មន្ត្រី​ជាន់ខ្ពស់​​ក្រសួង​​ផែនការ​ទទួល​ស្គាល់​​ថា ពលរដ្ឋ​ប្រមាណ​​ជាង​​កន្លះ​លាននាក់​​បាន​​ធ្លាក់​ខ្លួន​​ក្លាយ​​ជា​​អ្នក​ក្រ​ថ្មី ដោយសារ​​តែ​​វិបត្តិ​ជំងឺ​​រាតត្បាត​​សាកល​​កូវីដ​

ដោយ មាន ឫទ្ធិ
2021-05-09
Share
មន្ត្រី​ជាន់ខ្ពស់​​ក្រសួង​​ផែនការ​ទទួល​ស្គាល់​​ថា ពលរដ្ឋ​ប្រមាណ​​ជាង​​កន្លះ​លាននាក់​​បាន​​ធ្លាក់​ខ្លួន​​ក្លាយ​​ជា​​អ្នក​ក្រ​ថ្មី ដោយសារ​​តែ​​វិបត្តិ​ជំងឺ​​រាតត្បាត​​សាកល​​កូវីដ​ ព្រះបរមរាជវាំងនៃរាជធានីភ្នំពេញ។ (រូប៖ ADB)
រូប៖ គេ​ផ្ដល់​ឱ្យ

ស្របពេល​ដែល​វិបត្តិ​ជំងឺរាតត្បាត​សាកល​កូវីដ១៩ កំពុង​តែ​អូសបន្លាយ ហើយ​រដ្ឋាភិបាល​អនុវត្ត​វិធានការ​បិទខ្ទប់​តំបន់​ទៅតាម​ករណី​ជាក់ស្តែង វិបត្តិ​នេះ​កំពុង​តែ​អូសទាញ​ពលរដ្ឋ​ខ្មែរ​ជាច្រើន​នាក់​ឲ្យ​ធ្លាក់ខ្លួន​ក្រ​កាន់តែ​ខ្លាំង​បន្ថែមទៀត។ គ្រាន់តែ​ក្នុង​អំឡុង​ពេល​បិទខ្ទប់​រយៈពេល​ជិត​ ១ ខែ​កន្លងទៅ​នេះ ពលរដ្ឋ​មិនតិច​នាក់ទេ បាន​នាំគ្នា​ស្រែក​ដង្ហោយ​រក​ជំនួយ​ពី​រដ្ឋាភិបាល និង​សប្បុរសជន។ អ្នកខ្លះ​បាន​ដាច់​ចិត្ត​មិន​ខ្លាច​ឆ្លង​ជំងឺកូវីដ ជម្នះ​បម្រាម​រដ្ឋាភិបាល នាំគ្នា​ចេញ​តវ៉ា​ព្រោះ​​ដាច់ស្បៀង​បណ្តើរៗ ព្រោះ​ពួកគេ​រស់នៅ​មួយ​ថ្ងៃ​សម្រាប់​តែ​មួយ​ថ្ងៃ ហើយ​អស់​អង្ករ​ច្រកឆ្នាំង។

ធនាគារ​ពិភពលោក បាន​រកឃើញ​ថា ក្នុង​រយៈពេល​ ៦ ខែ​ចុងក្រោយ​ គិតចាប់​ពី​ខែ​មិថុនា ឆ្នាំ២០២០ រហូតដល់​ខែ​មករា ឆ្នាំ២០២១​ ពោលគឺ​នៅ​មុន​ពេល​មាន​វិបត្តិ​ផ្ទុះ​ខ្លាំង​នៃ​ជំងឺកូវីដ១៩ ចូលក្នុង​សហគមន៍​ជាលើក​ទីបី ពលរដ្ឋ​យ៉ាងហោចណាស់ ១សែន ៥ម៉ឺន​គ្រួសារ (១៥០.០០០ គ្រួសារ) ឬ​ស្មើ​នឹង​ជាង​កន្លះលាន​នាក់​ បាន​ធ្លាក់ខ្លួន​ក្លាយ​ជា​អ្នកក្រ ដោយសារ​តែ​វិបត្តិ​ជំងឺកូវីដ១៩​នេះ។

people_in_Covid19.jpg
ប្រជាពលរដ្ឋនៃសេដ្ឋកិច្ចក្រៅប្រព័ន្ធបានរងផលប៉ះពាល់ខ្លាំងផ្នែកសេដ្ឋកិច្ចនៅក្នុងអំឡុងពេលវិបត្តិកូវីដ១៩នេះ។ (រូប៖ ពលរដ្ឋ)

