា ការរៀនសូត្រពីចំណេះចេះដឹងទូទៅ ក៏ដូចជាជំនាញក្នុងការធ្វើយុទ្ធនាការផ្សព្វផ្សាយការរៀបចំផែនការ និងការធ្វើទំនាក់ទំនងសម្រាប់ការបោះឆ្នោតសកលខាងមុខនេះ និងជំរុញឲ្យមានប្រជាពលរដ្ឋកាន់តែច្រើនឡើងៗ ជាពិសេសស្ត្រីមកបោះឆ្នោតជ្រើសរើសតំណាងរបស់គេ ។
បេក្ខនារីបម្រុងឈរឈ្មោះតំណាងរាស្ត្រពីគណបក្សប្រជាជនកម្ពុជា គណបក្សសមរង្សី និងគណបក្សហ៊្វុនស៊ិនប៉ិច បានមានប្រសាសន៍បញ្ជាក់ប្រាប់វិទ្យុអាស៊ីសេរីតាមទូរស័ព្ទថា គណបក្សរបស់គេនីមួយៗ មានទិសដៅជំរុញឲ្យមានស្ត្រីឈរឈ្មោះជាតំណាងរាស្ត្រ ឲ្យបានច្រើននៅក្នុងអាណត្តិនេះ ព្រមទាំងផ្តល់លទ្ធភាពឲ្យបញ្ជីឈ្មោះបេក្ខនារី មានលំដាប់លេខរៀងនៅខាងលើ ។
លោកស្រី យាន ហ៊ុនលី អាយុ ៦៥ឆ្នាំ សមាជិកគណៈកម្មាធិការអចិន្ត្រៃយ៍ នៃគណបក្សប្រជាជនកម្ពុជា និងជាអតីតប្រធានកិច្ចការនារី ខេត្តតាកែវ ដែលបច្ចុប្បន្នចូលនិវត្តន៍ ហើយដែលបម្រុងនឹងឈរឈ្មោះជាបេក្ខនារីតំណាងរាស្ត្រ នៅមណ្ឌលខេត្តតាកែវនោះ បានមានប្រសាសន៍បង្ហាញក្តីសង្ឃឹមថា ការបោះឆ្នោតលើកនេលោកស្រីនឹងអាចបានជាប់ឆ្នោត ដោយសារតែឈ្មោះនៅលំដាប់លេខ១ ៖ «ខ្ញុំធ្លាប់ឈរឈ្មោះជាច្រើនអាណត្តិហើយតែមិនជាប់ ព្រោះលេខនៅខាងក្រោមគេ តែលើកនេះលេខនៅខាងលើ សង្ឃឹមថានឹងបានជាប់ឆ្នោត» ។
លោកស្រី យាន ហ៊ុនលី បានមានប្រសាសន៍បន្តថា វគ្គបណ្តុះបណ្តាលស្តីពីជំនាញឃោសនាបោះឆ្នោតនេះ មានសារសំខាន់ណាស់ ហើយដែលលោកស្រីនឹងខិតខំ ពន្យល់ឲ្យពលរដ្ឋគ្រប់ៗគ្នា បានយល់ច្បាស់អំពីសិទ្ធិរបស់គេដែលជាម្ចាស់ឆ្នោត ៖ «ខ្ញុំយល់ថាវាមានប្រយោជន៍ ព្រោះយើងអាចដឹងអំពីការងារហ្នឹង ហើយពេលយើងចុះផ្សព្វផ្សាយឃោសនា យើងនឹងយកចំណេះដឹងអស់ហ្នឹង ដើម្បីឲ្យប្រជាពលរដ្ឋទាំងអស់យល់បាន...» ។
សូមរំឭកជូនថា នៅក្នុងវគ្គបណ្តុះបណ្តាល ៣ថ្ងៃ ដែល NDI បានរៀបចំធ្វើឡើង កាលពីថ្ងៃ ៥ ដល់ ៧ ខែមិនា ឆ្នាំ២០០៨ កន្លងមកនេះ ស្រ្តី ៣៥នាក់ ពីគណបក្សធំៗបី មានគណបក្សប្រជាជនកម្ពុជា គណបក្សសមរង្សី និងគណបក្សហ៊្វុនស៊ិនប៉ិច បានត្រូវទទួលការហ្វឹកហាត់ធើ្វជាគ្រូបង្គោល ដើម្បីចុះធ្វើការផ្សព្វផ្សាយអំពីដំណើរការ នៃការបោះឆ្នោត យុទ្ធនាការឃោសនាបោះឆ្នោត ការពង្រឹងសមត្ថភាពជាអ្នកដឹកនាំ និងជាពិសេសគឺចង់ឲ្យ ប្រជាពលរដ្ឋទូទៅ បានយល់ដឹងអំពីសារសំខាន់ នៃសិទ្ធិពលរដ្ឋ ដែលជាម្ចាស់ឆ្នោត និងការជ្រើសរើសមេដឹកនាំ ។
