មេធាវីរបស់ជនជាតិថៃ២រូប ប្ដឹងឧទ្ធរណ៍នៅសប្ដាហ៍ក្រោយ
2011.02.03
លោកមេធាវី រស់ អូន មានប្រសាសន៍ប្រាប់វិទ្យុអាស៊ីសេរីនៅថ្ងៃព្រហស្បតិ៍ ទី៣ កុម្ភៈ ថាលោកកំពុងរៀបចំធ្វើលិខិតផ្ទេរសិទ្ធិជាមួយកូនក្តីរបស់លោក ឈ្មោះ វីរះ ស៊ុមក្វាមឃីត (Veera Somk wamkid) និង រ៉ាត់ទ្រី ប៉ៃប៉ូតាណាប៉ៃប៉ូន (Ratree Paiputanapaiboon) ដែលកំពុងជាប់ពន្ធនាគារព្រៃស ដើម្បីប្ដឹងជំទាស់ទៅនិងការកាត់សេចក្ដីរបស់តុលាការក្រុងភ្នំពេញ ៖ "បាទខ្ញុំកំពុងរៀបចំឯកសារបន្តិច ឲ្យគាត់ធ្វើលិខិតផ្ទេរសិទ្ធក្នុងការប្ដឹងឧទ្ធរណ៍ បើនិយាយរួមទៅ ការរៀបចំឯកសារ វាសំខាន់បំផុត ទីមួយឲ្យជនជាប់ចោទផ្ទេរសិទ្ធិឲ្យមេធាវីក្នុងការប្ដឹងឧទ្ធរណ៍"។
ជនជាតិថៃ ២នាក់ ក្នុងចំណោមជនជាតិថៃ ៧នាក់ បានចូលមកក្នុងទឹកដីប្រទេសកម្ពុជា ហើយត្រូវបានយោធាកម្ពុជា ចាប់ខ្លួនកាលពីថ្ងៃទី២៩ ខែធ្នូ ឆ្នាំ២០១០ កន្លងទៅ នៅក្នុងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
តុលាការក្រុងភ្នំពេញ កាលពីថ្ងៃទី១ ខែកុម្ភៈ បានកាត់ទោសជនជាប់ចោទថៃឈ្មោះ វីរះ ស៊ុមក្វាមឃីត ភេទប្រុស ឲ្យជាប់គុករយៈពេល ៨ឆ្នាំ និងផាកពិន័យចំនួន ១លាន ៨សែនរៀល ចូលថវិការដ្ឋ និងបានកាត់ទោសជនជាប់ចោទថៃម្នាក់ទៀតឈ្មោះ រ៉ាត់ទ្រី ប៉ៃប៉ូតាណាប៉ៃប៉ូន ភេទស្រី ឲ្យចាប់គុករយៈពេល ៦ឆ្នាំ និងផាកពិន័យចំនួន ១លាន ២សែនរៀល ចូលថវិការដ្ឋ។
ការកាត់ទោសនេះ គឺតុលាការបានផ្អែកលើមាត្រាទី២៩ នៃច្បាប់អន្តោប្រវេសន៍ ក្រោមបទចូលក្នុងទឹកដីប្រទេសកម្ពុជាខុសច្បាប់ និងផ្អែកតាមមាត្រាទី២៧ មាត្រាទី៤៧៣ មាត្រាទី៤៣៩ និងមាត្រាទី៤៤៦ នៃក្រមព្រហ្មទណ្ឌនៃប្រទេសកម្ពុជា ក្រោមបទចូលក្នុងទីលានយោធាកម្ពុជា ក្នុងបំណងទុច្ចរិត និងបទប្រមូលផ្តុំព័ត៌មានសំងាត់ ប៉ះពាល់ដល់សន្តិសុខជាតិកម្ពុជា។
ចំពោះជនជាតិថៃ ៥នាក់ផ្សេងទៀត តុលាការបានកាត់ទោសកាលពីថ្ងៃទី២១ មករា កន្លងទៅ ឲ្យជាប់គុកចំនួន ៩ខែ និងពិន័យលុយ ១លានរៀល ក្នុងម្នាក់ៗ គិតចាប់តាំងពីថ្ងៃចាប់ខ្លួន ហើយបានព្យួរទោសដែលនៅសល់ ក្រោយពេលមានការកាត់ក្ដី និងដោះលែងឲ្យនៅក្រៅឃុំ។ អ្នកទាំង ៥នាក់នោះ បានចាកចេញពីប្រទេសកម្ពុជាវិល ទៅកាន់ប្រទេសថៃវិញអស់ហើយ។
ជនជាតិថៃទាំង ៧រូបនេះ បានត្រូវចាប់ខ្លួនកាលពីថ្ងៃទី២៩ ធ្នូ កន្លងទៅ នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ នៅពេលដែលបានចូលមកក្នុងប្រទេសកម្ពុជា ដើម្បីពិនិត្យបង្គោលព្រំដែនលេខ៤៦ រវាងកម្ពុជា-ថៃ ហើយបានហួសចូលមកជម្រៅជាង ៥០០ម៉ែត្រ នៅក្នុងទឹកដីប្រទេសកម្ពុជា៕
អត្ថបទពេញនិយម
RFA
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- ពិធីមង្គលការរបស់ពលករខ្មែរនៅប្រទេសថៃ
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- អ្នកឃ្លាំមើល ថា លោក ហ៊ុន សែន ទំនងលែងទុកចិត្តអ្នកណាក្រៅពីកូនរបស់ខ្លួនហើយ
- លោក ស ខេង ចង់ឱ្យមានការធ្វើតេស្ដរកគ្រឿងញៀនលើពលរដ្ឋចាប់ពីអាយុ១៣ឆ្នាំដល់ក្រោម៤៥ឆ្នាំ
អត្ថបទពេញនិយម
ព័ត៌មានថ្មីៗ
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- លោក ហ៊ុន សែន មិនគាំទ្រដីកាតុលាការ ICC ដើម្បីចាប់ខ្លួនមេដឹកនាំរុស្ស៊ី
- អ្នកជំនាញថា ចិនមិនអាចជំនួសទីផ្សារសហភាពអឺរ៉ុប និងអាមេរិកក្នុងការទទួលទិញទំនិញកម្ពុជា
- មន្ត្រីសិទ្ធិមនុស្សថា ការចាប់ខ្លួនអ្នកគាំទ្រលោក កឹម សុខា ពីរនាក់ជាការបំបិទសិទ្ធិបញ្ចេញមតិ