ស្ថាបនិក​គណបក្ស​ប្រជាធិបតេយ្យ​មូលដ្ឋាន បណ្ឌិត យ៉ង សាំងកុមារ ព្យាករ​ថា ករណី EBA អឺរ៉ុប​នឹង​យក​ពន្ធ​ខ្លះ និង​លើក​លែង​ពន្ធ​ខ្លះ​លើ​ទំនិញ​កម្ពុជា

ដោយ វ៉ែន សុមេធ
2019-12-13
អ៊ីម៉ែល
មតិ
Share
បោះពុម្ព
រថយន្ត​ដឹក​ទំនិញ​ចេញ​ចូល​កំពង់ផែ​ស្វយ័ត​ខេត្ត​ព្រះសីហនុ ព្រឹក​ថ្ងៃ​ទី​៥ ខែ​តុលា ឆ្នាំ​២០១៦។ RFA/Den Ayuthyea
រថយន្ត​ដឹក​ទំនិញ​ចេញ​ចូល​កំពង់ផែ​ស្វយ័ត​ខេត្ត​ព្រះសីហនុ ព្រឹក​ថ្ងៃ​ទី​៥ ខែ​តុលា ឆ្នាំ​២០១៦។ RFA/Den Ayuthyea
RFA/Den Ayuthyea

ស្ថាបនិក​គណបក្ស​ប្រជាធិបតេយ្យ​មូលដ្ឋាន​បណ្ឌិត យ៉ង សាំងកុមារ បាន​ព្យាករ​ថា ករណី EBA អឺរ៉ុប​នឹង​យក​ពន្ធ​ខ្លះ និង​លើក​លែង​ពន្ធ​ខ្លះ​លើ​ទំនិញ​របស់​កម្ពុជា។ ការ​លើក​ឡើង​នេះ ស្រប​ពេល​ដែល​សហភាព​អឺរ៉ុប​ទទួល​បាន​របាយការណ៍​ឆ្លើយតប​​របស់​រដ្ឋាភិបាល​ស្ដីពី​ការ​ស្ដារ​ការ​គោរព​សិទ្ធិមនុស្ស និង​ប្រជាធិបតេយ្យ ដើម្បី​រក្សា​ប្រព័ន្ធ​អនុគ្រោះ​ពន្ធ។

បណ្ឌិត យ៉ង សាំងកុមារ លើក​ឡើង​ថា បើ​ប្រព័ន្ធ​អនុគ្រោះ​ពន្ធ​ត្រូវ​បាន​អឺរ៉ុប​ព្យួរ​ពី​កម្ពុជា​មែន​នោះ​នឹង​ធ្វើ​ឲ្យ​កើត​មាន​វិបត្តិ​ធ្ងន់ធ្ងរ។ ប៉ុន្តែ​អ្នក​ជំនាញ​វិស័យ​កសិកម្ម​រូប​នេះ​សង្កេត​ឃើញ​ថា រដ្ឋាភិបាល​ក៏​បាន​ព្យាយាម​កែ​លម្អ​ស្ថានភាព​ខ្លះៗ តាម​ការ​ចង់​បាន​របស់​សហភាព​អឺរ៉ុប​ដែរ៖ «តាម​ការ​មើល​ឃើញ​តាម​ការ​យល់​ឃើញ​របស់​ខ្ញុំ​រដ្ឋាភិបាល​ប្រឹងប្រែង​ដែរ ឃើញ​កែ​លម្អ​ស្ថានភាព​មួយ​ចំនួន ហើយ​សហភាព​អឺរ៉ុប​ប្រហែល​នឹង​ដក ប៉ុន្តែ​មិន​ដក​ទាំង​អស់​ទេ»

