អង្ករនាំចេញ​ទៅ​ទីផ្សារ​អឺរ៉ុប ថយ​ចុះ​ជាង ១ម៉ឺន​តោន​ក្រោយ​សហភាព​អឺរ៉ុប​យក​ពន្ធ​លើ​អង្ករ​ខ្មែរ

លោក មួង ណារ៉េត
2019-09-07
អ៊ីម៉ែល
មតិ
Share
បោះពុម្ព
ស្រ្តីកសិករខ្មែរកំពុងដកសំណាប នៅជាយក្រុងភ្នំពេញ កាលពីថ្ងៃទី ២២ ខែ មិថុនា ឆ្នាំ ២០១៨
ស្រ្តីកសិករខ្មែរកំពុងដកសំណាប នៅជាយក្រុងភ្នំពេញ កាលពីថ្ងៃទី ២២ ខែ មិថុនា ឆ្នាំ ២០១៨
AP Photo

អង្ករ​នាំ​ចេញទៅទីផ្សារអឺរ៉ុប ថយចុះជាង ១ ម៉ឺនតោន ក្រោយ​សហភាពអឺរ៉ុបយកពន្ធលើ​អង្ករខ្មែរ។ ប្រធាន​​សហព័ន្ធ​​សហគមន៍​​កសិករ​​កម្ពុជា បារម្ភ​ថា ការ​​ថយ​​ចុះ​​នៃ​ចំនួន​​អង្ករ​​នាំ​ចេញ​ទៅ​សហភាព​អឺរ៉ុបនេះ អាច​ប៉ះពាល់​ដល់​​ជីវភាព​កសិករ ក្នុង​រយៈ​ពេល​​យូរ​​អង្វែង។

របាយការណ៍នាំអង្ករចេញក្នុងពេល ៨ខែ ចាប់ពី​ខែ​មករា ដល់​​ខែសីហា ឆ្នាំ២០១៩ កន្លង​​ទៅ​​នេះ​​បង្ហាញ​​ថា កម្ពុជា​​នាំ​​អង្ករ​ខ្មែរ​​​ចេញ​​​​ទៅ​​​ទីផ្សារ​​​អឺរ៉ុប បាន​​ថយ​​ចុះ​​មក​នៅ​ត្រឹម ៣៤.០៣២​តោន​ប៉ុណ្ណោះ បើប្រៀបធៀប​ទៅរយៈពេល​​ដូច​គ្នា ​កាល​ពី​ឆ្នាំ២០១៨ ដែល​មាន​ចំនួន​ ៤៤.៥៥៨​តោន។

ការ​ថយចុះរហូតដល់​ ២៣,៦០%​ភាគ​រយ​នេះ កើត​មាន​ឡើង​ក្រោយ​សហភាព​អឺរ៉ុប​លែង​ផ្ដល់​ការ​អនុគ្រោះ​​ពន្ធលើ​​អង្ករ​​ខ្មែរ​​ ដែល​​នាំ​​ចូល​​ទៅ​​ទីផ្សារ​​អឺរ៉ុប សម្រាប់​​រយៈ​​ពេល​​បី​​ឆ្នាំ​​ជាប់​​គ្នា គិត​ចាប់ពី​​ថ្ងៃ​​ទី១៨ ខែ​មករា ឆ្នាំ២០១៩ ត​​ទៅ។

ការ​សម្រេច​យក​ពន្ធ​លើ​អង្ករ​ខ្មែរ​នេះ​ គឺដោយសារ​តែការ​នាំចូល​អង្ករ​ពី​កម្ពុជា​ទៅ​អឺរ៉ុប បាន​​កើន​​ឡើង​​​ខ្លាំង​​ក្នុង​​រយៈ​ពេល​ ៥ឆ្នាំ​​ចុង​ក្រោយ គឺ​ពី​ឆ្នាំ២០១២ ដល់​ឆ្នាំ២០១៧។ គណៈកម្មការ​អឺរ៉ុប​ថា ដោយសារ​ការ​អនុគ្រោះ​ពន្ធ​នេះ ធ្វើ​ឲ្យ​ការ​នាំ​ចូល​អង្ករ​​ខ្មែរ​ អាច​​លក់​​ក្នុង​​តម្លៃ​​ទាប ដែល​បណ្ដាល​ឲ្យ​មាន​ផល​វិបាក​ធ្ងន់ធ្ងរ សម្រាប់​​ក្រុម​​អ្នក​​ផលិត​​អង្ករ​នៅ​​អឺរ៉ុប។

ដោយសារ​ការយកពន្ធនេះ កម្ពុជាត្រូវ​បង់​ពន្ធ​ពេញ​ថ្លៃ ក្នុង​អត្រា​ជិត ២០០ដុល្លារ​​អាមេរិក​ សម្រាប់​​អង្ករ​​មួយ​​តោន ​ក្នុង​ឆ្នាំ​ដំបូង ២០១៩ ហើយ​អត្រា​ពន្ធ​នេះ​នឹង​ធ្លាក់​ចុះ​មក​នៅ​ត្រឹម​ជាង ១៧០​ដុល្លារ សម្រាប់​អង្ករ​មួយ​តោន​ក្នុង​ឆ្នាំ​២០២០ និង​​ជាង ១៤១​ដុល្លារ​ ក្នុង​​អង្ករ​​មួយ​​តោន នៅ​ឆ្នាំ២០២១។

ទោះបីជាការនាំអង្ករចេញទៅទីផ្សារ​អឺរ៉ុប ធ្លាក់ចុះយ៉ាងគំហុក ក្រោយ​សហភាពអឺរ៉ុប​យក​​ពន្ធ​​លើ​​អង្ករ​ខ្មែរ ក៏​មន្រ្តី​របប​លោក ហ៊ុន សែន លោក ផៃ ស៊ីផាន អះអាង​ថា ការ​​ថយ​ចុះ​នេះ មិនមែនបណ្តាលមកពី​​ការ​យកពន្ធនោះទេ ប៉ុន្តែ​​អាច​​មក​ពី​​ប៉ុន្មាន​ខែ​ចុង​ក្រោយ​​នេះ ជា​រដូវ​ផុត​ការ​​ច្រូត​កាត់៖ «ប្រហែលជាចុងដៃច្រើន​ជាង។ បរិមាណយើង​ចុះ!​ អាហ្នឹង​គឺចុងដៃ»។

លោក ផៃ ស៊ីផាន អះអាងបន្ថែមថា ការ​យកពន្ធលើអង្ករខ្មែរ ពិតជាគ្មានអ្វីប៉ះពាល់​ដល់​​ការ​​នាំ​​អង្ករ​​ទៅ​​ទីផ្សារ​​អឺរ៉ុប​នោះ​ទេ​ ដោយ​​លោក​សម្អាង​ទៅ​លើ​កញ្ចប់​​កំណែ​ទម្រង់​​សេដ្ឋកិច្ច​ថ្មី​​របស់​​របប​នេះ ដែល​ដាក់​ចេញ​កាល​ពី​ចុង​ខែ​មីនា ដើម្បី​ទប់ទល់​​​សម្ពាធ​​អន្តរជាតិ ក្នុងការ​ផ្តាច់ប្រព័ន្ធអនុគ្រោះពន្ធណាមួយពីកម្ពុជានោះ៖ «រាជរដ្ឋាភិបាល​បាន​​ជួយ​​បំពេញ​​បន្ថែម ដើម្បី​​ឆ្លើយ​​តប​​ទៅ​នឹង​​អត្រា​​ពន្ធ​​វា​កើន តាម​​រយៈ​ការ​​កាត់​​បន្ថយ​​អ្វី​​ដែល​​ចំណាយ​ ដែលគ្មាន​សារប្រយោជន៍ ដូច​ជាកាត់​បន្ថយ​ឧបសគ្គ​ពាក់ព័ន្ធនឹង​រដ្ឋបាលស្មុគស្មាញ កាត់​បន្ថយ​តម្លៃ​ភ្លើង​ កាត់​បន្ថយ​រឿង​ដទៃទៀត ដើម្បី​ធ្វើ​យ៉ាង​ដូចម្តេច​ ធ្វើ​ឲ្យ​មាន​តុល្យភាព​ ដើម្បី​ទោះបីជាបង់​ពន្ធ ចំណូល​របស់​អ្នកនាំចេញ នៅតែ​ទទួល​ចំណូល​ប្រហាក់ប្រហែលគ្នា​ដដែល​»។

មន្រ្តីអង្គការ​សង្គមស៊ីវិល ដែលធ្វើការជាមួយកសិករ​នៅមូលដ្ឋាន មិន​ជឿថា​កម្ពុជាខ្វះ​អង្ករ​ក្នុង​ការ​នាំចេញនោះឡើយ។ អគ្គលេខាធិការសម្ព័ន្ធសហគមន៍កសិករកម្ពុជាលោក ថេង សាវឿន ថា លោកសង្កេតឃើញតាម​រោងម៉ាស៊ីនកិនស្រូវ មាន​ស្តុក​ទុក​ស្រូវ​អង្ករ​​គ្រប់​គ្រាន់ សម្រាប់​តម្រូវ​ការ​នាំចេញ៖ «បើនិយាយ​អំពី​អង្ករ​ដែលនាំចេញ ខ្ញុំ​​គិត​​ថា​​មាន​​បរិបូណ៍ ដែល​​ត្រូវ​​នាំ​​ចេញ​»។

លោក ថេង សាវឿន សន្និដ្ឋានការថយចុះនៃចំនួន​អង្ករ​ទៅទីផ្សារ​អឺរ៉ុបនេះ គឺបណ្តាល​​មក​ពី​​សហភាព​​អឺរ៉ុប​ យក​ពន្ធ​លើ​​អង្ករ​​ខ្មែរ​នោះ​ឯង។ លោកថា ​កំណែ​ទម្រង់​សេដ្ឋកិច្ច ដែល​រដ្ឋាភិបាល​​អះអាង​ថា អាច​​ជួយ​ដល់​​វិនិយោគិន​វិស័យ​នេះ អាច​​គ្មាន​ប្រសិទ្ធភាព៖ «បើ​យើង​ប្រៀបធៀប​អត្រា​ ថាតើ​ប្រសិទ្ធភាព​ដែលរដ្ឋាភិបាលបាន​ជួយ ក្នុង​​ពេល​​សហភាព​​​អឺរ៉ុប​​មិន​​យក​​ពន្ធ និង​នៅ​ពេលយកពន្ធ តើ​វាមានប្រសិទ្ធភាព​ឬអត់ ដែល​អត្រា​​នៃ​ការ​នាំ​អង្ករ​ចេញ​ មាន​ការ​​ធ្លាក់​ចុះ? ចំណុច​​នេះ យើង​​អាច​​វាយ​តម្លៃ​​បាន​ថា ប្រសិទ្ធភាពនៃការជ្រោមជ្រែង ឬ​ក៏ការ​ជួយ​របស់​រដ្ឋាភិបាល​ នៅ​​មាន​​ការ​​ខ្វះ​​ចន្លោះ​​​នៅ​​ឡើយ ព្រោះ​​ការ​​នាំ​អង្ករ​​ចេញ​​ ធ្លាក់ចុះរហូតដល់ជិត ២៤% ដែរ»។

អាស៊ីសេរី​ មិនអាចសុំការបំភ្លឺពីមន្រ្តីសហព័ន្ធស្រូវអង្ករ​កម្ពុជា ជុំវិញការឆ្លាក់ចុះនៃការ​នាំអង្ករ​​ចេញ​ទៅ​ទីផ្សារ​​អឺរ៉ុប​នេះ​បាន​នៅ​ឡើយ​ទេ។ ប៉ុន្តែ កាលពីខែ​សីហា ស្ថាប័ននាំស្រូវអង្ករចេញនេះ បាន​ប្រកាស​អំពី​ផលប៉ះពាល់ ទៅ​លើ​ការ​នាំ​អង្ករ​ចេញ​ទៅ​ទីផ្សារ​​អឺរ៉ុប ដោយ​សារ​​តែ​​សហភាព​អឺរ៉ុប​​យក​ពន្ធ​​លើ​អង្ករ​ខ្មែរ។

សហព័ន្ធ​ស្រូវ​អង្ករ​កម្ពុជា​បញ្ជាក់​ថា ការកំណត់​ពន្ធ​នេះ បាន​ធ្វើ​ឱ្យ​ប៉ះពាល់​យ៉ាង​ធ្ងន់ធ្ងរ​ដល់​​កសិករ​កម្ពុជា​​ជាង​​​កន្លះ​​​លាន​​គ្រួសារ និង​ថា​ បញ្ហា​ទាំងនេះ បាន​ធ្វើ​ឱ្យ​ឈឺចាប់ ​និង​ដោះស្រាយ​មិនទាន់ចេញ​ផង ស្រាប់តែ​ឥឡូវ​សហគមន៍​អឺរ៉ុប កំពុង​ពិចារណា​​​ដក​​​ការ​​អនុគ្រោះ​​ពន្ធ EBA​ ថែម​ទៀត ដើម្បី​​ដាក់​​សម្ពាធ​​ឱ្យមាន​ការ​​កែ​ទម្រង់​​នយោបាយ​​នៅ​​កម្ពុជា។

ទោះបីការឈប់ផ្តល់ការអនុគ្រោះពន្ធដល់អង្ករខ្មែរ​ មិនពាក់ព័ន្ធនឹងរឿងរំលោភសិទ្ធិមនុស្ស និង ប្រជាធិបតេយ្យ​ក្តី របបលោក ហ៊ុន សែន អាច​ប្រឈមនឹង​ការព្យួរ​ការ​អនុគ្រោះពន្ធ EBA ពីសហភាពអឺរ៉ុប នៅពេលដ៏ខ្លីខាងមុខ ប្រសិនបើរបបនេះ មិន​ស្តារ​សិទ្ធិ​មនុស្ស និង​ប្រជាធិបតេយ្យ​​ឡើង​វិញ។

ស្របពេលដែលការនាំអង្ករចេញទៅទីផ្សារ​អឺរ៉ុបថយចុះខ្លាំង អង្ករខ្មែរនាំទៅទីផ្សារ​ចិន​មាន​ចំនួន​ជាង ១៣ម៉ឺន​តោន (១៣២.៩៤៧​តោន)។ ប្រទេសឈរនៅលេខរៀងទី១ នៃ​​ប្រទេស ​ដែល​នាំ​អង្ករ​ចូល​ពី​ខ្មែរ​ច្រើន​ជាង​គេ ក្នុង​​ចំណោម​ប្រទេស​ទាំង ៥១ ដែល​ទិញ​អង្ករ​​ពី​ខ្មែរ​ដែរ។

លោក ហ៊ុន សែន ធ្លាប់អះអាង កាលពីដើមខែ មករា ថាចិន​សន្យា​ទិញ​អង្ករ​ខ្មែរ​ចំនួន​​រហូត​ដល់ ៤០ម៉ឺន​​តោន ក្រោយ​សហភាពអឺរ៉ុប ប្រកាសយកពន្ធលើអង្ករខ្មែរ។ ជំហរជួយទិញអង្ករខ្មែរ​ពី​ភាគីចិននេះ ធ្វើ​ឡើង​​ក្រោយ​​សហគមន៍​អន្តរជាតិ ថ្កោល​ទោស​របប​លោក ហ៊ុន សែន និង​ព្រមាន​ដាក់ទណ្ឌកម្ម ដោយសារ​ការ​រំលោភ​សិទ្ធិ​មនុស្ស និង​បំផ្លាញ​​ប្រជាធិបតេយ្យ​​ធ្ងន់ធ្ងរ។

ទោះបីចិនជួយទិញអង្ករខ្មែរបន្ថែមយ៉ាងណាក្តី ក៏លោក ថេង សាវឿន គ្មាន​សុទិដ្ឋិនិយមថា ទីផ្សារ​​ចិន អាច​ទាក់ទាញ​អ្នក​នាំ​ចេញ​អង្ករ​ខ្មែរ និង​ជួយ​អ្វី​ច្រើន​​ដល់​​កសិករ​ខ្មែរ​នោះ​ដែរ ព្រោះ​​ចិន​​ក៏​ជាប្រទេសនាំអង្ករចេញទៅទីផ្សារ​អឺរ៉ុប និង​ជា​គូ​ប្រកួត​ប្រជែង​ជាមួយ​កម្ពុជា ដ្បិត​​ចិន​ក៏​ជា​អ្នក​ផលិតអង្ករនាំចេញដ៏ធំមួយ។ ម្យ៉ាងទៀត ឆ្នាំ​ដំបូងៗ អាច​​ចិន​ទិញ​អង្ករ​ពី​ខ្មែរ​ច្រើន តែ​ឆ្នាំ​បន្ទាប់​​ទៅ​ទៀត មិន​​ដឹង​​ជា​យ៉ាង​ណា​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល