លោក កែវ និមល អ្នកយកព័ត៌មានវិទ្យុអាស៊ីសេរី ប្រចាំទីក្រុងភ្នំពេញ បានរាយការណ៍សរុបព័ត៌មានសំខាន់ៗនៅកម្ពុជា ពីថ្ងៃ ២០ ដល់ ២៦ តុលា ឆ្នាំ២០០៨។
វៀតណាមនិងកម្ពុជាគ្រោងបោះបង្គោលព្រំដែនគោករួមគ្នានៅមុនដំណាច់ឆ្នាំនេះ
ប្រទេសវៀតណាមនិងកម្ពុជាមានគម្រោងបោះបង្គោលព្រំដែនគោករួមរវាងប្រទេសទាំងពីរឲ្យបានចំនួន១០០បង្គោលនៅមុនដំណាច់ឆ្នាំ២០០៨នេះ។
ការសម្រេចនេះបានកើតមានឡើងនៅក្នុងពេលមានកិច្ចប្រជុំរបស់គណៈកម្មាធិការព្រំដែនរបស់ប្រទេសទាំងពីរកាលពីថ្ងៃទី២៣-២៤ នៅក្រុងភ្នំពេញ។
ប្រទេសកម្ពុជានិងវៀតណាមមានព្រំដែនគោករួមគ្នាប្រវែង១២៧០គីឡូម៉ែត្រ ហើយប្រទេសទាំងពីរមានគម្រោងដាំបង្គោលចំនួន៣១៤នៅតាមព្រំដែននេះ ហើយគម្រោងដាំនេះនឹងធ្វើឲ្យហើយនៅឆ្នាំ២០១២។
មន្ត្រីយោធាថៃនិងកម្ពុជាជួបប្រជុំពិភាក្សាគ្នាពីបញ្ហាព្រំដែន
គណៈប្រតិភូយោធាថៃយោធភូមិភាគ២និងកម្ពុជាយោធភូមិភាគ៤ បានជួបប្រជុំគ្នានៅខែត្រសៀមរាប ប្រទេសកម្ពុជា នៅថ្ងៃទី២៣-២៤ តុលា ដើម្បីពិភាក្សាអំពីបញ្ហាព្រំដែននិងការប្រឈមមុខរវាងកងទ័ពប្រទេសទាំងពីរនៅតំបន់ប្រាសាទព្រះវិហារកម្ពុជា។
កិច្ចពិភាក្សានោះមិនបានដោះស្រាយឲ្យមានការដកទ័ពរវាងប្រទេសទាំងពីរនៅតំបន់ប្រាសាទព្រះវិហារទេ តែមានការសន្យារួមគ្នាមួយថា នឹងខិតខំរក្សាមិនឲ្យមានការប្រយុទ្ធគ្នារវាងកងទ័ពប្រទេសទាំងពីរដូចកាលពីថ្ងៃទី១៥ តុលា។
មានការរើសសេនាជននិងទាហាននៅក្នុងខែត្រឧត្តរមានជ័យ
ប្រភពព័ត៌មានពីខែត្រឧត្តរមានជ័យបានឲ្យដឹងថា មានការរើសសេនាជននិងទាហាននៅក្នុងស្រុកចំនួន៤របស់ខែត្រឧត្តរមានជ័យ។
មេបញ្ជាការរងយោធាខែត្រឧត្តរមានជ័យ លោក ហ៊ឹម សៀប បានមានប្រសាសន៍ឲ្យដឹងថា តាមលោកដឹងក្នុងមួយស្រុកមានរើសសេនាជនចំនួន១០០នាក់។
ការរើសសេនាជននេះបានកើតមានឡើងក្រោយពេលមានការប្រឈមមុខដាក់គ្នារវាងកងទ័ពខ្មែរជាមួយថៃ ចាប់តាំងពីពាក់កណ្តាលខែកក្កដាកន្លងមក។
នាយករដ្ឋមន្រ្តីខ្មែរដឹកនាំគណៈប្រតិភូទៅចូលរួមកិច្ចប្រជុំនៅចិន
លោកនាយករដ្ឋមន្រ្តីកម្ពុជាបានដឹកនាំគណៈប្រតិភូទៅចូលរួមប្រជុំនៅប្រទេសចិន ចាប់ពីថ្ងៃទី២០ ដល់ ២៦ តុលា។ នៅក្នុងពេលទៅប្រជុំនោះមានជួបជាមួយភាគីថៃ។
តាមមន្រ្តីក្រសួងការបរទេសកម្ពុជាបានឲ្យដឹងថា ការពិភាក្សាលើការប្រឈមមុខដាក់គ្នារវាងកងទ័ពកម្ពុជានិងថៃនៅតំបន់ព្រំដែន ជាប្រធានបទសំខាន់ក្នុងការជួបគ្នារវាងនាយករដ្ឋមន្រ្តីនៃប្រទេសទាំងពីរកម្ពុជាថៃនៅប្រទេសចិន។
តាមលោក ស្រ៊ី ថាមរុង្គ សមាជិកគណៈប្រតិភូបានឲ្យដឹងថា ប្រតិភូប្រទេសកម្ពុជាដែលដឹកនាំដោយលោកនាយករដ្ឋមន្រ្តី ហ៊ុន សែន នឹងចូលរួមក្នុងពិព័រណ៍អាស៊ានលើកទី៩ នៅខែត្រណាននឹង ប្រទេសចិន ពីថ្ងៃទី២២ ដល់ ២៣ តុលា ហើយដល់ថ្ងៃទី២៤ និង ២៥ បានទៅចូលរួមកិច្ចប្រជុំអាស៊ីអ៊ឺរ៉ុបនៅទីក្រុងប៉េកាំងដែលមានប្រតិភូមកពីប្រទេសចំនួន៤៥ចូលរួម។
អូស្រ្តាលីផ្តល់ប្រាក់៥លានដុល្លារដល់សាលាក្តីខ្មែរក្រហមភាគីអ.ស.ប.
