មាន់​​​នៅ​​កសិដ្ឋាន​ចុះ​ថោក​​​ខ្លាំង​​ហើយ​​ងាប់​​រាល់​ថ្ងៃ​​ ព្រោះ​គ្មាន​អ្នក​ទិញ​​​​

ដោយ មាន ឫទ្ធិ
2021-03-13
Share
មាន់​​​នៅ​​កសិដ្ឋាន​ចុះ​ថោក​​​ខ្លាំង​​ហើយ​​ងាប់​​រាល់​ថ្ងៃ​​ ព្រោះ​គ្មាន​អ្នក​ទិញ​​​​ មាន់រាប់ពាន់ក្បាល ត្រូវបានកសិករចិញ្ចឹមនៅក្នុកសិដ្ឋានចិញ្ចឹមមាន់មួយកន្លែងស្ថិតនៅក្នុងខេត្តកំពង់ស្ពឺ។
រូប៖ មន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ស្ពឺ ថ្ងៃទី០៨ ខែឧសភា ឆ្នាំ២០២០។

ការ​ធ្លាក់​ចុះ​ថ្លៃ​មាន់​​​ខុស​ប្រក្រតី គឺ​​ចាប់​តាំង​ពី​ផ្ទុះ​ជំងឺ​កូវីដ​១៩​ ក្នុង​ព្រឹត្តិការណ៍​សហគមន៍​២០ កុម្ភៈ​ មក​។ មាន់​ចិញ្ចឹម​យក​សាច់ដែល​ធ្លាប់​តែ​មិន​ខ្វះ​ទី​ផ្សារ​សោះ និង​​មាន​​តម្លៃ​​ខ្ពស់ខ្ទង់​បួន​ពាន់ (៤.០០០)​ ទៅ​ប្រាំ​ពាន់ (៥,០០០) ​រៀលក្នុង​មួយ​គីឡូក្រាម បែរ​ជា​ធ្លាក់​ថ្លៃ​ជាង​ពាក់​កណ្ដាល​រហូត​ដល់​គ្មាន​​អ្នក​ទិញ​។

ម្ចាស់​​រោង​ចិញ្ចឹម​មាន់ក្នុង​កសិដ្ឋាន​​​មួយ​កន្លែងនៅ​ម្ដុំ​ផ្សារ​ថ្នល់​បត់ ​ភូមិ​ត្រពាំង​ត្រគៀត ឃុំ​ពោធិ៍​អង្ក្រង​ លោក យិន សុភី ឲ្យ​ដឹង​ថា មាន់​របស់​លោកមាន​ជិត​ពីរ​ម៉ឺន​ (១៧.​០០០)​ ​ក្បាល កំពុង​ចាល់​ពេញ​ទ្រុង និង​ងាប់​រាល់​ថ្ងៃជា​បណ្ដើរ​ៗ​ ព្រោះ​គ្មាន​អ្នក​ទិញ។​

លោកប្រាប់​ថា មាន់​​អាច​ចាប់​លក់​បានក្នុង​អាយុ​ ៣៥ ទៅ​ ៤០​ថ្ងៃ គឺ​ជា​មាន់​ល្អកំពុង​ពេញ​សាច់។ មាន់​ពេញ​សាច់​នេះធ្លាប់​លក់​បាន​មួយ​គីឡូក្រាមជាង​ប្រាំ​ពាន់​ (៥.០០០) ​រៀល ឥឡូវលក់​បាន​​ជាង​មួយ​ពាន់ (១.២០០)​ រៀល​។ ឯ​មាន់អាយុ​លើស​ពី ​៤០​ថ្ងៃ ​ឡើង ជា​មាន់​ចាស់ លក់​បាន​ថោក។ មាន់​នេះបច្ចុប្បន្ន​តម្លៃ​ប្រាំ​បី​រយ (៨០០) ​រៀល ក្នុង​មួយ​គីឡូក្រាម ហើយ​នៅ​សល់​​ពាស​ពេញ​រោង​ដោយសារ​គ្មាន​អ្នក​ទិញ។