អគ្គនាយក​ផែនការ​នៃ​ក្រសួងផែនការលោក ថេង បញ្ញាធន ទទួលស្គាល់​តួលេខ​ពលរដ្ឋ​ធ្លាក់​ខ្លួន​ក្លាយ​ជា​អ្នកក្រ​ថ្មីនេះ ខណៈ​ចំនួន​ពលរដ្ឋ​ក្រីក្រ​ស្រាប់​នៅ​មុន​វិបត្តិ​ជំងឺកូវីដ១៩ មាន​ប្រមាណ​ជាង ៥០ ម៉ឺន​គ្រួសារ ស្មើនឹង​ប្រមាណ​ជាង ២ លាន​នាក់​រួចទៅហើយ៖ «យើង​បាន​កំណត់​គ្រួសារ​ក្រីក្រ ចាប់តាំង​ពី​ខែមិថុនា ឆ្នាំ២០២០ មកទល់​នឹង​ខែមេសា ឆ្នាំ២០២១ នេះ គឺ​កន្លែងនេះ យើង​ត្រូវ​បែងចែក​ជា​ពីរ។ ទីមួយ គឺ​ចំនួន​គ្រួសារ​ក្រីក្រ​ដែល​ក្រ​មុន​កាលពេល​កូវីដ ហើយ​នឹង​គ្រួសារ​ក្រីក្រ​ដែល​យើង​កំណត់​ក្រោយពេល​ដែល​រងនូវ​ផលប៉ះពាល់​ដោយសារ​ថា​កូវីដ១៩​នេះ។ សូម​ជម្រាប​ជូន​ថា សម្រាប់​គ្រួសារ​ក្រីក្រ​ដែល​មុន​កូវីដ គឺ​មាន​ជាង​ ៥០ ម៉ឺន​គ្រួសារ​ហើយ បើ​គិត​ពី​ចំនួន​ប្រជាជន​គឺ​ប្រហែល​ជា​ខ្ទង់​រង្វង់​ ២ លាន​នាក់​រួច​ទៅហើយ។ ហើយ​ដល់ពេល​រង​ផលប៉ះពាល់​ដោយសារ​តែ​ការរីករាលដាល​នៃ​ជំងឺកូវីដ​នេះ គឺ​គ្រួសារ​នេះ​កើនទៅដល់​ប្រហែល​ជា​ខ្ទង់​ ៧១ ម៉ឺន ស្មើនឹង​ចំនួន​ប្រជាជន​រង្វង់ ២លាន៨សែន​នាក់។ អញ្ចឹង បើ​យើង​យក​តួលេខ​នេះ មក​ធ្វើ​ការគណនា យើង​ដក​​ពី​ចំនួន​គ្រួសារ​ដែល​មុន​ពេល​កូវីដ​នោះ គឺ​ជាង ៥០ ​ម៉ឺន​ចេញ ដូច្នេះ គឺ​វានៅ​ជាង​រង្វង់ ១០ម៉ឺន​គ្រួសារ​ដែល​កើនឡើង​ក្រោយពេល​កូវីដ។ បើគិត​ជា​ចំនួន​ប្រជាជន​គឺ​វា​ប្រហាក់ប្រហែល​ទៅនឹង​របាយការណ៍​ដែល​ធនាគារ​ពិភពលោក​ បាន​ចេញ​ជា​របាយការណ៍»

