កសិករ​ដាំ​ស្វាយចន្ទី​តាម​បណ្ដា​ខេត្ត​មួយ​ចំនួន​ត្អូញត្អែរ​តម្លៃ​គ្រាប់​ស្វាយ​ចន្ទី​ចុះ​ថោក

ដោយ សេក បណ្ឌិត
2024.03.09
កសិករ​ដាំ​ស្វាយចន្ទី​តាម​បណ្ដា​ខេត្ត​មួយ​ចំនួន​ត្អូញត្អែរ​តម្លៃ​គ្រាប់​ស្វាយ​ចន្ទី​ចុះ​ថោក ស្វាយចន្ទី។
រូប៖ ក្រសួង​កសិកម្ម

កសិករ​ដាំ​ស្វាយចន្ទី នៅ​តាម​បណ្ដា​ខេត្ត​មួយ​ចំនួន កំពុង​ប្រឈម​នឹង​ការ​ខាតបង់ ក្រោយ​តម្លៃ​គ្រាប់​ស្វាយ​ចន្ទី បន្ត​ធ្លាក់​ចុះ ពីមួយ​ថ្ងៃ​ទៅ​មួយ​ថ្ងៃ និង​មិន​សូវ​មាន​ឈ្មួញ​ទិញ​ដូច​មុន។ ពួកគាត់​ថា បញ្ហា​នេះ​បណ្ដាល​មក​ពី​ទីផ្សារ​កម្ពុជា​នាំ​ចេញ​គ្រាប់​ស្វាយ​ចន្ទី​ទៅ​ប្រទេស​វៀតណាម​ច្រើន​ពេក បណ្ដាល​ឱ្យ​ឈ្មួញ​ទម្លាក់​តម្លៃ និង​លើស​តម្រូវការ​ទីផ្សារ។

កសិករ​ដាំ​ស្វាយចន្ទី មួយ​ចំនួន​ត្អូញត្អែរ​ថា ការ​ប្រមូល​ផល​គ្រាប់ស្វាយចន្ទី​ឆ្នាំ​នេះ ហាក់​ទទួល​បាន​ទិន្នផល​តិច ហើយ​លក់​បាន​តម្លៃថោក​ជាង​ឆ្នាំមុន បើ​ទោះ​បី​ជា​លោក ហ៊ុន សែន ធ្លាប់​ប្រកាស​កាលពី​ឆ្នាំមុន​ថា លោក​នឹង​ប្រែក្លាយ​កម្ពុជា​ទៅជា​ប្រទេស​អធិរាជ​ស្វាយចន្ទី ពោល​គឺជា​ប្រទេស​ដែល​នាំចេញ​គ្រាប់ស្វាយចន្ទី​ច្រើន​ជាង​គេ​នៅ​លើ​ពិភពលោក​ក្តី។

កសិករ​ដាំ​ស្វាយចន្ទី នៅ​ស្រុក​កែវសីមា ខេត្ត​មណ្ឌលគិរី លោកស្រី អាន សុខណា ប្រាប់​វិទ្យុ​អាស៊ីសេរី នៅ​ថ្ងៃ​ទី៨ ខែ​មីនា ថា ទន្ទឹមនឹង​តម្លៃ​ធ្លាក់ចុះ ឈ្មួញ​ក៏​លែង​ទទួល​ទិញ​ធ្វើ​ឱ្យ​គ្រាប់ស្វាយចន្ទី​សល់​ពេញ​ចម្ការ ដោយ​ពួកគេ​ប្រាប់​ថា នៅ​វៀតណាម​កំពុង​ចាល់​ខ្លាំង គ្មាន​អ្នកទទួល​ទិញ​ដូចគ្នា​។ អ្នកស្រី​បន្ត​ថា តម្លៃ​ធ្លាក់ចុះ​យ៉ាង​គំហុក​បែបនេះ នឹង​ធ្វើ​ឱ្យ​លោកស្រី​ខាតបង់ ព្រោះថ្នាំ និង​ជី​កសិកម្ម​មាន​តម្លៃ​ថ្លៃ និង​នៅ​តម្លៃ​ពលកម្ម​កម្មករ​ផ្សេង​ទៀត។

