ឆ្នាំថ្មីប្រពៃណីខ្មែរ ឆ្នាំ២០១៤ នេះ គឺចំលើសត្វសេះ ជាតំណាងឲ្យឆ្នាំមមី ដែលស្ថិតនៅលំដាប់លេខរៀងទី៧ ក្នុងចំណោមឆ្នាំខ្មែរទាំង១២។
តើប្រជាពលរដ្ឋទូទៅមានជំនឿយ៉ាងណាដែរចំពោះឆ្នាំសេះ ឬមមី ឆស័ក ពុទ្ធសករាជ ២៥៥៨ នេះ?
សេះជាសត្វចិញ្ចឹម ឬជាសត្វពាហនៈមួយប្រភេទដែលមានភាពជិតស្និទ្ធជាមួយមនុស្សជាយានជំនិះដ៏ប្រសើររបស់មនុស្សក្នុងសម័យបុរាណ ជាពិសេសសម្រាប់ត្រកូលអភិជន។
សត្វសេះជាទូទៅគេប្រើជាពិសេសក្នុងការរៀបចំក្បួនទ័ពជើងគោក ដើម្បីនាំមុខក្បួនទ័ពវាយលុកលើសត្រូវ។ ម្យ៉ាងទៀត សេះណាដែលមានមាឌធំខ្ពស់ និងរត់លឿនជាងគេ គឺតម្រូវលើមេទ័ពជាអ្នកប្រើប្រាស់។ ចំពោះអ្នកដែលជួបបញ្ហាទុក្ខលំបាកខ្លាំងច្រើនពោលពាក្យថា បើសិនជាមានទេវបុត្តជិះសេះសមកជួយសង្គ្រោះឲ្យទាន់ពេលវេលានោះ គឺពិតជាមានភព្វសំណាងខ្ពស់ណាស់។
ក្រៅពីនេះទៀត សត្វសេះនៅមានប្រយោជន៍ជាច្រើនទៀត ដូចចិញ្ចឹមសម្រាប់ទុកប្រណាំងកម្សាន្តសម្រាប់អូសរទេះសាលីក្នុងត្រកូលអភិជនកាលពីជំនាន់ដើម និងអូសរទេះដឹកកសិផលរបស់កសិករធម្មតាដែលមាននៅសល់រហូតដល់សព្វថ្ងៃនេះ។
ជំនួយការគណៈកម្មាធិការជាតិរៀបចំបុណ្យជាតិ អន្តរជាតិ និងជានាយកគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ និងជាអ្នកសរសេរសៀវភៅមហាសង្ក្រាន្ត លោក អ៊ឹម បូរិន្ទ។ លោកមានប្រសាសន៍ថា សត្វសេះជាសត្វមានកិត្តិយសទាក់ទងនឹងពុទ្ធសាសនា។ ដូចជាក្នុងពិធីបំបួសនាគជាដើម គឺគេច្រើនយកសេះជាយានជំនិះដើម្បីឲ្យកូននាគ អ្នកដែលកោសក់រៀបនឹងបួសធ្វើដំណើរឆ្ពោះទៅទីអារាម ហើយសេះនោះមានការតុបតែងខ្លួនប្រាណឲ្យស្អាតបាតណាស់។
លោក អ៊ឹម បូរិន្ទ៖ «តាមពិតទៅយានជំនិះសេះពីបុរាណមកគេមិនដែលទាក់រ៉ឺម៉ក ទាក់រទេះទេ សេះគឺគេចិញ្ចឹមដើម្បីទុកគ្រាន់តែជិះលេង ឬធ្វើសង្គ្រាម តែសម័យក្រោយមកទេ ដែលយើងយកសេះមកអូសរ៉ឺម៉ក។ តាមពិតទៅសេះគ្រាន់សម្រាប់ជិះលេងកម្សាន្ត ជាពិសេសអ្នកមាន អ៊ីចឹងបានបំបួសនាគ ព្រោះសម័យមុនយើងគ្មានឡាន គ្មានម៉ូតូអីទេ តែសេះហ្នឹងគឺជាយានជំនិះល្អបំផុតហើយក្នុងចំណោមសត្វពាហនៈទាំងឡាយ អ៊ីចឹងហើយបានជាគេយកសេះជាពាហនៈ សម័យពុទ្ធកាលក៏លោកជិះសេះទៅបួសដែរ»។
ទាក់ទងនឹងជំនឿវិញ ក្នុងឆ្នាំថ្មី ឆ្នាំមមីនេះ មានអ្នកនិពន្ធ អ្នកកាន់ក្បួនពិជ័យហោរាជាច្រើនបាននាំគ្នាសរសេរអត្ថាធិប្បាយ និងនិយាយអំពីជំនឿទៅលើសត្វសេះនេះ។
លោកគ្រូទាយម្នាក់ អាយុប្រមាណជាង ៦០ឆ្នាំ នៅខេត្តព្រៃវែង ឈ្មោះ តា ល្មម បានមានប្រសាសន៍ថា ឆ្នាំមមី ឆស័ក ២០១៤ នេះ គឺជាសេះស ដែលមានឫទ្ធិ មានពន្លឺកាំរស្មីល្អ មានសន្ទុះលឿនទៅមុខ គិតធ្វើអ្វីឆាប់បានសម្រេចដល់គោលដៅ ការគិតប្រាថ្នាចង់បានអ្វីពីមុនៗមកនឹងទទួលបានលទ្ធផលសម្រេចនៅឆ្នាំនេះ៖ «ពីព្រោះឆ្នាំវាលឿន ហើយជាឆ្នាំដែលមានម្ចាស់ជិះ ម្ចាស់ដែលគេយករក្សាក្នុងរឿងអីទាំងអស់ហ្នឹង។ សេះសសម្រាប់អ្នកមានឫទ្ធិជិះចេញទៅរំលត់ទុក្ខទោសអ្វីទាំងឡាយ ឬយ៉ាងណានោះ អាហ្នឹងបានសម្រេចភាគច្រើន»។
ចំណែកប្រជាពលរដ្ឋសាមញ្ញ អ្នករកស៊ីផ្សេងៗវិញ ក៏មានជំនឿថា ឆ្នាំសេះនេះតំណាងឲ្យការរកស៊ី ធ្វើការងារផ្សេងៗមានដំណើរឆ្ពោះទៅមុខដោយរលូន។
យុវជនម្នាក់ ឈ្មោះ សៀន សុវណ្ណរិទ្ធិ ជាអ្នកលក់គ្រឿងចម្លាក់ឈើប្រណិតគ្រប់ប្រភេទ ក្នុងរាជធានីភ្នំពេញ។ លោកបានឲ្យដឹងថា នៅក្នុងអំឡុងពេលជិតចូលឆ្នាំខ្មែរ ហាងគាត់បានលក់ដាច់រូបគំនូរ និងរូបចម្លាក់សត្វសេះធ្វើពីឈើច្រើនជាងគេ។៖ «...អ្នកដែលទិញសត្វសេះទៅហ្នឹង ភាគច្រើនគេមានជំនឿថា សត្វសេះ បោលលឿន និងកញ្ជ្រោលខ្លាំងជាងគេក្នុងចំណោមសត្វទាំងអស់ហ្នឹង អ៊ីចឹងកាលណាទិញសត្វសេះយកទៅប្រើដាក់នៅក្នុងផ្ទះ ឬកន្លែងអាជីវកម្មផ្សេងៗ ធ្វើឲ្យគេហ្នឹងរកស៊ីមានបាន ហើយរីកចម្រើនលឿនទៅមុខដូចសេះរត់អ៊ីចឹង»។
ដោយសារសេះជាតំណាងឲ្យសត្វមិនសូវបាននៅស្ងៀមមួយកន្លែងដូចសត្វដទៃនោះ គឺគេនិយមឆ្លាក់ឈើធ្វើរូបសេះកញ្ជ្រោលស្រែកលើកជើងមុខឡើងលើ និងរូបសេះរត់ផាយលឿនទៅមុខ។
សុវណ្ណរិទ្ធិ បានឲ្យដឹងទៀតថា សេះដែលលក់ដាច់ជាងគេ គឺរូបសេះទោល និងសេះ ៨ ទៅតាមជំនឿរបស់ជនជាតិចិន៖ «តាមពិតទៅជំនឿទៅលើជនជាតិចិន គេគិតថា សេះគេឆ្លាក់ ៨ ហើយបើត្រី គឺគេឆ្លាក់ ៩ ហើយបើសេះគេដាក់បែរចូលក្នុង គឺបានន័យថា វារត់ចូលក្នុងវានាំលាភសំណាងចូលក្នុងផ្ទះរបស់យើង»។
ប្រជាពលរដ្ឋម្នាក់ ឈ្មោះ គុយ ថាវ រស់នៅក្រុងភ្នំពេញ ក៏បានបង្ហាញជំនឿរបស់ខ្លួនចំពោះឆ្នាំសេះ ឬសត្វសេះស្រដៀងគ្នានេះដែរ៖ «ខ្ញុំមានជំនឿដែររឿងសត្វសេះ ដូចថាដាក់ក្នុងផ្ទះទៅមានហុងស៊ុយ យើងរកស៊ីមានបានលឿនដូចសត្វសេះ ដូចថា វារត់ឲ្យលឿនដូចសេះទៅមុខឲ្យកាន់តែមានថែមទៀត...»។
ទាក់ទងជុំវិញជំនឿលើសត្វសេះនេះដែរ សៀវភៅហោរាសាស្រ្ត និងហុងស៊ុយ សម្រាប់ឆ្នាំមមី ២០១៤ ដែលរៀបចំដោយអ្នកនិពន្ធ តាន់ សូដានី នៅផ្នែកខ្លះក៏បានបង្ហាញដែរថា ភាពឡូយសង្ហា ភាពរហ័សរហួន សម្រែកហោរកញ្ជ្រៀវប្រកបដោយថាមពលរបស់សេះអាចបង្កជាកម្លាំង បង្កើនក្ដីរំភើប សន្ទុះចិត្តក្លៀវក្លាដល់មនុស្សជាច្រើន។ សត្វសេះតំណាងឲ្យភាពក្លាហានរស់រវើកប្រកបដោយថាមពល។ ដើម្បីសេរីភាពនិងការសម្រេចបំណង សេះនឹងបំបោលខ្លួនដោយគ្មានខ្លាចរអែងដល់ទីបំផុតឡើយ។
សៀវភៅដដែលបានបង្ហាញឲ្យដឹងទៀតថា ឆ្នាំមមី ២០១៤ នេះ នឹងពាំនាំមកទាំងរឿងរ៉ាវវិជ្ជមាន និងអវិជ្ជមានកើតឡើងព្រមគ្នា ហើយក៏អាចជាឆ្នាំដែលមនុស្សមានភាពត្រេកត្រអាលកើនឡើងខ្ពស់ផងដែរ។
ទោះជាយ៉ាងណាក៏ដោយចុះ ខ្ញុំបាទ សេក បណ្ឌិត សូមប្រសិទ្ធពរជ័យ សេរីមង្គល វិបុលសុខគ្រប់ប្រការចូលកើតមានដល់លោកអ្នកនាងកញ្ញា អ្នកស្ដាប់ទាំងអស់នៅគ្រប់ទិសទី ព្រមទាំងក្រុមគ្រួសារ អោយទទួលបាននូវសុខភាពល្អ និងសេចក្ដីសុខក្សេមក្សាន្តក្នុងឆ្នាំថ្មីនេះកុំបីឃ្លៀងឃ្លាតឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។