រដ្ឋាភិបាលប្រទេសអូស្រ្តាលីបានផ្តល់ប្រាក់ចំនួន៥លានដុល្លារអាមេរិកដល់សាលាក្តីខ្មែរក្រហម ភាគីអង្គការសហប្រជាជាតិ (អ.ស.ប.) ដែលកំពុងប្រឈមមុខជាមួយការខ្វះលុយដំណើរការ។
យោងតាមឯកសារពីក្រសួងការបរទេសនិងពាណិជ្ជកម្មអូស្ត្រាលីបានឲ្យដឹងថា ប្រទេសអូស្ត្រាលីធ្លាប់បានថ្តល់ថវិកាដល់សាលាក្តីខ្មែរក្រហមកន្លងមកចំនួន៤លានដុល្លារសហរដ្ឋអាមេរិករួចទៅហើយ។
បើទោះបីជាមានការសន្យាផ្តល់ជាបន្តបន្ទាប់ពីសហរដ្ឋអាមេរិក អាល្លឺម៉ង់ និងប្រទេសអូស្ត្រាលី នាពេលថ្មីៗនេះក៏ដោយ លោក រាជ សម្បត្តិ អ្នកនាំពាក្យសាលាក្ដីខ្មែរក្រហម បានថ្លែងឲ្យដឹងថា ភាគីអង្គការសហប្រជាជាតិនៅខ្វះថវិកាច្រើនទៀត។
ជាមួយគ្នានេះដែរ លោក រាជ សម្បត្តិ បានឲ្យដឹងទៀតថា ភាគីកម្ពុជានៃសាលាក្តីក៏នៅខ្វះថវិកាជិត៥លានដុល្លារសហរដ្ឋអាមេរិកដែរ។
កម្ពុជាគ្រោងរៀបចំការបោះឆ្នោតរើសសមាជិកក្រុមប្រឹក្សាក្រុង ខែត្រ ខណ្ឌ និងស្រុក
ប្រទេសកម្ពុជាមានគម្រោងរៀបចំការបោះឆ្នោតរើសសមាជិកក្រុមប្រឹក្សាក្រុង ខែត្រ ខណ្ឌ និងស្រុក នៅខែឧសភា ឆ្នាំ២០០៩។ ការបោះឆ្នោតនោះអាចចំណាយប្រាក់ចំនួន១លានដុល្លារអាមេរិកកន្លះ។
មន្រ្តីគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. បានមានប្រសាសន៍ឲ្យដឹងនៅថ្ងៃទី២២ តុលា ថា ការបោះឆ្នោតរើសសមាជិកក្រុមប្រឹក្សារាជធានី ខែត្រ ស្រុក និងខណ្ឌ នៅខែឧសភា ឆ្នាំ២០០៩ខាងមុខ ជាការបោះឆ្នោតអសកល ដែលមានតែសមាជិកក្រុមប្រឹក្សាឃុំសង្កាត់ក្នុងមុខតំណែងប៉ុណ្ណោះដែលមានសិទ្ធិទៅបោះឆ្នោតបាន។
ខ្មែរនៅក្រៅប្រទេសគ្រោងធ្វើបាតុកម្មប្រឆាំងការឈ្លានពានរបស់ថៃនៅក្រុងឡាអេ
ប្រជាពលរដ្ឋខ្មែរដែលរស់នៅក្រៅប្រទេសមានគម្រោងធ្វើបាតុកម្មអហិង្សាមួយនៅថ្ងៃទី១ ខែវិច្ឆិកា ឆ្នាំ២០០៨ ខាងមុខនេះ នៅមុខទីស្នាក់ការតុលាការអន្តរជាតិ ទីក្រុងឡាអេ និងនៅមុខស្ថានទូតថៃ ប្រចាំក្រុងឡាអេ។
ក្នុងលិខិតមួយដែលវិទ្យុអាស៊ីសេរីទទួលបានពីគណៈកម្មការរៀបចំកម្មវិធីសម្រាប់បាតុកម្មនេះបានធ្វើការអំពាវនាវសុំឲ្យបងប្អូនជនរួមជាតិខ្មែរ នៅគ្រប់ទិសទី គ្រប់និន្នាការនយោបាយ គ្រប់ស្រទាប់វណ្ណៈ ក្រោកឈរឡើងដើម្បីរួមគ្នាធ្វើបាតុកម្មអហិង្សាប្រឆាំងនឹងការឈ្លានពានរបស់ប្រទេសថៃមកលើទឹកដីកម្ពុជានៅតំបន់ប្រាសាទព្រះវិហារ។
វៀតណាមហាមឃាត់ការសាងសង់របងវត្តខ្មែរនៅខែត្រកំពង់ចាម
វត្តខ្មែរមួយនៅជាប់ព្រំដែនកម្ពុជាវៀតណាមនៃច្រកបឹងជ្រោង ឃុំជាំ ស្រុកមេមត់ ខេត្តកំពង់ចាម ត្រូវបានអាជ្ញាធរការពារព្រំដែនវៀតណាមហាមឃាត់មិនឲ្យសាងសង់របងឡើយ ដោយគេអះអាងថាកន្លែងនោះជាតំបន់ស។
គណៈកម្មការវត្តគឺលោក ប៉ឹម ខេន បានមានប្រសាសន៍ប្រាប់វិទ្យុអាស៊ីសេរីឲ្យដឹងកាលពីថ្ងៃពុធ ទី២២ តុលា ថា វត្តគិរីមានជ័យ ត្រូវបានសាងសង់តាំងពីយូរមកម៉្លេះ វត្តនេះនៅជិតព្រំដែនខ្មែរវៀតណាម ហើយមានផ្ទៃដីជាង១ហិកតារ មានរបងព័ទ្ធនៅខាងមុខនិងសងខាង សល់ផ្នែកខាងក្រោយ ទើបគណៈកម្មការវត្តបានរៀបចំសាងសង់ផ្នែកខាងក្រោយនោះដែលមានប្រវែងប្រមាណជា ១០០ម៉ែត្រ ប៉ុន្តែត្រូវបានអាជ្ញាធរព្រំដែនវៀតណាមហាមឃាត់។
លោកបានបន្តថា ការហាមឃាត់មិនឲ្យសាងសង់របងនេះគឺកើតឡើងកាលពីថ្ងៃទី៧ ខែតុលាកន្លងទៅ ដោយអនុប្រធានប៉ុស្តិ៍ការពារព្រំដែនវៀតណាមបានមកប្រាប់មិនឲ្យសាងសង់នៅពេលដែលកម្មករកំពុងសាងសង់។
ថៃប្រគល់កំណត់ហេតុទាក់ទិននឹងបញ្ហាទំនាស់ព្រំដែនដល់កម្ពុជា
មន្រ្តីតំណាងរដ្ឋាភិបាលថៃបានប្រគល់កំណត់ហេតុនៃចំណុចសំខាន់ពីរឲ្យមន្ត្រីតំណាងរដ្ឋាភិបាលកម្ពុជា គឺទាក់ទិននឹងបញ្ហាទំនាស់ព្រំដែនរវាងប្រទេសខ្មែរនិងថៃកាលពីថ្ងៃទី២១ តុលា។
យោងតាមប្រភពព័ត៌មានពីក្រសួងការបរទេសថៃ ផ្សាយនៅថ្ងៃទី២២ ខែតុលានេះ បានឲ្យដឹងថា អគ្គនាយកការិយាល័យផ្នែកកិច្ចការសន្ធិសញ្ញានិងច្បាប់នៃក្រសួងការបរទេសថៃ គឺលោក វីឆ័យ ផ្លាស័យ បានជួបជាមួយលោក អ៊ុក សោភ័ណ ភារធារីអមស្ថានទូតខ្មែរប្រចាំប្រទេសថៃ នៅឯក្រសួងការបរទេសថៃនៅទីក្រុងបាងកក។
មន្ត្រីថៃរូបនោះបានប្រគល់កំណត់ហេតុមួយជូនទៅលោក អ៊ុក សោភ័ណ។ កំណត់ហេតុនោះមានន័យទីមួយគឺថា ភាគីថៃបង្ហាញពីក្តីបារម្ភចំពោះការដែលមិនគួរឲ្យមានភាពតានតឹងបញ្ហាជម្លោះព្រំដែន ដែលថៃចោទថា បណ្តាលមកពីភាគីកម្ពុជាចល័តទ័ពចូលទៅកាន់តំបន់ដែលកំពុងប្រទាញប្រទង់ជាមួយនឹងថៃដែលមិនទាន់ដោះស្រាយចប់នោះ។
ចំណុចទីពីរ ថៃបញ្ជាក់ថាជាថ្មីម្តងទៀតថា ភាគីថៃបានប្តេជ្ញាថានឹងបន្តដោះស្រាយបញ្ហាជម្លោះព្រំដែនជាមួយភាគីកម្ពុជាដោយសន្តិវិធី។
ជាមួយគ្នានោះដែរ ភាគីថៃបានស្នើសុំឲ្យភាគីកម្ពុជាដកកងទ័ពចេញពីតំបន់ត្រីកោណដែលស្ថិតនៅត្រង់ចំណុចប្រសព្វជួបគ្នានៃបីប្រទេស គឺកម្ពុជា ថៃ និងលាវ៕