FATF ដក​កម្ពុជា​ចេញពី​បញ្ជី​ប្រផេះ​នៃ​ក្រុម​ប្រទេស​លាង​លុយ​​កខ្វក់

ដោយ ទីន ហ្សាការីយ៉ា
2023.02.25
FATF ដក​កម្ពុជា​ចេញពី​បញ្ជី​ប្រផេះ​នៃ​ក្រុម​ប្រទេស​លាង​លុយ​​កខ្វក់ ​រដ្ឋមន្ត្រី​ក្រសួង​មហាផ្ទៃ លោក ស ខេង ថ្លែងសន្ទរកថា កាលពីថ្ងៃទី៨ ខែកុម្ភៈ ២០២៣។
រូប៖ ហ្វេសប៊ុក​លោក ស ខេង

អង្គការ​ឃ្លាំមើល​អំពើ​លាងលុយកខ្វក់​លើ​ពិភពលោក ឈ្មោះថា​ក្រុមការងារ​សកម្មភាព​ហិរញ្ញវត្ថុ (The Financial Action Task Force)​ ដែល​មាន​មូលដ្ឋាន​នៅ​ទីក្រុង​ប៉ារីស (Paris) ប្រទេស​បារាំង (France) បាន​ដក​កម្ពុជា​ចេញពី​បញ្ជី​ប្រផេះ នៃ​ប្រទេស​លាងលុយកខ្វក់​ហើយ កាលពី​ថ្ងៃទី​២៤​កុម្ភៈ។

ក្រុមការងារ​សកម្មភាព​ហិរញ្ញវត្ថុ នេះ បាន​ចេញ​សេចក្ដីថ្លែងការណ៍​បញ្ជាក់​ថា ក្រៅពី​ប្រទេស​កម្ពុជា ដែល​អង្គការ​នេះ​ដក​ចេញពី​បញ្ជី​ប្រផេះ នៃ​ក្រុម​ប្រទេស​លាង​កខ្វក់​នោះ គឺ​មាន​ប្រទេស​ម៉ារ៉ុក (Morocco) មួយទៀត​។ ដោយឡែក​ប្រទេស​មួយចំនួន​ទៀត ស្ថិត​នៅ​ក្នុង​បញ្ជី​ប្រផេះ​នេះ​នៅឡើយ រួមមាន កូរ៉េខាងជើង (North Korea) មីយ៉ាន់ម៉ា (Myanmar) និង អឺរ៉ុង (Iran) ជាដើម។

ពាក់ព័ន្ធ​នឹង​រឿង​នេះ​រដ្ឋមន្ត្រី​ក្រសួង​មហាផ្ទៃ លោក ស ខេង កាលពី​ថ្ងៃទី​២២ កុម្ភៈ បាន​ដាស់តឿន​ទៅ​មន្ត្រី​របស់​ខ្លួន កុំ​ឲ្យ​មាន​មោទនភាព​ជ្រុល​រហូតដល់​ភ្លេចខ្លួន ក្នុង​ការ​ទប់ស្កាត់​អំពើ​លាងលុយកខ្វក់​ឲ្យ​សោះ ក្រោយ​ពី​កម្ពុជា​បាន​រួច​ផុត​ពី​បញ្ជី​ប្រផេះ​នេះ។ លោក​បន្ថែម​ថា មន្ត្រី​ពាក់ព័ន្ធ​គ្រប់​ថ្នាក់ ត្រូវ​ខិតខំ និង​សាមគ្គី​គ្នា ដើម្បី​ការ​ការពារ​ឲ្យ​បាន កុំ​ឲ្យ​កម្ពុជា​វិល​ទៅ​ចូលក្នុង​បញ្ជី​ប្រផេះ​ឡើងវិញ​។ លោក ស ខេង អះអាង​ថា នឹង​ដាក់​ចេញ​ទិសដៅ​ការងារ​គន្លឹះៗ ជា​បន្ត​ទៀត ដើម្បី​ការពារ​ប្រទេស​កម្ពុជា​កុំ​ឲ្យ​ធ្លាក់​ចូល​ទៅ​ក្នុង​បញ្ជី​ប្រផេះ នៃ​ក្រុម​ប្រទេស​លាង​កខ្វក់​ជា​រៀង​រហូត។

ទោះបីជា​បែបនេះ​ក្ដី អ្នកវិភាគ​នយោបាយ​លោក គឹម សុខ អះអាង​ថា ការ​ដក​ប្រទេស​កម្ពុជា​ដកចេញ​ពី​បញ្ជី​ប្រផេះ ដោយសារតែ​របប​ឯក​បក្ស​បាន​បង្កើត​ច្បាប់ ដើម្បី​ទប់ស្កាត់​អំពើ​លាងលុយកខ្វក់ មិនមែន​ផ្អែកលើ​សកម្មភាព​ប្រឹងប្រែង​របស់​អាជ្ញាធរ​ទប់​ស្កាត់​អំពើ​លាងលុយកខ្វក់​ឡើយ។

លោក គឹម សុខ​៖ «គឺ​ដោយសារតែ​គេ​វិនិច្ឆ័យ​លើ​កម្ពុជា មាន​ឯកសារ​ច្បាប់​ច្រើនជាង ការវាយតម្លៃ​ទៅ​អនុវត្ត​ផ្ទាល់​។ ឧទាហរណ៍​កាលពី​ខែមីនា​ឆ្នាំ​២០២២ កម្ពុជា បាន​ធ្វើ​វិសោធនកម្ម​ច្បាប់ ទប់ស្កាត់​នៃ​អំពើ​លាងលុយកខ្វក់​ជាដើម។ មិនមែន​ផ្អែកលើ​លទ្ធផល​នៃ​ការទប់ស្កាត់​ការ​លាង​លុយកខ្វក់ អំពើ​ជួញដូរ​មនុស្ស ជួញដូរ​គ្រឿងញៀន និង​ការទប់ស្កាត់​អំពើពុករលួយ​នោះ​ទេ»

កម្ពុជា​ធ្លាប់​បាន​រួចផុត​ពី​បញ្ជី​ប្រផេះ​នៃ​ប្រទេស​លាងលុយកខ្វក់​នេះ​ម្ដង​រួចមក​ហើយ ប៉ុន្តែ ចាប់ពី​ឆ្នាំ​២០១៩​មក អង្គការ​ឃ្លាំមើល​អំពើ​លាងលុយកខ្វក់​នៅ​លើ​ពិភពលោក​បាន​ដាក់​កម្ពុជា​ចូលក្នុង​បញ្ជី​ប្រផេះ​ជាថ្មី​ម្ដងទៀត មកដល់​ឆ្នាំ​២០២៣​នេះ​។ ប្រទេស​កម្ពុជា​ក្រោម​ការដឹកនាំ​របស់​លោក ហ៊ុន សែន បាន​ជាប់​ឈ្មោះ​ជា «​ឋានសួគ៌​»​នៃ​កន្លែង​លាងលុយកខ្វក់​នៅ​លើ​ពិភពលោក ហើយ​ដែល​ក្រុម​អ្នកមាន​លុយ​មានអំណាច​ខ្មែរ​ឃុបឃិត​គ្នា​ប្រមូល​លុយ​ដែល​បាន​មក​ពី​ការប្រព្រឹត្តិ​អំពើពុករលួយ និង​អំពើ​ឧក្រិដ្ឋ​នានា​បង្វិល​យក​ទៅ​លាក់​ទុក​នៅ​ក្រៅ​ប្រទេស។ វិស័យ​ដែល​រង​ហានិភ័យ​ខ្ពស់​ខាង​អំពើ​លាងលុយកខ្វក់​នៅ​កម្ពុជា រួមមាន វិស័យ​ធនាគារ ហិរញ្ញវត្ថុ វិស័យ​សំណង់ អចលនទ្រព្យ និង​វិស័យ​កាស៊ីណូ​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។