សង្ខេបព័ត៌មានប្រចាំសប្ដាហ៍ ថ្ងៃ ៤ ដល់ ១០ សីហា ២០០៨
ដោយ មុំ សុផុន
2008-08-10
ព័ត៌មានសំខាន់ៗប្រចាំសប្ដាហ៍នេះរួមមាន ព្រះមហាក្សត្រ ព្រះបាទ សម្ដេចព្រះបរមនាថ នរោត្តម សីហមុនី បានចេញព្រះរាជលិខិតស្នើសុំឲ្យមានការអន្តរាគមន៍ដោះលែងពលរដ្ឋ៦នាក់ដែលកំពុងជាប់ឃុំដោយសារទំនាស់ដីធ្លី និងព័ត៌មានផ្សេងៗដទៃទៀត ។
ព្រះមហាក្សត្រខ្មែរ សម្តេចព្រះបរមនាថ នរោត្តម សីហមុនី (ស្ដាំ) ។
លោក មុំ សុផុន អ្នកយកព័ត៌មានវិទ្យុអាស៊ីសេរី ប្រចាំទីក្រុងភ្នំពេញ បានរាយការណ៍សរុបព័ត៌មានសំខាន់ៗនៅកម្ពុជា ពីថ្ងៃ ៤ ដល់ ១០ សីហា ឆ្នាំ២០០៨ ។
ព្រះមហាក្សត្រស្នើសុំឲ្យមានការអន្តរាគមន៍ដោះលែងពលរដ្ឋ៦នាក់
ព្រះមហាក្សត្រនៃប្រទេសកម្ពុជា ព្រះបាទ សម្ដេចព្រះបរមនាថ នរោត្តម សីហមុនី ទ្រង់បានចេញព្រះរាជលិខិតដែលចុះថ្ងៃទី៣១ ខែកក្កដា ស្នើសុំឲ្យលោកនាយករដ្ឋមន្ត្រី ហ៊ុន សែន អន្តរាគមន៍ដោះលែងពលរដ្ឋ៦នាក់ ដែលកំពុងជាប់ឃុំនៅពន្ធនាគារព្រៃស ដោយសារទំនាស់ដីធ្លីនៅខេត្តព្រះវិហារកន្លងទៅនោះ ។
ព្រះរាជចំណាររបស់ព្រះមហាក្សត្រមានខ្លឹមសារថា ព្រះអង្គបានទទួលសំណុំលិខិតរបស់ភរិយា និងឪពុកម្តាយបងប្អូនទាំង៦គ្រួសារ នៅភូមិស្រអែម ឃុំកន្ទួត ស្រុកជាំក្សាន្ត ខេត្តព្រះវិហារ ដែលបានស្នើសុំអន្តរាគមន៍ពីព្រះអង្គទៅសម្តេចអគ្គមហាសេនាបតីតេជោ លើកលែងការចោទប្រកាន់ចំពោះស្វាមីរបស់គាត់ទាំង៦នាក់ ឈ្មោះ ម៉ាន់ ច័ន្ទថន, ម៉ាន់ ច័ន្ទថា, រឹម រឿយ, ឈឿន ឆេង, នៅ ទិត្យ និង សុំ សុភ័ក្រ្ត ។
នៅឆ្នាំ២០០៧ អាជ្ញាធរបានបណ្តេញក្រុមអ្នកស្រុកចេញពីតំបន់ដែលសំអាងថា ដីនោះគឺជាតំបន់ហាមឃាត់ ។ ការបណ្តេញពលរដ្ឋគ្រានោះត្រូវមន្រ្តីអង្គការសិទ្ធិមនុស្សលីកាដូ បានអះអាងថាក៏បណ្តាលឲ្យមានអំពើហិង្សា ការចាប់ខ្លួន និងការបាញ់សម្លាប់ពលរដ្ឋយ៉ាងហោច២នាក់ផងដែរ ។
កម្ពុជារំពឹងថានឹងក្លាយខ្លួនទៅជាប្រទេសមហាអំណាចផ្នែកកសិកម្ម
កម្ពុជាកំពុងតែរំពឹងថានឹងកា្លយខ្លួនទៅជាប្រទេសមហាអំណាចផ្នែកកសិកម្ម បន្ទាប់ពីជំនួបរវាងនាយករដ្ឋមន្ត្រី គូវ៉េត អ្នកអង្គម្ចាស់ អាល់ហ្សែរបារ និងនាយករដ្ឋមន្ត្រីខ្មែរ លោក ហ៊ុន សែន កាលពីព្រឹកថ្ងៃច័ន្ទកន្លងមកនេះនៅឯរដ្ឋសភា ។
ក្នុងដំណើរទស្សនកិច្ចរយៈពេល២ថ្ងៃរបស់នាយករដ្ឋមន្ត្រីគូវ៉េតនៅកម្ពុជា អ្នកនាំពាក្យរដ្ឋាភិបាលកម្ពុជា លោក ខៀវ កាញារីទ្ធ មានប្រសាសន៍ឲ្យដឹងថា អ្នកអង្គម្ចាស់ អាល់ហ្សែរបារ បានផ្តោតការយកចិត្តទុកដាក់សំខាន់ទៅលើការវិនិយោគផ្នែកកសិកម្មនៅកម្ពុជា ដូចជាការនាំចេញគ្រឿងបរិភោគទៅកាន់ប្រទេសគូវ៉េត ការនាំចេញផលិតផលកសិកម្មនិងការដាក់ទុនទៅលើការដាំដុះស្រូវនៅកម្ពុជាដើម្បីទីផ្សារគូវ៉េត ។
អ្នកនាំពាក្យរូបនោះបានថ្លែងដោយសង្ឃឹមលើសក្តានុពលសេដ្ឋកិច្ចកម្ពុជាទៅថ្ងៃមុខ ដោយផ្អែកលើគម្រោងនាំចេញស្រូវថា គេនឹងធ្វើឲ្យបានលើស៩លានតោនក្នុងមួយឆ្នាំ បន្ទាប់ពីមានការវិនិយោគនោះ ។
លោក ខៀវ កាញារីទ្ធ មានប្រសាសន៍ទៀតថា អ្នកអង្គម្ចាស់នាយករដ្ឋមន្រ្តីគូវ៉េត ទ្រង់មានបន្ទូលថា នឹងរុញឲ្យប្រទេសកម្ពុជាជាមហាអំណាចកសិកម្មក្នុងពិភពលោក ។
កិច្ចពិភាក្សារយៈពេលមួយម៉ោងរវាងនាយករដ្ឋមន្រ្តីគូវ៉េត បានលើកមកបន្ថែមទៀតនូវគម្រោងដាក់ស្ថានទូតរបស់ខ្លួននៅក្នុងប្រទេសកម្ពុជាក្នុងពេលឆាប់ខាងមុខនេះ ។ ហើយជាមួយគ្នានោះដែរភាគីទាំងពីរបានចុះហត្ថលេខាព្រមព្រៀងគ្នានូវចំណុចចំនួន៥ ដូចជាកិច្ចសហប្រតិបត្តិការកម្ពុជា-គូវ៉េត ការព្រមព្រៀងរបស់កម្ពុជាក្នុងការធ្វើច្បាប់គាំពារអ្នកវិនិយោគគូវ៉េត និងការព្រមព្រៀងលើមូលនិធិប្រាក់កម្ចីដើម្បីរៀបចំរចនាសម្ព័ន្ធផ្លូវថ្នល់នៅកម្ពុជាជាដើម ។
ទាហានថៃរារាំងមិនឲ្យពលរដ្ឋខ្មែរចូលប្រាសាទតាមាន់ធំ
ទាហានថៃបានរារាំងមិនឲ្យប្រជាពលរដ្ឋខ្មែរចូលទៅកាន់ទីបរិវេណខាងក្នុងនៃប្រាសាទតាមាន់ធំ នៅលើខ្នងភ្នំដងរែក បើទោះបីជាមានការស្នើសុំពីមេបញ្ជាការកងទ័ពកម្ពុជាក៏ដោយ ។
លោកវរសេនីយ៍ឯក នាក់ ពង់ មេបញ្ជាការកងពល៤២ដែលបានដាក់ទ័ពពង្រាយការពារនៅលើខ្នងភ្នំដងរែកបានថ្លែងថា ភាគីទ័ពឈុតខ្មៅរបស់ថៃបានបដិសេធមិនឲ្យចូលទៅក្នុងបរិវេណប្រាសាទតាមាន់់ធំនោះឡើយ នាព្រឹកថ្ងៃទី៨ ខែ៨ ឆ្នាំ២០០៨នេះ ។
លោកបន្តថាភាគីថៃបានសំអាងថា មេបញ្ជាការកងទាហានឈុតខ្មៅនោះមិននៅ ដូច្នេះហើយក្រុមកូនទាហានឈុតខ្មៅរបស់ថៃបានបដិសេធមិនឲ្យចូលនោះទេ ។
ទោះជាយ៉ាងណាក៏ដោយលោកវរសេនីយ៍ឯក នាក់ ពង់ បានឲ្យដឹងថាថៃបានប្រកាសឲ្យរង់ចាំពីរសប្ដាហ៍ទៀតទើបអាចអនុញ្ញាតឲ្យពុទ្ធបរិស័ទខ្មែរចូលបាន ។