ទោះ​ជា​មាន់មាន​តម្លៃ​ថោក និង​លក់​មិន​ចេញ តែ​ម្ចាស់​រោង​ចិញ្ចឹមត្រូវ​ចំណាយ​លុយ​​ជា​ប្រចាំ​ដើម្បី​ទិញ​ចំណី​ឲ្យ​មាន់​ស៊ី។ លោក យិន សុភី បញ្ជាក់​ថា មាន់​ជាង​មួយ​ម៉ឺន​ក្បាល​នេះត្រូវ​​ចំណាយ​លុយ​មួយ​ថ្ងៃជាង​មួយ​ពាន់ (១.៣០០)​ ដុល្លារ ​លើ​ថ្លៃ​ស៊ី​ចំណី​មួយ​ថ្ងៃ មួយ​រយ (១០០) ​បាវ។ ​បច្ចុប្បន្នលោក កាត់​បន្ថយ​ចំណី​មាន់មួយ​ថ្ងៃ​ត្រឹម​៨០​បាវ​វិញ ដោយសារគ្មាន​លទ្ធភាព​ឲ្យ​ចំណី​បន្ត៖ «អាយុ​កាល​វា (មាន់៣៥​ថ្ងៃ​ឡើង​ វា​ត្រូវ​ងាប់​ហើយ។ មួយ​ថ្ងៃ​ងាប់​បួន ដប់​ ម្ភៃ ហើយ ហ្នឹង​ហើយ​ចាប់​ផ្ដើម​ងាប់​ហើយ។ មាន​បញ្ហា​អ្វី មាន​តែ​កូវីដ​ហ្នឹង។ ដល់​ពេល​ចាប់​ផ្ដើម​បិទ​ផ្លូវ​អ៊ីចឹង​ទៅ បិទ​កន្លែង​កម្សាន្ត​ អ៊ីចឹង​មាន​តម្រូវ​ការ​ទី​ផ្សារ​ឯណា​ច្រើន​។ ដល់​អ៊ីចឹង លក់​អ្វី​ចេញ។ អ្នក​លក់​នៅ​ទីផ្សារ​ក៏​គាត់​លក់​អត់​ដាច់​ ហើយ​មាន់ វា​ច្រើន ច្រើន​ចង់​លើស​តម្រូវ​ការ។ ឥឡូវ​មាន់​ហ្នឹង នៅ​ចាល់​រាប់​ម៉ឺន​ក្បាល​ពេញ​ហ្នឹង»។​​

ម្ចាស់​រោង​ចិញ្ចឹម​មាន់​រូប​នេះឲ្យ​ដឹង​ទៀត​ថា ការ​ដាក់​កូន​មាន់រហូត​ដល់​បាន​លក់ក្នុង​មួយ​រដូវ​កាល លោកត្រូវ​ចំណាយ​​លុយ​ដើម​​សរុបទាំង​ពូជ ចំណី ទឹក​ អគ្គិសនី​ កម្មករ ថ្នាំ​សម្លាប់​មេរោគជាដើម ប្រមាណ​ពីរ​សែន (២០ម៉ឺន)​ ដុល្លារ។ លោក យិន សុភី ត្អូញត្អែរ​ថា គ្រួសារ​លោកគ្មាន​លទ្ធភាព​សង​បំណុល​ធនាគារ​ទេពេល​នេះ ព្រោះ​ការ​ចិញ្ចឹម​មាន់លើក​នេះខាត​ទាំងស្រុង។​

ចំណែក​ម្ចាស់​រោង​ចិញ្ចឹម​មាន់​ម្នាក់​ទៀត នៅ​ភូមិ​រំដោះ​ថ្មី ឃុំ​ពោធិ៍​ម្រាល​​លោកស្រី ណុប សំឡី ឲ្យ​ដឹង​ថា សាច់​ញាតិ​ជិត​ឆ្ងាយ​របស់​លោកស្រី សុទ្ធ​តែ​ជា​អ្នក​ចិញ្ចឹម​មាន់ តាម​រោងនៅ​ក្នុង​កសិដ្ឋាន​រួម​មួយ​កន្លែងក្នុង​ភូមិ​នេះ​។ ក្នុង​កសិដ្ឋាន​​ទាំង​មូលមាន​រោង​​ចិញ្ចឹម​មាន់ជិត ​១០រោង​ ហើយ​បច្ចុប្បន្នកំពុង​ចាល់​មាន់ដែល​មាន​អាយុ​​លើស​​ហាសិប លើស​ហុកសិប​ថ្ងៃ​ខ្ទង់​៥​សែន (៥០ម៉ឺន)​ ក្បាល ហើយ​ងាប់​ត​គ្នាស្អុយ​ពេញ​​កសិដ្ឋាន។

លោកស្រី ណុប សំឡី មិន​ដឹង​ថា តម្លៃ​មាន់​ធ្លាក់​ចុះ​ដោយសារ​អ្វី​ទេតែ​លោកស្រីចង់​ឲ្យ​អាជ្ញាធរ​ជំនាញ​​ជួយ​អន្តរាគមន៍​ជា​បន្ទាន់ ​ដោយសារ​​ការ​ខាត​បង់​លើក​នេះ គឺ​ធ្ងន់ធ្ងរ​ ដែល​មិន​អាច​ស្មាន​ដល់​។ បច្ចុប្បន្នកសិដ្ឋាន​ចិញ្ចឹម​មាន់​មួយ​នេះ លែង​មាន​លទ្ធភាព​ផ្ដល់​ចំណី​ទៀង​ទាត់​ឲ្យ​មាន់​ស៊ី​ទៀត​ហើយ ដោយ​កាត់​បន្ថយ​ពី​មួយ​រយ​ (១០០) ​បាវ ក្នុង​មួយ​ថ្ងៃមក​ឲ្យ​ស៊ី​ចំណី ​​២ថ្ងៃ ត្រឹម ​២៥​បាវ ​វិញ៖ «អា​ហ្នឹង ថ្នាក់​មួយ​គីឡូ មួយ​ពាន់​ពីរ មួយ​ពាន់​បី គេ​អត់​មក​ចាប់​ទៀត។ ធំ​លើស​ចំនួន​របស់​វា។ គេ​ធ្លាប់​យក​មួយ​គីឡូ ២,៣គីឡូ ២,៥​គីឡូ ឥឡូវ​ឡើង​៣​គីឡូ​ជាង ចូល​៤​គីឡូ វា​ធំ​ពេក។ ចំណី​ចង់​ថា ​ឲ្យ​ស៊ីតែ​មួយ​រស់​ទេ ជួន​កាល​ឲ្យ​ផឹក​តែ​ទឹក​ទេ​ ​អត់​​​សមត្ថភាព​ឲ្យ​ស៊ី។ វា​ងាប់​ហ្នឹង ងាប់​ហើយ ស្អុយ​ពេញ​​ព្រៃ​ ស្អុយ​ពេញ​ភូមិ​អស់​ហើយ​។ មិន​ដឹង​យក​ទៅ​ចោល​ឯណា បើ​ងាប់​ច្រើន​។ ក្មេងៗ ដល់​ថ្នាក់​លែង​ចង់​ទៅ​រោង វា​ខ្ជិល​ដើរ​រើស​មាន់​ ទី​១។ ទី​២​ ថៅកែ​អត់​លុយ​ ​អត់​អ្វី​ កុន​លុយ ដាក់​ភ្លើង ចង់​និយាយ​ថា ខែ​ក្រោយ​សុំ​ផ្អាក​បង់ ហើយ​ចាំ​ដាក់​មាន់​សារ​ក្រោយ​ចាំ​បង់ មិន​ដឹង​យ៉ាង​ម្ដេច​ទេ មួយ​រោង ៣​ពាន់ (ដុល្លារ) ​ជាង​នោះ ខ្ញុំ»។

មាន់​កសិដ្ឋានដែល​ចិញ្ចឹម​យក​សាច់​ភាគច្រើន ពឹង​ផ្អែក​​លើ​ទីផ្សារ​ក្នុង​ស្រុក​ទាំង​ស្រុង​ ច្រើន​ជាង​ការ​នាំ​ចេញ។ អ្នក​ដើរ​​ទិញ​មាន់តាម​កសិដ្ឋាន​នៅ​តំបន់​ស្រុក​​បរសេដ្ឋ​ ខេត្តកំពង់ស្ពឺ យក​ទៅលក់​តាម​ដេប៉ូ និង​ក្រុមហ៊ុនលោកស្រី កែវ រ៉េន ប្រាប់​ឲ្យ​ដឹង​ថា ក្នុង​ស្ថានភាព​វិបត្តិ​ជំងឺ​កូវីដ​១៩​ផ្ទុះ​រាល​ដាល​​ខ្លាំង​នេះ​តម្លៃ​មាន់ធ្លាក់​ថ្លៃ ៣​ ទៅ​ ៤​ដង​នៃ​តម្លៃ​ធម្មតា។

លោកស្រីប្រាប់​ថា មុន​វិបត្តិ​ជំងឺ​កូវីដ​១៩ ក្រុម​ហ៊ុនធ្លាប់​ទិញមួយ​គីឡូ​ជាង​​ប្រាំ​​ពាន់​ (៥.០០០) ​រៀល តែ​ពេល​នេះបាន​ដាក់​តម្លៃ​មួយ​គីឡូ​​ត្រឹមមួយ​ពាន់​ប្រាំ​រយ​(១.៥០០) ​រៀលទៅ​មួយ​ពាន់​ប្រាំ​បី​រយ ​(១.៨០០) ​រៀល។ លោកស្រីកែវ រ៉េ ថាតម្លៃ​នេះលោក​ស្រីអាច​ទិញពី​អ្នក​ម្ចាស់​កសិដ្ឋានក្នុង​មួយ​គីឡូ​មួយ​ពាន់​ពីរ​រយ ​(១.២០០)​រៀល ហើយ​លោកស្រីចំណេញ​​បាន​ក្បាល​កាក់បាន​បី​រយ ​(៣០០) ​រៀលក្នុង​មួយ​គីឡូ​​ក្រាម​៖ «​ម៉ូយ​គាត់​ថា ខាង​ក្រុមហ៊ុន ​CPគាត់​ដាក់​ប៉ុណ្ណឹង​ ហើយ​គាត់​ឲ្យ​តម្លៃ​ខ្ញុំ​ប៉ុណ្ណឹង​ដែរ​អ៊ីចឹង​ទៅ​ណា។ គាត់​ថា ដូច​ថ្ងៃ​នេះ ១៨​ (.៨០០)​ទេ ខាង​ CPខេត្ត​កំពង់ស្ពឺ​មិន​ដឹង​ភ្នំពេញ​មិន​ដឹង តែ​ខាង​ខេត្ត​កំពង់សោម​គាត់​ដាក់​ម៉ូយ​ត្រែងត្រយឹងថ្ងៃ​នេះតែ​១៨​ទេ ហើយ​អ៊ីចឹងខ្ញុំ​ត​ឲ្យ​ម៉ូយ​ខ្ញុំ​១៥​អ៊ីចឹង​ទៅ។ យើង​ចំណេញ​ការប្រាក់​៣០០ (រៀល)»។

ជុំវិញ​ការ​ធ្លាក់​ថ្លៃ​មាន់​កសិដ្ឋានខុស​ប្រក្រតី​នេះ អាស៊ី​សេរី​មិន​អាច​សុំ​ការ​បញ្ជាក់​ពីប្រធាន​ការិយាល័យ​កសិកម្ម​ ស្រុក​បរសេដ្ឋ លោក ឌី សែន​កុសល និង​អ្នក​នាំ​ពាក្យ​ក្រសួង​កសិកម្ម រុក្ខា​ប្រមាញ់ និង​នេសាទ លោក ស្រី វុឌ្ឍី បាន​ទេ នៅ​ថ្ងៃ​​ទី១៣ ខែមីនា​។ 

តែ​យ៉ាង​ណាលោក ឌី សែន​កុសល បានប្រាប់សារព័ត៌មានក្នុងស្រុកថា តាម​កសិដ្ឋាន​ទាំងអស់​នៅ​សល់​មាន់​ប្រមាណ​បី​សែន (៣០​ម៉ឺន) ​ក្បាល។ លោកមិន​បាន​​ផ្ដល់​ដំណោះស្រាយ​បែប​ណា​ទេ ដោយ​គ្រាន់​តែ​​ជំរុញ​ឲ្យ​​ម្ចាស់​កសិដ្ឋាន និង​ម្ចាស់​ដេប៉ូ​ទទួល​ទិញ​សាច់​មាន់ ចរចា​គ្នា​ រក​តម្លៃ​សមរម្យដើម្បី​ចំណេញ​ទាំង​សង​ខាង​ហើយ​​ទទួល​​ទិញ​មាន់ឲ្យ​លឿន​ដើម្បី​កុំ​ឲ្យ​ម្ចាស់​កសិដ្ឋាន​ខាត​ថ្លៃ​ចំណី​មាន់កាន់​តែ​ច្រើន​។

សង្គម​ស៊ីវិលបារម្ភ​ថា ការ​ធ្លាក់​ចុះ​ថ្លៃ​មាន់​នេះនឹង​ធ្វើ​ឲ្យ​អ្នក​ចិញ្ចឹម​មាន់​ជួប​វិបត្តិ​សេដ្ឋកិច្ច​។​ តំណាង​បណ្ដាញ​ពហុ​វិស័យ (CGCN) ខេត្ត​កំពង់ស្ពឺ លោក ជា សុភ័ក្ក សង្កេត​​ឃើញ​ថា​ តម្លៃ​មាន់​មួយ​គីឡូ ​ត្រឹម​​ជាង​មួយ​ពាន់​ (១.២០០) ​រៀល ជា​តម្លៃ​ថោក​បំផុតមិន​អាច​ធ្វើ​ឲ្យ​ម្ចាស់​រោង ឬ​ម្ចាស់​កសិដ្ឋាន​លក់​​បាន​រួច​​ថ្លៃ​ដើម​​វិញ​ទេ។

អ្នក​ឃ្លាំមើល​រូប​នេះបារម្ភ​ថា ​កសិករ​​កាន់​តែ​​ជំពាក់​​បំណុល​ធនាគារ​​​ធ្ងន់ធ្ងរ​​ថែម​​ទៀត​ ព្រោះ​​ការ​លក់​មាន់មិន​គ្រប់​ថ្លៃ​ការ​ប្រាក់​បង់​​ធនាគារ។ លោក ជា សុភ័ក្ក យល់​ថា ដើម្បី​ដោះស្រាយ​បញ្ហា​តម្លៃ​មាន់​ពេលនេះ រដ្ឋគួរ​តែ​ជួយ​​ទទួល​ទិញ​យក​មាន់នៅ​តាម​កសិដ្ឋានក្នុង​តម្លៃ​សមរម្យ ដើម្បី​ជួយ​សម្រួល​បន្ទុក​​អ្នក​ចិញ្ចឹម​មាន់៖ «រដ្ឋ​ជា​អ្នក​ដើរ​តួ​ប្រមូល​ទិញ ត្រូវ​តែ​​ផ្គត់​ផ្គង់​ទី​ផ្សារ ហើយ​បើ​ឲ្យ​ឯកជន​គាត់​ទទួល​ទិញ ទិញ​ (ថ្លៃ)​ ម្ដេច​បាន គាត់​យក​ហេតុ​ផល​ថា កូវីដ គាត់​យក​ហេតុផល​ថា មិន​មាន​អ្នក​ទិញ​អ្វី​អ៊ីចឹង​ទៅ។ អ៊ីចឹង ការ​លក់​របស់​កសិករ​ ត្រូវ​តែ​ជួប​ការ​លំបាក​អ៊ីចឹង​ហ្មង»។ 

កសិករ​ចិញ្ចឹម​មាន់​ អះអាង​ថា ពួកគាត់​ទាល់​តម្រិះ​ហើយ មិន​ដឹង​ថា ដោះស្រាយ​បញ្ហា​នេះ​យ៉ាង​ណា​ទេ។ ពួកគាត់​ ស្នើសុំ​ ដោយ​ទទូច​ ឲ្យ​​​អាជ្ញាធរ​​ជំនាញ ចុះ​អន្តរាគឡមន៍​ជួយ​ពួកគាត់​ ជា​បន្ទាន់ និង​ឲ្យ​មាន​ប្រសិទ្ធិភាព​ ដើម្បី​បញ្ចៀស​ផល​លំបាក​ធ្ងន់ធ្ងរ​​នេះ ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល