លោកនាយករដ្ឋមន្ត្រី ហ៊ុន សែន បានចោទមេដឹកនាំគណបក្សភ្លើងទៀន ទាំងគ្មានភស្តុតាងថា ប្រើ «ល្បិច» មិនចង់ចូលរួមការបោះឆ្នោត ដើម្បីឱ្យអន្តរជាតិដាក់គំនាបលើរដ្ឋាភិបាលរបស់លោក។ លោកថា ឯកសារច្បាប់ដើមចុះបញ្ជីគណបក្សភ្លើងទៀន កំពុងស្ថិតក្នុងដៃថ្នាក់ដឹកនាំគណបក្សនេះ ប៉ុន្តែ អ្នកកាន់ឯកសារនោះលាក់ទុក។ ផ្ទុយពីការចោទប្រកាន់នេះ គណបក្សភ្លើងទៀន បានបដិសេធយ៉ាងដាច់អហង្ការជុំវិញរឿងចោទប្រកាន់នេះ និងបញ្ជាក់ជំហរអំពីឆន្ទៈពិតប្រាកដរបស់ខ្លួនក្នុងការចូលរួមការបោះឆ្នោតជាតិខែកក្កដាខាងមុខ។ គណបក្សនេះ បញ្ជាក់ថា ខ្លួនបានដាក់លិខិតស្នើសុំទៅសាលាដំបូងរាជធានីភ្នំពេញ និងសាលាឧទ្ធរណ៍ ដើម្បីប្រើប្រាស់ទីស្នាក់ការគណបក្សសង្គ្រោះជាតិ ដែលត្រូវបានបិទ (ដោយអំណាចសាលដីការបស់តុលាការកំពូល កាលពីចុងឆ្នាំ២០១៧) ដើម្បីប្រើប្រាស់ទីស្នាក់ការ និងប្រមូលឯកសារនានារបស់គណបក្សពីទីស្នាក់ការនោះ ប៉ុន្តែ តុលាការគ្រប់ជាន់ថ្នាក់ទាំងនេះ មិនបានអនុញ្ញាតឱ្យឡើយ ជាហេតុធ្វើឱ្យឯកសារមួយចំនួនរបស់គណបក្សភ្លើងទៀន រួមទាំងច្បាប់ដើមនៃប្រកាសចុះបញ្ជីគណបក្សនយោបាយត្រូវបានបាត់បង់។ គណបក្សភ្លើងទៀន ថាការមិនឱ្យគណបក្សខ្លួនចូលរួមប្រកួតប្រជែងបោះឆ្នោតខាងមុខនេះ រំលោភឆន្ទះពលរដ្ឋខ្មែរជិត២លាននាក់ ដែលបានបោះឆ្នោតជ្រើសរើសក្រុមប្រឹក្សាឃុំ-សង្កាត់ឆ្នាំ២០២២ឱ្យគណបក្សខ្លួន។
ទន្ទឹមនឹងការចោទប្រកាន់គណបក្សភ្លើងទៀន ហើយលោក ហ៊ុន សែន ក៏បានគំរាមសម្លាប់ និងចាក់ដាក់គុក ប្រសិនបើគណបក្សភ្លើងទៀនហ៊ានធ្វើបាតុកម្មតវ៉ាចង់ចូលរួមការបោះឆ្នោតជាតិខែកក្កដាខាងមុខនេះ។ តើនេះ ជាល្បិចមិនចង់ចូលរួមការបោះឆ្នោតរបស់គណបក្សភ្លើងទៀន ឬក៏ជាល្បិចរបស់លោក ហ៊ុន សែន ដើម្បីធានាជ័យជម្នះទុកជាមុន មិនខុសពីព្រឹត្តិការណ៍បោះឆ្នោតជាតិកាលពីខែកក្កដា ឆ្នាំ២០១៨កន្លងទៅ?
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។