ខ្មែរ​នៅ​អាមេរិក​ធ្វើ​បាតុកម្ម​ទាមទារ​កុំ​ឲ្យ​បញ្ជូន​ខ្មែរ​៤​នាក់​មក​ស្រុក​វិញ

ពលរដ្ឋ​ខ្មែរ និង​ពលរដ្ឋ​ជាតិ​សាសន៍​ផ្សេងៗ​ប្រមាណ​ជិត ៣០០​នាក់ ក្នុង​ទីក្រុង​ហ្វីឡាឌែលហ្វីយ៉ា (Philadelphia) នៃ​រដ្ឋ​ផេនស៊ីលវានៀ (Pennsylvania) កាល​ពី​ថ្ងៃ​ទី​១៧ មករា បាន​នាំ​គ្នា​ធ្វើ​បាតុកម្ម​ទាមទារ​កុំ​ឲ្យ​អាជ្ញាធរ​អន្តោប្រវេសន៍​អាមេរិក ធ្វើការ​បញ្ជូន​ពលរដ្ឋ​ខ្មែរ​ចំនួន ៤​នាក់​ទៅ​ស្រុក​កំណើត​វិញ។
ដោយ តាំង សារ៉ាដា
2011.01.19
Share on WhatsApp
Share on WhatsApp

ក្រុម​ប្រជាពលរដ្ឋ​បាន​នាំ​គ្នា​លើក​បដា​សរសេរ​ថា សូម​ឈប់​បំបែក​បំបាក់​គ្រួសារ​ត​ទៅ​ទៀត។  បដា​នេះ​បាន​លើក​ឡើង​លាយ​ឡំ​នឹង​ពាក្យ​ស្រែក​ថា គួរ​ធ្វើការ​អប់រំ​ជា​ជាង​ការ​ចាប់​បញ្ជូន។

ពួកគេ​ក៏​បាន​ចង​ខ្សែ​បូ​ពណ៌​លឿង​រាប់​រយ​ខ្សែ​នៅ​របង​ខាង​មុខ​នៃ​សាលា​ក្រុង​ហ្វីឡាឌែលហ្វីយ៉ា ដើម្បី​បង្ហាញ​សញ្ញា​ទាមទារ​របស់​ពលរដ្ឋ​ដល់​ក្រុម​អាជ្ញាធរ ដើម្បី​ដោះលែង​អ្នក​ទាំង​បួន​នោះ​ឲ្យ​មាន​សេរីភាព។

បុរស​អន្តោប្រវេសន៍​ខ្មែរ​ទាំង​បួន​នាក់​នោះ​មាន​ឈ្មោះ វែន វាន់នី, ធៀន ដាវី, អ៊ីវ មុត និង ដាង ឆាលី។ ពួកគេ​ត្រូវ​បាន​សមត្ថកិច្ច​ផ្នែក​អន្តោប្រវេសន៍ និង​គយ​របស់​រដ្ឋ​ផេនស៊ីលវានៀ ចាប់​ឃុំ​ខ្លួន​កាល​ពី​ថ្ងៃ​ទី​២១ ខែ​កញ្ញា ឆ្នាំ​២០១០ ដើម្បី​ត្រៀម​បញ្ជូន​ទៅ​កម្ពុជា។

នាយិកា​នៃ​សមាគម​ខ្មែរ​ក្នុង​ទីក្រុង​ហ្វីឡាឌែលហ្វីយ៉ា លោកស្រី រ៉ង សន មាន​ប្រសាសន៍​ថា ការ​ចាប់​បញ្ជូន​ពលរដ្ឋ​អន្តោប្រវេសន៍​ខ្មែរ​ទាំង​នោះ ធ្វើ​ឡើង​មិន​មាន​យុត្តិធម៌ ដោយសារ​អ្នក​ទាំង​នោះ​មិន​បាន​ប្រព្រឹត្ត​បទល្មើស​ធ្ងន់ធ្ងរ​ពី​មុន​មក។

ចាប់​តាំង​ពី​ឆ្នាំ​២០០២ ក្រោយ​ពេល​រដ្ឋាភិបាល​កម្ពុជា និង​រដ្ឋាភិបាល​សហរដ្ឋ​អាមេរិក ចុះ​កិច្ច​ព្រមព្រៀង​លើ​អនុស្សរណៈ​យោគយល់​គ្នា​ក្នុង​ការ​ទទួល​យក​ជន​អន្តោប្រវេសន៍​ខ្មែរ ដែល​ធ្លាប់​ប្រព្រឹត្ត​បទ​ល្មើស​នៅ​សហរដ្ឋ​អាមេរិក ទៅ​កម្ពុជា​វិញ​នោះ មាន​មនុស្ស​ចំនួន ២៣៦​នាក់​ហើយ ត្រូវ​បាន​ចាប់​បញ្ជូន​មក​កម្ពុជា ហើយ​សហរដ្ឋ​អាមេរិក​គ្រោង​នឹង​បញ្ជូន​ជា​បន្ត​បន្ទាប់​ថែម​ទៀត។