លោកស្រី ម៉ើក សាមាន អនុប្រធានចលនាស្ត្រី នៃគណបក្សហ៊្វុនស៊ីនប៉ិច នៅខេត្តកំពង់ឆ្នាំង បើទោះបីជាលោកស្រីនឹងពុំឈរឈ្មោះជា បេក្ខនារីតំណាងរាស្ត្រក្នុង អាណត្តិបោះឆ្នោកលើកនេះក៏ដោយ លោកស្រីក៏បានចូលរួមវគ្គបណ្តុះបណ្តាល ៣ថ្ងៃនោះដែរ ៖ «ខ្ញុំឃើញថា វាមានសារសំខាន់ចំពោះចលនាស្ត្រី ឲ្យគាត់យល់ពីបញ្ហា នៃការឃោសនាបោះឆ្នោតនេះ។ ខ្ញុំរៀន ខ្ញុំបានយល់អំពីបញ្ហានេះ ហើយខ្ញុំនឹងក្លាយជាគ្រូបង្គោល ហើយយកចំណេះវិជ្ជានេះទៅបង្រៀនបន្ត ហើយខ្ញុំនឹងណែនាំឲ្យគេយល់ថា ដើម្បីបានទទួលបានជោគជ័យសម្រាប់ការបោះឆ្នោតត្រូវធ្វើដូចម្តេច» ។
ចំណែកឯលោកស្រី កិត្យា វរលក្ខណ៍ អគ្គលេខាធិការរងនៃគណបក្សសមរង្សី ដែលបម្រុងនឹងឈរឈ្មោះលើកដំបូង ជាបេក្ខនារីតំណាងរាស្ត្រ នៅមណ្ឌលខេត្តកំពង់ចាម របស់គណបក្សសមរង្សី បានមានប្រសាសន៍អំពីគុណសម្បត្តិ និងចរិយាសម្បត្តិ របស់ស្ត្រី ដែលអាចក្លាយជាអ្នកដឹកនាំល្អបាន ៖ «ស្ត្រីមាន ៥២% បើស្ត្រីចូលរួមបានច្រើននិយាយទៅគេឆាប់ជឿជាងបុរស ស្ត្រីខ្មាសអៀននឹងអំពើពុករលួយ គិតពីកិត្តិយស ។ ស្ត្រីបើសិនជាបានធ្វើជាអ្នកដឹកនាំ បានលុយកាក់ពីការងាររបស់គាត់ គាត់មិនមានប្តីចុង ប្តីដើម ដូចប្រុសៗទេ ។ ស្ត្រីបានថវិកាមកសម្រាប់ធ្វើដូចម្តេចឲ្យគ្រួសារមានសេចក្តីថ្លៃថ្នូរ ឲ្យកូនបានរៀនសូត្រ ព្រោះគាត់ជាអ្នកគ្រប់គ្រងក្នុងគ្រួសារ ហើយគាត់ដឹងជាងបុរស» ។
វិទ្យុអាស៊ីសេរី នៅពុំទាន់បានទទួលស្ថិតិពិតប្រាកដ នូវចំនួនបេក្ខនារីដែលបម្រុងឈរឈ្មោះនៅក្នុងអាណត្តិទី៤ នេះ ថា មានប៉ុន្មាននាក់ មកពីគណបក្សណាខ្លះហើយនៅពុំទាន់បានដឹងចំនួនបេក្ខនារីបម្រុងឈរឈ្មោះលើកនេះ ច្រើនជាងកាលពីអាណត្តិទី៣ ឬយ៉ាងណានៅឡើយទេ ក៏ប៉ុន្តែតាមវ៉ឹបសៃរបស់សភាជាតិកម្ពុជាក្នុងចំណោមសមាជិកសភាសរុបទាំងអស់ ១២៣នាក់ មានស្ត្រីតំណាងរាស្ត្រចំនួន ២៤នាក់ ក្នុង ១៤នាក់ មកពីខាងគណបក្សប្រជាជនកម្ពុជា ៥នាក់ ពីគណបក្សហ៊្វុនស៊ិនប៉ិច និង ៥នាក់ទៀត មកពីខាងគណបក្សសមរង្សី ៕
ឧបករណ៍រឿង
|
ស្តាប់សំឡេង |
|
ថតសំឡេង |
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
