ក្រសួងការងារ និងបណ្ដុះបណ្ដាលវិជ្ជាជីវៈ កំណត់ក្រុមហ៊ុនស្របច្បាប់ដែលនាំពលករទៅធ្វើការនៅក្រៅប្រទេសដើម្បីលុបបំបាត់នូវក្រុមហ៊ុនដែលឆបោកពលករកន្លងមក។ ទោះជាយ៉ាងណា សង្គមស៊ីវិលថា រដ្ឋាភិបាលគួរស្ដារសេដ្ឋកិច្ច និងបង្កើតការងារក្នុងស្រុក ជាជាងឱ្យពលរដ្ឋធ្វើចំណាកស្រុក។
ក្រសួងការងារ និងបណ្ដុះបណ្ដាលវិជ្ជាជីវៈ នៅថ្ងៃទី០២ ខែមករា បានជ្រើសរើសប្រមាណ ៤រយក្រុមហ៊ុនឯកជន ដែលបានទទួលការអនុញ្ញាតឱ្យធ្វើការជ្រើសរើសបណ្ដុះបណ្ដាលបញ្ជូន និងគ្រប់គ្រងពលករខ្មែរទៅធ្វើការនៅក្រៅប្រទេសរួមមាន ប្រទេសជប៉ុន ប្រទេសថៃ និងអារ៉ាប់ប៊ីសាអូឌីត (Saudi Arabia) ជាដើម។ ក្រសួងការងារ ថារាល់ទីភ្នាក់ងារជ្រើសរើសឯកជនទាំងឡាយណាដែលពុំមានឈ្មោះក្នុងបញ្ជីរបស់ក្រសួងគឺចាត់ទុកថា ជាទីភ្នាក់ងារងារជ្រើសរើសឯកជនខុសច្បាប់។
ប្រធានផ្នែកប្រឆាំងការជួញដូរមនុស្ស និងទេសន្តរប្រវេសន៍នៃអង្គការសង់ត្រាល់ លោក ឌី ថេហូយ៉ា លើកឡើងថា ការផ្សព្វផ្សាយពីក្រុមហ៊ុន ឬទីភ្នាក់ងារជ្រើសរើសឯកជនរបស់ក្រសួងការងារនេះ គឺជាផ្នែកមួយក្នុងការទប់ស្កាត់ក្រុមហ៊ុន ឬទីភ្នាក់ងារនាំពលករទៅក្រៅប្រទេសខុសច្បាប់ប៉ុណ្ណោះ។
លោក ឌី ថេហូយ៉ា បន្តថា នៅពេលដែលស្ថានភាពសេដ្ឋកិច្ចនៅប្រទេសកម្ពុជាធ្លាក់ចុះនាំឱ្យពលរដ្ឋធ្វើចំណាកស្រុកទៅក្រៅប្រទេសកាន់តែឡើង ហើយពលករមួយចំនួនបានជ្រើសរើសរើសក្រុមហ៊ុនខុសច្បាប់ដែលយកតម្លៃសេវាតិចដដែល។
លោក ឌី ថេហូយ៉ា៖ «ច្បាស់ណាស់ពាក់ព័ន្ធនឹងកត្តាសេដ្ឋកិច្ច វាអត់ប្រសើរឡើង វាដុនដាប អត្រាការងារធ្វើធ្លាក់ចុះ អ៊ីចឹងហើយពលរដ្ឋត្រូវការរកការងារធ្វើដើម្បីបានប្រាក់ចំណូល អ៊ីចឹងគាត់ត្រូវចំណាកស្រុកបន្ថែមហើយ»។
ទិន្នន័យរបស់ក្រសួងការងារ និងបណ្ដុះបណ្ដាលវិជ្ជាជីវៈ បង្ហាញថាក្នុងឆ្នាំ ២០២២ ថា មានពលករកម្ពុជា ជាង ១លាន បីសែននាក់ កំពុងបម្រើការងារនៅក្នុងប្រទេសគោលដៅចំនួន ៧ ដែលក្នុងនោះមានប្រទេសថៃ កូរ៉េខាងត្បូង ម៉ាឡេស៊ី ជប៉ុន សិង្ហបុរី តំបន់រដ្ឋបាលពិសេសហុងកុង និងប្រទេសអារ៉ាប់ប៊ីសាអូឌីត។
ទោះជាយ៉ាងណារបាយការណ៍របស់អង្គការសង់ត្រាល់ កាលពីថ្ងៃទី២០ ខែធ្នូ ឆ្នាំ២០២៣ ថាយ៉ាងតិចណាស់មានពលករខ្មែរជាង ២លាននាក់ កំពុងបម្រើការងារនៅប្រទេសថៃដែលភាគច្រើនមិនបានទៅតាមក្រុមហ៊ុន ឬមានឯកសារស្របច្បាប់។ របាយការណ៍ដដែលឱ្យដឹងទៀតថា ភាគច្រើននៃពលករកម្ពុជា ត្រូវចំណាកស្រុកដោយសារតែគ្មានជម្រើស ឬដោយសារស្ថានភាពបង្ខំ ដូចជា កង្វះខាតឱកាសការងារសមរម្យ និងទៀងទាត់នៅក្នុងស្រុក ការជំពាក់បំណុល ទិន្នផលកសិកម្មធ្លាក់ចុះ និងខ្វះ ឬគ្មានទីផ្សារលក់ផលិតផលជាដើម។
របាយការណ៍ដដែលឱ្យដឹងថា កត្តាទាំងនេះបានរុញច្រានពលករចំណាកស្រុកពិសេស ពលករជាស្ត្រី និងកុមារ ក្លាយជាក្រុមងាយធ្លាក់ខ្លួនទៅក្នុងស្ថានភាពរងគ្រោះកាន់តែខ្លាំង ដូចជាចាញ់បោកមេខ្យល់ ទទួលរងការកេងប្រវ័ញ្ចកម្លាំងពលកម្ម ការរំលោភបំពានសិទ្ធិការងារ និងរងគ្រោះក្នុងអំពើជួញដូរមនុស្ស។
ជុំវិញរឿងនេះ ប្រធានសហភាពការងារកម្ពុជា (CLC) លោក អាត់ ធន់ មានប្រសាសន៍ថា រោងចក្រប្រមាណ៤០ បានបិទទ្វារកាលពីឆ្នាំ២០២៣ ដែលបានធ្វើឱ្យកម្មករបាត់បង់ការងារ នឹងមានកម្មករមួយចំនួនទៀតសម្រេចចិត្តចំណាកស្រុកដើម្បីជីវភាព និងដោះបំណុលគ្រួសារ។ លោក អាត់ ធន់ លើកឡើងថា សម្រាប់កម្មករមិនចង់ចំណាកស្រុកទៅប្រទេសថៃ និងម៉ាឡេស៊ីដែលមានប្រាក់ឈ្នួលប្រហាក់ប្រហែលនឹងការងារក្នុងស្រុកនោះទេ។
លោក អាត់ ធន់៖ «បាទជាការពិត នៅពេលដែលនៅក្នុងស្រុកវាមិនមានការងារធ្វើ ហើយការងារហ្នឹងមិនមានប្រាក់ចំណូលគ្រប់គ្រាន់ ឬលក្ខខណ្ឌការងារមិនល្អ ឬអត់មានសុវត្ថិភាពការងារ អ៊ីចឹងហើយកម្មករ និងពលរដ្ឋចេះតែរកវិធីដូចជាការចំណាកស្រុកគឺជាជម្រើសមួយ ដូចជាគាត់អាចទៅកូរ៉េ ទៅជប៉ុន ឬទៅថៃ ឬប្រទេសផ្សេងៗ ទៀត អ៊ីចឹងការមិនមានការងារច្បាស់លាស់ ការមិនមានសុវត្ថិភាព វាមិនល្អសម្រាប់កម្មករយើងទេ»។
លោក អាត់ ធន់ ស្នើដល់រដ្ឋាភិបាលបើកលំហប្រជាធិបតេយ្យដើម្បីឱ្យកម្ពុជាទទួលបានប្រព័ន្ធអនុគ្រោះពន្ធឡើងវិញដើម្បីឱ្យសេដ្ឋកិច្ចកម្ពុជាល្អប្រសើរ ហើយពលរដ្ឋខ្មែរក៏មិនប្រថុយប្រថានចំណាកស្រុកទៅបរទេសទៀតនោះដែរ។
វិទ្យុអាស៊ីសេរីមិនអាចសុំការឆ្លើយតបជុំវិញរឿងនេះពីរដ្ឋមន្ត្រីក្រសួងការងារ លោក ហេង សួរ និង អ្នកនាំពាក្យក្រសួងការងារ លោក កត្តា អ៊ន បានទេ នៅថ្ងៃទី៣ ខែមករា។
កន្លងទៅសង្គមស៊ីវិលរកឃើញថា ពលករខ្មែរធ្វើការនៅក្រៅប្រទេស ជាពិសេសពលករខុសច្បាប់បានប្រឈមនឹងបញ្ហាមួយចំនួនដូចជាការកេងប្រវ័ញ្ចកម្លាំងពលកម្ម ការរំលោភបំពានសិទ្ធិការងារ គំរាមកំហែង ថៅកែមិនបើកប្រាក់ខែឱ្យគ្រប់គ្រាន់ និងការចាប់ខ្លួនដាក់ពន្ធនាគារដោយសារឆ្លងដែនធ្វើការខុសច្បាប់នៅស្រុកគេជាដើម។
ជាក់ស្ដែងកាលពីខែតុលា កន្លងទៅ អាជ្ញាធរថៃបានព័ទ្ធចាប់ខ្លួនពលករចំណាកស្រុកខុសច្បាប់ ជាង៤រយនាក់នាក់ ដែលធ្វើការជាកម្មករសំណង់នៅខេត្តអយុធ្យា (Ayuthaya) ក្នុងប្រទេសថៃ(Thailand)។ ប៉ុន្តែករណីនេះអាជ្ញាធរថៃបានដោះលែងពលរដ្ឋខ្មែរខ្លះឱ្យវិលត្រឡប់ទៅកន្លែងការងារវិញ ក្រោយពេលថៅកែធានាដោយសន្យាធ្វើសំបុត្រស្នាមស្របច្បាប់ជូនពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។