កម្ពុជាគ្រោងសង់អគារខ្ពស់ជាងគេនៅអាស៊ីក្នុងក្រុងភ្នំពេញ
លោកនាយករដ្ឋមន្ត្រី ហ៊ុន សែន ប្រមុខរដ្ឋាភិបាលកម្ពុជា បានមានប្រសាសន៍ឲ្យដឹងថា រដ្ឋាភិបាល និងក្រុមអ្នកវិនិយោគ កំពុងសិក្សាគម្រោងសាងសង់អគារមួយ ដែលមានកម្ពស់ខ្ពស់ជាងគេនៅអាស៊ី ក្នុងប្រទេសកម្ពុជា នាពេលខាងមុខនេះ។
ថ្លែងពីថ្ងៃពុធ ទី១ ខែកញ្ញា សប្ដាហ៍នេះ នាយករដ្ឋមន្ត្រីខ្មែរ លោក ហ៊ុន សែន បានឲ្យដឹងថា អគារនោះមានកម្ពស់ ៥៥៥ម៉ែត្រ ដែលអាចនឹងសង់នៅលើទីតាំងកោះពេជ្រ ក្នុងទីក្រុងភ្នំពេញ។ តែទោះជាយ៉ាងណាក្ដី លោកនាយករដ្ឋមន្ត្រីមិនទាន់បញ្ជាក់ថា ក្រុមហ៊ុនវិនិយោគនោះជានរណា ក្នុងដើមទុនវិនិយោគប៉ុន្មាន ហើយនឹងត្រូវចាប់ផ្ដើមនៅពេលណានោះទេ។
ហ៊ុន សែន អត្ថាធិប្បាយពីទំនាក់ទំនងខ្មែរ-ថៃ និងរឿងថាក់ស៊ីន
នាយករដ្ឋមន្ត្រីខ្មែរបានមានប្រសាសន៍ឲ្យដឹងនៅថ្ងៃ១ កញ្ញា សប្ដាហ៍នេះ ពីទំនាក់ទំនងកម្ពុជា-ថៃ ដែលនៅតែមិនទាន់ល្អដូចមុន និងអំពីមូលហេតុនៃការលាឈប់របស់លោក ថាក់ស៊ីន ពីទីប្រឹក្សាផ្ទាល់របស់លោក និងទីប្រឹក្សាសេដ្ឋកិច្ចរបស់រដ្ឋាភិបាលខ្មែរ ថាមិនមែនធ្វើឡើងក្រោមការបញ្ជាពីភាគីថៃនោះទេ។
លោកបានមានប្រសាសន៍ថា សូមកុំឲ្យភាគីថៃកេងចំណេញផ្នែកនយោបាយពីបញ្ហា លោក ថាក់ស៊ីន ស៊ីណាវ៉ាត់ (Thaksin Shinawatra) អតីតនាយករដ្ឋមន្ត្រីថៃ ក្នុងជម្លោះព្រំដែនខ្មែរ-ថៃ។ លោកបញ្ជាក់ថា កន្លងមកប្រទេសថៃបាននិយាយថា ថាក់ស៊ីន ស៊ីណាវ៉ាត់ ដែលលាឈប់ពីទីប្រឹក្សាកម្ពុជានោះ ដោយមានជម្លោះជាមួយ ហ៊ុន សែន។
លោកនាយករដ្ឋមន្ត្រីបន្តថា មកដល់ពេលនេះកម្ពុជា និងថៃ មានការធូរស្រាលខាងការទូត ប៉ុន្តែលោកបញ្ជាក់ទៀតថា លោកមិនសប្បាយចិត្តឡើយ ដ៏រាបណាកងទ័ពថៃមិនទាន់ដកចេញពីទឹកដីកម្ពុជា នៅតំបន់ប្រាសាទព្រះវិហារខ្មែរនោះ។
ថាក់ស៊ីន ប្រាប់ពីមូលហេតុនៃការលាឈប់ពីតំណែងជាទីប្រឹក្សា ហ៊ុន សែន
អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រ នៅថ្ងៃ៣ កញ្ញាសប្ដាហ៍នេះ បានឲ្យដឹងថា លោកបានលាឈប់ពីតំណែងជាទីប្រឹក្សារបស់លោក ហ៊ុន សែន និងជាទីប្រឹក្សាសេដ្ឋកិច្ចរដ្ឋាភិបាលកម្ពុជា ដើម្បីចៀសវាងការរំខាន និងដោយសារតែលោកគ្មានពេលវេលាគ្រប់គ្រាន់។
លោក ថាក់ស៊ីន ស៊ីណាវ៉ាត្រ (Thaksin Shinawatra) អតីតនាយករដ្ឋមន្ត្រីថៃ និងជាទណ្ឌិតកំពុងតែភៀសខ្លួនពីការតាមចាប់របស់អាជ្ញាធរថៃ បានប្រកាសឲ្យដឹងថា លោកបានឈប់ពីតួនាទីលោកជាទីប្រឹក្សាសេដ្ឋកិច្ចរដ្ឋាភិបាលកម្ពុជា ដោយសារតែមិនចង់ឲ្យមានការរំខានលោក ហើយលោកត្រូវការពេលវេលាទំនេរសម្រាប់ខ្លួនលោកផ្ទាល់។
ការប្រកាសរបស់លោក ថាក់ស៊ីន ស៊ីណាវ៉ាត្រ គឺក្រោយពេលជាងមួយសប្ដាហ៍ បន្ទាប់ពីលោកបានលាលែងពីតំណែងរបស់គាត់ ហើយការលាលែងរបស់លោក ថាក់ស៊ីន ស៊ីណាវ៉ាត្រ បានធ្វើឲ្យកម្ពុជា និងថៃ បន្តទំនាក់ទំនងការទូតឡើងវិញ ក្រោយពេល ៩ខែ ដែលប្រទេសទាំងពីរនេះ បានកោះហៅឯកអគ្គរាជទូតរៀងៗខ្លួនត្រឡប់ទៅប្រទេសវិញនោះ។
អាណិកជនខ្មែរដែលអាមេរិកចាប់បញ្ជូន៥នាក់មកដល់កម្ពុជា
ពលរដ្ឋខ្មែររស់នៅសហរដ្ឋអាមេរិក ដែលពុំមានសញ្ជាតិចំនួន ៥នាក់ ត្រូវរដ្ឋាភិបាលសហរដ្ឋអាមេរិកបានបញ្ជូនមកដល់កម្ពុជាហើយ។
មន្ត្រីអ្នកនាំពាក្យអគ្គស្នងការនគរបាលជាតិ លោកឧត្ដមសេនីយ៍ឯក គៀត ចន្ថារិទ្ធ បានថ្លែងថា ពលរដ្ឋកម្ពុជាដែលរស់នៅសហរដ្ឋអាមេរិកជាយូរមកហើយ ប៉ុន្តែពុំមានសញ្ជាតិនោះ ត្រូវបានរដ្ឋាភិបាលសហរដ្ឋអាមេរិកបញ្ជូនត្រឡប់មកមាតុភូមិវិញហើយ នៅថ្ងៃព្រហស្បតិ៍ ទី២ ខែកញ្ញា សប្ដាហ៍នេះ។
ពលរដ្ឋខ្មែរដែលបញ្ជូនមកនោះមានចំនួន ៥នាក់ បច្ចុប្បន្នកំពុងស្នាក់នៅក្នុងនាយកដ្ឋានអន្តោប្រវេសន៍ក្រសួងមហាផ្ទៃ បណ្ដោះអាសន្នមួយរយៈសិន រង់ចាំបងប្អូនមកទទួល ហើយអ្នកដែលមិនមានបងប្អូន ត្រូវរង់ចាំអង្គការក្រៅរដ្ឋាភិបាលទទួលយកទៅរក្សាដើម្បីអប់រំ និងសិក្សាជំនាញផ្សេងៗ។
តុលាការកាត់ទោសខ្មែរក្រោមប្រឆាំងបក្សប្រជាជននិងវៀតណាម
មានមនុស្សចំនួនជិត៣០០នាក់ មកពីអង្គការមិនមែនរដ្ឋាភិបាលនានា ប្រជាពលរដ្ឋ និងតំណាងស្ថានទូតសហរដ្ឋអាមេរិក បានចូលរួមតាមដានតុលាការខេត្តតាកែវ បើកសវនាការលើសំណុំរឿងបាចខិត្តប័ណ្ណប្រឆាំងរដ្ឋាភិបាលកម្ពុជា នៅក្នុងនោះមានជនសង្ស័យជាសកម្មជនការពារសិទ្ធិមនុស្សផងដែរ។
តុលាការខេត្តតាកែវ នៅថ្ងៃទី៣០ ខែសីហា សប្ដាហ៍នេះ បានបើកសវនាការកាត់ទោសជនសង្ស័យចំនួន ៤នាក់ ឲ្យជាប់គុករវាង ២ឆ្នាំ ទៅ ៣ឆ្នាំ និងផាកពិន័យជាប្រាក់រវាងពី ២លានរៀល ទៅ ៦លានរៀល ក្រោមបទចោទថា បានបាច់ខិត្តប័ណ្ណ ឬបាចត្រាក់ប្រឆាំងរដ្ឋាភិបាលកម្ពុជា កាលពីដើមឆ្នាំ២០១០ កន្លងទៅនេះ នៅក្នុងខេត្តតាកែវ។
ចៅក្រមជម្រះក្ដីនៃតុលាការខេត្តតាកែវ គឺលោក ចេង ប៊ុនលី បានអានសាលក្រមផ្ដន្ទាទោស ឈ្មោះ ថាច់ ទ្បេ អ្នករត់ម៉ូតូឌុបឲ្យជាប់គុក ២ឆ្នាំ ផាកពិន័យ ២លានរៀល, ផ្តន្ទាទោស ឈ្មោះ ថាច់ វណ្ណៈ ឲ្យជាប់គុក ២ឆ្នាំ ផាកពិន័យ ២លានរៀល និងផ្តន្ទាទោសកំបាំងមុខ ឈ្មោះ ថាច់ កុងភួង ចំនួន ៣ឆ្នាំ ផាកពិន័យចំនួន ៦លានរៀល។
តុលាការខេត្តតាកែវដដែល បានផ្ដន្ទាទោសមានឈ្មោះ លាង សុខជឿន ជាបុគ្គលិករបស់អង្គការការពារសិទ្ធិមនុស្សលីកាដូ ឲ្យជាប់គុក ២ឆ្នាំ និងផាកពិន័យ ២លានរៀល។ អ្នកទាំងអស់គ្នារងការចោទប្រកាន់តាមមាត្រាទី៦២ នៃច្បាប់ព្រហ្មទណ្ឌអន្តរកាលសម័យអ៊ុនតាក់ (UNTAC) ក្រោមបទផ្សាយព័ត៌មានមិនពិត។
មន្ត្រីប្រឆាំងអំពើពុករលួយ១៤នាក់ស្បថចូលកាន់តំណែងជានគរបាលយុត្តិធម៌
មន្ត្រីស៊ើបអង្កេត ១៤នាក់នៃអង្គភាពប្រឆាំងអំពើពុករលួយ នៅថ្ងៃ៣១ ខែសីហា បានចូលស្បថ និងធ្វើសច្ចាប្រណិធានរួមគ្នា នៅសាលាឧទ្ធរណ៍ ដើម្បីធ្វើឲ្យមាននីតិសម្បទាក្នុងការបើកការស៊ើបអង្កេតលើសំណុំរឿងអំពើពុករលួយ និងចាប់ខ្លួនជនសង្ស័យ ចាប់ពីថ្ងៃនេះតទៅ ក្នុងឋានៈជានគរបាលយុត្តិធម៌។
ដំណើរស៊ើបអង្កេតនោះ នឹងចាប់ផ្ដើមនៅពេលណាអង្គភាពនេះ បានទទួលពាក្យបណ្ដឹងពីប្រភពនានា ហើយដំណើរការស៊ើបអង្កេតគឺប្រព្រឹត្តទៅដោយឯករាជ្យ ប៉ុន្តែក្រោមការត្រួតពិនិត្យលើនីតិវិធី ដោយអគ្គព្រះរាជអាជ្ញានៃតុលាការសាលាឧទ្ធរណ៍ លោក អ៊ុក សាវុធ។
ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង និងជាទេសរដ្ឋមន្ត្រី បានមានប្រសាសន៍ក្រោយពីពិធីសច្ចាប្រណិធាននោះថា លោកបានប្រើប្រាស់កម្លាំងចារកម្ម ដើម្បីស៊ើបការណ៍សម្ងាត់ ប្រមូលព័ត៌មាន និងភស្តុតាងនានា នៅពេលណាបានទទួលពាក្យបណ្ដឹង។
សង្គមស៊ីវិលប្ដឹងករណីពុករលួយកាប់ឈើទៅអង្គភាពប្រឆាំងអំពើពុករលួយ
អង្គការឃ្លាំមើលការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ បានដាក់ពាក្យបណ្ដឹងទៅអង្គភាពប្រឆាំងអំពើពុកលួយឲ្យចាត់ការជាបន្ទាន់ លើករណីពុករលួយក្នុងបទល្មើសកាប់ឈើប្រណីត នៅតំបន់ឧទ្យានជាតិភ្នំឱរ៉ាល់ ខេត្តកំពង់ស្ពឺ ដែលកំពុងកើតមានយ៉ាងអនាធិបតេយ្យ។
ប្រធានអង្គការឃ្លាំមើលការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ លោក ជា ហ៊ាន បានថ្លែងនៅថ្ងៃអង្គារ ទី៣១ ខែសីហាសប្ដាហ៍នេះ ថា អង្គការលោកបានដាក់សំណុំលិខិត រួមជាមួយនឹងភស្តុតាងជាច្រើន និងពាក្យបណ្ដឹងសុំឲ្យស៊ើបអង្កេតលើក្រុមពាក់ព័ន្ធការកាប់ឈើប្រមាណជាង ២០០នាក់ ក្នុងនោះរួមមាននាយកដែនជម្រកសត្វព្រៃភ្នំឱរ៉ាល់ផងដែរ ដាក់ចូលក្នុងប្រអប់ខ្មៅរបស់អង្គភាពប្រឆាំងអំពើពុករលួយ កាលពីថ្ងៃ៣០ សីហា។
សាលាក្ដីទទួលសំណើសុំធ្វើជាដើមបណ្ដឹងក្នុងសំណុំរឿង០០២ជិត៤ពាន់នាក់
សហចៅក្រមស៊ើបអង្កេតនៃសាលាក្ដីខ្មែរក្រហមបានសម្រេចទទួលយកទៅពិនិត្យនូវសំណើរបស់ជនរងគ្រោះក្នុងរបបខ្មែរក្រហមចំនួន ៣.៩៨៨នាក់ ដែលសុំតាំងខ្លួនជាដើមបណ្ដឹងរដ្ឋប្បវេណីសម្រាប់សំណុំរឿង០០២។
ការសម្រេចទទួលយកសំណើសុំទាំងនេះ ត្រូវបានប្រកាសឱ្យដឹងដោយសហចៅក្រមស៊ើបអង្កេត តាមរយៈសេចក្តីថ្លែងការណ៍មួយ ដែលចេញផ្សាយនៅថ្ងៃទី៣០ ខែសីហា សប្ដាហ៍នេះ។
សហចៅក្រមស៊ើបអង្កេតលើកឡើងថា ខ្លួនបានអង្កេត និងវិភាគយ៉ាងហ្មត់ចត់លើសំណើសុំនីមួយៗ ទាំងទម្រង់ដាក់ព័ត៌មានបន្ថែម និងការរៀបរាប់លម្អិតអំពីអង្គហេតុដែលបានចោទ និងដាក់សុំក្នុងពេលកំណត់ត្រឹមថ្ងៃទី៣០ ខែមិថុនា ឆ្នាំ២០១០៕