លោក ថេង បញ្ញាធន បញ្ជាក់​ប្រាប់ អាស៊ីសេរី បន្ថែម​កាលពី​ពេល​ថ្មីៗនេះថា ក្រុមការងារ​បច្ចេកទេស​របស់​ក្រសួង​ផែនការ និង​ភាគី​ពាក់ព័ន្ធ បាន​សិក្សា​ចប់​សព្វ​គ្រប់​ហើយ ដើម្បី​ធ្វើ​បច្ចុប្បន្នភាព​នៃ​ចំនួន​តួលេខ​អត្រាភាពក្រីក្រ ឬ​ពលរដ្ឋ​រស់​នៅ​ក្រោម​បន្ទាត់​ភាពក្រីក្រ​នៅ​កម្ពុជា​នេះ។ លោកថា រដ្ឋាភិបាល​នឹង​បញ្ចេញ​អត្រា​ភាពក្រីក្រ​ថ្មី​នេះ នាពេល​ឆាប់ៗ​នៅ​ពេលដែល​វិបត្តិ​ជំងឺកូវីដ១៩ ចុះ​ថមថយ៖ «ជាក់ស្តែង គឺ​ការងារ​នេះ គឺ​អ្នកបច្ចេកទេស​គឺ​បាន​ធ្វើ​ចប់​សព្វគ្រប់​ហើយ។ យើង​បាន​ដាក់ជូន​ទៅថ្នាក់​ដឹកនាំ​ដើម្បី​ពិនិត្យ​ និង​សម្រេចហើយ។ គ្រាន់តែ​ថា ក្នុង​ដំណាក់កាល​នេះ គឺ​យើង​ដឹងហើយ​ថា​ប្រទេស​កំពុងតែ​គិតគូរ​ខ្លាំង​ ដោះស្រាយ​បញ្ហា​បន្ទាន់​ចំពោះមុខ​នោះ គឺរឿង​បញ្ហា​កូវីដ និង​បញ្ហា​ជីវភាព​ប្រជាជន ជាពិសេស​គឺក្នុង​អំឡុងពេល​បិទខ្ទប់​អីទាំងអស់​ហ្នុង។ អ៊ីចឹង ការងារ​នោះ គឺ​អាចថា ក្នុង​ពេល​ឆាប់ៗនេះ​ហើយ នៅ​ពេល​ដែល​ស្ថានភាព​កូវីដ​ស្រាក គឺ​ការងារ​បច្ចេកទេស​អី​ទាំងអស់​នោះ នឹង​ត្រូវបាន​ពិនិត្យ​ និង​សម្រេច។ គ្រាន់តែ​ដឹងថា ក្នុង​ពេល​ឆាប់ៗនេះ គឺ​យើង​នឹង​មាន​អត្រា​ភាពក្រីក្រ​ថ្មី​សម្រាប់​កម្ពុជា​យើង»

Poor_people_Past.jpg
ប័ណ្ណក្រីក្រដែលរដ្ឋាភិបាលចែកជូនប្រជាពលរដ្ឋ (ក្រ១,ក្រ២) ដើម្បីទទួលបានជំនួយពីរដ្ឋាភិបាលក្នុងពេលជួបវិបត្តិនៃជំងឺកូវីដ១៩។

ជុំវិញ​បញ្ហា​អត្រាភាព​ក្រីក្រ​នេះ កន្លងទៅ នៅ​មុន​ពេល​ផ្ទុះ​ខ្លាំង​នៃ​ជំងឺកូវីដ១៩ ចូល​ក្នុង​សហគមន៍ អង្គការ​កម្មវិធី​អភិវឌ្ឍន៍​សហប្រជាជាតិ UNDP ​បាន​វាយតម្លៃ​លើ​ផលប៉ះពាល់​ផ្នែកសេដ្ឋកិច្ច និង​សង្គម​ដោយសារ​វិបត្តិ​ជំងឺកូវីដ១៩ កាលពី​ចុងឆ្នាំ២០២០ ​ថា អត្រា​ពលរដ្ឋ​កម្ពុជា​រស់នៅ​ក្រោម​បន្ទាត់​ភាព​ក្រីក្រ ឬ​ចំណាយ​តិច​ជាង ២ ​ដុល្លារ​ក្នុង​មួយថ្ងៃ អាច​នឹង​កើនឡើង​រហូតដល់​ជាង ១៧% ឬ​ស្មើនឹង​ពលរដ្ឋ​ប្រមាណ​ជិត ៣ លាន​នាក់។ រីឯ ធនាគារ​ពិភពលោក​ នៅតែ​វាយតម្លៃ​ដែរ​ថា ​ពលរដ្ឋ​ជាង ៤លាន ​៥សែន ​នាក់ នៅតែ​​ងាយប្រឈម​នឹង​ធ្លាក់ខ្លួន​ក្រីក្រវិញ​ក្នុងពេល​ឆាប់ៗ​នៅពេល​ណា​ដែល​​មាន​បញ្ហា​ផ្នែកសេដ្ឋកិច្ច ឬកត្តា​ខាងក្រៅ​ដទៃទៀត។

