លោកនាយករដ្ឋមន្រ្តី ហ៊ុន សែន ប្រកាសទទួលស្គាល់ថា ការបូមប្រេងនៅប្លុក A បរាជ័យ ក្រោយក្រុមហ៊ុនប្រេង គ្រីសអិនណឺជី (KrisEnergy) ប្រកាសក្ស័យធន។ អ្នកឃ្លាំមើលបរិស្ថានថា បទពិសោធន៍របស់ក្រុមហ៊ុននេះអាចជាគំរូមិនល្អធ្វើឱ្យក្រុមហ៊ុនផ្សេងទៀតពិបាក នឹងចូលមកវិនិយោគវិស័យប្រេងនៅកម្ពុជានៅថ្ងៃមុខ និងថែមទាំងអាចប៉ះពាល់ដល់វិស័យបូមប្រេងនៅកម្ពុជា ក្នុងពេលអនាគត។
នៅពេលដែលក្រុមហ៊ុនប្រេងមានមូលដ្ឋាននៅប្រទេសសឹង្ហបូរី (Singspore) គ្រីសអិនណឺជី (KrisEnergy) កំពុងដំណើរការរឿងក្ដីនៅតុលាការក្នុងសំណុំរឿងក្ស័យធន លោកនាយករដ្ឋមន្រ្តី ហ៊ុន សែន កាលពីថ្ងៃទី១ ខែសីហា បានប្រកាសទទួលស្គាល់ថា ដំណើរការបូបប្រេងនៅពេលនេះ គឺត្រូវបរាជ័យ៖ «ឥឡូវសូមនិយាយតិចអារឿងហ្នឹងទៅចុះ ២៩ធ្នូ ដែលយើងសង្ឃឹមថាបាន៥៧០០ បារ៉ែល ទីចុងបំផុត១ថ្ងៃបានតែ១០០០ បារ៉ែល។ ឥឡូវក្រុមហ៊ុនហ្នឹងក្ស័យធន វាបូកថែមទាំងអាកប៉ាល់ដែលយើងបូមដាក់វារត់ចេញទៅបាត់ទៅ យើងទប់វាមិនទាន់ចូលដល់ដីថៃរួចហើយគេមានមេធាវីរបស់គេ អានោះវាជួលកប៉ាល់ម៉ោទុក។ ឥឡូវវាយកទាំងប្រេងទៅបាត់អស់រលីង បាត់អស់អាប្រេងហ្នឹង។ ប៉ុន្តែដោយប្លុកប្រេងវានៅច្រើន យើងនៅបន្តការខិតខំ ដើម្បីបន្តការរុករកនឹងធ្វើអាជីវកម្ម»។
វិទ្យុអាស៊ីសេរីនៅមិនទាន់អាចសុំការឆ្លើយតបពីក្រុមហ៊ុនគ្រីសអិនណឺជី ( KrisEnergy) ចំពោះការចោទប្រកាន់របស់លោក ហ៊ុន សែន នេះបាននៅឡើយទេគិតមកដល់ថ្ងៃទី២ ខែសីហានេះ។
ក្រុមហ៊ុន KrisEnergy នៅពេលនេះកំពុងដំណើរការរឿងក្ដីនៅតុលាការក្រោយប្រកាសក្ស័យធនដោយសារបំណុល។ ក្រុមហ៊ុននេះប្រកាសកាលពីថ្ងៃទី៤ ខែមិថុនា ថាក្រុមហ៊ុនមិនមានលទ្ធភាពសងបំណុល ទាំងបំណុលដែលអាចកើនឡើង និងកំពុងជំពាក់ជាក់ស្តែង។ ក្រុមហ៊ុនថា មូលហេតុចម្បងមួយក្នុងចំណោមមូលហេតុជាច្រើនទៀត ដែលធ្វើឱ្យក្រុមហ៊ុនប្រកាសក្ស័យធននោះ គឺការធ្លាក់ចុះកម្រិតប្រេង ដែលរកឃើញនៅអណ្ដូងអប្សរា ឬប្លុកA នៅកម្ពុជា។
ស្ថាបនិកអង្គការមាតាធម្មជាតិ លោកអាឡិចហាន់ដ្រូ ហ្គន់សាឡេស ដេវីដសុន (Alejandro Gonzalez-Davidson) ថ្លែងថា បទពិសោធន៍ដែលក្រុមហ៊ុន KrisEnergy ជួបប្រទះនៅកម្ពុជាអាចនឹងធ្វើឱ្យក្រុមហ៊ុនត្រឹមត្រូវមិនហ៊ានមកវិនិយោគលើវិស័យប្រេងនៅកម្ពុជា៖ «ក្នុងវិស័យប្រេងកាតមួយនេះ គឺមិនងាយក្រុមហ៊ុនណាមួយមកជំនួសក្រុមហ៊ុន KrisEnergy នៅពេលអនាគតទេ។ មូលហេតុ ដែលមិនងាយមានហ្នឹង គឺទី១ ហាក់ដូចជាចំនួនប្រេងនៅកម្ពុជា គឺមានប្រេងកាត់តិចពេក។ ទី២ តម្លៃនៅទីផ្សារទាបនៅឡើយ អត់ទាន់ឡើងនៅឡើយទេ អាចនិយាយថា ថោកពេកសម្រាប់ចំណេញ។ កត្តាទី៣ គឺពុករលួយ។ នៅប្រទេសកម្ពុជាឱ្យតែក្រុមហ៊ុនណាចង់ពាក់ព័ន្ធជាមួយក្រសួងរ៉ែ និងថាមពល គឺត្រូវតែមានការសូកប៉ាន់។ ឧបសគ្គទី៤សម្រាប់ក្រុមហ៊ុន គឺអ្វីដែល KrisEnergy បានឆ្លងកាត់ ក្រោយពីក្ស័យធន ក្រោយពីបូមប្រេងមិនបានគ្រប់គ្រាន់ហ្នឹង គឺប្រមុខរដ្ឋាភិបាលប្រកាស និងគំរាមជាសាធារណៈ។ នេះជាឧបសគ្គធំណាស់សម្រាប់ក្រុមហ៊ុន»។
ក្រុមហ៊ុន KrisEnergy បានរកឃើញតំណក់ប្រេងដំបូងរបស់កម្ពុជានៅចុងឆ្នាំ ២០២០ ប៉ុន្តែលទ្ធផលនៃកម្រិតបរិមាណប្រេងដែលបូមពីអណ្តូងសាកល្បងចំនួន ៥នៅប្លុកA មិនដូចអ្វីដែលបានរំពឹងទុក។ ដំបូងក្រុមហ៊ុននេះថា អាចបូមប្រេងបានជាង៧ពាន់ធុង (៧.៥០០) ក្នុងមួយថ្ងៃ តែជាក់ស្ដែងបូមបានមិនដល់៣ពាន់ធុង (២.៨៨៣ធុង) ផង ហើយនៅថ្ងៃទី១ សីហា លោកនាយករដ្ឋមន្ត្រី ហ៊ុន សែន អះអាងថា ក្រុមហ៊ុន KrisEnergy នេះ បូម១ថ្ងៃបានតែ១០០០ បារ៉ែល ឬធុង ប៉ុណ្ណោះ។
តែទោះជាយ៉ាងណា អាជ្ញាធរក្រុងភ្នំពេញបានធ្វើពិធីតម្កល់ដំណក់ប្រេងលើកដំបូងកាលពីថ្ងៃទី ៩ ខែមិថុនា គឺនៅស្របពេលគ្នា ដែលក្រុមហ៊ុន KrisEnergy ប្រកាសក្ស័យធនតែម្ដង។ តំណក់ប្រេងដំបូងនោះ ត្រូវនាំទៅរក្សាទុកនៅវិមានឈ្នះឈ្នះ។ លើសពីនេះកម្ពុជាធ្លាប់គ្រោងទុកថា នឹងប្រឹងប្រែងឱ្យក្លាយជាប្រទេសនាំចេញប្រេងឆៅទៅទីផ្សារអន្តរជាតិថែមទៀតផង។ យ៉ាងនេះក្ដី អ្នកបរិស្ថាន និងអង្គការសង្គមស៊ីវិលពាក់ព័ន្ធ តែងតែបារម្ភពីការហិនហោចសម្បត្តិធម្មជាតិ ធនធានកម្ររបស់ជាតិ នៅពេលដែលអាជីវកម្មប្រេងត្រូវមើលឃើញថា ធ្វើឡើងដោយគ្មានតម្លាភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។