បណ្ឌិត យ៉ង សាំងកុមារ បញ្ចេញ​ទស្សនៈ​ផ្ទាល់​ខ្លួន​ថា ប្រហែល​ជា​សហភាព​អឺរ៉ុប​ឈរ​លើ​ផ្លូវ​កណ្ដាល​នៃ​គម្រោង​ព្យួរ​ប្រព័ន្ធ​អនុគ្រោះ​ពន្ធ​នេះ ដោយ​ខ្លួន​នឹង​យក​ពន្ធ​លើ​ទិញ​ខ្លះ​របស់​កម្ពុជា ហើយ​ទំនិញ​ខ្លះ​ទៀត​អាច​នឹង​ត្រូវ​ទទួល​បាន​ការ​អនុគ្រោះ​ពន្ធ​ដដែល។ លោក​បន្ត​ថា ទំនិញ​ដែល​អឺរ៉ុប​នឹង​យក​ពន្ធ​អាច​ជា​មុខ​ទំនិញ​មួយ​ចំនួន ដែល​មិន​សូវ​ប៉ះពាល់​ខ្លាំង​ដល់​សេដ្ឋកិច្ច​កម្ពុជា៖ «មាន​កែ​លម្អ​ខ្លះ​អ៊ីចឹង​គេ (សហភាព​អឺរ៉ុប) អាច​ទុក​ខ្លះ​ទៅ បើ​គេ​ដក​ទាំង​អស់ មាន​ការ​ប៉ះពាល់​ខ្លាំង ណា​មួយ​គេ​គិត​អាច​ប៉ះពាល់​សេដ្ឋកិច្ច​ការ​រស់​នៅ​របស់​ពលរដ្ឋ​ធម្មតា កម្មករ អ្នក​ក្រីក្រ​អី​ចឹង​ទៅ»

លោក យ៉ង សាំងកុមារ ថ្លែង​បែប​នេះ​តាម​រយៈ​វីដេអូ​រយៈ​ពេល​ជាង ៤នាទី ដែល​បង្ហោះ​តាម​ហ្វេសប៊ុក។ កាល​ពី​ថ្ងៃ​ទី១២ ខែ​ធ្នូ ក្រសួង​ការបរទេស​ទើប​បាន​ឆ្លើយ​តប នឹង​របាយការណ៍​វាយ​តម្លៃ​បឋម​របស់​គណៈកម្មការ​អឺរ៉ុប​ស្ដីពី​ប្រព័ន្ធ​អនុគ្រោះ​ពន្ធ​ EBA។ ក្នុង​របាយការណ៍​នោះ​ក្រសួង​ការ​បរទេស​សង្ឃឹម​ថា​ គណៈកម្មការ​អឺរ៉ុប​នឹង​ពិចារណា​មិន​ព្យួរ​ប្រព័ន្ធ​អនុគ្រោះ​ពន្ធ​ EBA​ នេះ​ទេ​។ ក្រសួង​ការបរទេស​​អះអាង​ទៀត​ថា​ ការ​ដាក់​របាយការណ៍​ឆ្លើយ​តប​នេះ​គឺ​ធ្វើ​ឡើង​ផ្អែក​តាម​នីតិវិធី​របស់​សហភាព​អឺរ៉ុប​ និង​ថា ​សេចក្ដី​ឆ្លើយតប​ចុង​ក្រោយ​នេះ ​គឺជា​របាយការណ៍​គ្រប់​ជ្រុងជ្រោយ​អំពី​សកម្មភាព​ និង​វិធានការ​នានា​ ដែល​រដ្ឋាភិបាល​បាន​អនុវត្ត​ឆ្លើយ​តប​ទៅ​នឹង​បញ្ហា​ទាំង​ឡាយ​ ដែល​ជា​ការ​ព្រួយបារម្ភ​របស់​គណៈកម្មការ​អឺរ៉ុប រួមមាន បញ្ហា​សិទ្ធិ​ក្នុង​ការ​ចូលរួម​នយោបាយ​ សិទ្ធិ​ដីធ្លី​ សេរីភាព​នៃ​ការ​បញ្ចេញមតិ​ និង​សេរីភាព​នៃ​ការ​បង្កើត​សមាគម​ជា​ដើម។

