កម្ពុជាប្រារព្ធខួបទី៥៥នៃការទទួលបានឯករាជ្យពីបារាំង
ប្រទេសកម្ពុជា នៅថ្ងៃអាទិត្យ ទី៩ វិច្ឆិកានេះ ប្រារព្ធពិធីបុណ្យខួបទី៥៥ នៃការទទួលបានឯករាជ្យពីអាណានិគមបារាំង ហើយនៅថ្ងៃអង្គារ ១១ វិច្ឆិកា នឹងធ្វើការប្រារព្ធពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក នៅទីក្រុងភ្នំពេញ។
កងកម្លាំងការពារសន្តិសុខជាង ១ម៉ឺននាក់ នឹងត្រូវគេដាក់ពង្រាយតាមផ្លូវនានាក្នុងក្រុងភ្នំពេញ ក្នុងខណៈដែលក្រុងនេះទទួលមនុស្សវាល់លាននាក់ចូលរួមក្នុងពិធីបុណ្យជាតិ គឺថ្ងៃ៩ វិច្ឆិកា ជាបុណ្យឯករាជ្យជាតិ និងបន្ទាប់មកគឺពិធីបុណ្យអុំទូក។
ស្នងការនគរបាលក្រុងភ្នំពេញ លោក ទូច ណារ៉ុថ បានមានប្រសាសន៍ថា អាជ្ញាធរនឹងបិទផ្លូវសំខាន់ៗមួយចំនួននៅក្នុងទីក្រុងភ្នំពេញ ដោយហាមឃាត់ការបើកយានយន្តឆ្លងកាត់ ហើយអនុញ្ញាតឲ្យតែអ្នកដំណើរថ្មើរជើងប៉ុណ្ណោះ។ លោកបានមានប្រសាសន៍ទៀតថា នៅថ្ងៃទី៩ ខែវិច្ឆិកានេះ នឹងបិទផ្លូវសុធារសពីវិមានឯករាជ្យ ដល់វត្តភ្នំ ដោយសារតែថ្ងៃនោះមានរៀបចំដង្ហែព្យុហយាត្រាអបអរបុណ្យឯករាជជាតិលើទី៥៥នោះ។
នៅក្នុងពិធីបុណ្យអុំទូកនាឆ្នាំនេះ ក្រុមមន្ត្រីបានឲ្យដឹងថា នឹងមានមនុស្សរាប់លាននាក់ចូលរួមពិធីបុណ្យជាតិនេះ នៅទីក្រុងភ្នំពេញ។
ទង់អង្គការយូណេស្កូនិងអង្គការបេតកភណ្ឌពិភពលោកត្រូវបានដោតនៅប្រាសាទព្រះវិហារ
ទង់ជាតិនិងផ្លាកសញ្ញារបស់អង្គការយូណេស្កូ (UNESCO) និងអង្គការបេតិកភណ្ឌពិភពលោកត្រូវបានដោតដំឡើងជាផ្លូវការហើយ នៅថ្ងៃទី៧ ខែវិច្ឆិកា ឆ្នាំ២០០៨នេះ នៅឯបរិវេណប្រាសាទព្រះវិហារ។
ទង់ជាតិនិងផ្លាកសញ្ញាទាំងនោះត្រូវបានដោតដំឡើងដោយមន្ត្រីចម្រុះមួយក្រុមដែលរួមមានមន្ត្រីអង្គការក្រៅរដ្ឋាភិបាលនិងតំណាងខ្មែរអាមេរិកទៅពីសហរដ្ឋអាមេរិកផង និងមន្ត្រីរដ្ឋាភិបាលកម្ពុជាផង។
ទង់ដែលត្រូវបានគេលើកនៅឯប្រាសាទព្រះវិហារនោះ មានចំនួន៣ ទី១ គឺទង់ជាតិ ទី២ គឺទង់របស់អង្គការយូណេស្កូ ហើយនិងទី៣ គឺជាទង់របស់អង្គការបេតិកភណ្ឌពិភពលោក។
អគ្គលេខាធិការគណៈកម្មការជាតិយូណេស្កូកម្ពុជា អ្នកស្រី តាន់ ភានី បានឲ្យដឹងថា ការលើកទង់នេះមានលក្ខណៈពិសេសសម្រាប់ការពារដល់ប្រាសាទព្រះវិហារដែលបានចុះបញ្ជីនៅក្នុងបេតិកភណ្ឌពិភពលោក ហើយប្រកាសកំណត់ទីតាំងយ៉ាងច្បាស់ថាមិនឲ្យមានកម្លាំងប្រដាប់អាវុធណារំលោភឬក៏ទៅប៉ះពាល់ប្រាសាទព្រះវិហារដែលជារបស់ប្រទេសកម្ពុជា ហើយស្ថិតនៅក្នុងបញ្ជីបេតិកភណ្ឌពិភពលោកជារបស់មនុស្សជាតិនោះបានទៀតទេ។
កម្ពុជា-ថៃនឹងជួបប្រជុំគ្នាពីបញ្ហាព្រំដែននៅថ្ងៃ១០-១១ ខែវិច្ឆិកា
មន្ត្រីទទួលបន្ទុកកិច្ចការព្រំដែនចម្រុះខណ្ឌសីមាព្រំដែនគោកកម្ពុជា-ថៃ គ្រោងនឹងជួបប្រជុំគ្នាពិសេសនៅថ្ងៃទី១០ ដល់ថ្ងៃទី១១ ខែវិច្ឆិកាខាងមុខនេះ នៅឯខេត្តសៀមរាប ដើម្បីជំរុញល្បឿននៃការកំណត់ខណ្ឌសីមាព្រំដែនរវាងប្រទេសទាំងពីរ។
ប្រធានគណៈកម្មការព្រំដែនខ្មែរ លោក វ៉ា គឹមហុង បានមានប្រសាសន៍ថា លោកមានក្តីសង្ឃឹមយ៉ាងមុតមាំថា កិច្ចប្រជុំនេះនឹងទទួលបាននូវលទ្ធផលជាផ្លែផ្កា ព្រោះកិច្ចប្រជុំនេះគឺជាការបូកសរុបនូវលទ្ធផលដែលប្រទេសទាំងពីរធ្លាប់បានធ្វើរួចហើយនាពេលកន្លងទៅ។
នៅថ្ងៃ១២ វិច្ឆិកានោះដែរ រដ្ឋមន្ត្រីការបរទេសខ្មែរ ក៏នឹងជួបប្រជុំជាមួយនឹងសមភាគីថៃ គឺលោក សំភុង អៈម៉នវីវ៉ាត់ នៅឯខេត្តសៀមរាបនោះផងដែរដើម្បីដោះស្រាយជម្លោះព្រំដែននៃប្រទេសទាំងពីរ ដែលបានបង្កឲ្យមានការផ្ទុះអាវុធដាក់គ្នាកាលពីពាក់កណ្ដាលខែតុលា កន្លងទៅនេះ ដែលបានបណ្ដាលឲ្យទាហានខ្មែរ ៣នាក់ និងទាហានថៃម្នាក់ស្លាប់បាត់បង់ជីវិត។
រូបប្រាសាទព្រះហារត្រូវបានបោះពុម្ពផ្សាយលើតែមប្រិ៍ប្រៃសណីយ៍
ក្រសួងប្រៃសណីយ៍និងទូរគមនាគមន៍កម្ពុជា កាលពីថ្ងៃទី៦ វិច្ឆិកា បានសម្ពោធដាក់ឲ្យប្រើប្រាស់តែមប្រិ៍ប្រៃសណីយ៍ចំនួន៥សន្លឹកដែលមានរូបប្រាសាទព្រះវិហារនិងមានឈ្មោះថា ឈុតអបអរសាទរប្រាសាទព្រះវិហារបានត្រូវដាក់បញ្ចូលក្នុងបញ្ជីបេតិកភណ្ឌពិភពលោក។
តែមប្រិ៍ប្រៃសណីយ៍ដែលមានរូបភាពប្រាសាទព្រះវិហារទាំង៥សន្លឹកថ្មីនេះ មានតម្លៃខុសៗគ្នាគឺមានសន្លឹកតម្លៃ ៦០០រៀល តម្លៃ ៧០០រៀល តម្លៃ ១០០០រៀល តម្លៃ ២០០០រៀល និងតម្លៃ ៣០០០រៀល។
ភាពមិនប្រក្រតីនៃការចែកស្បៀងជួយជនក្រីក្រ
ប្រជាជនច្រើនខេត្តតវ៉ាភាពមិនប្រក្រតីក្នុងការចែកស្បៀងជួយជនក្រីក្រដោយគម្រោងធនាគារអភិវឌ្ឍន៍អាស៊ីនិងរដ្ឋាភិបាលកម្ពុជា។
ការតវ៉ានេះបានលេចឮគ្រប់កន្លែងដែលបានចែកអង្ករជួយជនក្រីក្រជុំវិញបឹងទន្លេសាប មាន៧ខែត្រ និង២០០ឃុំ។ អ្នកស្រុកបានចោទអាជ្ញាធរមូលដ្ឋានថា បានរើសអើងប្រកាន់បក្សពួកនិងគ្រួសារនិយម។
មន្រ្តីគម្រោងសន្តិសុខស្បៀងនៃធនាគារអភិវឌ្ឍន៍អាស៊ី លោក ឡុង ពិសិដ្ឋ មានប្រសាសន៍នៅថ្ងៃពុធ ទី៥ ខែវិច្ឆិកា ឆ្នាំ២០០៨ថា មុនការចែកអង្ករ១ម៉ឺន២ពាន់តោនដល់២០០ឃុំនៃ៧ខេត្តនៅជុំវិញបឹងទន្លេសាប បានជួលអង្គការពីរ មានអង្គការ BFDនិង CEDACឲ្យចុះស៊ើបអង្កេតភាពមិនប្រក្រតីក្រោយការចែកអង្ករនៅក្នុងខេត្តទាំង៧នោះ។
លោក ឡុង ពិសិដ្ឋ បន្តថា ធនាគារនិងរដ្ឋាភិបាលនឹងបើកកិច្ចប្រជុំរកវិធីដោះស្រាយកែលម្អអាចមិនមានការតវ៉ាក្រោយការចែកស្បៀងដល់ជនក្រីក្រក្នុងរាជធានីភ្នំពេញក្រោយបុណ្យអុំទូក។
អ្នកស្រុកនៅខេត្តក្រចេះតវ៉ាបញ្ហាថ្លៃអគ្គិសនីខ្ពស់
ប្រជាពលរដ្ឋជាង៧០០នាក់នៅឃុំឆ្លូង ស្រុកឆ្លូង ខេត្តក្រចេះ បានផ្ដិតមេដៃទាមទារឲ្យអាជ្ញាធរខេត្តជួយអន្តរាគមន៍ធ្វើយ៉ាងណាឲ្យតម្លៃជាវអគ្គិសនីបញ្ចុះតម្លៃមកវិញ បន្ទាប់ពីប្រេងឥន្ធនៈបានចុះតម្លៃស្ទើរតែដូចដើមវិញហើយនោះ។
តំណាងប្រជាពលរដ្ឋបានឲ្យដឹងថា នៅពេលដែលប្រេងឥន្ធនៈបានឡើងខ្ពស់ តម្លៃជាវអគ្គិសនីបានដំឡើងដល់ ៣៥០០រៀលក្នុងមួយគីឡូវ៉ាត់។ ប៉ុន្តែបច្ចុប្បន្ន តម្លៃប្រេងឥន្ធនៈបានចុះស្ទើរមកដល់កម្រិតដើមវិញហើយនោះ អ្នកស្រុកថា មានការបញ្ចុះតម្លៃជាវអគ្គិសនីដែរ តែបន្តិចបន្តួចមិនមានតុល្យភាពទៅនឹងការបញ្ចុះតម្លៃប្រេង។
អភិបាលខេត្តក្រចេះគឺលោក ខាំ ភឿន បានជម្រាបថា ក្រោយទទួលពាក្យស្នើសុំឲ្យជួយអន្តរាគមន៍ លោកបានហៅម្ចាស់អាជីវកម្មមកពិភាក្សាដើម្បីដោះស្រាយបញ្ហានេះ។
ជំនន់ទឹកភ្លៀងបំផ្លាញដំណាំអ្នកស្រុកនៅខេត្តឧត្តរមានជ័យ
ទឹកជំនន់ដែលហូរខ្លាំងចុះពីតំបន់ភ្នំ កំពុងហូរកាត់កំណាត់ផ្លូវចន្លោះពីស្រុកអន្លង់វែងនិងស្រុកត្រពាំងប្រាសាទ ខេត្តឧត្ដរមានជ័យ បណ្ដាលឲ្យដំណាំស្រូវ សណ្ដែកសៀង ដែលត្រូវប្រមូលផលទទួលរងការខូចខាតរាប់សិបហិកតារនិងការធ្វើដំណើរឆ្ពោះទៅកាន់តំបន់ប្រាសាទព្រះវិហារ ត្រូវជួបការលំបាកផ្នែកដឹកជញ្ជូន។
អធិការនគរបាលស្រុកត្រពាំងប្រាសាទ លោក កែវ ប៉ាន់ បានឲ្យដឹងកាលពីដើមសប្ដាហ៍នេះថា ភ្លៀងបានធ្លាក់ខ្លាំងជាប់ៗគ្នា ចំនួន ៤ថ្ងៃមកហើយ នៅតំបន់នោះ បណ្ដាលឲ្យស្រូវ សណ្ដែករបស់កសិករទូទាំងស្រុកត្រពាំងប្រាសាទ ទទួលរងការខូចខាតស្ទើរទាំងស្រុង។ ក៏ប៉ុន្តែទោះយ៉ាងណា លោកមិនទាន់អាចបញ្ជាក់អំពីតួលេខបានច្បាស់លាស់នៅឡើយទេ។
ក្រុមយោធារុះរើបំផ្លាញផ្ទះអ្នកស្រុកក្នុងជម្លោះដីធ្លីនៅក្រុងព្រះសីហនុ
តំណាងប្រជាពលរដ្ឋចំនួនជាង ៣០០គ្រួសាររស់នៅក្នុងសង្កាត់ ៤ ខណ្ឌមិត្តភាព ក្រុងព្រះសីហនុ បានសម្ដែងការតវ៉ានិងព្រួយបារម្ភជាខ្លាំងនៅគ្រាដែលក្រុមយោធាមួយក្រុមប្រដាប់អាវុធកំពុងតែធ្វើសកម្មភាពឈូសឆាយកម្ទេចផ្ទះសម្បែងរបស់ប្រជាពលរដ្ឋជាច្រើនខ្នងនៅថៃ្ងអង្គារនេះដើម្បីរឹបយកដីចំនួនជាង៦ហិកតារ។
កាលពីថៃ្ងច័ន្ទកន្លងទៅនេះ មានក្រុមយោធាប្រដាប់អាវុធចំនួន៥នាក់បានមករុះរើផ្ទះចំនួនជាង ១០ខ្នងដោយគ្មានការជូនដំណឹងជាមុន និងគ្មានឯកសារដីកាឬបទបញ្ជាអ្វីឡើយ។
ទោះជាយ៉ាងណា ក្រុមយោធាប្រដាប់អាវុធដែលបានឈូសឆាយផ្ទះសម្បែងប្រជាពលរដ្ឋជាច្រើនខ្នងកាលពីថៃ្ងច័ន្ទនិងថៃ្ងអង្គារនោះ បានផ្អាកសកម្មភាពឈូសឆាយនោះហើយដោយសារការរារាំងនិងការតវ៉ាជាច្រើនពីសំណាក់ប្រជាពលរដ្ឋរងគ្រោះបាត់បង់ដីធ្លីនិងទីជម្រករបស់ខ្លួន។
លោក សឿន វ៉ា ជាមន្រ្តីយោធាជាន់ខ្ពស់នៃអគ្គបញ្ជាការដ្ឋាននៃកងយោធពលខេមរភូមិន្ទទទួលបន្ទុកអភិវឌ្ឍន៍នៅតំបន់ក្បាលឆាយជាតំបន់មានវិវាទដីធ្លីនោះ បានមានប្រសាសន៍ថា លោកបានសម្រេចផ្អាកការឈូសឆាយនោះមួយរយៈពេលមួយសប្តាហ៍សិនដោយសារមានការតវ៉ាជាច្រើនពីសំណាក់ប្រជាពលរដ្ឋរងគ្រោះ ហើយថា ផ្អែកតាមគម្រោងរបស់លោក គ្រោងនឹងរុះរើផ្ទះសម្បែងប្រជាពលរដ្ឋចំនួន៧ខ្នងតែប៉ុណ្ណោះដែលលោកចោទប្រកាន់ថា ប្រជាពលរដ្ឋទំាងនោះបានមកតាំងទីលំនៅនៅលើដីធ្លីហាមឃាត់ដោយអនុក្រឹត្យ៕