ធនាគារអភិវឌ្ឍន៍អាស៊ី ហៅកាត់ថា អេឌីប៊ី (ADB) ប្រចាំនៅក្នុងប្រទេសកម្ពុជា នៅថ្ងៃទី២២ ខែកុម្ភៈ បានប្រកាសឲ្យដឹងអំពីផែនការដើម្បីធ្វើការអភិវឌ្ឍនៅក្នុងមហាអនុតំបន់ទន្លេមេគង្គ និងច្រករបៀងសេដ្ឋកិច្ចទិសខាងត្បូងនៃតំបន់នេះ ដើម្បីធ្វើឲ្យប្រជាពលរដ្ឋនៅក្នុងតំបន់នេះ មានការរីកចំរើននៃជីវភាពរស់នៅ។
មហាអនុតំបន់ទន្លេមេគង្គនោះ គឺរាប់ទាំងខេត្តយុនណាន់ (Yunnan) និងខេត្តក្វាងស៊ី (Guangxi) នៃប្រទេសចិន ប្រទេសលាវ ប្រទេសភូមា ប្រទេសថៃ វៀតណាម និងកម្ពុជា។
សេដ្ឋកិច្ចវិទូជាន់ខ្ពស់នៃធនាគារអភិវឌ្ឍន៍អាស៊ី លោក ភីធឺ ប្រ៊ីមបូល (Peter Brimble) ដែលជាអ្នករៀបចំផែនការនេះ បានមានប្រសាសន៍នៅក្នុងសន្និសីទកាសែតនៅថ្ងៃទី២២ ខែកុម្ភៈ នៅឯការិយាល័យធនាគារអភិវឌ្ឍន៍អាស៊ី នៅក្នុងទីក្រុងភ្នំពេញ ថា ៖ "គម្រោងការអភិវឌ្ឍសំខាន់ៗ គឺរាប់ទាំងផ្លូវថ្នល់ អគ្គិសនី សុខាភិបាល និងទេសចរណ៍ជាដើម។ យើងព្យាយាមដើម្បីធ្វើប្រាកដថា ប្រទេសកម្ពុជានឹងទទួលផលប្រយោជន៍ឲ្យបានច្រើន តាមតែអាចធ្វើទៅបាន ពីផែនការអភិវឌ្ឍទាំងនេះ។ យើងបានចំណាយថវិកាចំនួន ៦លានដុល្លារអាមេរិក លើផ្នែកបច្ចេកទេសសិក្សាគម្រោងនេះ"។
សេចក្ដីប្រកាសព័ត៌មានរបស់ធនាគារអភិវឌ្ឍន៍អាស៊ី បានឲ្យដឹងថា នៅចុងឆ្នាំ២០១០ កន្លងទៅនេះ ធនាគារអភិវឌ្ឍន៍អាស៊ី បានបន្តកម្មវិធីកម្ចីប្រាក់ ចំនួនសរុបជាង ៤ពាន់លានដុល្លារអាមេរិក សម្រាប់គម្រោងការវិនិយោគចំនួន៥៥ ដែលគម្រោងនោះមានតម្លៃសរុបជាង ១១ពាន់លានដុល្លារអាមេរិក។
គម្រោងទាំងនោះមានផ្លូវថ្នល់ឆ្លងកាត់មហាអនុតំបន់ទន្លេមេគង្គ អាកាសយានដ្ឋាន ការកែលម្អផ្លូវដែក គម្រោងសាងសង់ វារីអគ្គិសនីសម្រាប់ផ្ដល់ថាមពលឆ្លងកាត់ព្រំដែន ការអភិវឌ្ឍហេដ្ឋារចនាសម្ព័ន្ធ ទេសចរណ៍ និងការគ្រប់គ្រងមេរោគឆ្លងជាដើម។
អគ្គលេខាធិការរងក្រុមប្រឹក្សាស្ដារកសិកម្ម និងអភិវឌ្ឍជនបទនៅក្នុងប្រទេសកម្ពុជា លោក សាន វឌ្ឍនា បានមានប្រសាសន៍ថា ចង់ឃើញកិច្ចអភិវឌ្ឍន៍នេះ ផ្ដល់ផលប្រយោជន៍ដល់ប្រជាពលរដ្ឋនៅតាមជនបទ ៖ "ដើម្បីធ្វើជាការដោះស្រាយទៅលើសកម្មភាពមួយចំនួន ដែលអាចកើតមានជាលក្ខណៈលំនៅ។ អ៊ីចឹងហើយយើងចង់ឲ្យសហគមន៍របស់ពួកគាត់បានចូលរួមនៅក្នុង Infrastructure Development ហ្នឹងទៀត ដើម្បីឲ្យគាត់ដោះស្រាយការងារនៅពេលដែលគាត់មាន Unemployment Gap ហ្នឹង"។
សេចក្ដីប្រកាសព័ត៌មានរបស់ធនាគារអភិវឌ្ឍន៍អាស៊ីបានឲ្យដឹងថា ច្រករបៀងសេដ្ឋកិច្ចទិសខាងត្បូង នៃមហាអនុតំបន់ទន្លេមេគង្គនោះ គឺកាត់តាមខេត្តចំនួន២១ នៅក្នុងប្រទេសកម្ពុជា រាប់ទាំងខេត្តពោធិ៍សាត់ ខេត្តកំពង់ឆ្នាំង និងខេត្តកំពង់ធំ ជាដើម ដែលមានសក្ដានុពលសម្រាប់ការលូតលាស់ និងការអភិវឌ្ឍសេដ្ឋកិច្ច៕