កម្មកររោងចក្រកាត់ដេរ វ៉ាយ អែន ដាប់បែលយូរ (Y&W) ប្រមាណ ៥០០នាក់ នៅព្រឹកថ្ងៃទី១២ មីនា បានជួបជុំគ្នាធ្វើកូដកម្មបិទផ្លូវមុខរោងចក្រ ដែលស្ថិតនៅខណ្ឌដង្កោ រាជធានីភ្នំពេញ ដើម្បីទាមទាររកដំណោះស្រាយវិវាទការងារ។ មន្ត្រីសង្គមស៊ីវិល ស្នើដល់រដ្ឋាភិបាលឲ្យបញ្ចេញកញ្ចប់ថវិកាជាតិ ដើម្បីដោះស្រាយបញ្ហាប្រឈមរបស់កម្មករ ដែលថៅកែបានរត់ចោលរោងចក្រ ដោយមិនបានទូទាត់ប្រាក់ឈ្នួល។
កម្មកររោងចក្រកាត់ដេរ វ៉ាយ អែន ដាប់បែលយូរ (Y&W Garment) ប្រមាណ ៥០០នាក់ បានធ្វើកូដកម្មអហិង្សានៅមុខរោងចក្រ ដោយនាំគ្នាឈរបិទផ្លូវលេខ ២១៧ ដែលស្ថិតនៅខណ្ឌដង្កោ រាជធានីភ្នំពេញ។
កម្មកររោងចក្រ វ៉ាយ អែន ដាប់បែលយូរ លោកស្រី ដុន ចាន់ថន ប្រាប់វិទ្យុអាស៊ីសេរីនៅថ្ងៃទី១២ មីនាថា គោលបំណងនៃកូដកម្មនេះ គឺដើម្បីទាមទារឲ្យក្រសួងការងារ ដោះស្រាយវិវាទការងារ ដែលថៅកែ បានរត់ចោលរោងចក្រ ដោយមិនទូទាត់ប្រាក់ឈ្នួល និងអត្ថប្រយោជន៍ផ្សេងទៀតឲ្យកម្មករ។
លោកស្រី ដុន ចាន់ថន៖«ចង់បានតែឲ្យគិតលុយឲ្យកម្មករប្រាំចំណុចហ្នឹងសិនមក ព្រោះអីកម្មករអត់មានលុយទេ ហើយបើសិនគាត់បើកលុយឲ្យកម្មករនៅថ្ងៃទី២០ តែបើម្ចាស់ផ្ទះជួលខ្លះត្រឹមថ្ងៃទី១៥ ទេ គេឈប់ឲ្យនៅហើយ»។
កម្មករទាមទារគោលការណ៍ចំនួន ៥ចំណុច រួមមាន ប្រាក់ឈ្នួលចុងក្រោយ ប្រាក់ជួសជុលការសម្រាកប្រចាំឆ្នាំ ប្រាក់បំណាច់អតីតភាពការងារ ប្រាក់ជូនដំណឹងមុនកុងត្រា និងប្រាក់សោហ៊ុយ ជំងឺចិត្ត។
ចំណែកឯកូដកម្មនៅថ្ងៃនេះ កម្មករចាប់ផ្ដើមជួបជុំគ្នានៅម៉ោង ៧កន្លះព្រឹក និងរំសាយទៅវិញ នៅម៉ោង ១១ថ្ងៃត្រង់ ហើយមានតំណាងមកពីក្រសួងការងារចុះសម្របសម្រួលជាមួយកម្មករ ដោយសន្យាថា ក្រសួងនឹងចាត់ចែងប្រាក់ខែចុងក្រោយសម្រាប់កម្មករទាំងអស់ និងបន្តដោះស្រាយបញ្ហាវិវាទការងារនេះ ។ តំណាងក្រសួង ក៏បានដាក់ភ្នាក់ងារជាតិមុខរបរ ដើម្បីឲ្យក្រុមកម្មករទាំងនោះ អាចស្វែងរកការងារនៅកន្លែងផ្សេងបាន ដើម្បីរក្សាសុពលភាពបណ្ណសមធម៌សង្គម ឬបណ្ណ ប.ស.ស។
«ខ្ញុំតាមដានរឿងនេះរហូត ហើយអ្នកឯកឧត្ដមរដ្ឋមន្ត្រីកំពុងតែដោះស្រាយរឿងហ្នឹង សូមឲ្យបងប្អូនទាំងអស់ មានសណ្ដាប់ធ្លាប់ ហើយកុំឲ្យខុសនឹងច្បាប់»។
ឆ្លើយតបនឹងការលើកឡើងនេះ កម្មករឲ្យដឹងថា ប្រាក់ខែចុងក្រោយ ដែលពួកគាត់ទទួលបាន ប្រមាណ ១០០ដុល្លារប៉ុណ្ណោះ មិនអាចទប់ទល់ការចំណាយជាច្រើន រួមមាន ថ្លៃបន្ទប់ជួល ទឹក ភ្លើង អាហារហូបចុក និងសងបំណុលធនាគារជាដើម បានទេ ដោយសារតែមុនពេលថៅកែរត់ចោលរោងចក្រ ថៅកែបានឲ្យកម្មករធ្វើការត្រឹមតែកន្លះថ្ងៃ ដើម្បីទទួលបានប្រាក់ឈ្នួល ៥០ភាគរយ។