ទោះ​ជា​ក្រសួង​ការ​បរទេស​ព្យាយាម​និយាយ​កុំ​ឲ្យ​អឺរ៉ុប​ព្យួរ​ប្រព័ន្ធ​អនុគ្រោះ​ពន្ធ​បែប​នេះ​ក្តី ក៏​លោក​នាយក​រដ្ឋមន្រ្តី ហ៊ុន សែន នៅ​តែ​ថ្លែង​ដដែល​ថា លោក​មិន​យក​អធិបតេយ្យ​ជាតិ​ទៅ​ដោះដូរ​ជាមួយ​ជំនួយ​ ឬក៏​ភាព​អនុគ្រោះ​ពន្ធ​ពី​អ្នក​ណា​ទាំង​អស់។

អ្នកវិភាគ​បញ្ហា​នយោបាយ និង​សង្គម លោក គឹម សុខ យល់​ឃើញ​ស្រដៀង​គ្នា​នឹង​ការ​លើក​ឡើង​របស់​បណ្ឌិត យ៉ង សាំងកុមារ ដែរ ដោយ​លោក​សង្កេត​ឃើញ​ថា រដ្ឋាភិបាល​បាន​កែ​ប្រែ​ស្ថានការណ៍​តាម​ការ​ទាមទារ​របស់​អឺរ៉ុប​ខ្លះ​ដែរ។ ប៉ុន្តែ​លោក​ថា បើ​ពិនិត្យ​ឲ្យ​ដិតដល់ លោក ហ៊ុន សែន គ្មាន​បំណង​គោរព​សិទ្ធិ​មនុស្ស និង​ប្រជាធិបតេយ្យ​នោះ​ទេ៖ «ប្រសិន​បើ​ចង់​រក្សា​ប្រព័ន្ធ​អនុគ្រោះ​ពន្ធ​ទាំង​ស្រុង គឺ​ស្ថិត​ក្នុង​ដៃ​លោក ហ៊ុន សែន។ បើ​លោក ហ៊ុន សែន វិល​ទៅ​កាន់​ប្រជាធិបតេយ្យ នោះ​ការ​រក្សា​ប្រព័ន្ធ​អនុគ្រោះ​ពន្ធ​សម្រាប់​កម្ពុជា​នៅ​តែ​មាន ហើយ​អឺរ៉ុប​គេ​សប្បាយ​ចិត្ត»

ស្ថាប័ន​ហិរញ្ញវត្ថុ​ធំៗ របស់​ពិភពលោក​បាន​ព្រមាន​ថា កំណើន​សេដ្ឋកិច្ច​កម្ពុជា​នឹង​ត្រូវ​ធ្លាក់​ចុះ​ពី ៧ភាគ​រយ ក្នុង​ឆ្នាំ២០១៩ មក​នៅ​ត្រឹម ៦,ក្នុង​ឆ្នាំ២០២០ ដោយសារ​ភាព​មិន​ប្រាកដ​ប្រជា​នៃ​បញ្ហា​ព្យួរ​ប្រព័ន្ធ​អនុគ្រោះ​ពន្ធ។

ករណី​ជាក់​ស្ដែង កាល​ពី​ថ្ងៃ​ទី​១៨ មករា ឆ្នាំ​២០១៩ នៅ​ពេល​សហភាព​អឺរ៉ុប​បាន​សម្រេច​យក​ពន្ធ​លើ​អង្ករ​កម្ពុជា ដែល​ធ្វើ​ឲ្យ​កម្ពុជា​ត្រូវ​ខាត​បង់​ដល់​ទៅ​ជាង ៥៣លាន​ដុល្លារ​អាមេរិក​សម្រាប់​ការ​បង់​ពន្ធ​ទៅ​ឲ្យ​អឺរ៉ុប​ក្នុង​ឆ្នាំ​ដំបូង​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល