សង្គម​ស៊ីវិល​ចង់​ឃើញ​រដ្ឋាភិបាល​ទប់​ស្កាត់​អំពើ​លាង​លុយ​កង្វក់​ឱ្យ​មាន​ប្រសិទ្ធភាព

ដោយ ទីន ហ្សាការីយ៉ា
2022.09.27
Share on WhatsApp
Share on WhatsApp
សង្គម​ស៊ីវិល​ចង់​ឃើញ​រដ្ឋាភិបាល​ទប់​ស្កាត់​អំពើ​លាង​លុយ​កង្វក់​ឱ្យ​មាន​ប្រសិទ្ធភាព រូបត្លុក៖ ស្ដីអំពី​អំពើលាងលុយកខ្វក់នៅកម្ពុជា។
RFA

មន្ត្រី​សង្គម​ស៊ីវិល​ចង់​ឃើញ​រដ្ឋាភិបាល​បង្ហាញ​ឆន្ទៈ ទប់ស្កាត់ និង​ឆ្លើយតប​សកម្មភាព​លាង​លុយ​កង្វក់​ឱ្យ​មាន​ប្រសិទ្ធភាព ពីព្រោះ​ពួកគេ​មើល​ឃើញ​ថា បញ្ហា​នេះ​ប៉ះពាល់​ដល់​មុខមាត់​ជាតិ សេដ្ឋកិច្ចជាតិ និង​បង្ក​ឱ្យ​មាន​វិបត្តិ​សង្គម​ជាដើម។ មន្ត្រី​ជាន់ខ្ពស់​រដ្ឋាភិបាល​អះអាង​ថា រដ្ឋាភិបាល​បាន​ដោះស្រាយ និង​កំពុង​រៀបចំ​ច្បាប់​ឆ្លើយតប​នឹង​លក្ខខណ្ឌ​របស់​ស្ថាប័ន​អន្តរជាតិ​បណ្តើរៗ​ហើយ ដើម្បី​ឱ្យ​កម្ពុជា​រួច​ផុត​ពី​បញ្ជី​ប្រផេះ ឬ​ប្រទេស​ដែល​មាន​ហានិភ័យ​ខាង​លាង​លុយ​កង្វក់។

មន្ត្រី​សង្គម​ស៊ីវិល​ជំរុញ​ឱ្យ​រដ្ឋាភិបាល​បង្ហាញ​ឆន្ទៈ​ទៅ​អន្តរជាតិ​ជឿជាក់​ថា កម្ពុជា​ពិតជា​មានបំណង​ពិត​ប្រាកដ​ក្នុង​ការ​អនុវត្ត​ច្បាប់ និង​ទប់ស្កាត់​បញ្ហា​លាង​លុយ​កង្វក់ ដើម្បី​ឱ្យ​កម្ពុជា​រួច​ពី​បញ្ជី​ប្រផេះ​ខាងមុខ​នេះ។

