ក្រុមហ៊ុនអូស្រ្តាលី ចាប់ផ្តើមចម្រាញ់រ៉ែមាសដំបូងនៅការដ្ឋានចម្រាញ់រ៉ែមាសនៅអូរខ្វាវ ក្នុងខេត្តមណ្ឌលគិរី នៅថ្ងៃទី២១ ខែមិថុនា។ ក្រុមហ៊ុនអូស្រ្តាលី ដែលធ្វើអាជីវកម្មរ៉ែមាសនេះមានឈ្មោះថា រ៉ឺណេសង់ មីនីរ៉ល ខែមបូឌា (Renaissance Minerals Cambodia) ដែលមានក្រុមហ៊ុនមេចុះបញ្ជីនៅទីផ្សារភាគហ៊ុនរបស់អូស្ត្រាលី ឈ្មោះ អេមីរ៉ល រីស៊សស៊ីស (Emerald resources)។
សេចក្តីថ្លែងការណ៍របស់ក្រសួងរ៉ែ និងថាមពល ផ្សាយថ្ងៃទី២១ ខែមិថុនា ឲ្យដឹងថាចំណូលពីអាជីវកម្មរ៉ែមាសនេះ នឹងចម្រាញ់មាសដុំបានប្រមាណ ៣ តោនក្នុងមួយឆ្នាំ និងទាញយកចំណូលដុលប្រមាណ ១៨៥ លានដុល្លារក្នុងមួយឆ្នាំដែលក្នុងនោះរដ្ឋបានចំណូលពីសួយសារ និងសារពើពន្ធប្រមាណ ៤០លានដុល្លារក្នុងមួយឆ្នាំ សម្រាប់រយៈពេល ៨ឆ្នាំដំបូង។
ទោះជាយ៉ាងនេះក្ដី មិនទាន់មានសេចក្តីរាយការណ៍លម្អិត និងជាក់លាក់ណាមួយ អំពីការបែងចែកផលចំណេញ រវាងក្រុមហ៊ុនអូស្រ្តាលី និងរដ្ឋាភិបាលកម្ពុជានោះទេ។ គ្រាន់តែភាគីទាំងពីរបញ្ជាក់ថា ផលចំណេញពីអាជីវកម្មរ៉ែមាសនេះ នឹងជួយសម្រាលបន្ទុកនៃវិបត្តិដោយសារជំងឺកូវីដ-១៩ បានមួយចំណែក និងផ្តល់ឱកាសការងារដល់កម្លាំងពលកម្មក្នុងស្រុកបាន ៤២៧នាក់។
វិទ្យុអាស៊ីសេរី មិនទាន់អាចសុំការបំភ្លឺជុំវិញរឿងនេះពីអ្នកនាំពាក្យក្រសួងរ៉ែ និងថាមពលលោក យស់ មុនីរ៉ាត់ និងស្ថានទូតអូស្រ្តាលីបាននៅឡើយទេ។
ជាងនេះទៅទៀតទាំងរដ្ឋាភិបាលកម្ពុជា និងក្រុមហ៊ុនអូស្រ្តាលីនេះនៅមិនទាន់បង្ហាញរបាយការណ៍ ស្តីពីការសិក្សានិងវាយតម្លៃលើផលប៉ះពាល់បរិស្ថាន និងសង្គម ជុំវិញអាជីវកម្មរ៉ែមាសនេះនៅឡើយនោះដែរ។
កន្លងមកប្រជាពលរដ្ឋនៅខេត្តមណ្ឌលគិរីជាពិសេសជនជាតិដើមភាគតិចបានទទូចឲ្យរដ្ឋាភិបាលយកចិត្តទុកដាក់លើបញ្ហានៃផលប៉ះពាល់ដល់បរិស្ថាន និងសង្គមនេះព្រោះមានអាជីវកម្មរ៉ែមាសមួយចំនួន នៅក្នុងខេត្តនេះដែលបង្ហូរជាតិគីមីចូលក្នុងអូរធម្មជាតិធ្វើឲ្យមនុស្សស្លាប់ជាច្រើននាក់ និងងាប់គោក្របីរាប់រយក្បាលកាលពីឆ្នាំ២០១៨៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។