មន្ត្រីថៃមួយក្រុមបានជ្រៀតឆ្លងព្រំដែនមកស្វាគមន៍នាយករដ្ឋមន្ត្រីខ្មែរនៅប្រាសាទព្រះវិហារ
ចៅហ្វាយខេត្តស៊ីសាកេតរបស់ថៃ និងមេបញ្ជាការយោធាថៃបានព្យាយាមឆ្លងដែនចូលដីខ្មែរដើម្បីស្វាគមន៍លោកនាយករដ្ឋមន្ត្រី ហ៊ុន សែន ក្នុងពេលដែលលោកកំពុងចុះសួរសុខទុក្ខយុទ្ធជនដែលកំពុងតែត្រៀមប្រយុទ្ធនៅតំបន់ព្រះវិហារនៅចុងសប្តាហ៍នេះ។
ក្រុមមន្ត្រីថៃដែលទីបំផុតត្រូវបានលោកនាយករដ្ឋមន្ត្រីអនុញ្ញាតឲ្យចូលមកជួបនោះបានប្រាប់ថា មេកើយរបស់ខ្លួនគឺលោកឧបនាយករដ្ឋមន្ត្រីថៃ សាថេប ធុកសាបាន ចង់មកជួបលោកនាយករដ្ឋមន្ត្រី ហ៊ុន សែន ផ្ទាល់នៅទីនេះ។
តែលោកនាយករដ្ឋមន្ត្រីខ្មែរបានឆ្លើយតបទៅវិញថា ឧបនាយករដ្ឋមន្ត្រីថៃរូបនោះគ្មានសិទ្ធិចូលមកជួបលោកនៅក្នុងដែនដីព្រះវិហារដែលជាដីខ្មែរនោះបានទេ ក៏ប៉ុន្តែបើលោកនាយករដ្ឋមន្ត្រីខ្មែរអនុញ្ញាតឲ្យជួប ទើបលោកឧបនាយករដ្ឋមន្ត្រីថៃមានសិទ្ធិចូលបាន។
លោកនាយករដ្ឋមន្ត្រីបានរិះគន់ថា មន្ត្រីថៃបានតាំងខ្លួនធ្វើជាម្ចាស់ផ្ទះ ហើយចាត់ទុកលោកនាយករដ្ឋមន្ត្រីខ្មែរដែលជាម្ចាស់ទឹកដីធ្វើដំណើរទស្សនកិច្ចនៅតំបន់ព្រះវិហារនោះជាភ្ញៀវទៅវិញ។ លោកនាយករដ្ឋមន្ត្រីបានបន្ថែមថា ឫកពារបស់ថៃដូច្នេះមិនចេះអៀនខ្មាសអ្នកជិតខាងសោះ។
ជំងឺផ្ដាសាយបក្សីផ្ទុះឡើងវិញនៅខេត្តតាកែវ
ប្រធាននាយកដ្ឋានផលិតកម្មនិងបសុព្យាបាលនៃក្រសួងកសិកម្ម លោក កៅ ផល មានប្រសាសន៍ថា មន្ទីរពិសោធន៍បានរកឃើញមានមេរោគផ្តាសាយបក្សី H5N1 លើសត្វទាងាប់នៅភូមិប្រឡាយមាស ឃុំរមិញ ស្រុកកោះអណ្តែត ខេត្តតាកែវ កាលពីដើមខែនេះ។
ក្រុមពេទ្យសត្វប្រកាសហាមចល័តសត្វមាន់ទាឆ្លងកាត់ភូមិនោះចម្ងាយ ៥គីឡូម៉ែត្រក្រឡា បង្ការមេរោគនេះកុំឲ្យឆ្លងទៅសត្វនិងមនុស្សនៅភូមិឃុំដទៃទៀត ដែលការហាមប្រាមនេះមានរយៈពេល ១ខែទើបបើកវិញ។
ជំងឺផ្តាសាយបក្សីនេះផ្ទុះឡើងចំពេលជិតពេលថ្ងៃចូលឆ្នាំចិននិងវៀតណាម ដែលមាន់ទាជាមុខម្ហូបដ៏យ៉ាងសំខាន់ត្រូវគេនិយមប្រើដាក់សែន ឬក៏ជាដង្វាយដូនតាក្នុងពិធីបុណ្យនេះ។
រដ្ឋាភិបាលខ្មែរហាមមន្ត្រីរាជការជក់បារីនៅកន្លែងធ្វើការ
ក្រសួងមហាផ្ទៃបានចេញបំរាមហាមមិនឲ្យមន្ត្រីរាជការ និងនគរបាល ជក់បារីនៅក្នុងកន្លែងធ្វើការងាររដ្ឋ។
បំរាមហាមមិនឲ្យជក់បារីនៅទីកន្លែងធ្វើការរដ្ឋរបស់ក្រសួងមហាផ្ទៃ បានធ្វើឡើងដោយយោងតាមខ្លឹមសារនៃលិខិតរបស់ទីស្តីការគណៈរដ្ឋមន្ត្រីស្តីពីគោលការណ៍ហាមជក់បារីនៅក្នុងកន្លែងធ្វើការរបស់មន្ត្រីរាជការ នៅក្នុងសាលប្រជុំ រោងមហោស្រព និងផលវិបាកនៃការជក់បារីដែលបានធ្វើឲ្យប៉ះពាល់យ៉ាងខ្លាំងដល់សុខភាពសាធារណជន បរិស្ថាន ធ្វើឲ្យបាត់បង់ថវិកាគ្រួសារនិងសេដ្ឋកិច្ចជាតិផង។