នាយកប្រតិបត្តិ​អង្គការ​តម្លាភាព​កម្ពុជា (TI-Cambodia) លោក ប៉ិច ពិសី មាន​ប្រសាសន៍​ថា រដ្ឋាភិបាល​នៅ​មិនទាន់​កំណត់​និយមន័យ​ជាក់លាក់​អំពី​ភាពក្រីក្រ​នេះ​នៅឡើយទេ ថាតើ​ត្រូវ​កំណត់​យក​អ្នកដែល​ចំណាយ​តិចជាង ២ដុល្លារ​ក្នុង​មួយថ្ងៃ ឬ តិចជាង ៥ដុល្លារ​ក្នុង​មួយថ្ងៃ ឬយ៉ាងនោះទេ ព្រោះ​បញ្ហា​នេះ​ជាបញ្ហា​រស៊ើប។ លោក​ពន្យល់​ថា រដ្ឋាភិបាល​តែងតែ​ចង់​បង្ហាញ​ថា អត្រា​ភាពក្រីក្រ​នៅ​កម្ពុជា​ ធ្លាក់ចុះ និង​មាន​កម្រិតទាប។ លោក​បារម្ភ​អត្រា​ពលរដ្ឋ​រស់នៅ​ក្រោម​បន្ទាត់​​ភាពក្រីក្រ អាច​នឹង​កើនឡើង​ដោយសារតែ​ព្រឹត្តិការណ៍​ផ្ទុះ​រាលដាល​នៃ​ជំងឺកូវីដ១៩ ចូល​ក្នុង​សហគមន៍​ជាលើកទីបី កំពុង​ប៉ះពាល់​ដល់​វិស័យ​សំខាន់ៗ​ដែល​ទ្រទ្រង់​សេដ្ឋកិច្ច​ជាតិ ជាពិសេស​ ប៉ះពាល់​ដល់​ពលរដ្ឋ​ដែល​បម្រើការងារ​ក្នុង​វិស័យ​ទេសចរណ៍ កំសាន្ត វិស័យ​សំណង់ និង​អចលនទ្រព្យ ព្រមទាំង​វិស័យ​នាំចេញ​ជា​ដើម៖ «អញ្ចឹង​ ខ្ញុំ​គិតថា​ ភាពក្រីក្រ​នឹង​អាច​កើនឡើង។ កើនឡើង​នៅ​ក្នុង​កម្រិតណា គឺ​យើង​ត្រូវ​សិក្សា​ឲ្យ​បាន​ច្បាស់លាស់។ យើង​ក៏​បាន​ដឹងដែរ​ថា ប្រជាពលរដ្ឋ​យើង​ដែល​ទើបតែ​នឹង​ងើប​ពី​ភាពក្រីក្រ​នៅ​ក្នុង​រយៈពេល​ពីរ​បី​ឆ្នាំ​ចុងក្រោយ គឺ​គាត់​ទើបតែ​រឹងដៃ​រឹងជើង​តិចតួច​ទេ។ គាត់​មិនទាន់​មាន​លទ្ធភាព​រឹងម៉ាំ​ទេ ដោយសារ​គាត់​ទើប​ចាប់ផ្តើម​ងើប​ទៅ ហើយ​កូនគាត់​ចាប់ផ្តើម​មាន​ការងារ ធំឡើង​ទៅ​ គឺ​គាត់​អាច​ចាប់ផ្តើម​ជួយ​គ្រួសារ​អី​បាន​។ អញ្ចឹង គឺ​គាត់​ទើបតែ​ងើបទេ។ ដល់​ពេល​ឥឡូវ យើង​មាន​បញ្ហា​កូវីដ គឺ​ផលប៉ះពាល់​អវិជ្ជមាន​ អាច​ទាញ​គាត់​ត្រលប់​ទៅ​រក​ភាពក្រីក្រ​វិញ ហើយ​ប្រជាពលរដ្ឋ​ដែល​យើង​ឃើញ​ក្នុង​ទិន្នន័យ​ហ្នុង គឺ​មាន​ចំនួន​ច្រើន​ គឺ​រហូតដល់​ទៅ ៤,៥ លាន​នាក់​ ដែល​រស់​នៅ​កៀក​នឹង​បន្ទាត់​ភាពក្រីក្រ។ យើង​បារម្ភ​ថា បញ្ហា​ហ្នុង​អាច​ធ្វើ​ឲ្យ​គាត់​វិលមក​ក្រ​វិញ»

