ក្រុមអតីតបាតុករអាវលឿងថៃ ទាមទារឱ្យរដ្ឋាភិបាលថៃលុបចោលកិច្ចព្រមព្រៀងរកស៊ីធនធានប្រេងរួមគ្នាជាមួយកម្ពុជា។
សារព័ត៌មានបាងកកប៉ុស្តិ៍ (Bangkok Post) ចុះផ្សាយថា ក្រុមដែលដឹកនាំដោយអតីតមេដឹកនាំក្រុមបាតុករថៃ លោក សុន្ធិ លឹមថងគុល ( Sondhi Limthongkul) បានជួបជុំគ្នានៅមជ្ឈមណ្ឌលទទួលបណ្ដឹងតវ៉ារបស់រដ្ឋាភិបាលថៃ កាលពីថ្ងៃទី៨ ខែធ្នូ ដោយទាមទារឱ្យរដ្ឋាភិបាលលុបចោលអនុស្សរណៈនៃការយោគយល់គ្នា (MoU) ឆ្នាំ២០០១ ជាមួយកម្ពុជា បើពុំនោះសោតរដ្ឋាភិបាលនឹងប្រឈមនឹងបាតុកម្មតវ៉ារឿងនេះនៅពេលខាងមុខ។ លោក សុន្ធិ លឹមថងគុល កាលពីឆ្នាំ២០០៥ ធ្លាប់ដឹកនាំបាតុកម្មរបស់ក្រុមអតីតបាតុករអាវលឿងថៃ ដើម្បីទម្លាក់លោក ថាក់ស៊ីន ចេញពីអំណាច។
ជាមួយគ្នានេះក្រុមនេះក៏ទាមទារឱ្យរដ្ឋាភិបាលលើករឿងនេះទៅឱ្យតុលាការធម្មនុញ្ញថៃកាត់សេចក្ដីរឿងនេះដោយសំអាងថា ការចុះកិច្ចព្រមព្រៀងជាមួយកម្ពុជានេះរដ្ឋាភិបាលដឹកនាំដោយ លោក ថាក់ស៊ីន ស៊ីណាវ៉ាត់ (Thaksin Shinawatra) ពុំបានឆ្លងកាត់រដ្ឋសភាទេ និងថាជាកិច្ចព្រមព្រៀងដែលធ្វើឱ្យថៃបាត់បង់ដែនទឹកឱ្យទៅកម្ពុជា។
ពួកគេទុកពេល ១៥ ថ្ងៃឱ្យរដ្ឋាភិបាលដឹកនាំដោយកូនស្រី លោក ថាក់ស៊ីន គឺអ្នកស្រី ផែថងថាន ស៊ីណាវ៉ាត់ (Paethongthan Shinawatra) ដើម្បីដោះស្រាយបញ្ហានេះ។
ទាក់ទងនឹងរឿងនេះក្រុមអ្នកនយោបាយប្រឆាំងថៃធ្លាប់បានព្រមានហើយថា នឹងធ្វើបាតុកម្មតវ៉ាតាមដងផ្លូវនៅដើមឆ្នាំ២០២៥ខាងមុខនេះ ដើម្បីទាមទារឱ្យរដ្ឋាភិបាលលុបចោលកិច្ចព្រមព្រៀងរកស៊ីប្រេងជាមួយកម្ពុជានេះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។