អាជ្ញាធរវៀតណាមហាមខ្មែរក្រោមមិនឲ្យធ្វើស្រែ
ខែ្មរកម្ពុជាក្រោមនៅក្នុងស្រុកទិនបៀង ខេត្តអានយ៉ាង ឬខេត្តមាត់ជ្រូក ទឹកដីខែ្មរកម្ពុជាក្រោមបានឲ្យដឹងថា ពួកគាត់ពុំមានដីស្រែធ្វើកសិកម្មទៀតទេនៅឆ្នាំនេះ ដោយសារតែអាជ្ញាធរវៀតណាមបានរឹបអូសយកដើម្បីជីកប្រទ្បាយទឹក។
គ្រួសារខែ្មរកម្ពុជាក្រោមនៅទីនោះ បានបញ្ជូនកូនៗឲ្យស៊ីឈ្មួលគេនៅព្រៃនគរ ឬក្រុងហូជីមិញ និងខេត្តដទៃទៀតដើម្បីរកកម្រៃក្រៅចិញ្ចឹមគ្រួសារជំនួសការធ្វើស្រែ នៅពេលដែលពួកគាត់បាត់បង់ដីស្រែទាំងនោះ។
គ្រួសារខែ្មរកម្ពុជាក្រោមទាំងនោះបានថ្លែងប្រាប់វិទ្យុអាស៊ីសេរីតាមទូរស័ព្ទឲ្យថា អាជ្ញាធរវៀតណាមបានគាបសង្កត់ និងតាមដានខ្មែរក្រោមទាំងនោះជាប្រចាំថ្ងៃនិងដិតដល់ជាទីបំផុត។
គណៈកម្មការប្រឹក្សាការងារសុំដំឡើងប្រាក់ខែកម្មករ
គណៈកម្មការប្រឹក្សាការងារដែលមានសមាសភាពរួមគ្នាពីសហជីពតំណាងកម្មកររោងចក្រ កាត់ដេរនានា តំណាងក្រសួងការងារ និងតំណាងថៅកែរោងចក្រ មានគម្រោងកោះប្រជុំគ្នាមួយ ដើម្បីពិភាក្សាស្ដីពីស្ថានភាពកម្មករកាត់ដេរកម្ពុជានិងសុំឡើងប្រាក់ខែ។
លោក ជួន មុំថុល អនុប្រធានគណៈកម្មការប្រឹក្សាការងារ និងជាប្រធានសហព័ន្ធសហជីពខ្មែរបានមានប្រសាសន៍នៅថ្ងៃទី៣១ មករា ថា កិច្ចប្រជុំនេះនឹងធ្វើឡើងនៅថ្ងៃទី៨ កុម្ភៈសប្តាហ៍ក្រោយនេះ ហើយនឹងសុំតម្លើងប្រាក់ខែកម្មករកាត់ដេរ ដែលបច្ចុប្បន្នមានកម្មករទាំងនោះមានប្រាក់ខែពី ៥០ដុល្លារ សុំឲ្យឡើង ៩៣ដុល្លារក្នុងមួយខែ។
នគរបាលក្រុងប៉ោយប៉ែត៤នាក់ត្រូវបានគេចោទថាធ្វើទារុណកម្មមនុស្ស
អ្នកស្រី សុខ វណ្ណឌី ម្តាយយុវជនរងគ្រោះ បានមានប្រសាសន៍នៅព្រឹកថ្ងៃច័ន្ទថា អ្នកស្រីបានដាក់ពាក្យបណ្ដឹងប្តឹងក្រុមនគរបាលក្រុងប៉ោយប៉ែត ៤នាក់ទៅតុលាការខេត្តបន្ទាយមានជ័យ ដោយចោទថា នគរបាលទាំង ៤នាក់នោះបានវាយទាត់ធាក់កូនគាត់ គឺយុវជនឈ្មោះ ចាន់ អ៊ិច បោកក្បាលផ្ទប់នឹងសសរថ្មរហូតដល់សន្លប់ ទាំងដៃជាប់ខ្នោះ ក្នុងពេលសួរចម្លើយ។
អ្នកស្រី សុខ វណ្ណឌី ថ្លែងថា នគរបាលភាគច្រើនប្រើអំណាចរំលោភសិទ្ធិជនស្លូតត្រង់ ហើយអ្នកស្រីប្តឹងទាមទារឲ្យនគរបាលទាំង៤រូបនោះឲ្យសងជំងឺចិត្តក្នុងម្នាក់ៗ ៣លានរៀល ក៏ប៉ុន្តែនគរបាលទាំង ៤រូបនោះបដិសេធពាក្យចោទប្រកាន់នេះ។
សហព្រះរាជអាជ្ញាអន្តរជាតិថ្មីស្បថចូលកាន់តំណែង
ការធ្វើសច្ចាប្រណិធានរបស់សហព្រះរាជអាជ្ញាអន្តរជាតិថ្មី គឺលោក អេនឌ្រូ ខេលៃ (Andrew Cayley) និងសហព្រះរាជអាជ្ញាបម្រុងលោក នីកូឡាស គុំជាន (Nicholas Koumjian) បានធ្វើឡើងនៅព្រឹកថ្ងៃទី២ ខែកុម្ភៈ ឆ្នាំ២០១០។
នៅក្នុងពិធីសច្ចាប្រណិធាននោះ លោក អេនឌ្រូ ខេលៃ បានប្រកាសថា លោកនឹងបំពេញតួនាទី និងប្រើអំណាចកាត់ក្តីឧក្រិដ្ឋជនដោយស្មោះស មិនលម្អៀង និងមិនទទួលការបង្គាប់បញ្ជាពីរដ្ឋាភិបាល ឬក៏ជនណាម្នាក់នោះឡើយ។
មណ្ឌលកែប្រែមួយចំនួនរងការចោទប្រកាន់ថាធ្វើទារុណកម្មអ្នកញៀនថ្នាំញៀន
អង្គការឃ្លាំមើលសិទ្ធិមនុស្ស (Human Rights Watch) នៅថៃ្ង៣១ មករានេះ បានអំពាវនាវសុំឲ្យរដ្ឋាភិបាលកម្ពុជាបើកការស៊ើបអង្កេត ឬក៏បិទមណ្ឌលស្តារនីតិសម្បទានៅចោមចៅនិងមណ្ឌលមួយចំនួនទៀតតែម្ដង នៅគ្រាដែលមានការចោទប្រកាន់ថា មានការវាយដំ វាយនឹងខ្សែតី ឆក់ខ្សែភ្លើងមនុស្សដែលកំពុងតែទទួលការអប់រំកែប្រែខ្លួននៅក្នុងមណ្ឌលទាំងនោះ។
សេចក្តីថែ្លងការណ៍របស់អង្គការឃ្លាំមើលសិទ្ធិមនុស្សអាស៊ី ដែលបានចេញផ្សាយជាសាធារណៈនៅថៃ្ងអាទិត្យ ទី៣១ ខែមករា បានបង្ហាញថា ជនរងគ្រោះដែលគេធ្វើទារុណកម្មនោះ មានកុមារ និងអ្នកជំងឺសរសៃប្រសាទ នៅក្នុងមណ្ឌលចំនួន ៧កន្លែងនៅក្នុងប្រទេសកម្ពុជា។ តែរបាយការណ៍ស្តីពីការរំលោភសិទ្ធិមនុស្សនោះត្រូវបានរដ្ឋាភិបាលប្រកាសបដិសេធយ៉ាងដាច់អហង្ការ។
អង្គការអាដហុកថា ស្ថានភាពសិទ្ធិមនុស្សឆ្នាំ២០០៩ធ្លាក់ចុះនៅក្នុងប្រទេសកម្ពុជា
សមាគមសទ្ធិមនុស្ស អាដហុក ថា ឆ្នាំ២០០៩កន្លងទៅ មន្ត្រីរដ្ឋាភិបាលបានប្តឹងអ្នកនយោបាយ តំណាងរាស្ត្រ អង្គការសង្គមស៊ីវិលមួយចំនួន និងអ្នកកាសែតមួយចំនួន ដែលក្នុងនោះមានតួលេខដូចជាអ្នកតំណាងរាស្ត្រ និងសហគមន៍ការពារដីធ្លីចំនួន ២៣៥នាក់ត្រូវបានគេប្តឹងផ្តល់ទៅកាន់តុលាការ និងជាប់ឃុំចំនួន ១៤៧នាក់ និងត្រូវបានគេចាប់ដាក់គុកចំនួន ៥៨នាក់ ហើយ ៨៨នាក់ទៀតកំពុងរត់គេចខ្លួនពីការចាប់ខ្លួនរបស់តុលាការ។
ជាថ្មីម្តងទៀតរបាយការណ៍ស្តីពីការរំលោភសិទ្ធិមនុស្សរបស់អង្គការសិទ្ធិមនុស្សអាដហុកនេះត្រូវបានរដ្ឋាភិបាលបដិសេធចោល។
លោក ឱម យ៉ិនទៀង ទេសរដ្ឋមន្ត្រី និងជាប្រធានគណៈកម្មាធិការសិទ្ធិមនុស្សរបស់រដ្ឋាភិបាល បានឆ្លើយតបបែបពេបជ្រាយវិញថា អាដហុក សរសេររបាយការណ៍នោះដូចបិទភ្នែក ហើយចង់ឲ្យអ្នកដទៃបិទភ្នែកតាមរបាយការណ៍នោះដែរ៕