ច្បាប់​របស់​សហរដ្ឋ​អាមេរិក​មាន​សុពលភាព​ក្នុង​ការ​បញ្ជូន​ជន​អន្តោប្រវេសន៍​ទាំង​ឡាយ​ណា​ដែល​បាន​ប្រព្រឹត្ត​បទឧក្រិដ្ឋ​ប្លន់ សម្លាប់​មនុស្ស បង្ក​របួស​ស្នាម លួច​អីវ៉ាន់​ក្នុង​ហាង​ទំនិញ បន្ទោបង់​តាម​ទី​សាធារណៈ ឬ​បើកបរ​ពេល​ស្រវឹង​ជាដើម។

លោកស្រី រ៉ង សន មាន​ប្រសាសន៍​ថា បុរស​ទាំង​បួន​នាក់​នោះ​សុទ្ធ​តែ​មាន​ប្រពន្ធ​កូន ហើយ​ពួកគេ​ជា​ជំហរ​ដ៏​ធំ​ក្នុង​ការ​រក​ចំណូល​ចិញ្ចឹម​គ្រួសារ។ លោកស្រី​មាន​ប្រសាសន៍​ថា ក្រោយ​ពី​ពួកគេ​ចេញ​ពី​ពន្ធនាគារ​រួច​មក ពួកគេ​បាន​កែ​ខ្លួន​យ៉ាង​ល្អ​ក្នុង​សហគមន៍។

ក្រុម​សកម្មជន​ប្រឆាំង​ការ​បញ្ជូន​ជន​អន្តោប្រវេសន៍​ខ្មែរ​ទៅ​ស្រុក​កំណើត​វិញ បាន​ឲ្យ​ដឹង​ថា យ៉ាង​ហោច​ណាស់​មាន​ពលរដ្ឋ​ខ្មែរ​ចំនួន ១.៥០០​នាក់ កំពុង​មាន​ឈ្មោះ​ក្នុង​បញ្ជី​សម្រាប់​ធ្វើការ​បញ្ជូន​ទៅ​កម្ពុជា។

លោក សេង ដេវីដ បុគ្គលិក​នៃ​សមាគម The United Communities Southeast Philadelphia ធ្លាប់​មាន​ប្រសាសន៍​ថា ការ​បញ្ជូន​ពលរដ្ឋ​ខ្មែរ​ទៅ​ស្រុក​កំណើត​វិញ​កាន់​តែ​ធ្វើ​ឲ្យ​ចុះ​ថយ​ចំនួន​ពលរដ្ឋ​ខ្មែរ​ក្នុង​សហរដ្ឋ​អាមេរិក ដែល​ភាគ​ច្រើន​ពួកគេ​បាន​ផ្ដល់​មូលនិធិ​ជា​ច្រើន​ទៅ​ក្រុម​គ្រួសារ​របស់​គេ​នៅ​កម្ពុជា ដែល​ធ្វើ​ឲ្យ​បន្ទុក​របស់​រដ្ឋាភិបាល​ខ្មែរ​ធូរ​មួយ​កម្រិត។

លោក​មាន​ប្រសាសន៍​ថា ជនអន្តោប្រវេសន៍​ដែល​បាន​ទៅ​ដល់​កម្ពុជា ពួកគេ​មាន​ការ​លំបាក​យ៉ាង​ខ្លាំង​ក្នុង​សម្រប​ខ្លួន​ចូល​ក្នុង​សង្គម​កម្ពុជា ហើយ​ពួកគេ​មួយ​ចំនួន​មាន​ការ​រស់​ដោយ​ក្តី​អស់​សង្ឃឹម។

មជ្ឈមណ្ឌល​ជួយ​ជន​មាតុភូមិ​និវត្តន៍​ដែល​ហៅ​កាត់​ថា RISP ធ្លាប់​បាន​រាយការណ៍​ថា ចាប់​តាំង​ពី​ឆ្នាំ​២០០២​មក ក្នុង​ចំណោម​ជនអន្តោប្រវេសន៍​ខ្មែរ ២៣៦​នាក់ ដែល​សហរដ្ឋ​អាមេរិក​ចាប់​បញ្ជូន​មក​កម្ពុជា យ៉ាង​ហោច​ណាស់​មាន​ចំនួន ៥​នាក់ បាន​ស្លាប់​ដោយសារ​ជំងឺ ការ​ធ្វើ​អត្តឃាត ឬ​ដោយ​គ្រោះថ្នាក់​ចរាចរណ៍​ជាដើម៕

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
រឿង​ដែល​គេ​អាន​​ច្រើន​បំផុត
ព័ត៌មាន​ថ្មីៗ
លោក ហ៊ុន សែន បន្ត​ប្រកាស​ថា ​​​នឹង​ការពារ​មិន​ឱ្យ​មាន​​​រដ្ឋប្រហារ​ ដើម្បី​​​អភិវឌ្ឍប្រទេស​ឱ្យ​រីក​ចំរើន
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

មតិយោបល់៖

Anonymous
Jan 19, 2011 11:29 PM

Free tickets to Cambodia