លោកស្រី អាន សុខណា៖ «ទើបនឹង​ឆ្នាំ​ហ្នឹង បើ​ឆ្នាំទៅ​តម្លៃ​គ្រាន់បើ ដល់ពេល​ឆ្នាំ​ហ្នឹង​តម្លៃថោក​ធ្លាក់​រាល់ថ្ងៃ។ ហើយ​កាលពី​យប់មិញ​ហ្នឹង​ម៉ាក់​គាត់​តេ​ប្រាប់​ខ្ញុំ​ដឹង​ថា ម៉ូយ​ដែល​គាត់​ធ្លាប់​លក់​ឱ្យ​ហ្នឹង​គេ​អត់​យក​ទេ ពេល​គាត់​យក​ស្វាយ​ទៅ​លក់​នៅ​វៀតណាមៗ​គាត់​អត់​ចេញចូល​ទៀត​ទេ ស្ទះ​ច្រើន​ពេក គាត់​និយាយ​ថា អ៊ីចឹង​។ តម្លៃ​ធ្លាក់​ហើយ ម៉ូយ​ធំៗ​ដែល​ធ្លាប់​ទិញ​តម្លៃ​ដូច​ថា​ខុសគេ ៥០ ទៅ​១០០​រៀល ហ្នឹង​គាត់​មក​ទិញ​ទៀត គាត់​ថា គាត់​ចាល់​ច្រើនពេក ហើយ​ខាង​វៀតណាម​ជំពាក់​លុយ​ទៀត»

កសិករ​ដាំ​ស្វាយចន្ទី​នៅ​ខេត្ត​កំពង់ចាម លោក ឃួន ថា ត្អូញត្អែរ​ថា តម្លៃ​គ្រាប់​ស្វាយ​ចន្ទី​នៅ​ខេត្ត​កំពង់ចាម បច្ចុប្បន្ន​បាន​ធ្លាក់ចុះ​នៅ​ត្រឹម ៤​ពាន់ ៥​រយ​រៀល ក្នុង​មួយ​គីឡូក្រាម ហើយ​តម្លៃ​នេះ នៅ​បន្ត​ធ្លាក់ចុះ​ថែម​ទៀត។ លោក​បន្ត​ថា ទន្ទឹមគ្នា​នឹង​តម្លៃ​ចុះ​ថោក​ហើយ​នោះ ចម្ការ​ស្វាយ​ចន្ទី​នៅ​តាម​តំបន់​មួយ​ចំនួន ក្នុង​ខេត្ត​កំពង់ចាម ក៏​ទទួលរង​អាកាសធាតុ​ក្ដៅ​ខ្លាំង​ផង​ដែរ ដែល​ធ្វើ​ឱ្យ​ស្វាយចន្ទី​មិន​សូវ​កាន់​ផ្លែ និង​ទទួល​បាន​ផល​ច្រើន​ដូច​ឆ្នាំ​មុន​ឡើយ។

លោក ឃួន ថា៖ «បើ​ទៅ​មុខ​ទៀត នៅតែ​យ៉ាប់​ជាង​ហ្នឹង​ទៀត យើង​អត់​មាន​អ្វី​សង​គេ​ទេ មាន​តែ ឈប់​ធ្វើ​ចម្ការ ហើយ​លក់​ដី​យក​លុយ​សង​គេ​។ ធ្វើ​ម៉េច​កសិករ​អត់​មាន​លុយ​បម្រុង ហើយ​ទីផ្សារ​តម្លៃ​ថោក យើង​ធ្វើ​ខាតៗ អត់​មាន​លុយ យើង​ជំពាក់​គេ​ដោះ​អត់​ចេញ អ៊ីចឹង​មានតែ​លក់​ដីចម្ការ​ខ្លះ​ទៅ ដើម្បី​យក​លុយ​សង​គេ»

វិទ្យុ​អាស៊ីសេរី មិន​អាច​ទាក់ទង​អ្នកនាំពាក្យ​ក្រសួង​កសិកម្ម កញ្ញា អ៊ឹម រចនា និង​លោក ឃឹម ហ្វីណង់ ដើម្បី​សុំ​ការ​បកស្រាយ​ជុំវិញ​បញ្ហា​នេះ​បាន​ទេ នៅ​ថ្ងៃ​ទី៨ ខែ​មីនា ដោយ​ទូរស័ព្ទ​ហៅ​ចូល តែ​ត្រូវ​ចុច​បិទ។

កន្លងមក លោកនាយក​រដ្ឋមន្ត្រី ហ៊ុន ម៉ាណែត បាន​ណែនាំ​ដល់​គណៈកម្មាធិការ​គោល​នយោបាយ សេដ្ឋកិច្ច និង​ហិរញ្ញវត្ថុ ដាក់​ចេញ​នូវ​វិធានការ ដើម្បី​ជំរុញ​ការកែច្នៃ និង​ការនាំចេញ​ផលិតផល​ស្វាយចន្ទី ក្នុង​នោះ រួមមាន ការ​ពង្រឹង និង​ការពង្រីក​ការនាំចេញ​គ្រាប់ស្វាយចន្ទី ការ​បន្ត​ពង្រឹង​ការ​ធ្វើ​ម៉ាក និង​ទីផ្សារ​ផលិតផល​គ្រាប់ស្វាយចន្ទី​កម្ពុជា និង​ការពិនិត្យ​លទ្ធភាព បង្កើន​ទុន​បង្វិល​សម្រាប់​ប្រមូល​ទិញ​គ្រាប់​ស្វាយ​ចន្ទី ដើម្បី​កែច្នៃ។

ជុំវិញ​រឿង​នេះ ប្រធាន​សមាគម​ស្វាយចន្ទី​កម្ពុជា លោក អួន ស៊ីឡុត ប្រាប់​វិទ្យុ​អាស៊ីសេរី តាម​បណ្ដាញ​ទំនាក់ទំនង​តេឡេក្រាម (Telegram) ថា តម្លៃ​គ្រាប់ស្វាយចន្ទី​ចន្លោះ​ពី ៤​ពាន់ ទៅ​៥​ពាន់​រៀល ក្នុង​មួយ​គីឡូក្រាម គឺជា​តម្លៃ​អាច​ទទួល​យក​បាន ព្រោះ​ជា​តម្លៃ​អន្តរជាតិ ប៉ុន្តែ​មូលហេតុ ដែល​កសិករ​មិន​អាច​ទទួល​យក​បាន គឺ​ដោយសារ​ទិន្នផល​ស្វាយចន្ទី​ថយ​ផល​ខ្លាំង បណ្ដាល​មក​ពី​បាតុភូត អែលនីណូ (El Nino) ធ្វើ​ឱ្យ​អាកាសធាតុ​ក្ដៅ​ហួតហែង។ លោក អួន ស៊ីឡុត អំពាវនាវ​ដល់​កសិករ ដែល​កំពុង​ប្រមូល​គ្រាប់​ស្វាយ​ចន្ទី ឱ្យ​ហាល​គ្រាប់​ទុក​សិន រង់ចាំ​លក់​ពេល​មាន​តម្លៃ​ល្អ នៅ​ចន្លោះ​ខែ​កក្កដា ឬ​ខែ​កញ្ញា ខាងមុខ។

ទោះជា​បែបនេះ​ក្ដី កសិករ​លើកឡើង​ថា ពួកគាត់​មិនអាច​ស្តុក​គ្រាប់ស្វាយចន្ទី​ទុក​រាប់​ខែ​បាន​នោះ​ទេ ដោយសារ​ពួកគាត់​គ្មាន​លុយ​បម្រុង​ទុក ហើយ​ត្រូវ​លក់​គ្រាប់ស្វាយចន្ទី​ភ្លាមៗ ដើម្បី​ប្រញាប់​យក​លុយ​ទៅ​ទូទាត់​ថ្លៃ​កម្លាំង​ពលកម្ម ថ្លៃ​ជី និង​សង​ធនាគារ​ជាដើម។

ទិន្នន័យ​នាំចេញ​គ្រាប់ស្វាយចន្ទី របស់​សមាគម​ស្វាយចន្ទី​កម្ពុជា បញ្ជាក់​ថា ក្នុង​ខែមករា ២០២៤ កម្ពុជា​បាន​នាំ​គ្រាប់​ចន្ទី​ឆៅ​ទៅ​វៀតណាម​កើនឡើង​៥០​ភាគរយ បើ​ធៀប​នឹង​រយៈពេល​ដូចគ្នា​ក្នុង​ឆ្នាំ​២០២៣​។ ក៏ប៉ុន្តែ​តម្លៃ​គ្រាប់ស្វាយចន្ទី បច្ចុប្បន្ន​នេះ បាន​ធ្លាក់ចុះ ពី​១០​ភាគរយ ទៅ​១៥​ភាគរយ ខណៈ​ទិន្នផល​វិញ សមាគម​ស្វាយចន្ទី​កម្ពុជា បាន​ព្យាករណ៍​ថា បាន​ថយ​ចុះ​ពី ១០​ភាគរយ ទៅ ៣០​ភាគរយ បើ​ធៀប​នឹង​ឆ្នាំ​២០២៣។

កសិករ​ស្នើ​ឱ្យ​រដ្ឋាភិបាល ជួយ​ដោះស្រាយ​បញ្ហា​គ្រាប់ស្វាយចន្ទី កុំឱ្យ​ធ្លាក់​ថ្លៃ​បន្ត​ទៀត ព្រោះ​ឆ្នាំនេះ ពួកគាត់​បាន​ខាតបង់​ធ្ងន់ធ្ងរ ដោយសារ​បង្ហា​អាកាសធាតុ​បំផ្លាញ​ទិន្នផល​ផង និង​បញ្ហា​តម្លៃ​ទីផ្សារ​ផង ដែល​ធ្វើ​ឱ្យ​ពួកគាត់​ប្រឈម​នឹង​ការ​ក្ស័យធន និង​បោះបង់​របរ​ដាំ​ស្វាយចន្ទី​ទាំងស្រុង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។