ក្រុមយុវជន បានចុះទៅសិក្សាពីតំបន់អារ៉ែង បានចេញរបាយការណ៍មួយអំពីសក្ដានុពលនៃតំបន់អារ៉ែង ដែលជាតំបន់ព្រៃក្រាស់ចុងក្រោយសម្រាប់ប្រទេសកម្ពុជា។ យុវជនទាំងនោះ នៅតែព្រួយបារម្ភអំពីការអភិវឌ្ឍវារីអគ្គិសនីនៅតំបន់អារ៉ែងនេះ ទោះបីជារដ្ឋាភិបាលប្រកាសមិនធ្វើវារីអគ្គិសនីនៅក្នុងអាណត្តិនេះក្ដី។
តើយុវជនបានរកឃើញសក្ដានុពលអ្វីខ្លះនៅតំបន់អារ៉ែង?
ក្រុមយុវជនចង់អភិវឌ្ឍតំបន់អារ៉ែង ឲ្យនៅគង់វង្សដដែល គ្មានការកែប្រែតំបន់នេះទៅជាតំបន់អភិវឌ្ឍន៍នោះទេ ដោយពួកគេចង់រក្សាទុកតំបន់ជាយអារ៉ែងនេះ ទៅជាតំបន់ព្រៃសន្តិភាព។
ការអំពាវនាវរបស់ក្រុមយុវជនចង់រក្សាទុកតំបន់អារ៉ែង ទៅជាតំបន់ព្រៃសន្តិភាពនេះ នៅបន្ទាប់ពីក្រុមយុវជនជាច្រើនក្រុមកាលពីពេលថ្មីៗនេះ បានធ្វើសកម្មភាពចុះទៅទស្សនកិច្ច និងធ្វើកម្មសិក្សាជាច្រើនពីសក្ដានុពលតំបន់អារ៉ែង។
យុវជនកសាងសន្តិភាពវ័យក្មេងនៃវិទ្យាស្ថានសន្តិភាព លោក គួយ កក្កដា ដែលបានដឹកនាំយុវជនទៅទស្សនកិច្ចតំបន់អារ៉ែង កាលពីថ្ងៃទី១៣ ដល់ថ្ងៃទី១៥ ឧសភា មានប្រសាសន៍ថា ការរីកចម្រើននៃសក្ដានុពលអេកូទេសចរណ៍តំបន់នេះពីមួយថ្ងៃទៅមួយថ្ងៃ ប្រជាពលរដ្ឋភាគច្រើនចាប់ផ្ដើមស្គាល់កាន់តែច្បាស់ពីសម្រស់ធម្មជាតិ កេរដំណែលរបស់ដូនតាដែលបន្សល់ទុកនៅទីនោះ។ លោកបន្ថែមថា ការបញ្ឈប់ការសាងសង់ទំនប់វារីអគ្គិសនីងាកទៅរកការអភិវឌ្ឍអេកូទេសចរណ៍ធម្មជាតិវិញ គឺជាជម្រើសដ៏ល្អបំផុត ដើម្បីជួយដល់សហគមន៍ជនជាតិដើមភាគតិចជង អភិរក្សព្រៃឈើ និងសត្វព្រៃដ៏កម្រ ក៏ដូចជាថែរក្សាបរិស្ថានដើម្បីធានាសុខុមាលភាពរបស់មនុស្សជំនាន់ក្រោយ និងភាពសុខដុមរមនារបស់ប្រជាពលរដ្ឋ៖ «»។
តំបន់អារ៉ែង ជាផ្នែកមួយនៃជួរភ្នំក្រវាញ មានផ្ទៃដីជិត ១០ម៉ឺនហិកតារ គ្របដណ្ដប់ដោយព្រៃស្រោង ព្រៃរបោះ ដីចម្ការ ដីស្រែ និងដងស្ទឹង។ តំបន់ជាយអារ៉ែងនេះ សម្បូរទៅដោយធនធានធម្មជាតិ សត្វព្រៃ និងកន្លែងទេសចរណ៍គួរឲ្យទាក់ទាញ និងល្អស្អាតជាច្រើនកន្លែង។ ដោយសារតែតំបន់ជាយអារ៉ែងជាតំបន់ព្រៃចុងក្រោយ ក្រុមយុវជន និងប្រជាសហគមន៍ ចង់ឲ្យរដ្ឋាភិបាលអភិវឌ្ឍតំបន់ជាយអារ៉ែងនេះឲ្យទៅជាតំបន់អេកូទេសចរណ៍ និងចង់ថែរក្សាសម្បត្តិធម្មជាតិដ៏ស្រស់ត្រកាលមួយនេះ ឲ្យនៅគង់វង្ស និងរក្សាសភាពដើម។ ក្រុមយុវជនមួយចំនួន កំពុងធ្វើសកម្មភាពយ៉ាងផុសផុល ដើម្បីការពារបរិស្ថាន ព្រៃឈើ និងធនធានធម្មជាតិ ថែមទាំងកិច្ចការនយោបាយផង។
យុវជនស្ម័គ្រចិត្តនៃអង្គការកម្មវិធីអភិវឌ្ឍន៍ធនធានយុវជន លោក ខុម សេរីវឌ្ឍន៍ លើកឡើងថា គម្រោងសាងសង់ទំនប់វារីអគ្គិសនីបានស្ងប់ស្ងាត់បន្តិចនាពេលបច្ចុប្បន្ន បន្ទាប់ពីរដ្ឋាភិបាលបានប្រកាសថា មិនសាងសង់ទំនប់វារីអគ្គិសនីនោះ។ លោកបញ្ជាក់ថា បញ្ហាសំខាន់ លោកចង់ឲ្យស្ថាប័នពាក់ព័ន្ធនានា ជួយពង្រឹងសហគមន៍តំបន់អារ៉ែងឲ្យទៅជាសហគមន៍ដ៏រឹងមាំមួយ ដើម្បីរក្សាព្រៃ និងធនធានធម្មជាតិដទៃទៀតនៅតំបន់អារ៉ែង៖ «»។
របាយការណ៍ស្រាវជ្រាវរបស់ លោក គួយ កក្កដា ឲ្យដឹងថា ជ្រលងអារ៉ែង គឺជាកន្លែងដ៏ស្រស់ស្អាតមួយដែលមានទីតាំងស្ថិតនៅក្នុងខេត្តកោះកុង នៅភាគនិរតីនៃប្រទេសកម្ពុជា មានប្រភេទសត្វព្រៃដ៏កម្រ ហើយព្រៃឈើដ៏ស្រស់ត្រកាលចុងក្រោយនៅក្នុងប្រទេសកម្ពុជា ហើយជាកន្លែងដែលជនជាតិដើមភាគតិចជង កំពុងរស់នៅក្នុងភាពសុខដុមជាមួយបរិស្ថានជុំវិញខ្លួនរបស់គេ នៅក្នុងជ្រលងភ្នំនេះ ជាពិសេសតំបន់នេះជាព្រលឹងនៃព្រៃឈើចុងក្រោយ និងជាជម្រកសម្រាប់សត្វព្រៃដ៏កម្រមួយចំនួន ដូចជា សត្វក្រពើភ្នំ ត្រីនាគ ដំរីធំៗ និងជនជាតិដើមភាគតិចជង ប្រមាណ ១.៥០០នាក់ ដែលរស់នៅទីនោះតាំងពីយូរយារណាស់មកហើយ។
ប្រធានវិទ្យាស្ថានសន្តិភាព លោក ឡុង ខែត្រ មានប្រសាសន៍ថា លោកចង់ឲ្យរដ្ឋាភិបាលរក្សាតំបន់អារ៉ែងនេះជាតំបន់ធម្មជាតិ ឬជាព្រៃសន្តិភាព ដោយពុំអភិវឌ្ឍអ្វីផ្សេងនោះឡើយ ព្រោះតំបន់នេះជាតំបន់ទេសចរណ៍សំខាន់មួយសម្រាប់កម្ពុជា ដែលជាធនធានចុងក្រោយដ៏សំខាន់របស់កម្ពុជា៖ «»។
លោកនាយករដ្ឋមន្ត្រី ហ៊ុន សែន ថ្លែងនៅក្នុងទិវាជាតិទីក្រុងស្អាត កាលពីខែកុម្ភៈ ឆ្នាំ២០១៥ ថា គម្រោងអភិវឌ្ឍន៍ទំនប់វារីអគ្គិសនីនៅតំបន់អារ៉ែង ឋិតនៅក្នុងខេត្តកោះកុង ដ៏ចម្រូងចម្រាសនោះ នឹងមិនត្រូវធ្វើទេនៅអាណត្តិនេះ ដោយរង់ចាំការសិក្សាបន្ថែមជាមុនសិន។ លោកបញ្ជាក់ថា ចិត្តរបស់លោក លោកចង់រក្សាតំបន់នោះទុកឲ្យក្មេងជំនាន់ក្រោយជាអ្នកសម្រេច ថាតើត្រូវធ្វើដូចម្ដេច? ការលើកឡើងរបស់លោកនាយករដ្ឋមន្ត្រី ហ៊ុន សែន នេះ គឺស្របទៅនឹងអ្វីដែលក្រុមយុវជន កំពុងចង់បាននៅពេលនេះ គឺពួកគេចង់រក្សាតំបន់ព្រៃភ្នំអារ៉ែងនេះ ឲ្យនៅគង់វង្សដដែល និងប្រែក្លាយតំបន់នេះទៅជាតំបន់អេកូទេសចរណ៍ និងជាតំបន់ព្រៃសន្តិភាព។
ទោះបីជាយ៉ាងនេះក្ដី ប្រធានអង្គការកម្មវិធីអភិវឌ្ឍន៍ធនធានយុវជន លោក ជាង សុខា ហាក់ដូចជាមិនទាន់មានទំនុកចិត្តជាមួយរដ្ឋាភិបាលទាំងស្រុងនៅឡើយ។ លោកបញ្ជាក់ថា គម្រោងការរបស់រដ្ឋាភិបាលអាចប្រែប្រួលបានគ្រប់ពេល៖ «»។
របាយការណ៍របស់ លោក គួយ កក្កដា ដដែលបញ្ជាក់ថា ការបញ្ឈប់ការសាងសង់ទំនប់វារីអគ្គិសនី ហើយងាកទៅរកការអភិវឌ្ឍអេកូទេសចរណ៍ធម្មជាតិវិញ គឺជាជម្រើសដ៏ល្អបំផុត ដើម្បីជួយដល់សហគមន៍ជនជាតិដើមភាគតិចជង អភិរក្សព្រៃឈើរបស់យើង និងសត្វព្រៃដ៏កម្រ ក៏ដូចជាថែរក្សាបរិស្ថាន ដើម្បីធានាសុខុមាលភាពរបស់មនុស្សជំនាន់ក្រោយ និងភាពសុខសាន្តរបស់ជនជាតិដើមភាគតិចនៅទីនោះ ដែលពួកគាត់រស់នៅអាស្រ័យអនុផលព្រៃឈើ និងធនធានធម្មជាតិតាំងពីជីដូនជីតាមកនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។