មនុស្សជាង៣០នាក់ដែលជាជនជាតិខ្មែរបាននាំគ្នាធ្វើដំណើរឡើងទៅជើងភ្នំដងរែក នៅព្រឹកថ្ងៃទី៨ ខែសីហា ឆ្នាំ២០០៨នេះ ដើម្បីប្រារព្ធពិធីបួងសួងតាមបែបព្រហ្មញ្ញសាសនា អន្ទងមហិទ្ធិឫទ្ធិនិងបារមីបុព្វបុរសដូនតាអតីតព្រះមហាក្សត្រនៅទីនោះ ឲ្យបណ្ដេញកងទ័ពឈ្លានពានរបស់ថៃចេញពីទឹកដីប្រាសាទតាមាន់ធំ ។ ការហាមឃាត់និងការឈ្លានពានរបស់ថៃបានធ្វើឲ្យពុទ្ធបរិស័ទខ្មែរមានការខកចិត្តនិងខឹងសម្បាយ៉ាងខ្លាំង ។
លោកស្រី ព្រាប ស៊ីនរ៉ា បានឲ្យដឹងថាលោកស្រីមានការខកចិត្តខ្លាំងណាស់ព្រោះជនជាតិខ្មែរមិនអាចចូលទៅជាន់ឬប៉ះប្រាសាទរបស់ខ្មែរបាន ។
ហ៊ុន សែន៖ ដំណើរការប្រព្រឹត្តទៅនៃការបោះឆ្នោតជាជោគជ័យដ៏សម្បើម
លោកនាយករដ្ឋមន្រ្តី ហ៊ុន សែន បានថ្លែងទៅកាន់កសិកររាប់រយនាក់នៅខេត្តកំពង់ស្ពឺ ដោយហៅដំណើរការប្រព្រឹត្តទៅនៃការបោះឆ្នោតកាលពីពេលថ្មីៗនេះថាជាជោគជ័យដ៏សម្បើម ហើយថ្លែងអំណរគុណចំពោះពលរដ្ឋគ្រប់ស្រទាប់វណ្ណៈដែលបានបោះឆ្នោតឲ្យលោកធ្វើនាយករដ្ឋមន្រ្តីតទៅទៀត ។
លោក ហ៊ុន សែន សម្ដែងមោទនភាពដែលថាការបោះឆ្នោតនោះបានប្រព្រឹត្តទៅយ៉ាងប្រពៃ ហើយគេវាយតម្លៃថាប្រព្រឹត្តទៅដោយសេរី ដោយយុត្តិធម៌ និងគួរទទួលយកបាន ។
បក្សនយោបាយ៣រួមគ្នាបដិសេធលទ្ធផលនៃការបោះឆ្នោត
គណបក្សនយោបាយបីមានគណបក្សសមរង្ស៊ី គណបក្សសិទ្ធិមនុស្ស និងគណបក្ស នរោត្តម រណឫទ្ធិ នៅសប្តាហ៍នេះដែរជួបជុំគ្នាធ្វើការបដិសេធនូវលទ្ធផលនៃការបោះឆ្នោតជ្រើសរើសកាលពីថ្ងៃទី២៧ ខែកក្កដាកន្លងមកនេះ ។
ការច្រានចោលលទ្ធផលនេះត្រូវគណបក្សទាំងបីអះអាងថា ការបោះឆ្នោតមិនបានប្រព្រឹត្តទៅដោយតម្លាភាពនោះទេ ហើយបានចោទប្រកាន់ទៀតថា ការបោះឆ្នោតនោះមានការកេងបន្លំ ដូចជា ការលុបឈ្មោះអ្នកដែលមានសិទ្ធិបោះឆ្នោត ការចេញទម្រង់ ១០១៨ ច្រើនពេក មានជនជាតិវៀតណាមបានចូលរួមបោះឆ្នោត និងឈ្មោះមួយចំនួនមានអ្នកបោះឆ្នោតជំនួសជាដើម ។
គណបក្សទាំងបីបានស្នើសុំឲ្យគណៈកម្មាធិការជាតិរៀបចំការបោះឆ្នោតធ្វើការបោះឆ្នោតឡើងវិញនៅតាមមណ្ឌលមួយចំនួន ។ ក៏ប៉ុន្តែមន្ត្រីជាន់ខ្ពស់នៃគ.ជ.ប.បានឲ្យដឹងថា ករណីនេះមិនអាចកើតមាននូវដំណើរការបោះឆ្នោតឡើងវិញបានឡើយ ។
នាយករដ្ឋមន្ត្រីខ្មែរព្រមានពីបញ្ហាជម្លោះព្រំដែនរវាងខ្មែរនិងថៃ
លោកនាយករដ្ឋមន្ត្រី ហ៊ុន សែន បានព្រមានកាលពីថ្ងៃពុធ ទី៦ សីហានេះ ថា ប្រសិនបើមានការប្រឈមមុខដាក់គ្នារវាងទាហានខ្មែរនិងថៃនៅតំបន់ប្រាសាទព្រះវិហារក្លាយទៅជាការផ្ទុះអាវុធច្បាំងគ្នាទៅវិញទៅមកនោះ សេដ្ឋកិច្ចនៃប្រទេសទាំងពីរនឹងរងការលំបាកជាមិនខាន ។
លោក ហ៊ុន សែន បានមានប្រសាសន៍បន្តថាជំហររាជរដ្ឋាភិបាលខ្មែរនៅតែចង់ឲ្យមានការដោះស្រាយជម្លោះព្រំដែនរវាងខ្មែរនិងថៃដោយសន្តិវិធី ហើយថាប្រទេសទាំងពីរត្រូវពង្រឹងពង្រីកមិត្តភាពនិងសហប្រតិបត្តិការបន្ថែមទៀត ។
នៅទន្ទឹមនឹងនោះលោកនាយករដ្ឋមន្ត្រី ហ៊ុន សែន ក៏បានថ្លែងរិះគន់ចំពោះខិត្តប័ណ្ណដែលបានចែកចាយកាលពីពេលថ្មីៗនេះ អំពាវនាវសុំឲ្យប្រជាពលរដ្ឋខ្មែរឈប់នាំទំនិញថៃចូលក្នុងប្រទេសកម្ពុជានិងឈប់ទិញទំនិញទាំងនោះយកមកប្រើប្រាស់ ដើម្បីជាការឆ្លើយតបទៅនឹងសកម្មភាពឈ្លានពានរបស់កងទាហានថៃដែលរំលោភចូលបូរណភាពទឹកដីប្រទេសកម្ពុជានៅវត្តកែវសិក្ខាគិរីស្វារៈ ហៅវត្តប្រាសាទព្រះវិហារ និងនៅប្រាសាទតាមាន់ធំក្នុងខេត្តឧត្តរមានជ័យ ។
លោកថាគ្រាន់តែបញ្ហាជម្លោះព្រំដែនគេមិនគួរធ្វើឲ្យប្រទេសទាំងពីរក្លាយទៅជាសត្រូវនឹងគ្នានូវរាល់គ្រប់បញ្ហាទាំងអស់នោះឡើយ ។
កម្ពុជាបញ្ជូនកីឡាករ៤នាក់ទៅចូលរួមកីឡាអូឡាំពិកនៅចិន
កីឡាករប្រទេសកម្ពុជាចំនួន៤នាក់បានធ្វើដំណើរទៅកាន់ប្រទេសចិននៅថ្ងៃពុធ ទី៧ សីហានេះ ដើម្បីចូលរួមប្រកួតកីឡាអូឡាំពិកនៅឯទីក្រុងប៉េកាំង ។
លោក មាស សារិន អគ្គលេខាធិការនៃគណៈកម្មាធិការអូឡាំពិកកម្ពុជា បានមានប្រសាសន៍ថាកីឡាករខ្មែរទាំង៤នាក់ មានស្រី២នាក់ និងប្រុស២នាក់ បានទទួលយកវិញ្ញាសាចំនួន២ដើម្បីប្រកួត គឺទី១ ការប្រឡងហែលទឹកនិងអត្តពលកម្ម ៕
ឧបករណ៍រឿង
|
ស្តាប់សំឡេង |
|
ថតសំឡេង |
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
សង្ខេបព័ត៌មានប្រចាំសប្ដាហ៍ ថ្ងៃ ២៤ ដល់ ៣០ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ១៧ ដល់ ២៣ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ១០ ដល់ ១៦ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ៣-៩ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ២៧ តុលា ដល់ ២ វិច្ឆិកា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ២០ ដល់ ២៦ តុលា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ១៣ ដល់ ១៩ តុលា ២០០៨
សង្ខេបព័ត៌មានប្រចាំសប្ដាហ៍ ថ្ងៃ ៦ ដល់ ១២ តុលា ២០០៨
