សមាគមធនាគារនៅកម្ពុជា និងគ្រឹះស្ថានមីក្រូហិរញ្ញវត្ថុ ឆ្លើយតបថា សេចក្ដីការណ៍រួមរបស់ក្រុមសង្គមស៊ីវិល សមាគម និងសហគមន៍ មិនឆ្លុះបញ្ចាំងពីស្ថានភាពពិតជាក់ស្ដែងនោះទេ និងបណ្ដាលឱ្យមានផលប៉ះពាល់ដល់វិស័យធនាគារ និងហិរញ្ញវត្ថុ ដែលជាឆ្អឹងខ្នងនៃសេដ្ឋកិច្ចជាតិ ទាំងមូល។ ការឆ្លើយតបនេះ បន្ទាប់ពីក្រុមអង្គការសង្គមស៊ីវិល និងសហគមន៍ជិត ១៥០ស្ថាប័នស្នើសុំ ឱ្យរដ្ឋាភិបាល ជួយអន្តរាគមន៍ទៅស្ថាប័នមីក្រូហិរញ្ញវត្ថុ ដើម្បីព្យួរការសងបំណុលរយៈពេល៣ខែ និងប្រគល់ប័ណ្ណកម្មសិទ្ធិ ដីធ្លីជូនម្ចាស់ទ្រព្យវិញ។
សមាគមធនាគារនៅកម្ពុជា និងគ្រឹះស្ថានមីក្រូហិរញ្ញវត្ថុ បញ្ជាក់ជំហរថា សមាជិករបស់ខ្លួន មិនអាចធ្វើតាមសំណើសុំឱ្យផ្អាកការសងប្រាក់កម្ចីនិងការប្រាក់រយៈពេលយ៉ាងតិច៣ខែ សម្រាប់អតិថិជនគ្រប់ៗគ្នាបានឡើយ ដោយហេតុថា ផលប៉ះពាល់ក្នុងវិបត្តិកូវីដ១៩ ទៅលើអតិថិជនមានស្ថានភាព និងកម្រិតខុសៗគ្នា។ សមាគមដដែលថ្លែងទៀតថា ចំពោះការស្នើសុំឱ្យប្រគល់ប័ណ្ណកម្មសិទ្ធិដីធ្លីជូនម្ចាស់ទ្រព្យវិញ ក៏មិនអាចធ្វើបានដែរ ប៉ុន្តែអតិថិជន នៅតែអាចប្រើប្រាស់ដីធ្លី ឬអចលនទ្រព្យ ដែលខ្លួនដាក់ធានានោះ (ទ្រព្យបញ្ចាំ) បានជាធម្មតា។
សមាគមទាំងពីរលើកឡើងនៅក្នុងសេចក្ដីថ្លែងការណ៍របស់ខ្លួន កាលពីល្ងាចថ្ងៃទី២៨ ខេមេសាថា គ្រឹះស្ថានធនាគារ និងហិរញ្ញវត្ថុ កំពុងអនុវត្តយ៉ាងពេញលេញតាមការណែនាំរបស់ធនាគារជាតិនៃកម្ពុជា ក្នុងការរៀបចំឥណទានឡើងវិញ ជូនដល់អតិថិជនដែលរងផលប៉ះពាល់ធ្ងន់ធ្ងរពីជំងឺកូវីដ -១៩ និងការដោះស្រាយឥណទាន ដោយឥរិយាបថទន់ភ្លន់ និងប្រកបដោយវិជ្ជាជីវៈខ្ពស់។
សមាគមរបស់ស្ថាប័នផ្ដល់ប្រាក់កម្ចី ចាត់ទុកថា ការស្នើសុំ និងការផ្ដល់អនុសាសន៍របស់អង្គការ សង្គមស៊ីវិលមួយចំនួន គឺខ្វះការសិក្សាតាមបច្ចេកទេស និងកំពុងតែជំរុញឱ្យសេដ្ឋកិច្ចជាតិរងនូវផលប៉ះពាល់បន្ថែមទៀត។
កាលពីថ្ងៃទី២៧ ខែមេសា ក្រុមសង្គមស៊ីវិល និងសហគមន៍មូលដ្ឋាន បានចេញសេចក្តីថ្លែងការណ៍រួមគ្នា ស្នើសុំដល់រដ្ឋាភិបាល បង្គាប់ឱ្យគ្រឹះស្ថានមីក្រូហិរញ្ញវត្ថុ ឆាប់ផ្អាកការសងប្រាក់កម្ចី និងការប្រាក់ទាំងអស់យ៉ាងតិចណាស់ចំនួន៣ខែ ព្រមទាំងប្រគល់ជូនម្ចាស់ទ្រព្យវិញនូវប័ណ្ណកម្មសិទ្ធិដីធ្លីរាប់លានប្លង់ពាក់ព័ន្ធនឹងកម្ចីខ្នាតតូច ដែលបច្ចុប្បន្នត្រូវបានដាក់ជាទ្រព្យធានា (បញ្ចាំ) នៅក្នុងគ្រឹះស្ថានមីក្រូហិរញ្ញវត្ថុ។
ក្រុមអង្គការ-សមាគម និងសហគមន៍ដីធ្លី លើកឡើងថា វិធានការទាំងនេះគឺមានភាពចាំបាច់ ដើម្បីធានាថា ប្រជាពលរដ្ឋអាចបន្តរស់នៅក្នុងពេលមានវិបត្តិជំងឺកូវីដ-២៩នេះដោយគ្មានហានិភ័យចំពោះ សុខភាព ឬលំនៅឋានរបស់អ្នកទាំងនោះ និងអាចបញ្ចៀសពីកម្ចីឥណទានមានហានិភ័យ ដែលអាចនាំឱ្យកើតមានករណីធ្វើការងារដោះបំណុល ការជួញដូរមនុស្ស និងការរំលោភសិទ្ធិមនុស្សដទៃទៀត។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ( IDEA)លោក វន់ ពៅ មានប្រសាសន៍ថា វិធានការមួយចំនួនរបស់ធនាគារជាតិនៅមានភាពខ្វះចន្លោះ និងមិនទាន់មានប្រសិទ្ធិភាពគ្រប់គ្រាន់នោះទេ។ លោកអះអាងថា មានគ្រឹះស្ថានធនាគារ និងហិរញ្ញវត្ថុតិចតូចបំផុត ដែលព្រមពន្យារពេលសងទាំងការប្រាក់ និងប្រាក់ដើមរយៈពេល៣ខែ សម្រាប់អ្នកខ្ចីប្រាក់មួយចំនួនតាមការស្នើសុំនោះ។ លោកនៅតែស្នើសុំឱ្យធនាគារជាតិនិងរាជរដ្ឋាភិបាល ចេញសេចក្ដីបង្គាប់តែម្ដង ដើម្បីឱ្យគ្រឹះស្ថានមីក្រូហិរញ្ញវត្ថុទាំងអស់ មានកាតព្វកិច្ចអនុវត្តតាម៖ «មានធនាគារមួយចំនួន បានយកប្លង់ផ្ទះប្លង់ដីធ្វើជាការទាលុយពីអតិថិជនរបស់ខ្លួនហើយបើសិនមិនឱ្យទេ គាត់នឹងបំភ័យថា រឹបអូសយកផ្ទះយកអីចឹងទៅ ដូច្នេះយើងគិតថា នេះជារឿងមួយដែលសង្គមយើងកំពុងជួបប្រទះនៅក្នុងខែ៤នេះ ហើយយើងជាក់ស្ដែងសមាជិកយើងមួយចំនួន ក៏មានការត្អូញត្អែរអំពីការតាមទារលុយពីធនាគារមួយចំនួនផងដែរ ដែលមកដល់ពេលនេះ មិនទាន់មានការអនុវត្តទាំងអស់នៅឡើយទេ»។
អាជីវករមួយរូបរស់នៅក្នុងស្រុកល្វាឯម ខេត្តកណ្ដាល លោក បាន សុខ ត្អូញប្រាប់អាស៊ីសេរីថា លោកបានខ្ចីប្រាក់ពីគ្រឹះស្ថានមីក្រូហិរញ្ញវត្ថុមួយជាង ១ម៉ឺន ៩ពាន់ដុល្លារ ដើម្បីរកស៊ីម៉ៅចម្ការស្វាយ និងរកស៊ីលក់ពងទា និងសាច់គោអាងនៅមុខរោងចក្រ។ បុរសវ័យ៤២ឆ្នាំរូបនេះ បន្តថា នៅពេល ផ្ទុះជំងឺកូវីដ-១៩នេះ ប្រភពចំណូលរបស់លោកបានធ្លាក់ចុះទាំងស្រុង ដោយសារតែមុខរបររបស់លោក មិនលក់ដាច់ដូចកាលពីមុនឡើយ ខណៈការរកស៊ីម៉ៅស្វាយត្រូវបានខាត់បង់ធ្ងន់ធ្ងរដែរនោះ។ លោកព្រួយបារម្ភថា ប្រសិនបើរដ្ឋាភិបាល គ្មានវិធានការអន្តរាគមន៍ច្បាស់លាស់ទេ គឺប្លង់ដី និងប្លង់ផ្ទះរបស់លោកអាចត្រូវបានធនាគាររឹបអូសជាក់ជាមិនខាន៖ «ពីមុនខ្ញុំលក់ដាច់ហើយបង់គេបាន ៩ខែហើយ។ ខ្ញុំយកគេតែ ៣ឆ្នាំហើយបង់គេមួយខែជាង ៦រយដុល្លារ ហើយខ្ញុំមិនដែលបង់ឱ្យគេពិបាកទេ ស្មើមុនមួយថ្ងៃរហូត តែពេលកូរ៉ូណានេះកើតឡើងនេះ ខ្ញុំលក់អត់ដាច់ ហើយឥឡូវនេះរកតែមួយម៉ឺនដាក់ហោប៉ៅគ្មានផង។ ឥឡូវនេះគេនៅតែតេមករឹបខ្ញុំឱ្យបង់លុយមួយខែនេះ ដើម្បីឱ្យគេធ្វើឯកសារថ្មីឱ្យ តែខ្ញុំវាគ្មានអាមួយខែនេះ ហើយគេនៅតែតេមកជ្រកជ្រេញរហូត។ គេតេផង គេទៅដល់ផ្ទះផង។ខ្ញុំស្នើសុំគាត់ពន្យារពេលតែបីខែទេ តែគេអត់សុខចិត្ត ហើយមិញនេះគេតេមកថា បើចុងខែនេះខ្ញុំមិនឱ្យទេ គេថា នឹងធ្វើតាមផ្លូវច្បាប់»។
អាស៊ីសេរី មិនអាចសុំការឆ្លើយតបពីអគ្គនាយកបច្ចេកទេស និងជាអ្នកនាំពាក្យធនាគារជាតិនៃកម្ពុជា អ្នកស្រី ជា សិរី និងប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន បានទេ នៅថ្ងៃទី២៩ ខែមេសា ដោយទូរស័ព្ទចូលតែពុំមានអ្នកទទួល។
ក្រុមអង្គការសង្គមស៊ីវិល សមាគម និងសហគមន៍ដីធ្លី ព្រួយបារម្ភថា នៅប៉ុន្មានខែខាងមុខនេះ ប្រជា ពលរដ្ឋកម្ពុជារាប់សែននាក់អាចនឹងបាត់បង់ការងារ ឬប្រាក់បៀវត្សរ៍ ហើយហានិភ័យកើតចេញពីបំណុលមីក្រូហិរញ្ញវត្ថុ គឺជារឿងសំខាន់មិនអាចព្រងើយកន្តើយបានទេ។ ក្រុមអង្គការសង្គមស៊ីវិល លើកឡើងថា វិធានការជាបន្ទាន់គួរត្រូវបានពិចារណាយកមកអនុវត្ត ដើម្បីធានាថា គ្មានអ្នកណា ម្នាក់ត្រូវបានបង្ខំឱ្យលក់ដីសម្រាប់សងបំណុល អំឡុងពេលមានវិបត្តិសេដ្ឋកិច្ចនេះឡើយ ។ ពួកគេ យល់ថា មធ្យោបាយល្អបំផុត ដើម្បីជៀសវាងពីបញ្ហានេះ គឺការប្រគល់ប័ណ្ណកម្មសិទ្ធិដីធ្លីជូនទៅម្ចាស់ទ្រព្យ ដែលមានសិទ្ធិពេលលេញវិញ និងផ្អាកការសងប្រាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។