លោក ប៉ិច ពិសី ពន្យល់​ថា រដ្ឋាភិបាល​ត្រូវ​តែ​ដឹង​អំពី​ចំនួន​ពិតប្រាកដ​នៃ​ពលរដ្ឋ​រស់នៅ​ក្រោម​បន្ទាត់​ភាពក្រីក្រ និង​បញ្ចេញ​តួលេខ​នេះ​​ប្រកប​ដោយ​តម្លាភាព ដើម្បី​រិះរក​យុទ្ធសាស្ត្រ​ឆ្លើយតប​នឹង​ភាពក្រីក្រ​នេះ។

Worker_Siclo.jpg
អ្នកប្រកបរបរជាអ្នកធាក់ស៊ីក្លូនៅម្តុំផ្សារកណ្តាល រាជធានីភ្នំពេញ ខ្សត់ភ្ញៀវក្នុងអំឡុងពេលរដ្ឋាភិបាលចាត់វិធានការបិទខ្ទប់រាជធានីភ្នំពេញ និងក្រុងតាខ្មៅនៃខេត្តកណ្តាល កាលពីខែមេសា ឆ្នាំ២០២១។

កន្លងទៅ កាលពី​ចុងឆ្នាំ២០១៨ ការកំណត់​និយមន័យ​អំពីភាពក្រីក្រ​ និង​អត្រាភាពក្រីក្រ​នៅ​កម្ពុជា បាន​ក្លាយ​ជា​សង្គ្រាម​ពាក្យសម្តី​រវាង​អង្គការកម្មវិធី​អភិវឌ្ឍន៍​​សហប្រជាជាតិ ហៅកាត់ថា UNDP និង​ក្រសួង​ផែនការ។ កាលណោះ អង្គការ​អន្តរជាតិ​នេះ បាន​ពិនិត្យ​មើល​ពី​ភាពក្រីក្រ​របស់​ពលរដ្ឋ​កម្ពុជា​​តាមបែប​ស៊ីជម្រៅ លើស​ពី​កម្រិត​ប្រាក់ចំណូល​តិចជាង ១,៩ ដុល្លារ​ក្នុង​មួយថ្ងៃ ដោយ​រាប់បញ្ចូល​ទាំង​បញ្ហា​ប្រឈម​ផ្សេងៗទៀត ដូចជា​ពលរដ្ឋ​ដែល​ត្រូវ​គេបោះបង់​ចោល​ក្នុង​វិស័យ​សុខាភិបាល អប់រំ និង​ស្តង់ដារ​នៃ​ការរស់​នៅ ជាពិសេស​គឺ​កង្វះ​ទឹកស្អាត អនាម័យ កង្វះអាហារូបត្ថម្ភ និង​ការអប់រំ​កម្រិត​មូលដ្ឋាន​ជាដើម។ ដោយគិត​ពី​បញ្ហា​អស់​ទាំងនេះ អង្គការ​ UNDP នាពេល​នោះ បាន​រកឃើញ​ថា អត្រា​ភាពក្រីក្រនៅ​កម្ពុជា មាន​រហូតដល់​ ៣៥%។ ក៏ប៉ុន្តែ តួលេខ​នេះ ក្រោយ​មក​ត្រូវ​រដ្ឋាភិបាល និង​អង្គការ​នេះ សម្រេច​កែសម្រួល​ និង​ឯកភាព​គ្នា​មកត្រឹម​ ១៣,៥% វិញ។ លុះ​មក​ត្រឹម​ចុងឆ្នាំ២០២០អង្គការ​កម្មវិធី​អភិវឌ្ឍន៍​សហប្រជាជាតិ UNDP ​បាន​វាយតម្លៃ​ម្តងទៀត​លើ​ផលប៉ះពាល់​ផ្នែកសេដ្ឋកិច្ច និង​សង្គម​ដោយសារ​វិបត្តិ​ជំងឺកូវីដ១៩ ​ថា អត្រា​ពលរដ្ឋ​កម្ពុជា​រស់នៅ​ក្រោម​បន្ទាត់​ភាព​ក្រីក្រ ឬ​ចំណាយ​តិច​ជាង ២ ​ដុល្លារ​ក្នុង​មួយថ្ងៃ អាច​នឹង​កើនឡើង​រហូតដល់​ជាង ១៧% ឬ​ស្មើនឹង​ពលរដ្ឋ​ប្រមាណ​ជិត ៣លាន​នាក់។ តួលេខ​នេះ ស្រដៀងគ្នា​ទៅនឹង​តួលេខ​របស់​រដ្ឋាភិបាល​ចុងក្រោយ​ដែល​ថា ពលរដ្ឋ​ក្រីក្រ​ប្រមាណ​ជិត ៧សែន​គ្រួសារ​ ស្មើនឹង​ជាង ២លាន ​៧សែន​នាក់ ទទួល​បាន​ការឧបត្ថម្ភ​សាច់ប្រាក់​ពី​រដ្ឋ ដែល​គិត​រហូត​មកទល់ពេល​នេះ រដ្ឋ​អះអាង​ថា​ បាន​ចំណាយ​ថវិកា​សរុប​ជិត ៣រយ​លាន​ដុល្លារអាមេរិក​ដើម្បី​ឧបត្ថម្ភ​ជា​សាច់ប្រាក់​ជូន​ពលរដ្ឋ​ក្រីក្រ​ទាំងនោះ។ ផ្អែក​តាម​តួលេខ​នេះ អត្រា​ពលរដ្ឋ​ក្រីក្រ​អាច​មាន​ក្នុង​រង្វង់​ជាង ១៧% នៃ​ពលរដ្ឋ​សរុប​ជាង ១៥,៥លាន​នាក់។

