លោក កែវ និមល អ្នកយកព័ត៌មានវិទ្យុអាស៊ីសេរី ប្រចាំទីក្រុងភ្នំពេញ បានរាយការណ៍សរុបព័ត៌មានសំខាន់ៗនៅកម្ពុជា ពីថ្ងៃ ១០ ដល់ ១៦ វិច្ឆិកា ឆ្នាំ២០០៨។
អគ្គស្នងការប៉ូលិសជាតិ ហុក ឡង់ឌី ទទួលមរណភាពក្នុងការធ្លាក់ឧទ្ធម្ភាគចក្រ
លោកអគ្គស្នងការប៉ូលិសជាតិផ្កាយមាស៤ ហុក ឡង់ឌី រួមជាមួយលោកឧត្តមសេនីយ៍យោធាផ្កាយ៣ មេបញ្ជាការរងកងទ័ពជើងគោក សុក សាឯម និងអ្នកបើកយន្តហោះចំនួន២នាក់បានស្លាប់កាលពីថ្ងៃទី៩ វិច្ឆិកា ក្នុងពេលឧទ្ធម្ភាគចក្រធ្លាក់នៅភូមិព្រៃចៀវ ឃុំកំពង់ចក ស្រុករំដួល ខែត្រស្វាយរៀង។
តាមការសន្និដ្ឋានដំបូងរបស់ក្រុមអ្នកជំនាញឯកទេសបាននិយាយថា អាកាសធាតុអាក្រក់ជាបុព្វហេតុដែលបានបណ្តាលឲ្យយន្តហោះធ្លាក់។ ការស៊ើបអង្កេតនៅបន្តទៀតដើម្បីឲ្យបានពត៌មានជាក់លាក់ថា តើមូលហេតុពិតប្រាកដនៃការធ្លាក់យន្តហោះនោះ។
ក្រោយការស្លាប់របស់លោក ហុក ឡង់ឌី មន្រ្តីក្រសួងមហាផ្ទៃបានឲ្យដឹងថា លោក នេត សាវឿន អគ្គស្នងការរងប៉ូលិសជាតិនិងត្រូវជាក្មួយប្រសាលោកនាយករដ្ឋមន្ត្រី ហ៊ុន សែន បានទទួលការតែងតាំងជំនួសលោកឧត្តមសេនីយ៍ប៉ូលីសផ្កាយមាស៤ ហុក ឡង់ឌី។
សពលោក ហុក ឡង់ឌី បានដង្ហែពីភ្នំពេញទៅកប់នៅស្រុកកំណើតលោកនៅឃុំបាវិត ស្រុកចន្ទ្រា ខែត្រស្វាយរៀង នៅថ្ងៃទី១៥ វិច្ឆិកា។
កម្ពុជាប្រារព្ធទិវាបុណ្យខួបឯករាជ្យជាតិលើកទី៥៥
ទិវាបុណ្យខួបឯករាជ្យជាតិកម្ពុជាលើកទី៥៥បានប្រព្រឹត្តទៅយ៉ាងអធិកអធមនៅទីក្រុងភ្នំពេញដោយមានការរៀបចំឲ្យមានការហែក្បួនព្យុហយាត្រាមហាជនផង។
ព្រះមហាក្សត្រកម្ពុជានិងមន្រ្តីជាន់ខ្ពស់កម្ពុជាជាច្រើនរូបបានចូលរួមនៅក្នុងពិធីបុណ្យខួបឯករាជ្យជាតិនោះ ដែលមានជាអាទិ៍លោកនាយករដ្ឋមន្រ្តី ហ៊ុន សែន លោកប្រធានរដ្ឋសភា ហេង សំរិន លោកប្រធានព្រឹទ្ធសភា ជា ស៊ីម។
នៅក្នុងឱកាសបុណ្យខួបលើកនេះមានការថ្លែងសុន្ទរកថាដោយលោកនាយករដ្ឋមន្រ្តី ហ៊ុន សែន និងព្រះមហាក្សត្រអំពីប្រវត្តិនៃឯករាជ្យជាតិកម្ពុជាផងដែរ។
ក្បូនព្យុហយាត្រាចំនួន៣១ផែនរបស់ក្រសួងមន្ទីរនានាបានចាប់ផ្តើមដើរក្រោយពេលព្រះមហាក្សត្របានថ្លែងព្រះរាជសុន្ទរកថាចប់។
តាមមន្រ្តីរៀបចំបុណ្យជាតិនិងអន្តរជាតិបានឲ្យដឹងថា មានមនុស្សប្រមាណ៦ម៉ឺននាក់ចូលរួមពិធីបុណ្យឯករាជ្យជាតិលើកនេះ។
កម្ពុជាប្រារព្ធពិធីបុណ្យអុំទូក
ពិធីបុណ្យអុំទូកបានប្រព្រឹត្តទៅរយៈពេលបីថ្ងៃនៅកម្ពុជាដោយមានទូកគ្រប់ប្រភេទចូលរួមចំនួន៤០៦ទូកប្រកួតនៅក្នុងចំណោមទូកចំនួន៤២៤ដែលបានចុះឈ្មោះមកពីគ្រប់ខែត្រក្រុងទូទាំងប្រទេសនិងមានការបណ្តែតប្រទីបចំនួន២១ផង។
នៅក្នុងឱកាសពិធីបុណ្យអុំទូក បណ្តែតប្រទីប សំពះព្រះខែ និងអកអំបុកឆ្នាំនេះ មានស្លាប់អ្នកអុំទូកមួយរូបមកពីខែត្រពោធិ៍សាត់ដែលបានធ្លាក់ទឹកក្នុងពេលហាត់សមដៃតាមដងទន្លេសាបកាលពីថ្ងៃទី១០ វិច្ឆិកាកន្លងមក។
បើតាមគណៈកម្មការបុណ្យអុំទូកបានឲ្យដឹងថា នៅក្នុងកម្មវិធីនោះមានការបែងចែកពានរង្វាន់ ហើយអ្នកដែលទទួលពានរង្វាន់ក្នុងផែនលេខមួយនឹងទទួលបានទឹកប្រាក់៣៥ម៉ឺនរៀល ហើយអ្នកដែលទទួលបានពានរង្វាន់ក្នុងផែនលេខ២ បានទទួលទឹកប្រាក់៣០ម៉ឺនរៀល អ្នកទទួលពានរង្វាន់ក្នុងផែនលេខ៣បាន២៥ម៉ឺនរៀល និងអ្នកទទួលពានរង្វាន់ក្នុងផែនលេខ៤បាន២០ម៉ឺនរៀល។
ក្រុមសមត្ថកិច្ចបានឲ្យដឹងថា នៅក្នុងពិធីបុណ្យអុំទូកនេះនៅក្នុងខេត្តកណ្តាលនិងនៅរាជធានីភ្នំពេញមានមនុស្សស្លាប់យ៉ាងហោចណាស់ចំនួន៧នាក់ គឺភាគច្រើនដោយសារគ្រោះថ្នាក់ចរាចរណ៍។
ក្រុមប៉ូលិសក៏បានឲ្យដឹងដែរថា នៅក្នុងពិធីបុណ្យនេះសមត្ថកិច្ចចាប់បានចោរលូកហោប៉ៅចំនួន៤នាក់និងចោរឆក់ចំនួន៦នាក់។ នៅក្នុងពិធីបុណ្យនេះមានកម្លាំងសន្តិសុខចំនួនប្រមាណ១ម៉ឺននាក់បានដាក់ពង្រាយការពាសន្តិសុខ។
កម្ពុជា-ថៃជួបចរចាគ្នាពីបញ្ហាព្រំដែននៅឯខែត្រសៀមរាប
កិច្ចចរចាកម្ពុជានិងថៃថ្នាក់គណៈកម្មាធិការព្រំដែននិងរដ្ឋមន្រ្តីការបរទេសបានប្រព្រឹត្តទៅនៅខែត្រសៀមរាបប្រទេសកម្ពុជា កាលពីថ្ងៃទី ១០ ១១ និង ១២ វិច្ឆិកា។
ការប្រជុំចំនួនពីរថ្ងៃដំបូងជាការប្រជុំថ្នាក់គណៈកម្មាធិការបច្ចេកទេសនិងការប្រជុំនៅថ្ងៃទី១២ជាការប្រជុំថ្នាក់រដ្ឋមន្រ្តីការបរទេស។
លទ្ធផលនៃកិច្ចប្រជុំលើកនេះគឺរដ្ឋមន្រ្តីការបរទេសរបស់ប្រទេសទាំងពីរបានឯកភាពលើការវាស់វែងព្រំដែននៅតំបន់ប្រាសាទព្រះវិហារដែលចាប់ផ្តើមនៅពាក់កណ្តាលខែធ្នូខាងមុខ ព្រមទាំងមានការដោះមីនផងដែរ។
ការប្រជុំបានផ្តោតទៅលើការទទួលស្គាល់ចំពោះការរកឃើញបង្គោលព្រំដែនមួយចំនួនផងដែរ។ចំពោះការដកកងទ័ពចេញពីតំបន់ប្រាសាទព្រះវិហារនៅមិនទាន់បានឯកភាពគ្នានៅឡើយទេ ដោយភាគីថៃត្រូវការឆ្លងមតិរបស់សភាថៃជាបន្តទៀតសិន។
អៀង សារី និង អៀង ធីរិទ្ធ នឹងត្រូវបន្តឃុំខ្លួនមួយឆ្នាំទៀតមុនពេលកាត់ទោស
លោក យូ ប៊ុនឡេង សហចៅក្រមស៊ើបអង្កេតរបស់សាលាក្តីខ្មែរក្រហមបានឲ្យកាសែតក្នុងស្រុកដឹង កាលពីថ្ងៃទី១២ វិច្ឆិកា ថា លោក អៀង សារី និងភរិយាឈ្មោះ អៀង ធីរិទ្ធ នឹងត្រូវបន្តឃុំខ្លួនចំនួនមួយឆ្នាំទៀតមុនពេលកាត់ទោសជាសាធារណៈ។
លោកសហចៅក្រមសាលាក្ដីខ្មែរក្រហមបានឲ្យដឹងទៀតថា ការប្រកាសអំពីការឃុំខ្លួននេះនឹងប្រកាសក្រោយបុណ្យអុំទូក។
លោក អៀង សារី និងភរិយា បានត្រូវឃុំខ្លួនចំនួនមួយឆ្នាំមកហើយដោយសារការខ្លាចពួកគាត់អាចបំផ្លាញវត្ថុតាងឬបង្កចលាចលនៅពេលនៅក្រៅឃុំ។
ប្រធានអង្គការក្រៅរដ្ឋាភិបាលមួយជាប់ជាវីរនារី១០នាក់របស់ទូរទស្សន៍ CNN
លោកស្រី នួន ភិមាន ប្រធានអង្គការក្រៅរដ្ឋាភិបាលមួយ ឈ្មោះអង្គការលើកស្ទួយប្រជាពលរដ្ឋ បានត្រូវជាប់ជាបេក្ខជនម្នាក់ក្នុងចំណោមបេក្ខជនទូរទស្សន៍ CNN ១០នាក់ ប្រចាំឆ្នាំ២០០៨ ដែលរើសចេញមកពីបេក្ខជនចំនួន៤០០០នាក់ពីប្រទេសចំនួន៧៥ លើពិភពលោក។
លោកស្រី នួន ភិមាន មានស្រុកកំណើតនៅខេត្តកំពង់ចាម។ លោកស្រីអះអាងថា មុននឹងទូរទស្សន៍ CNN អាមេរិក សម្រេចជ្រើសរើសជាវីរនារីឆ្នើម ក្រុមការងារស្ថានីយទូរទស្សន៍នោះបានសាកសួរលោកស្រីជាច្រើនអំពីការធ្វើការងារនិងអង្គការដែលលោកស្រីបំពេញភារកិច្ចក្នុងការបង្កើត ដែលជួយកុមាររើសសំរាម កុមារក្រីក្រ និងស្រ្តីខ្មែរគ្មានមុខរបរ យកទៅបណ្តុះបណ្តាលឲ្យបានរៀនពីថ្នាក់មតេ្តយ្យដល់ថ្នាក់ទី៩ និងកុមារី និងស្រ្តីមួយចំនួនទៀត ត្រូវបានបង្រៀនមុខជំនាញផ្សេងៗសម្រាប់ចិញ្ចឹមជីវិតប្រមាណ៦០០នាក់។
ពិធីប្រកាស លោកស្រី នួន ភិមាន ជាបេក្ខជនរបស់ CNN បានរៀបចំធ្វើកាលពីថ្ងៃទី៩ វិចិ្ឆកាកន្លងទៅ នៅសណ្ឋាគារអាំងទែកុងទីណង់តាល់ ក្រុងភ្នំពេញ ដោយមានការចូលរួមពីលោករដ្ឋមន្ត្រីក្រសួងព័ត៌មាននិងតំណាងទូរទស្សន៍ CNN ផងដែរ។
តំណាងឲ្យទូរទស្សន៍ CNN អបអរលោកស្រី នួន ភីមាន ជាប់ជាវីរនារីឆ្នើមក្នុងចំណោមនារី១០រូបប្រចាំទូរទស្សន៍ CNN កាលពីយប់ថ្ងៃអាទិត្យ ទី៩ ខែវិច្ឆិកា ថា ក្រុមការងាររបស់ស្ថានីយនោះបានចុះដល់កន្លែងដែលលោកស្រីកំពុងធ្វើការជាមួយក្រុមកុមាររើសសំរាម កុមារកំព្រា និងគ្រួសារក្រីក្រ។
លោក ខៀវ កាញារីទ្ធ រដ្ឋមន្រ្តីក្រសួងព័ត៌មានដែលបានចូលរួមក្នុងពិធីអបអរនោះដែរ បានមានប្រសាសន៍ថា លោកស្រី នួន ភិមាន ដែលជាប់ជាវីរនារីមួយរូបក្នុងចំណោមនារី១០រូប ប្រចាំទូរទស្សន៍ CNN ប្រចាំឆ្នាំ២០០៨ គាត់ត្រូវបានជ្រើសរើសនិងល្បីឈ្មោះនៅក្នុងចំណោមប្រជារាស្រ្ដជាង៦ពាន់លាននាក់នៅលើពិភពលោក។ នេះក៏ជាមោទនភាពមួយដែរចំពោះប្រទេសកម្ពុជាយើងដែលយើងបានឃើញថា យើងមិនខ្វះទេអ្នកដែលមានសុឆន្ទៈ មានបំណងចង់ជួយសង្គមរបស់យើង។
ផលិតផលស្រូវឆ្នាំ២០០៨នេះនឹងមានបរិមាណគ្រប់គ្រាន់
មន្រ្តីជាន់ខ្ពស់នៃក្រសួងកសិកម្ម រុក្ខាប្រមាញ់ និងនេសាទ បានប៉ាន់ប្រមាណថា ផលិតផលស្រូវវស្សាសម្រាប់ឆ្នាំ២០០៨នេះនឹងមានបរិមាណគ្រប់គ្រាន់ក្រោយពីមានភ្លៀងធ្លាក់ជាច្រើននៅចុងឆ្នាំកាលពីពេលថ្មីៗនេះ។
លោក ម៉ាក់ សឿន អនុប្រធាននាយកដ្ឋានផែនការ ស្ថិតិ និងសហប្រតិបត្តិការអន្តរជាតិ របស់ក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ឲ្យដឹងថា នៅឆ្នាំ២០០៨នេះ មានការកើនទ្បើងនៃការធ្វើស្រូវរដូវវស្សារហូតដល់ជាង២លាន២សែនហិកតារច្រើនជាងឆ្នាំ២០០៧កន្លងទៅ។
លោកបានឲ្យដឹងថា ផលិតផលស្រូវឆ្នាំ២០០៨នេះនឹងរំពឹងមានការកើនឡើងជាងឆ្នាំ២០០៧កន្លងទៅ។
លោកបានឲ្យដឹងផងដែរថា ផលិតផលស្រូវកាលពីឆ្នាំ២០០៧កន្លងទៅ គឺមានចំនួនប្រមាណ៧លាន៦សែនតោននៅទូទាំងប្រទេសកម្ពុជា៕