សង្ខេបព័ត៌មានប្រចាំសប្ដាហ៍ ថ្ងៃ ២២ ដល់ ២៨ មិថុនា ២០០៩
ដោយ កែវ និមល
2009-06-28
ព័ត៌មានសំខាន់ៗប្រចាំសប្ដាហ៍នេះរួមមាន ចាងហ្វាងកាសែតខែ្មរម្ចាស់ស្រុកត្រូវបានចាប់បញ្ជូនដាក់ពន្ធនាគារពីបទផ្សាយព័ត៌មានមិនពិត និងព័ត៌មានផ្សេងៗដទៃទៀត។
លោក ហង្ស ចក្រា ចាងហ្វាងកាសែត«ខ្មែរម្ចាស់ស្រុក»។
លោក កែវ និមល អ្នកយកព័ត៌មានវិទ្យុអាស៊ីសេរី ប្រចាំទីក្រុងភ្នំពេញ បានរាយការណ៍សរុបព័ត៌មានសំខាន់ៗនៅកម្ពុជា ពីថ្ងៃ ២២ ដល់ ២៨ មិថុនា ឆ្នាំ២០០៩។
ចាងហ្វាងកាសែតខែ្មរម្ចាស់ស្រុកត្រូវបានចាប់បញ្ជូនដាក់ពន្ធនាគារ
លោក ហង្ស ចក្រា ជាចាងហ្វាងនៃកាសែតខែ្មរម្ចាស់ស្រុកនោះ ត្រូវបានសមត្ថកិច្ចនគរបាលខេត្តបាត់ដំបងចាប់ខ្លួនហើយនិងបញ្ជូនដាក់ពន្ធនាគារ កាលពីថ្ងៃទី២៦ មិថុនាកន្លងទៅ ក្រោយពីតុលាការក្រុងភ្នំពេញបានកាត់ទោសដាក់គុករយៈពេល១២ខែ និងផាកពិន័យជាប្រាក់ចំនួន៩លានរៀលក្រោមបទចោទថាផ្សាយព័ត៌មានមិនពិត ក្រោយពីកាសែតនេះបានផ្សាយអត្ថបទព័ត៌មានមួយចំនួនកាលពីខែមេសានិងឧសភា ថា មន្រ្តីមួយចំនួននៅជុំវិញលោកឧបនាយករដ្ឋមន្រ្តី សុខ អាន ជាមន្រ្តីពុករលួយ។
ការសម្រេចផ្តន្ទាទោស លោក ហង្ស ចក្រា បានធ្វើឡើងដោយចៅក្រមតុលាការក្រុងភ្នំពេញ ដោយចេញសាលក្រមកំបាំងមុខ។
សវនាការរយៈពេលខ្លីនិងជាបន្ទាន់នោះបានធ្វើទ្បើងដោយគ្មានការចូលរួមរបស់ជនជាប់ចោទមកបង្ហាញមុខទេ រីឯមេធាវីការពារក្តីលោក ហង្ស ចក្រា ក៏មិនបានចូលរួមផងដែរ ដោយសារតែតុលាការបានបដិសេធសំណើរបស់មេធាវីក្នុងការសុំពន្យារពេលសវនាការនោះទៅថៃ្ងក្រោយ។
នាយករដ្ឋមន្ត្រីបារម្ភពីការកើនឡើងនៃការប្រើប្រាស់គ្រឿងញៀន
លោកនាយករដ្ឋមន្រ្តី ហ៊ុន សែន បានថ្លែងអំពីការប្រើប្រាស់គ្រឿងញៀនក្នុងប៉ុន្មានឆ្នាំចុងក្រោយនេះ ថាបានកើនឡើងគួរឲ្យព្រួយបារម្ភ។
ថ្លែងទៅកាន់សិស្សនិងមហាជនជាច្រើនពាន់នាក់នៅពហុកីឡដ្ឋានជាតិអូឡាំពិក នៅព្រឹកថ្ងៃសុក្រ ទី២៦ ខែមិថុនា ក្នុងទិវាអន្តរជាតិប្រឆាំងគ្រឿងញៀនក្រោមប្រធានបទ "តើគ្រឿងញៀនត្រួតត្រាជីវិតអ្នកឬ?" លោកនាយករដ្ឋមន្រ្តីកម្ពុជាបានលើកឡើងថា នៅប្រទេសកម្ពុជាគេបានរកឃើញយ៉ាងហោចណាស់មានអ្នកប្រើគ្រឿងញៀនប្រមាណ៤៦ពាន់នាក់។
របាយការណ៍មួយរបស់អាជ្ញាធរជាតិប្រយុទ្ធប្រឆាំងគ្រឿងញៀនស្តីពីការត្រួតពិនិត្យគ្រឿងញៀនដែលចេញផ្សាយនៅខែមិថុនា ឆ្នាំ២០០៩នេះ បានឲ្យដឹងថា ឧក្រិដ្ឋជនគ្រឿងញៀននៅតែបន្តនាំគ្រឿងញៀនឆ្លងដែនចូលមកប្រទេសកម្ពុជានៅឡើយ ជាពិសេសថ្នាំញៀនប្រភេទមេតំហ្វេតាមីន ហើយថ្នាំប្រភេទនេះត្រូវបានចែកចាយឲ្យប្រើប្រាស់នៅតាមកន្លែងជាច្រើន ដូចជានៅតាមទីសាធារណៈ លំនៅឋាន ផ្ទះសំណាក់ និងសណ្ឋាគារជាដើម។
ពលរដ្ឋជិត២០០នាក់នៅរតនគិរីដង្ហែក្បួនទាមទារឲ្យបញ្ឈប់ការកាប់រានព្រៃឈើ
មនុស្សជិត២០០នាក់មកពីស្រុកនិងក្រុងចំនួន៧ក្នុងខេត្តរតនគិរីបាននាំគ្នាស្រែកបួងសួងនិងដើរហែក្បួនទាមទារឲ្យមានការផ្តន្ទាទោសនិងបញ្ឈប់ការកាប់រានព្រៃឈើ បញ្ឈប់ការរំលោភយកដីនិងសកម្មភាពកាប់ព្រៃឈើធ្វើអាជីវកម្មខុសច្បាប់។
ពិធីនេះធ្វើឡើងនៅទីក្រុងបានលុង ទីរួមខេត្តរតនគិរី នៅព្រឹកថ្ងៃព្រហស្បតិ៍ ទី២៥ មិថុនា ក្រោយពេលតែបីថ្ងៃប៉ុណ្ណោះបន្ទាប់ពីអ្នកភូមិសាយ៉ោះលើនៃស្រុកលំផាត់ម្នាក់បានរងការបាញ់ឲ្យរបួសជើង និងជាង១០នាក់ទៀតរងការបាញ់គំរាមពីកងទាហាននិងប៉ូលិសការពារក្រុមហ៊ុនឈ្មោះ ឌីអ៊ឹមហ្គ្រូប ក្នុងជម្លោះដីធ្លីរវាងអ្នកភូមិនិងក្រុមហ៊ុន។
អ្នកកាសែត៣នាក់នៅកំពង់ចាមត្រូវបានចាប់ខ្លួនពីបទជំរិតទារប្រាក់
អ្នកកាសែតក្នុងស្រុកចំនួន៣នាក់ត្រូវបានប៉ូលិសខេត្តកំពង់ចាមចាប់ខ្លួន ហើយបញ្ជូនខ្លួនទៅកាន់តុលាការកាលពីព្រឹកថ្ងៃព្រហស្បតិ៍ ទី២៥ មិថុនា ដោយចោទពីបទជំរិតទារប្រាក់។
ស្នងការរងប៉ូលិសខេត្តកំពង់ចាមទទួលបន្ទុកព្រហ្មទណ្ឌ គឺលោក ជឹម សេងហុង បានមានប្រសាសន៍កាលពីព្រឹកថ្ងៃទី២៥ មិថុនា ថាលោកបានសុំដីកាឃាត់ខ្លួនអ្នកកាសែត៤នាក់ បន្ទាប់ពីទទួលរបាយការណ៍ពីអ្នកស្រុកថា អ្នកកាសែតទាំង៤នាក់នោះបានជំរិតទារប្រាក់ពីអ្នកស្រុកម្នាក់នៅក្នុងភូមិសុខសាន្ត ឃុំកំពង់ព្រីង ស្រុកដំបែ ខេត្តកំពង់ចាម ដោយគំរាមថា នឹងចុះផ្សាយរឿងអាស្រូវថាបាននាំកូនអ្នកដទៃទៅជួញដូរ បើសិនជាមិនបង់ប្រាក់ឲ្យពួកគេ ដែលករណីនេះលោកស្នងការរងបានអះអាងថារឿងនេះជាភារកិច្ចរបស់ប៉ូលិស។
លោកស្នងការរងបានបន្ថែមថា អ្នកកាសែត៣នាក់នោះមានឈ្មោះ ស ផៃ នៅកាសែតខ្មែរថ្មី, ច័ន្ទ សារឿន នៅកាសែតដំណឹងពិស្តារ, មាស ច័ន្ទតារា នៅកាសែតប្រព័ន្ធយុត្តិធម៌ ឯអ្នកកាសែតម្នាក់ទៀតបានរត់គេចខ្លួនរួច។
មន្រ្តីអ.ស.ប.៖ កម្ពុជាត្រូវការពង្រឹងប្រព័ន្ធយុត្តិធម៌ឲ្យមានឯករាជភាព
មន្រ្តីជាន់ខ្ពស់របស់អង្គការសហប្រជាជាតិ (អ.ស.ប.) ទទួលបន្ទុកសិទ្ធិមនុស្សនៅកម្ពុជាបានអះអាងថា ប្រទេសកម្ពុជាត្រូវការពង្រឹងជាចាំបាច់នូវប្រព័ន្ធយុត្តិធម៌ឲ្យមានឯករាជភាព គ្មានអំពើពុករលួយ ហើយមិនត្រូវរងឥទ្ធិពលណាមួយទេនៅក្នុងការអនុវត្តឬប្រតិបត្តិយុត្តិធម៌នៅក្នុងប្រទេសនេះ។
លោក Surya Subedi ជាអ្នករាយការណ៍ពិសេសរបស់អ.ស.ប.ទទួលបន្ទុកសិទ្ធិមនុស្សនៅកម្ពុជា បានថែ្លងនៅក្នុងសន្និសីទកាសែតមួយនៅថៃ្ងព្រហស្បតិ៍ ទី២៥ មិថុនា ថាការធ្វើការពង្រឹងប្រព័ន្ធតុលាការនៅកម្ពុជាគឺធ្វើយ៉ាងណាឲ្យតុលាការទទួលបានការជឿទុកចិត្តនិងការគោរពពីពលរដ្ឋ។
លោកបានបន្តថា បញ្ហាខ្វះខាតនានាខាងលើគឺត្រូវការពេលដើម្បីដោះស្រាយនិងកែលម្អ។ គេមិនអាចដោះស្រាយបញ្ហានេះបានក្នុងរយៈពេលខ្លីនោះទេ។
លោក Surya Subedi បានមកបំពេញទស្សនកិច្ចនៅក្នុងប្រទេសកម្ពុជាជាលើកដំបូងរយៈពេលពីរសប្តាហ៍ ចាប់ពីថៃ្ងទី១៦ ខែមិថុនាកន្លងទៅ ហើយលោកនឹងចាកចេញពីប្រទេសកម្ពុជានៅថៃ្ងទី២៦ ខែមិថុនា។
នៅក្នុងអំទ្បុងពេលនៃការបំពេញទស្សនកិច្ចជាលើកដំបូងរបស់លោកនៅកម្ពុជានេះ លោកបានជួបពិភាក្សាជាមួយមន្ត្រីជាន់ខ្ពស់កម្ពុជា មានជាអាទិ លោកនាយករដ្ឋមន្រ្តី ហ៊ុន សែន និងមន្រ្តីជាន់ខ្ពស់នានាមួយចំនួនទៀត។
សហព្រះរាជអាជ្ញាអន្តរជាតិនៃសាលាក្ដីខ្មែរក្រហមបំភ្លឺពីការលាលែងចេញពីមុខតំណែង
លោក Robert Petit សហព្រះរាជអាជ្ញាអន្តរជាតិនៃអង្គជំនុំជម្រះវិសាមញ្ញក្នុងតុលាការកម្ពុជា បានថ្លែងថា ការព្រួយបារម្ភអំពីការលាលែងរបស់លោកពីមុខតំណែងសហព្រះរាជអាជ្ញាអន្តរជាតិនៃអង្គជំនុំជម្រះវិសាមញ្ញក្នុងតុលាការកម្ពុជាមិនប៉ះពាល់ដល់ការស្នើសុំចោទប្រកាន់អតីតមេដឹកនាំខ្មែរក្រហមបន្ថែមនោះទេ។
លោក Robert Petit បានថ្លែងអំពីការសម្រេចចិត្តចាកចេញរបស់លោកកាលពីថ្ងៃ២៤ មិថុនា នៅក្នុងសន្និសីទសារព័ត៌មានប្រចាំសប្តាហ៍ថា មូលហេតុនៃការសុំលាលែងនោះគឺទាក់ទងទៅនឹងបញ្ហាគ្រួសាររបស់លោកផ្ទាល់និងបញ្ហាខ្លួនលោកផ្ទាល់តែម្ដង មិនទាក់ទងទៅនឹងការទទួលខុសត្រូវខាងវិជ្ជាជីវៈឬការងារនៅក្នុងតុលាការទេ។
ការថ្លែងរបស់លោក Robert Petit នៅក្នុងសន្និសីទកាសែតបានធ្វើឡើងបន្ទាប់ពីអង្គការសង្គមស៊ីវិលចំនួន៦បានរួមគ្នាចេញសេចក្តីថ្លែងការណ៍មួយសម្តែងអំពីការព្រួយបារម្ភរបស់ខ្លួនថា ការចាកចេញរបស់លោក Robert Petit អាចប៉ះពាល់ដល់ដំណើរការរបស់អង្គជំនុំជម្រះវិសាមញ្ញក្នុងតុលាការកម្ពុជា។
រដ្ឋសភាដកអភ័យឯកសិទ្ធិតំណាងរាស្ត្របក្សសមរង្ស៊ី២រូប
រដ្ឋសភានៃប្រទេសកម្ពុជាកាលពីថ្ងៃទី២២ មិថុនាកន្លងទៅ បានបោះឆ្នោតដកអភ័យឯកសិទ្ធិសភារបស់លោកស្រី មូរ សុខហួរ និងលោក ហូ វ៉ាន់ សមាជិកសភាមកពីគណបក្សសមរង្ស៊ី យោងតាមការស្នើសុំរបស់តុលាការ។
លោកស្រី មូរ សុខហួរ បានត្រូវដកអភ័យឯកសិទ្ធិដោយសារមានទាក់ទងជាមួយនឹងពាក្យបណ្ដឹងរបស់លោកនាយករដ្ឋមន្ត្រី ហ៊ុន សែន។ ចំណែកលោក ហូ វ៉ាន់ បានត្រូវដកអភ័យឯកសិទ្ធិទាក់ទងជាមួយពាក្យបណ្តឹងរបស់មន្រ្តីយោធាជាន់ខ្ពស់ចំនួន២២រូប។
ករណីជំងឺផ្តាសាយ A(H1N1) កើនឡើងដល់៦ករណីនៅកម្ពុជា
មន្រ្តីសុខាភិបាលនៃប្រទេសកម្ពុជាបានប្រកាសឲ្យដឹងថា នៅប្រទេសកម្ពុជាមានកើតជំងឺផ្តាសាយបង្កដោយមេរោគ A(H1N1) ចំនួន៦ករណី គិតចាប់តាំងពីថ្ងៃទី២៤ មិថុនាមក។
អ្នកកើតជំងឺផ្តាសាយទាំង៦ករណីនោះមាន៤នាក់ជានិស្សិតស្ម័គ្រចិត្តអាមេរិកាំងដែលមកបំពេញការងារស្ម័គ្រចិត្តនៅប្រទេសកម្ពុជាតាមរយៈអង្គការក្រៅរដ្ឋាភិបាល និង២នាក់ផ្សេងទៀត ម្នាក់ជាជនជាតិហ្វីលីពីននិងម្នាក់ជាជនជាតិកម្ពុជា៕
អត្ថបទដែលទាក់ទង
សង្ខេបព័ត៌មានប្រចាំសប្ដាហ៍ ថ្ងៃ ៥ ដល់ ១១ តុលា ២០០៩
សង្ខេបព័ត៌មានប្រចាំសប្ដាហ៍ ថ្ងៃ ២៨ កញ្ញា ដល់ ៤ តុលា ២០០៩
សង្ខេបព័ត៌មានប្រចាំសប្ដាហ៍ ថ្ងៃ ២១ ដល់ ២៧ កញ្ញា ២០០៩
សង្ខេបព័ត៌មានប្រចាំសប្ដាហ៍ ថ្ងៃ ១៤ ដល់ ២០ កញ្ញា ២០០៩
សង្ខេបព័ត៌មានប្រចាំសប្ដាហ៍ ថ្ងៃ ៧ ដល់ ១៣ កញ្ញា ២០០៩
សង្ខេបព័ត៌មានប្រចាំសប្ដាហ៍ ថ្ងៃ ៣១ សីហា ដល់ ៦ កញ្ញា ២០០៩
សង្ខេបព័ត៌មានប្រចាំសប្ដាហ៍ ថ្ងៃ ២៤ ដល់ ៣០ សីហា ២០០៩
សង្ខេបព័ត៌មានប្រចាំសប្ដាហ៍ ថ្ងៃ ១៧ ដល់ ២៣ សីហា ២០០៩
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.