រដ្ឋាភិបាល​តែង​អះអាង​ពី​មោទនភាព​ថា ក្នុង​រយៈពេល​ជាង ២ទសវត្ស​មក​នេះ ខ្លួន​បាន​កាត់បន្ថយ​អត្រា​ភាពក្រីក្រ ពី​ជិត ៤៨% ក្នុង​ឆ្នាំ២០០៧ មកនៅត្រឹម ១៣,៥ ភាគរយ​កាលពី​ឆ្នាំ២០១៤ ហើយ​មាន​មហិច្ឆតា​ចង់ក្លាយ​ខ្លួន​​ពី​ប្រទេស​អភិវឌ្ឍន៍​តិចតួច ឬ LDC មកជា​ប្រទេស​មាន​ចំណូល​មធ្យម​កម្រិត​ខ្ពស់​នៅ​ឆ្នាំ​២០៣០ និង​ជា​ប្រទេស​មាន​ចំណូល​ខ្ពស់​នៅឆ្នាំ២០៥០។ ក៏ប៉ុន្តែ រូបភាព​នៃ​ពលករ​ចំណាកស្រុក​ខ្មែរ​រាប់​លាននាក់ អត់​ការងារ​ធ្វើ​នៅក្នុង​ស្រុក រួច​រត់ទៅ​ធ្វើ​ការស្របច្បាប់​ និង​ខុសច្បាប់ និង​ធ្វើ​ជាអ្នកសុំទាន​គេ​នៅ​តាម​ប្រទេស​ជិតខាង ហើយ​ត្រូវ​អាជ្ញាធរ​បរទេស​ចាប់​បញ្ជូន​មក​កម្ពុជា​វិញ​ស្ទើរាល់​ថ្ងៃ​ កំពុង​ធ្វើ​ឲ្យ​រដ្ឋាភិបាល​រងនូវ​ក្តី​អាម៉ាស់ ​នៅ​លើ​ឆាកអន្តរជាតិ។ បន្ថែម​ពីនេះ​ទៀត ពលរដ្ឋ​កម្ពុជា​ជាង ២លាន​៤សែន​គ្រួសារ​កំពុង​ជំពាក់​បំណុល​មីក្រូ​ហិរញ្ញវត្ថុ​ស្ទើ​វ័ន្តក​ក្នុង​ម្នាក់ៗ​មិន​តិច​ជាង ៤ពាន់​ដុល្លារ ខណៈ​រដ្ឋ​វិញ ​គិតត្រឹម​ដំណាច់​ឆ្នាំ២០២០ ​ជំពាក់​បំណុល​បរទេស​សរុប​ប្រមាណ​ជាង ៩ពាន់៦រយ​លានដុល្លារ (៩.៦០១,៩៣ លាន​ដុល្លារ)។ ក្នុងនោះ​ បំណុល​ស្ទើរតែ​ជិត​ពាក់​កណ្តាល ឬ​ប្រមាណ​ជាង ៤៦% (៤៦,៦៧%) ជា​បំណុល​ដែល​រដ្ឋ​ជំពាក់​ចិន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល