សភាពាណិជ្ជកម្មអឺរ៉ុបប្រចាំនៅកម្ពុជា រៀបចំកិច្ចប្រជុំកំពូលធុរកិច្ច អាស៊ាន-កម្ពុជា រយៈពេល ២ថ្ងៃក្នុងរាជធានីភ្នំពេញ ដើម្បីភ្ជាប់ទំនាក់ទំនង គំនិតសមាហរណកម្ម និងកិច្ចសហប្រតិបត្តិការសេដ្ឋកិច្ច រវាងអ្នកដឹកនាំធុរកិច្ចក្នុងតំបន់មេគង្គ។ អ្នកតាមដានភូមិសាស្ត្រនយោបាយលើកឡើងថា កម្ពុជានឹងអាចទទួលបានការវិនិយោគពីក្រុមហ៊ុនធំៗ ក្នុងតំបន់ និងអឺរ៉ុប លុះត្រាតែកម្ពុជាមានស្ថិរភាពនយោបាយ និងការប្រកួតប្រជែងវិស័យពាណិជ្ជកម្មដោយតម្លាភាព។
សភាពាណិជ្ជកម្មអឺរ៉ុបប្រចាំនៅកម្ពុជា រៀបចំកិច្ចប្រជុំធុរកិច្ចអាស៊ាន-កម្ពុជា រយៈពេល ២ថ្ងៃ ចាប់ពីថ្ងៃទី២៨ ដល់ថ្ងៃទី២៩ កញ្ញា ក្នុងគោលបំណងលើកកម្ពស់សមាហរណកម្មសេដ្ឋកិច្ចក្នុងអនុតំបន់មេគង្គ រួមមានប្រទេសកម្ពុជា ថៃ វៀតណាម និងឡាវ។
កិច្ចប្រជុំធុរកិច្ចនេះ មានអ្នកចូលរួមប្រមាណ៣០០នាក់ អ្នកទាំងនោះ រួមមាន មន្ត្រីជាន់ខ្ពស់សហភាពអឺរ៉ុប តំណាងក្រុមហ៊ុនពាណិជ្ជកម្មនៅក្នុងអនុតំបន់មេគង្គ មន្ត្រីសមាគមប្រជាជាតិអាស៊ីអាគ្នេយ៍ (ASEAN) ហើយមន្ត្រីជាន់ខ្ពស់របស់រដ្ឋាភិបាលកម្ពុជា រួមមាន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុលោក អូន ព័ន្ធមុន្នីរ័ត្ន និងរដ្ឋមន្ត្រីក្រសួងពាណិជ្ជកម្មអ្នកស្រី ចម និម្មល ក៏បានចូលរួមកិច្ចប្រជុំនេះដែរ។
នាយកប្រតិបត្តិនៃសភាពាណិជ្ជកម្មអឺរ៉ុប ប្រចាំប្រទេសកម្ពុជា លោក ម៉ាទីន ប្រីសសុន (Martin Brisson) លើកឡើងថា កិច្ចប្រជុំនេះធ្វើឡើង ដើម្បីបូកសរុបការងារសភាពាណិជ្ជកម្មអឺរ៉ុប ប្រចាំប្រទេសកម្ពុជាកន្លងមក និងជំរុញការធ្វើសមាហរណកម្មពាណិជ្ជកម្មក្នុងអនុតំបន់មេគង្គ ដើម្បីលើកកម្ពស់កំណើនសេដ្ឋកិច្ចកម្ពុជា តាមរយៈការបង្កបរិយាកាសល្អក្នុងការធ្វើធុរកិច្ច។
ក្រៅពីធ្វើបទបង្ហាញសៀវភៅសឆ្នាំ២០២៤ ដែលបង្ហាញអំពីបញ្ជីអនុសាសន៍គោលនយោបាយ លើវិស័យចំនួន១២ ដើម្បីលើកកម្ពស់បរិយាកាសពាណិជ្ជកម្ម និងលទ្ធផលពីការស្ទង់មតិអំពីទំនុកចិត្តធុរកិច្ចឆ្នាំ២០២៣ នៅកម្ពុជា ដោយនាយកប្រតិបត្តិ នៃសភាពាណិជ្ជកម្មអឺរ៉ុប ប្រចាំប្រទេសកម្ពុជា លោក ម៉ាទីន ប្រីសសុន (Martin Brisson) ហើយនោះ ប្រធានផ្នែកពាណិជ្ជកម្ម និងសេដ្ឋកិច្ច ប្រតិភូសហភាពអឺរ៉ុបប្រចាំប្រទេសថៃ លោក ប៉ែតត្រូស សួរមេលីស (Petros Sourmelis) ក៏បានធ្វើបទបង្ហាញអំពី លក្ខខ័ណ្ឌគោលនយោបាយពាណិជ្ជកម្ម ដែលសភាពអឺរ៉ុប ពិចារណាដើម្បីបង្កើតដៃគូពាណិជ្ជកម្មដែរ។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ ដើម្បីសុំការបកស្រាយជុំវិញរឿងនេះបានឡើយ នៅថ្ងៃទី២៨ កញ្ញា។
ជុំវិញរឿងនេះ អ្នកតាមដានភូមិសាស្ត្រតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី មានប្រសាសន៍ថា ដោយសារតែស្ថានភាពនយោបាយ និងការគោរពសិទ្ធិមនុស្សនៅកម្ពុជា នៅតែមិនទាន់ល្អប្រសើរ ដូច្នេះក្រុមហ៊ុនធំៗ របស់សហភាពអឺរ៉ុប និងបណ្ដាប្រទេសនាំមុខលទ្ធិប្រជាធិបតេយ្យផ្សេងៗ ទៀត នៅតែខ្លាចរអាមិនហ៊ានវិនិយោគនៅកម្ពុជា។ លោកបន្ថែមថា រដ្ឋាភិបាលត្រូវតែធានាឱ្យបាននូវការប្រកួតប្រជែងដោយស្មើភាព និងកែប្រែគោលនយោបាយពាណិជ្ជកម្មឱ្យស្របទៅនឹងគោលនយោបាយពាណិជ្ជកម្មសហភាពអឺរ៉ុប នោះទើបរដ្ឋាភិបាលអាចទាក់ទាញវិនិយោគិនមកបណ្ដាក់ទុនរកស៊ី ដើម្បីលើកកម្ពស់សេដ្ឋកិច្ចជាតិ។
លោក សេង វណ្ណលី៖«ខ្ញុំជឿថា បើសិនជាកម្ពុជាមានការតាំងចិត្តពិតប្រាកដ(Commitment)ប្រហែលជាអាចទាក់ទាញក្រុមហ៊ុនមួយចំនួន ខណៈក្រុមហ៊ុនវិនិយោគភាគច្រើនមកពីអឺរ៉ុប ក៏ដូចជា មកពីអាមេរិក គាត់ព្យាយាមបង្វែរផលិតកម្មចេញពីប្រទេសចិន មកទីផ្សារអាស៊ាន ដែលជាទីផ្សារសំខាន់បំផុត ហើយជាពិសេស ផ្នែកកម្លាំងពលកម្មតែម្ដង ហើយរឿងសិទ្ធិ សេរីភាពសារព័ត៌មាន និងលំហនយោបាយ គឺជាអ្វីដែលគេបារម្ភ(Concern)»។
កិច្ចប្រជុំធុរកិច្ចអាស៊ាន-កម្ពុជា នេះ នឹងបិទបញ្ចប់នៅថ្ងៃទី២៩ កញ្ញា។អ្នកវិភាគនយោបាយលើកឡើងថា ដោយសារតែភាពទន់ខ្សោយផ្នែកនីតិរដ្ឋ ហើយស្ថានភាពអំពើពុករលួយជាប្រព័ន្ធនៅតែអាក្រក់ ដូច្នេះ ក្រុមហ៊ុនអន្តរជាតិ នឹងអាចរារែកមកបណ្ដាក់ទុននៅកម្ពុជា៕