កាលពីថ្ងៃទី២៥ ខែកុម្ភៈ ឆ្នាំ២០១១ អង្គភាពព័ត៌មាន និងប្រតិកម្មរហ័សនៃទីស្ដីការគណៈរដ្ឋមន្ត្រីនៃប្រទេសកម្ពុជា ប្រកាសឱ្យដឹងថា គណៈរដ្ឋមន្ត្រីបានសម្រេចលើសេចក្ដីព្រាងអនុក្រឹត្យមួយស្ដីពីការកំណត់សារធាតុគីមី ដែលទាក់ទងទៅនឹងការផលិតអាវុធគីមី អាវុធនុយក្លេអ៊ែរ អាវុធជីវសាស្ត្រ និងអាវុធវិទ្យុសកម្ម។
សេចក្ដីព្រាងអនុក្រឹត្យនេះ គឺធ្វើឡើងដោយអាជ្ញាធរជាតិអាវុធគីមី យោងតាមមាត្រា ៥៤ នៃរដ្ឋធម្មនុញ្ញព្រះរាជាណាចក្រកម្ពុជា ដែលចែងថា ត្រូវហាមឃាត់ដាច់ខាតរាល់ការផលិត ការប្រើប្រាស់ ការរក្សាទុកអាវុធបរមាណូ អាវុធគីមី ឬអាវុធវេត្រាណូ និងមាត្រា ៩ នៃច្បាប់ស្ដីពីការហាមឃាត់អាវុធគីមី អាវុធនុយក្លេអ៊ែរ អាវុធជីវសាស្ត្រ និងអាវុធវិទ្យុសកម្ម។
សេចក្ដីប្រកាសព័ត៌មានរបស់អង្គភាពព័ត៌មាន និងប្រតិកម្មរហ័សនៃទីស្ដីការគណៈរដ្ឋមន្ត្រី បានបង្ហាញថា អនុក្រឹត្យដែលបានព្រាងឡើង គឺសម្រាប់ជាយន្តការដើម្បីធ្វើការត្រួតពិនិត្យ ការគ្រប់គ្រង ការប្រមូលទិន្នន័យស្ដីពីតម្រូវការសារធាតុគីមី សម្រាប់អនុវត្តសន្ធិសញ្ញាអន្តរជាតិ អនុវត្តអនុសញ្ញាគីមី និងកិច្ចសហប្រតិបត្តិការជាមួយរដ្ឋភាគីដទៃទៀត ឱ្យមានប្រសិទ្ធភាពខ្ពស់។
សន្ធិសញ្ញាអន្តរជាតិស្ដីពីការហាមប្រាមការសាកល្បងអាវុធនុយក្លេអ៊ែរ ត្រូវបានអនុម័តដោយមហាសន្និបាតអង្គការសហប្រជាជាតិ នៅថ្ងៃទី១០ ខែកញ្ញា ឆ្នាំ១៩៩៦ ហើយបើកឱ្យរដ្ឋនានាចុះហត្ថលេខានៅថ្ងៃទី២៤ ខែឆ្នាំដដែល។
ប្រទេសកម្ពុជា បានចុះហត្ថលេខាលើសន្ធិសញ្ញាអន្តរជាតិស្ដីពីការហាមឃាត់ការសាកល្បងអាវុធនុយក្លេអ៊ែរ កាលពីថ្ងៃទី២៦ ខែកញ្ញា ឆ្នាំ១៩៩៦ ហើយផ្តល់សច្ចានុម័ត នៅថ្ងៃទី១០ ខែវិច្ឆិកា ឆ្នាំ២០០០ ដែលមានកាតព្វកិច្ចជាមូលដ្ឋាន ហាមឃាត់រាល់ការសាកល្បងអាវុធនុយក្លេអ៊ែរគ្រប់ប្រភេទ។
ក្រៅពីប្រទេសលាវ ប្រទេសកម្ពុជា ជាប្រទេសទីពីរដែលបានផ្ដល់សច្ចានុម័តលើសន្ធិសញ្ញាអន្តរជាតិស្ដីពីការហាមប្រាមការសាកល្បងអាវុធនុយក្លេអ៊ែរ ក្នុងចំណោមរដ្ឋជាសមាជិកហត្ថលេខីចំនួន ៦៧ប្រទេស។
ក្រុមអ្នកវិទ្យាសាស្ត្រកម្ពុជា កាលពីឆ្នាំ២០១០ បានចាប់ផ្ដើមសិក្សាលើបច្ចេកវិទ្យាផលិតឋាមពលអគ្គិសនីនុយក្លេអ៊ែរ ដើម្បីបំពេញតាមតម្រូវការរបស់ខ្លួន។
រដ្ឋលេខាធិការក្រសួងឧស្សាហកម្ម រ៉ែ និងថាមពល លោក អ៊ិត ប្រាង មិនអាចទាក់ទងសុំសេចក្ដីអធិប្បាយបានទេ នៅថ្ងៃទី២៨ ខែកុម្ភៈ ក៏ប៉ុន្តែលោកបានថ្លែងប្រាប់សារព័ត៌មានរ៉យធឺរ (Reuters) កាលពីខែសីហា ឆ្នាំ២០១០ ថា ការផលិតឋាមពលអគ្គិសនីនុយក្លេអ៊ែរ កម្ពុជាអាចមានលទ្ធភាព ដូច្នេះហើយបានជាកម្ពុជា សិក្សារកមើលថា តើមានភាពគ្រោះថ្នាក់ប៉ុណ្ណា។
ការសិក្សាអំពីគម្រោងឋាមពលអគ្គិសនីនុយក្លេអ៊ែរ របស់អ្នកវិទ្យាសាស្ត្រកម្ពុជា គឺចង់ដើរឱ្យទាន់ប្រទេសជិតខាង ដែលគ្រោងនឹងកសាងរោងចក្រនុយក្លេអ៊ែរ នៅក្នុងរយៈពេលប៉ុន្មានឆ្នាំខាងមុខនេះ៕