ក្រុមហ៊ុននាំពលករទៅម៉ាឡេស៊ីគំរាមចាប់អ្នកផ្ដល់បទសម្ភាសន៍
2011.02.16
អ្នកស្រី ស៊ុម ស៊ីម ដែលត្រូវជាម្ដាយ និងពលការិនីឈ្មោះ ព្រីង ម៉ៅ បានថ្លែងប្រាប់វិទ្យុអាស៊ីសេរី នៅព្រឹកថ្ងៃទី១៥ ខែកុម្ភៈថា ពួកគាត់ត្រូវបានបុគ្គលិកក្រុមហ៊ុននាំពលករចេញទៅធ្វើការនៅប្រទេសម៉ាឡេស៊ី ឈ្មោះក្រុមហ៊ុនអាយ.អាយ.អេស (IIS) មកគំរាមថា នឹងឲ្យប៉ូលិសមកចាប់គាត់ចំពោះករណីដែលគាត់បានផ្ដល់បទសម្ភាសន៍ដល់វិទ្យុអាស៊ីសេរី នៅពេលកន្លងទៅ ៖ «ក្រុមហ៊ុនគេមកពីរនាក់ គេចង់ឲ្យខ្ញុំទៅបំភ្លឺទៀត គេអត់សុខចិត្តទេ។ គេថា គេនឹងយកប៉ូលិសមកអន្តរាគមន៍យកខ្ញុំទៅឲ្យទាល់តែបាន ២នាក់កូនខ្ញុំ»។
កាលពីថ្ងៃទី៣ ខែកុម្ភៈ ពលការិនីឈ្មោះ ព្រីង ម៉ៅ អាយុ ២២ឆ្នាំ មានទីលំនៅនៅភូមិអណ្តូងច្រុះ ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង ដែលបានត្រឡប់ពីប្រទេសម៉ាឡេស៊ីវិញ បានចោទប្រកាន់ក្រុមហ៊ុន IIS ថា បានបង្ខំឲ្យគាត់បង់ប្រាក់ឲ្យក្រុមហ៊ុនចំនួន ១ពាន់ដុល្លារទើបគេព្រមបញ្ជូនគាត់ឲ្យត្រឡប់មកស្រុកខ្មែរវិញ។ពលការិនីរូបនេះបានថ្លែងប្រាប់វិទ្យុអាស៊ីសេរីថា នាងបានចេញដំណើរទៅធ្វើការនៅប្រទេសម៉ាឡេស៊ី តាមរយៈក្រុមហ៊ុន IIS កាលពីថ្ងៃទី១២ ខែធ្នូ ឆ្នាំ២០១០ បានរយៈពេល ២០ថ្ងៃ នាងក៏ទទួលរងនូវការចាប់រំលោភតែមិនសម្រេចពីបុរសចំណាស់ម្នាក់ ដែលជាឪពុករបស់ម្ចាស់ផ្ទះដែលនាងនៅធ្វើការបម្រើ។ ពលការិនី ព្រីង ម៉ៅ បន្តថា ដោយការភ័យខ្លាច និងព្រួយបារម្ភពេក នាងក៏ទាមទារឲ្យគេបញ្ជូននាងត្រឡប់មកស្រុកខ្មែរវិញ។
ករណីនេះក៏ត្រូវបានលើកឡើងដែរ ក្នុងវេទិកាសាធារណៈដែលរៀបចំឡើងដោយអង្គការខុមហ្វ្រែល កាលពីថ្ងៃទី២៦ ខែមករា កន្លងទៅ នៅឃុំរលាប្អៀរ ដើម្បីឲ្យប្រជាពលរដ្ឋឡើងសម្ដែងពីក្ដីកង្វល់របស់ពួកគាត់ឲ្យអាជ្ញាធរជួយដោះស្រាយនោះ។
បុគ្គលិកក្រុមហ៊ុន IIS ឈ្មោះ ភិរុណ បានបដិសេធការចោទប្រកាន់នេះ ដោយលោកមានប្រសាសន៍ថា លោកគ្រាន់តែបំពេញតួនាទីក្នុងនាមជាបុគ្គលិកក្រុមហ៊ុនមកផ្ដល់ព័ត៌មានឲ្យអ្នកស្រី ស៊ុម ស៊ីម ទៅជួបក្រុមហ៊ុនប៉ុណ្ណោះ លោកពុំបានធ្វើការគំរាមអ្វីដល់គ្រួសារអ្នកស្រី ស៊ុម ស៊ីម នោះទេ ៖ «អញ្ជើញគាត់ឡើងទៅបកស្រាយនៅក្រុមហ៊ុន ហើយបើគាត់មិនទៅទេ ជាសិទ្ធិរបស់គាត់។ អ៊ីចឹងខ្ញុំនឹងផ្ដល់តួនាទីនេះទៅឲ្យខាងជួញដូរផ្លូវភេទនៃស្នងការខេត្តកំពង់ឆ្នាំង ឲ្យគាត់អញ្ជើញមកផ្ទាល់ ខ្ញុំអស់តួនាទីត្រឹមហ្នឹង»។