កម្មករស្នើដល់រដ្ឋមន្ត្រីក្រសួងការងារ លោក ហេង សួរ ឲ្យពន្លឿននីតិវិធីដោះស្រាយវិវាទការងារនេះឲ្យបានឆាប់។
វិទ្យុអាស៊ីសេរី នៅមិនទាន់អាចទាក់ទងអ្នកនាំពាក្យក្រសួងការងារលោក កត្តា អ៊ន ដើម្បីសុំការឆ្លើយតបសំណើនេះបាននៅឡើយទេ នៅថ្ងៃទី១២ មីនា។
ប្រធានគ្រប់គ្រងកម្មវិធីការងារ នៃអង្គការសង់ត្រាល់ (CENTRAL) លោក ឃុន ថារ៉ូ មានប្រសាសន៍ថា ការទូទាត់អត្ថប្រយោជន៍ផ្សេងៗ សម្រាប់កម្មករ គឺត្រូវការចំណាយពេលវេលា ដើម្បីគណនាឲ្យបានត្រឹមត្រូវតាមច្បាប់។ លោកបន្ថែមថា រដ្ឋាភិបាលគួរតែបញ្ចេញកញ្ចប់ថវិកាជាតិណាមួយ ដើម្បីដោះស្រាយបញ្ហា ចំពោះមុខរបស់កម្មករ។
លោក ឃុន ថារ៉ូ៖ « បើសិនជាខាងគណៈកម្មាធិការដោះស្រាយបញ្ហាកូដកម្ម បាតុកម្មគ្រប់មុខសញ្ញានេះ ជំរុញនីតិវិធីឲ្យបានលឿន ខ្ញុំគិតថា ដំណើរការនីតិវិធីតាមផ្លូវតុលាការឈានដល់ការលក់ឡាយឡុងនេះ វាអាចដោះស្រាយនៅក្នុងថេរវេលាកំណត់ណាមួយ។ ប៉ុន្តែចំពោះមុខ វាជាសេចក្ដីត្រូវការរបស់កម្មករនិយោជិត ខ្ញុំគិតថា រដ្ឋគួរតែពិចារណានៅក្នុងការពិនិត្យមើលអំពីលទ្ធភាពក្នុងការប្រើប្រាស់កញ្ចប់បុរេប្រទានណាមួយរបស់រាជរដ្ឋាភិបាល ដែលកន្លងមកក្រសួងតែងតែមានការដោះស្រាយបញ្ហាហ្នឹង ដោយស្នើឲ្យមានការប្រើប្រាស់នូវកញ្ចប់បុរេប្រទាន កញ្ចប់ថវិកាជាតិណាមួយ ដើម្បីទម្លាក់ទៅឲ្យកម្មករនិយោជិត » ។
រោងចក្រកាត់ដេរ វ៉ាយ អែន ដាប់បែលយូរ មានកម្មករជិត ៤ពាន់នាក់ (៣.៧៥៦នាក់) ហើយក្នុងនោះស្ត្រីមានផ្ទៃពោះមានជិត ៥រយនាក់។
នៅថ្ងៃទី៧ មីនា ថៅកែរោងចក្រកាត់ដេរ វ៉ាយ អេន ដាប់បែលយូ ពុំមានលទ្ធភាពបើកប្រាក់ឈ្នួលលើកទី២ ជូនកម្មករ និងមិនបានបង់ប្រាក់វិភាគទាន ប.ស.ស សម្រាប់ខែមករា និងខែកុម្ភៈ ឆ្នាំ២០២៤។ នៅថ្ងៃដដែលនោះ កម្មកររោងចក្រកាត់ដេរ វ៉ាយ អេន ដាប់បែលយូ ជិត៣ពាន់នាក់ (២.៦២៥) ដាក់ពាក្យបណ្ដឹងទៅនាយកដ្ឋានដោះស្រាយវិវាទការងារ នៃក្រសួងការងារ ដើម្បីស្នើដល់ក្រសួងឱ្យដោះស្រាយវិវាទការងាររួមរបស់កម្មកររោងចក្រកាត់ដេរមួយនេះ ក្រោយពីថៅកែមិនបើកប្រាក់ឈ្នួលលើកទី២។
នេះជាលើកទី២ ហើយ ដែលកម្មកររោងចក្រ វ៉ាយ អេន ដាប់បែលយូ (Y&W GARMENT) ជួបជុំគ្នាតវ៉ារកដំណោះស្រាយការងារពីរោងចក្រ និងក្រសួងការងារ។ កាលពីព្រឹកថ្ងៃទី៩ មីនា កម្មករ នៃរោងចក្រនេះ ជិតមួយពាន់នាក់ បានប្រមូលផ្ដុំគ្នា ដើម្បីដង្ហែញត្តិទៅកាន់ក្រសួងការងារ ទាមទារដំណោះស្រាយវិវាទការងារនេះ។
កម្មកររោងចក្រ វ៉ាយ អេន ដាប់បែលយូ បញ្ជាក់ថា ពួកគាត់នឹងបន្តការតវ៉ានេះ នៅថ្ងៃស្អែកទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។