អ្នកឃ្លាំមើលថា ការរក្សាភាពស្ងាត់ស្ងៀមរបស់រដ្ឋាភិបាលក្នុងការទប់ស្កាត់ការលាងលុយកខ្វក់ ធ្វើឱ្យកម្ពុជានៅតែជាប់ក្នុងបញ្ជីខ្មៅ ឬបញ្ជីប្រផេះ នៃក្រុមប្រទេសលាងលុយកខ្វក់ដដែល។ ការលើកឡើងបែបនេះ ខណៈគណៈកម្មការអឺរ៉ុបនឹងប្រកាសជាផ្លូវការថា កម្ពុជានឹងជាប់ក្នុងបញ្ជីខ្មៅ នៃក្រុមប្រទេសលាងលុយកខ្វក់ ឬរួចផុតពីការចោទប្រកាន់នេះ នាពេលឆាប់ៗនេះ។
អ្នកជំនួញព្រួយបារម្ភថា ប្រសិនបើកម្ពុជាជាប់ក្នុងបញ្ជីខ្មៅ នឹងអាចធ្វើឱ្យបាត់បង់ទំនុកចិត្តពីអ្នកវិនិយោគស្អាតស្អំ។
អ្នកជំនាញខាងវិទ្យាសាស្ត្រនយោបាយ លោក ឯម សុវណ្ណារ៉ា សង្កេតឃើញថា ទោះរដ្ឋាភិបាលបានធ្វើច្បាប់ទប់ស្កាត់ករណីលាងលុយកខ្វក់រួចហើយក្ដី ប៉ុន្តែលោកមិនទាន់បានឃើញរដ្ឋាភិបាលបង្ហាញលទ្ធផលជាសាធារណៈពីអ្វីដែលខ្លួនបានធ្វើនៅឡើយទេ។ លោកបន្តទៀតថា ចំណែកសហភាពអឺរ៉ុប ក៏នៅតែរក្សាភាពស្ងៀមស្ងាត់មិនបានបង្ហាញការព្រួយបារម្ភ ឬអបអរចំពោះកិច្ចខិតខំរបស់រដ្ឋាភិបាលនោះដែរ៖ «យើងអត់ទាន់បានឃើញ ឬក៏យើងអត់ទាន់ទទួលបានព័ត៌មានអំពីការប្រកាសជាសាធារណៈអំពីការចាត់វិធានការ ឬការទប់ស្កាត់ទៅលើនីតិវិធីដែលសហភាពអឺរ៉ុបចោទប្រកាន់កន្លងមក អត់ទាន់មានលិខិតអបអរ ឬសរសើរកម្ពុជានៅឡើយ អ៊ីចឹងនៅស្ទាក់ស្ទើរ អ៊ីចឹងរដ្ឋាភិបាលកម្ពុជា គួរបង្ហាញ ឬចេញលិខិតបញ្ជាក់បន្ថែមណាមួយជាការការពារ»។
កាលពីខែឧសភាកន្លងទៅ គណៈកម្មការអឺរ៉ុបបានដាក់បញ្ចូលប្រទេសកម្ពុជាក្នុងបញ្ជីខ្មៅនៃក្រុមប្រទេសលាងលុយកខ្វក់ ហើយបើគ្មានការប្រែប្រួលនៅក្នុងខែតុលានេះ គណៈកម្មការអឺរ៉ុបនឹងប្រកាសជាផ្លូវការនៃការចូលជាធរមាននៃវិធានការនេះ។
ក្រោយគណៈកម្មការអឺរ៉ុបប្រកាសបែបនេះ រដ្ឋាភិបាលកម្ពុជា ប្រញាប់ធ្វើច្បាប់ចំនួនបី ដើម្បីប្រយុទ្ធប្រឆាំងនឹងអំពើលាងលុយកខ្វក់។ ច្បាប់ទាំងនោះរួមមាន៖ច្បាប់ស្ដីពីការប្រឆាំងការសម្អាតប្រាក់និងហិរញ្ញប្បទានភេរវកម្ម ច្បាប់ស្ដីពីការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ និងច្បាប់ស្ដីពីការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌ។
អាស៊ីសេរីបានព្យាយាមសុំការបំភ្លឺរឿងនេះពីអ្នកនាំពាក្យរដ្ឋាភិបាល លោក ផៃ ស៊ីផាន តែលោកមិនលើកទូរស័ព្ទ នៅថ្ងៃទី០៣ តុលា។ ទោះជាយ៉ាងណា លោក ផៃ ស៊ីផាន ធ្លាប់ប្រាប់អាស៊ីសេរីថា រដ្ឋាភិបាលបានបញ្ជូនឯកសារពាក់ព័ន្ធពីការទប់ស្កាត់ និងបង្ក្រាបការចរាចរណ៍នៃការលាងលុយកខ្វក់នេះទៅសហភាពអឺរ៉ុបរួចរាល់អស់ហើយ។ លោករំពឹងថា ក្រោយរដ្ឋាភិបាលបានធ្វើច្បាប់ប្រឆាំងអំពើលាងលុយកខ្វក់ និងបង្ក្រាបបានបញ្ហាជាច្រើនករណីរួចមករំពឹងថា កម្ពុជានឹងរួចផុតពីបញ្ជីខ្មៅ និងបញ្ជីប្រផេះ។
ប៉ុន្តែ អ្នកជំនាញខាងវិទ្យាសាស្ត្រនយោបាយ លោក ឯម សុវណ្ណារ៉ា យល់ថា ជោគវាសនារបស់កម្ពុជា ប្រហែលជាមិនអាចគេចផុតពីការចោទប្រកាន់របស់អឺរ៉ុបទាំងស្រុងនោះ ហើយលោកថា ប្រសិនកម្ពុជាធ្វើបានល្អក្នុងការទប់ស្កាត់ការលាងលុយកខ្វក់ កម្ពុជាអាចត្រឹមធ្លាក់ពីបញ្ជីខ្មៅមកត្រឹមបញ្ជីប្រផេះប៉ុណ្ណោះ។
អាស៊ីសេរី បានព្យាយាមសាកសួររឿងនេះពីមន្ត្រីសំខាន់ៗមួយចំនួនទៀត ដូចជាអ្នកនាំពាក្យបក្សកាន់អំណាច លោក សុខ ឥសាន ប្រធានអង្គភាពប្រឆាំងអំពើពុករលួយ លោក ឱម យិនទៀង និងអ្នកនាំពាក្យក្រសួងមហាផ្ទៃ លោក ខៀវ សុភ័គ ប៉ុន្តែពួកលោកមិនទទួលទូរស័ព្ទ។
រីឯ សមាជិក និងជាអ្នកនាំពាក្យគណៈកម្មាធិការសិទ្ធិមនុស្សរបស់រដ្ឋាភិបាល លោក កត្តា អ៊ន វិញ ប្រាប់ថា កិច្ចការងារនេះក្រសួងមហាផ្ទៃ និងអង្គភាពប្រឆាំងអំពើពុករលួយជាអ្នកទទួលបន្ទុក អ្វីលើសពីនេះលោកសុំមិនធ្វើអត្ថាធិប្បាយឡើយ។
ទាក់ទងបញ្ហានេះ អ្នកវិនិយោគ និងជាអ្នកស្រាវជ្រាវសេដ្ឋកិច្ចលោក ង៉ែត ជូ និយាយថា សព្វថ្ងៃកម្ពុជាមានអ្នកបរទេសច្រើនមករកស៊ីនៅកម្ពុជា។ លោកយល់ថា បើកម្ពុជាត្រូវជាប់ឈ្មោះក្នុងបញ្ជីខ្មៅនៃក្រុមប្រទេសលាងលុយកខ្វក់ នឹងធ្វើឱ្យអ្នកវិនិយោគអន្តរជាតិមើលមកកម្ពុជាក្នុងផ្លូវអវិជ្ជមាន៖ «អ៊ីចឹងអាចប៉ះពាល់ភ្ញៀវអ្នកវិនិយោគក្រៅស្រុក ហើយដែលគេចង់មកវិនិយោគនៅកម្ពុជាយើងបន្ទាប់មកទៀតប៉ះពាល់ដល់ជាពិសេសវិស័យហិរញ្ញវត្ថុរបស់យើងដែលជាទូទៅយើងមានអ្នកវិនិយោគបរទេសច្រើនដែរ ដែលគេវិនិយោគវិស័យហិរញ្ញវត្ថុនៅកម្ពុជា ហើយជាធម្មតាបើប៉ះពាល់ដល់វិស័យហិរញ្ញវត្ថុ សេដ្ឋកិច្ចប្រទេសមួយមានផលប៉ះពាល់អវិជ្ជមានច្រើនទៀត»។
របបលោក ហ៊ុន សែន កំពុងរងទណ្ឌកម្មពីសហភាពអឺរ៉ុបស្រាប់ទៅហើយ។ នោះគឺការដកហូតឋានៈអនុគ្រោះពន្ធ EBA ចំនួន២០% លើទំនិញដែលកម្ពុជានាំទៅលក់នៅទីផ្សារអឺរ៉ុប។ ទណ្ឌកម្មនេះ កើតឡើងដោយសារតែរបបក្រុងភ្នំពេញ រំលោភសិទ្ធិមនុស្សធ្ងន់ធ្ងរជាប្រព័ន្ធ ដែលមិនអាចឱ្យសហភាពអឺរ៉ុបអត់ឱនឱ្យបាន។ ក្រុមអ្នកសង្កេតការណ៍ជឿថា បើរបបនេះនៅតែមិនព្រមស្ដារប្រជាធិបតេយ្យ និងគោរពសិទ្ធិមនុស្សពេញលេញទេ នោះសហភាពអឺរ៉ុបនឹងកាត់ផ្តាច់ឋានៈអនុគ្រោះពន្ធទាំងស្រុង ហើយទណ្ឌកម្មធ្ងន់ធ្ងរនឹងបន្តធ្លាក់មកជាបន្តបន្ទាប់ពីក្រុមប្រទេសលោកខាងលិច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។