គួរបញ្ជាក់ថា បន្ទាប់ពីបង់ប្រាក់ហើយ ក្រុមហ៊ុនបានបង្ខំឲ្យអ្នកស្រី ព្រមទាំងពលការិនី ព្រីង ម៉ៅ ឲ្យធ្វើកិច្ចសន្យាដោយផ្ដិតមេដៃថា មិនធ្វើការប្ដឹងផ្ដល់ ឬនិយាយបញ្ហានេះប្រាប់នរណាទាំងអស់ បើមិនដូច្នោះទេ គឺត្រូវទទួលខុសត្រូវចំពោះមុខច្បាប់ ហើយកិច្ចសន្យានេះមានមេធាវីរបស់ក្រុមហ៊ុនចុះហត្ថលេខា និងបោះត្រាដឹងឮទៀតផង។
នាយកប្រតិបត្តិអង្គការខារ៉ាម កម្ពុជា (CARAM Cambodia) លោក យ៉ា ណាវុធ មានប្រសាសន៍ថា កិច្ចសន្យាមិនឲ្យប្ដឹងផ្ដល់តាមផ្លូវច្បាប់ និងមិនឲ្យនិយាយរឿងនេះប្រាប់អ្នកដទៃ គឺជាកិច្ចសន្យាមិនស្របច្បាប់ និងជាការបង្ខិតបង្ខំ ៖ «កិច្ចសន្យាបែបនេះគឺខុសច្បាប់ទាំងស្រុងហើយ។ ធ្វើអ៊ីចឹងគឺបំបិទសិទ្ធិសេរីភាពគេហើយ។ កិច្ចសន្យាបែបនេះគេអាចប្ដឹងសុំមោឃភាពបាន។ កិច្ចសន្យាបែបនេះ តុលាការក៏មិនអនុវត្តដែរ វាគ្មានសុពលភាពផ្លូវច្បាប់ទេ»។
ប្រធានអង្គការការពារសិទ្ធិកម្ពុជា លោកមេធាវី សុក សំអឿន មានប្រសាសន៍ថា ការធ្វើកិច្ចសន្យាបែបនេះ គឺខុសច្បាប់ទាំងស្រុង។ លោកថា អ្នករងការរំលោភបំពានត្រូវតែមានសិទ្ធិក្នុងការប្ដឹងផ្ដល់ និងបញ្ចេញមតិ៕
អត្ថបទពេញនិយម
RFA
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន មិនគាំទ្រដីកាតុលាការ ICC ដើម្បីចាប់ខ្លួនមេដឹកនាំរុស្ស៊ី
- ពិធីមង្គលការរបស់ពលករខ្មែរនៅប្រទេសថៃ
អត្ថបទពេញនិយម
ព័ត៌មានថ្មីៗ
- អ្នកឃ្លាំមើល ថា លោក ហ៊ុន សែន ទំនងលែងទុកចិត្តអ្នកណាក្រៅពីកូនរបស់ខ្លួនហើយ
- លោក ស ខេង ចង់ឱ្យមានការធ្វើតេស្ដរកគ្រឿងញៀនលើពលរដ្ឋចាប់ពីអាយុ១៣ឆ្នាំដល់ក្រោម៤៥ឆ្នាំ
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- អ្នកជំនាញថា ចិនមិនអាចជំនួសទីផ្សារសហភាពអឺរ៉ុប និងអាមេរិកក្នុងការទទួលទិញទំនិញកម្ពុជា
- ចិនបញ្ជូនកងទ័ពជាង២០០នាក់មកធ្វើសមយុទ្ធនាគមាសឆ្នាំ២០២៣ជាមួយកម្ពុជា