ប្រធាន​អង្គការ​សម្ព័ន្ធ​គណនេយ្យភាព​សង្គម​កម្ពុជា លោក សន ជ័យ លើកឡើង​ថា ការ​ដែល​ស្ថាប័ន​អន្តរជាតិ​បាន​ដាក់​កម្ពុជា​ទាក់ទង​បញ្ហា​ការ​លាង​លុយ​កង្វក់ និង​បញ្ហា​ជួញដូរ​មនុស្ស​កន្លង​មក​នេះ​មិនមែន​ជា​រឿង​ល្អ​ឡើយ​។ លោក​ថា បញ្ហា​នេះ គឺ​ប៉ះពាល់​ដល់​មុខមាត់​រដ្ឋាភិបាល​នៅ​លើ​ឆាក​អន្តរជាតិ និង​បាត់បង់​អ្នក​វិនិយោគ​ល្អៗ​រកស៊ី​នៅ​ក្នុង​ប្រទេស បើសិន​រដ្ឋាភិបាល​យឺតយ៉ាវ​ក្នុង​ការ​ឆ្លើយតប​នឹង​របាយការណ៍​ទាំងនោះ​ឱ្យ​ប្រសិទ្ធភាព​នោះ​ទេ​។ លោក​មើល​ឃើញ​ថា កន្លង​មក​នេះ រដ្ឋាភិបាល​បាន​ចាត់វិធានការ​ដោះស្រាយ​កម្រិត​មន្ត្រី​ស្ថាប័ន​ជំនាញ​ដែរ ប៉ុន្តែ​ប្រសិទ្ធភាព​ឬ​យ៉ាងនោះ​លោក​មិនអាច​វាយ​តម្លៃ​បាន​ទេ ដោយ​អាស្រ័យ​លើ​ការអនុវត្ត និង​ការ​ឆ្លើយ​តប​របស់​រដ្ឋាភិបាល ព្រមទាំង​ការ​ត្រួត​ពិនិត្យ​ពី​ស្ថាប័ន​ជំនាញ​នៅ​ក្រៅ​ប្រទេស៖ «ដរាបណា​មានការ​ឆ្លើយតប​យឺត ឬក៏​វិធានការ​អនុវត្ត​ទៅ​មិន​មាន​ប្រសិទ្ធភាព វា​អាច​ទីមួយ​តាម​ការ​មើល​ឃើញ​ទៅលើ​មុខមាត់​កម្ពុជា​នៅ​លើ​ឆាក​អន្តរជាតិ​មិនល្អ ទី​ពីរ​វា​អាច​ថា​ប៉ះពាល់​ដល់​ការ​វិនិយោគ​ព្រោះ​យើង​ដឹង​ហើយ​អ្នក​វិនិយោគ​ត្រឹមត្រូវ​មកពី​ប្រទេស​ស្អាតស្អំ​មិន​ហ៊ាន​ទេ»

ចំណែក អគ្គលេខាធិការ​សហព័ន្ធ​និស្សិត​បញ្ញវន្ត​កម្ពុជា​លោក គៀន ពន្លក លើកឡើង​ថា ស្ថាប័ន​អន្តរជាតិ​បាន​លើកឡើង​ពី​ការ​ព្រួយបារម្ភ និង​ផ្តល់​អនុសាសន៍​ក្នុង​របាយការណ៍​របស់​ខ្លួន​ប្រចាំឆ្នាំ​ដោយ​ជំរុញ​ឱ្យ​រដ្ឋាភិបាល​កម្ពុជា​កែសម្រួល​ច្បាប់​មួយ​ចំនួន រួម​ទាំង​ពង្រឹង​ការអនុវត្ត​ឱ្យ​បាន​ត្រឹមត្រូវ ដើម្បី​កុំឱ្យ​កម្ពុជា​ស្ថិត​ក្នុង​បញ្ជីខ្មៅ ឬ​ប្រទេស​ដែល​លាង​លុយ​កង្វក់ តែ​រហូត​មក​ដល់​ពេលនេះ​លោក​សង្កេត​ឃើញ​ថា ការប្រតិបត្តិ​របស់​រដ្ឋាភិបាល​ហាក់​មិនទាន់​បង្ហាញ​សញ្ញា​វិជ្ជមាន​ណាមួយ​គួរ​ជឿ​ទុកចិត្ត​បាន​នៅឡើយ​ទេ​។ លោក​បញ្ជាក់​ថា មូលហេតុ​ដែល​កម្ពុជា​ជាប់​ក្នុង​បញ្ជី​ប្រផេះ​នៃ​ប្រទេស​មាន​ហានិភ័យ​ខាង​អំពើ​លាង​លុយ​កង្វក់​ពី​ស្ថាន​អន្តរជាតិ ដោយសារ​ការអនុវត្ត​ច្បាប់​ធូរ​លុង និង​អំពើ​ពុករលួយ​ចាក់ស្រេះ​ដែល​សម្រួល​ឱ្យ​ជនខិលខូច​ងាយស្រួល​ចាប់​យក​ឱកាស​ប្រព្រឹត្ត​អំពើ​ល្មើស​ក្រោម​រូបភាព​ផ្សេងៗ​ដូចជា តាម​ប្រព័ន្ធ​ធនាគារ កាស៊ីណូ អចលនទ្រព្យ និង​អាជីវកម្ម​ជាដើម៖ «អង្គការ​សង្គម​ស៊ីវិល​ចង់​ឃើញ​រដ្ឋាភិបាល​មាន​ឆន្ទៈ​មួយ​ដើម្បី​បញ្ចៀស​ប្រទេស​កម្ពុជា​ដែល​មាន​ការ​លាង​លុយ​កង្វក់​ដោយ​ពី​បញ្ជី​ប្រផេះ​ទៅ​បញ្ជីខ្មៅ ដូច្នេះ​រដ្ឋាភិបាល​ត្រូវតែ​អនុវត្ត​ច្បាប់​ឱ្យ​តឹងរ៉ឹង លុប​បំបាត់​អំពើពុករលួយ បក្ខពួក​និយម​កុំឱ្យ​កើត​មាន ហើយ​ប្រាប់​អន្តរជាតិ​ថា កម្ពុជា​ពិត​ជា​មាន​ឆន្ទៈ មាន​បំណង​ក្នុង​ដោះស្រាយ​បញ្ហា​លាង​លុយ​កង្វក់»

កាលពី​ខែមីនា​កន្លង​ទៅ អង្គការ​ឃ្លាំមើល​អំពើ​លាងលុយកខ្វក់​លើ​ពិភពលោក ឈ្មោះ​ក្រុមការងារ​ហិរញ្ញវត្ថុ (FATF) ដែល​មាន​មូលដ្ឋាន​នៅ​ទីក្រុង​ប៉ារីស (Paris) ប្រទេស​បារាំង (France) បាន​បន្ត​ដាក់​កម្ពុជា​ក្នុង «​បញ្ជី​ប្រផេះ​» នៃ​ក្រុម​ប្រទេស​មាន​ហានិភ័យ​ខាង​អំពើ​លាងលុយកខ្វក់ ដែល​ពិភពលោក​ត្រូវ​បង្កើន​ការ​តាមដាន។

ឆ្លើយតប​រឿង​នេះ ប្រធាន​អង្គភាព​អ្នកនាំពាក្យ​រដ្ឋាភិបាល​លោក ផៃ ស៊ីផាន ប្រាប់​វិទ្យុ​អាស៊ីសេរី​ដោយ​លោក​អះអាង​ថា កម្ពុជា​មិនមែន​ជា​ទីកន្លែង​លាង​លុយ​កង្វក់​ដូច​ការចោទប្រកាន់​នោះ​ទេ។ លោក​បញ្ជាក់​ថា មូលហេតុ​ដែល​អង្គការ​ឃ្លាំមើល​អំពើ​លាង​លុយ​កង្វក់​ដាក់​កម្ពុជា​ចូលក្នុង​បញ្ជី​ប្រផេះ​កន្លងមក​នោះ ដោយសារ​រដ្ឋាភិបាល​មិន​បាន​ធ្វើ​បច្ចុប្បន្ន​នៃ​ច្បាប់​មួយ​ចំនួន​ឱ្យ​ទាន់​ច្បាប់​អន្តរជាតិ​តែប៉ុណ្ណោះ។ លោក​ឱ្យ​ដឹង​ថា​រដ្ឋាភិបាល​កំពុង​បំពេញ​ចំណុច​ចន្លោះប្រហោង​នៃ​ច្បាប់ ដើម្បី​ដកខ្លួន​ចេញពី​បញ្ជី​ប្រផេះ​នៃ​ប្រទេស​លាង​លុយ​កង្វក់៖ «បញ្ជី​ប្រផេះ​ហ្នឹង​មិនមែន​តែ​កម្ពុជា​តែម្នាក់ឯង​ទេ គឺ​ប្រទេស​មួយចំនួន​ដែល​អត់​ទាន់​ឆ្លើយតប​ទៅ​លើ​ច្បាប់ គោលការណ៍ យន្តការ និង​ការ​អនុវត្តន៍​ហ្នឹងឯង មិនមែន​ន័យ​ថា បាន​ទទួល ឬ​រង​អំពើ​លាង​លុយ​តាម​ការ​ចោទ​ប្រកាន់​តាម​វិធានការ​ថ្មី​ច្បាប់​របស់​អន្តរជាតិ​ទេ»

ទោះ​យ៉ាងណា កាលពី​ថ្ងៃទី​៨ ខែ​កញ្ញា រដ្ឋមន្ត្រី​ក្រសួង​មហាផ្ទៃ​លោក ស ខេង ថ្លែង​ថា បញ្ហា​លាងលុយកខ្វក់​កំពុង​ជះឥទ្ធិពល​មិនល្អ​ដល់​មុខមាត់​របស់​កម្ពុជា​។ លោក​បន្ត​ថា បើសិន​កម្ពុ​ជា​ធ្លាក់​ចូល​បញ្ជីខ្មៅ​នៃ​ប្រទេស​លាង​លុយ​កង្វក់​នោះ រដ្ឋ​និង​វិស័យ​ឯកជន​នឹង​ជួប​ការ​លំបាក។ ដូច្នេះ លោក​អំពាវនាវ​ដល់​ក្រសួង​ស្ថាប័ន​ពាក់ព័ន្ធ​ចូលរួម​ឱ្យ​បាន​ខ្លាំងក្លា​បន្ថែម​ទៀត ដើម្បី​ដោះស្រាយ​បញ្ហា​ប្រឈម​ទាំងនេះ​ឱ្យ​មាន​ប្រសិទ្ធភាព​ខ្ពស់។

អង្គការ​ឃ្លាំមើល​អំពើ​លាងលុយកខ្វក់​ធ្លាប់​ជំរុញ​ដល់​កម្ពុជា​បង្ហាញ​អន្តរជាតិ​ឃើញ​ពី​ការ​វិវឌ្ឍន៍​សំខាន់ៗ​ដោយ​ឆាប់រហ័ស​ក្នុង​ការ​បំពេញ​តាម​ផែនការ​សកម្មភាព​ដែល​កម្ពុជា​ត្រូវ​កែ​លម្អ​ឱ្យ​បាន​ត្រឹមត្រូវ​។ អង្គការ​នេះ​ព្រមាន​ថា បើ​ពុំ​ដូច្នោះ​ទេ ខ្លួន​នឹង​ពិចារណា​នូវ​ជំ​ហ៊ាន​បន្ទាប់​មក​លើ​កម្ពុជា​ពាក់ព័ន្ធ​នឹង​បញ្ហា​នៃ​អំពើ​លាងលុយកខ្វក់​នេះ​។ បើ​តាម​អង្គការ​នេះ ជំ​ហ៊ាន​បន្ទាប់ គឺ​សំដៅ​ដល់​ការ​អំពាវនាវ​ដល់​ប្រទេស​សមាជិក និង​យុត្តាធិការ​ទាំងអស់​នៅ​ទូទាំង​ពិភពលោក ឱ្យ​បង្កើន​ការ​តាមដាន​ត្រួត​ពិនិត្យ​រាល់​ទំនាក់ទំនង និង​ប្រតិបត្តិការ​អាជីវកម្ម​ទាំងអស់​ជាមួយ​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ប្ដី​ស្ត្រី​រងគ្រោះ​ដោយ​គ្រូ​ពេទ្យវះកាត់​ដាច់​ពោះវៀន​សម្រេច​ប្ដឹង​មន្ទីរ​សំរាក​ព្យាបាល​បង្ក​បញ្ហា​នោះ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។