សង្គមស៊ីវិលជំរុញឱ្យរដ្ឋាភិបាលផ្ដល់ប្រាក់ខែ និងប្រាក់ឧបត្ថម្ភឱ្យមន្ត្រីរាជការស៊ីវិល និងកងកម្លាំងប្រដាប់អាវុធឲ្យបានច្រើនជាងពេលបច្ចុប្បន្ននេះ។ ការលើកឡើងនេះគឺបន្ទាប់ពី លោកនាយករដ្ឋមន្ត្រី ហ៊ុន សែន កាលពីថ្ងៃទី៣១ ខែមីនា ចេញអនុក្រឹត្យស្ដីពី ការផ្ដល់ប្រាក់ឧបត្ថម្ភចំនួន៥ម៉ឺនរៀល ក្នុងឱកាសពិធីបុណ្យ ចូលឆ្នាំខ្មែរ និងពិធីបុណ្យភ្ជុំបិណ្ឌ កាលពីថ្ងៃទី៣១ មីនា ដល់ មន្ត្រីរាជការស៊ីវិល និងកងកម្លាំងប្រដាប់អាវុធ។
មន្ត្រីសង្គមស៊ីវិលយល់ឃើញថា ចំនួនទឹកប្រាក់ ៥ម៉ឺនរៀលដែលរដ្ឋាភិបាល ផ្តល់ជូនមន្ត្រីរាជការស៊ីវិល និងកងកម្លាំងប្រដាប់អាវុធ ក្នុងឱកាសបុណ្យចូលឆ្នាំខ្មែរ និងពិធីបុណ្យភ្ជុំបិណ្ឌនេះនៅមានចំនួនតិចតួច មិនអាចមានផ្គត់ផ្គង់ជីវភាពឱ្យបានសមរម្យនោះទេ។
មន្ត្រីសង្គមស៊ីវិលអះអាងថា កាលណាប្រាក់ខែ និងប្រាក់ជំនួយមួយចំនួន នៅតែតិចតួចអាចធ្វើឱ្យពួកគាត់រកមុខរបរទីពីរ ដើម្បីទ្រទ្រង់ជីវភាពគ្រួសារ ហើយកត្តាទាំងនេះអាចធ្វើប៉ះពាល់គុណភាពការងារ ដូច្នេះរដ្ឋគួរតែពិចារណាឡើងវិញ ចំពោះសុខទុក្ខមន្ត្រីរាជការគ្រប់ស្ថាប័ន។
អគ្គលេខាធិការសហព័ន្ធនិស្សិតបញ្ញវន្តកម្ពុជា លោក គៀន ពន្លក ប្រាប់វិទ្យុអាស៊ីសេរីនៅថ្ងៃទី០១ មេសា ថា រដ្ឋាភិបាលគួរតែផ្ដល់ប្រាក់ឧបត្ថម្ភ ឱ្យមន្ត្រីគ្រប់ស្ថាប័នទាំងអស់ឱ្យបាន២៥ភាគរយ (២៥%) នៃប្រាក់ខែនាយករដ្ឋមន្ត្រីដើម្បីអាចជួយឱ្យពួកគាត់ មានសេដ្ឋកិច្ចល្អប្រសើរមិនចាំបាច់ ចំណាយពេលរកប្រាក់ក្រៅម៉ោងបន្ថែម។ លោកបញ្ជាក់ថា ប្រាក់ខែតិចតួច ក៏ជាប្រភពធ្វើឱ្យមានបញ្ហាពុករលួយផងដែរ ជាក់ស្ដែងលោកថា ក្នុងសាលារៀនខ្លះ មានគ្រូមួយចំនួនលក់ក្រដាសមេរៀនឱ្យសិស្ស ហើយខ្លះទៀតបើកម៉ោងបង្រៀនគួរក្នុងសាលា ដែលបញ្ហាទាំងនេះមិនត្រឹមតែប៉ះពាល់ដល់ការសិក្សារបស់សិស្សនោះទេ ថែមទាំងប៉ះពាល់ជីវភាពអាណាព្យាបាលសិស្ស ថែមទៀតផង។
លោក គៀន ពន្លក៖ «ខ្ញុំគិតថាប្រាក់នេះនៅតិចណាស់សម្រាប់មន្ត្រីរាជការពីព្រោះអី យើងដឹងហើយឥឡូវនេះកំពុងតែមានវិបត្តិសេដ្ឋកិច្ចជាពិសេសទំនិញគឺកំពុងតែបន្តឡើងថ្លៃខ្ពស់ទោះបីជាបើកប្រាក់ខែតែម្ដងក្នុងខែមេសាហ្នឹង ក៏ដោយក៏ប៉ុន្តែការចំណាយរបស់គាត់ក្នុងពិធីបុណ្យធំៗមានការចំណាយច្រើនណាស់។ ខ្ញុំសង្ឃឹមថាការឧបត្ថម្ភសាច់ប្រាក់ទៅលើមន្ត្រីរាជការចំនួន៥ម៉ឺនរៀល(៥.០០០០)នេះ រាជរដ្ឋាភិបាលហ្នឹងពិចារណាឡើងវិញតាមការស្នើសុំ»។
ការឡើងលើកនេះគឺបន្ទាប់ពី លោកនាយករដ្ឋមន្ត្រី ហ៊ុន សែន សម្រេចផ្ដល់ប្រាក់ឧបត្ថម្ភក្នុងឱកាសពិធីចូលឆ្នាំខ្មែរប្រពៃណីជាតិ និងពិធីបុណ្យភ្ជុំបិណ្ឌខាងមុខ ដល់ មន្ត្រីរាជការ ស៊ីវិល និងកងកម្លាំងប្រដាប់អាវុធ មន្ត្រីជាប់កិច្ចសន្យា ឬបុគ្គលិកបណ្ដែត សមាជិកក្រុមប្រឹក្សារាជធានី ខេត្ត ក្រុង សង្កាត់ ជនពិការដែលជាអតីតមន្ត្រីរាជការ អតីតមន្ត្រីនគរបាលជាតិ ជនបាត់បង់សមត្ថភាពការងារ និងអតីតយុទ្ធជន ដោយក្នុងម្នាក់ទទួលបាន៥ម៉ឺនរៀល។ ប្រាក់ខែ និងប្រាក់ឧបត្ថម្ភប្រចាំខែមេសា យ៉ាងយូរត្រឹមថ្ងៃទី១៣ ខែមេសា។
ជំរុញរឿងនេះដែរ ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍ថា ចំនួនថវិកា ៥ម៉ឺនរៀល នេះ មិនគ្រប់គ្រាន់សម្រាប់ការចំណាយនោះទេ ម្យ៉ាងទំនិញនៅលើទីផ្សារមានតម្លៃថ្លៃមិនសមស្របជាមួយប្រាក់ដែលទទួលបាន។ លោកស្នើឱ្យរដ្ឋាភិបាលគិតគូរដល់ជីវភាព របស់មន្ត្រីទាំងអស់ដូចជាការដំឡើងប្រាក់ខែ និងផ្ដល់ប្រាក់សម្រាប់ទ្រទ្រង់តាមផ្នែកផ្សេងៗឱ្យបានច្រើន ពីព្រោះមន្ត្រីទាំងនោះមានតួនាទីបម្រើពលរដ្ឋ ហើយបើប្រាក់ខែមិនគ្រប់ អាចធ្វើឱ្យសមត្ថភាពនៃការបំពេញការងារថយចុះ។
លោក យង់ គិមអេង៖ «ប្រាក់ឧបត្ថម្ភនេះគឺវាតិចដែរ បើសម្រាប់លទ្ធភាពឱ្យគាត់ទៅស្រុកទៅស្រែទៅអីគឺពិបាកចំពោះជីវភាពឃើញថា អ្នកដែលពឹងទៅលើតែប្រាក់ខែមួយមុខ មិនបានរកស៊ីអីប្រហែលជាអាចប្រឈមនឹងជីវភាព»។
ចាប់តាំងពីឆ្នាំ២០១៦មក រដ្ឋាភិបាលតែងតែផ្ដល់ប្រាក់ឧបត្ថម្ភចំនួនប្រាំម៉ឺន រៀលឲ្យមន្ត្រីរាជការទាំងអស់ សម្រាប់ពិធីបុណ្យជាតិធំ២ គឺចូលឆ្នាំខ្មែរ និងភ្ជុំបិណ្ឌ ដែលគេមើលឃើញថា ជាការកេងចំណេញនយោបាយ។ ទោះជាយ៉ាងណា មន្ត្រីសង្គមស៊ីវិល យល់ឃើញថា រដ្ឋាភិបាល គួរតែដំឡើងប្រាក់ខែដល់មន្ត្រីរាជការស៊ីវិល និងកងកម្លាំងប្រដាប់អាវុធ ឲ្យខ្ពស់ជាងសព្វថ្ងៃនេះ ដើម្បីឲ្យពួកគាត់អាចរស់នៅក្នុងជីវភាពសមរម្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។