ធ្លាក់​ចុះ​ភ្ញៀវ​ទេសចរ​​យ៉ាង​​គំហុក​​ ​​ធ្វើ​​ឱ្យ​​សណ្ឋាគារ​ និង​​កន្លែង​​ផ្ដល់​​សេវាកម្ម​​ម្ហូប​អាហារ​​​បិទ​​ទ្វារ​

ដោយ ហេង រស្មី
2019-09-03
អ៊ីម៉ែល
មតិ
Share
បោះពុម្ព
ទិដ្ឋភាព​ភ្ញៀវ​ទេសចរ​នៅ​ប្រាសាទ​អង្គរវត្ត នៅ​ចុង​ខែ​សីហា ឆ្នាំ២០១៩។
ទិដ្ឋភាព​ភ្ញៀវ​ទេសចរ​នៅ​ប្រាសាទ​អង្គរវត្ត នៅ​ចុង​ខែ​សីហា ឆ្នាំ២០១៩។
RFA

ពលរដ្ឋ​រស់នៅ​ក្រុង​សៀមរាប​ និង​ក្រុម​មគ្គទេសក៍​ទេសចរ​បង្ហាញ​ក្ដី​កង្វល់​យ៉ាង​ខ្លាំង​ ពី​ការ​ធ្លាក់​ចុះ​ភ្ញៀវ​ទេសចរ​យ៉ាង​គំហុក​ពុំ​ធ្លាប់​មាន​ បណ្ដាល​ឱ្យ​ម្ចាស់​សណ្ឋាគារ​ ផ្ទះសំណាក់​ និង​កន្លែង​ផ្ដល់​សេវាកម្ម​ទេសចរ​មួយ​ចំនួន​បង្ខំចិត្ត​បិទទ្វារ។ បញ្ហា​នេះ​ពួកគេ​បាន​ទម្លាក់កំហុស​ ទៅ​លើ​របប​ក្រុងភ្នំពេញ​ថា មិន​មាន​យុទ្ធសាស្ត្រ​ទាក់ទាញ​ភ្ញៀវ​ទេសចរ​បទេស​រវល់​តែ​ទាស់ទែង​គ្នា​ក្នុង​វិបត្តិ​នយោបាយ។

ក្រុម​ពលរដ្ឋ​រស់នៅ​ក្រុង​សៀមរាប​ និង​មន្ត្រី​អង្គការ​សង្គម​ស៊ីវិល​ត្អូញត្អែរ​ថា បើ​ទោះ​បី​ភ្ញៀវ​ទេសចរ​ធ្លាក់​ចុះ​យ៉ាង​ខ្លាំង​ក្ដី ពុំ​ឃើញ​អាជ្ញាធរ​ក្រុង​ភ្នំពេញ បង្ហាញ​យុទ្ធសាស្ត្រ​ និង​គោល​នយោបាយ​ជាក់លាក់​មួយ ដើម្បី​ដោះ​ស្រាយ​វិបត្តិ​នេះ​នៅឡើយ​ទេ។

ក្រុម​ពលរដ្ឋ​រស់នៅ​ក្រុង​សៀមរាប​ត្អូញ​ថា ប្រភព​ការងារ​ និង​ប្រាក់​ចំណូល​ចម្បង​របស់​ប្រជាជន​ខេត្ត​នេះ​ភាគ​ច្រើន​ ពឹង​ផ្អែក​ទាំង​ស្រុង លើ​វិស័យ​ទេសចរ ក៏​ប៉ុន្តែ​ប្រសិន​បើ​ភ្ញៀវ​ទេសចរ​ធ្លាក់​ចុះ​ហើយ​នោះ​ ក្រុមហ៊ុន​ប្រតិបត្តិ​ករ​ទេសចរ សណ្ឋាគារ កន្លែង​លក់​វត្ថុ​អនុស្សាវរីយ​ និង​ភោជនីយដ្ឋាន រួម​ទាំង​កន្លែង​ផ្ដល់​សេវាកម្ម​ទេសចរ​ជា​ច្រើន​ទៀត​នឹង​ក្ស័យធន ធ្វើ​ឱ្យ​ពលរដ្ឋ​បាត់បង់​ការងារ និង​ប្រាក់​ចំណូល។

បុគ្គលិក​រដ្ឋបាល​នៃ​សណ្ឋាគារ​មួយ​ ក្នុង​ក្រុង​សៀមរាប លោក អាង ឆាល ថ្លែង​ថា សណ្ឋាគារ និង​ផ្ទះ​សំណាក់​ចំនួន​ក្នុង​ក្រុង​សៀមរាប កំពុង​ជួប​វិបត្តិ​សេដ្ឋកិច្ច​ រហូត​បង្ខំ​ចិត្ត​បិទ​ទ្វារ។ លោក​ថា នៅ​គ្រា​ភ្ញៀវ​ទេសចរ​ធ្លាក់​ចុះ សណ្ឋាគារ​លំដាប់​ផ្កាយ​៤ និង​ផ្កាយ៥​ បាន​បញ្ចុះ​តម្លៃ​ទាប ប៉ះពាល់​ដល់​ប្រាក់​ខែ​បុគ្គល​ និង​កាត់​បន្ថយ​ចំណាយ​ប្រចាំ​ថ្ងៃ​ជាដើម។ រី​ឯ​សណ្ឋាគារ និង​ផ្ទះ​សំណាក់​តូចៗ ជា​ច្រើន​ទៀត​ ស្ទើរតែ​គ្មាន​ភ្ញៀវ​ទាល់តែសោះ​នៅ​រយៈពេល​ប៉ុន្មាន​ខែ​ចុងក្រោយ​នេះ៖ «មួយ​រយៈ​នេះ​អត់​ភ្ញៀវ​ដល់​អូតែល (Hotel) ផ្កាយ ៥ ធ្លាប់​លក់​ថ្លៃ ក៏​គាត់​បញ្ចុះ​តម្លៃ​ទាប​មែនទែន ដល់​ពេល​ទាប វា​ប៉ះ​ពាល់​ដល់​ប្រាក់​ខែ​បុគ្គលិក និង​កាត់​បន្ថយ​ចំណាយ​ប្រចាំ​ថ្ងៃ ម៉ាស៊ីន​ភ្លើង​ច្រើន​ណាស់។ ដល់​ពេល​បញ្ចុះ​ខ្លាំង មួយ​រយៈ​នេះ​ធ្លាក់​ភ្ញៀវ​ខ្លាំង ទោះ​បី​ជា​ចុះ​ប៉ុណ្ណា​ក៏​នៅ​តែ​អត់​ភ្ញៀវ​ដដែល»

នៅ​ខេត្ត​សៀមរាប​ មាន​សណ្ឋាគារ​ ឬ​កន្លែង​ផ្ដល់​សេវាកម្ម​ស្នាក់​នៅ​ជាង ៥០០កន្លែង និង​មាន​បន្ទប់​គេង​ចំនួន ២ម៉ឺន​បន្ទប់។ ក្រុម​មគ្គទេសក៍​បង្ហើប​ថា បច្ចុប្បន្ន​ភ្ញៀវ​ទេស​ចរ​អឺរ៉ុប កូរ៉េ និង​ជប៉ុន​ ធ្លាក់​ចុះ​ច្រើន​ ជំនួស​ដោយ​ភ្ញៀវ​ទេសចរ​ជនជាតិ​ចិន និង​មាន​ភ្ញៀវ​ទេសចរ​ខ្លះ បាន​បង្វែរ​ទិសដៅ​ទៅ​ថៃ និង​វៀតណាម​វិញ។

លោក​ អាង​ ឆាល​ បន្ថែម​ទៀត​ថា​ ពលរដ្ឋ​រាប់ពាន់​នាក់​ដែល​កំពុង​បម្រើការ​ងារ​វិស័យ​ទេសចរ​ មាន​ប្រាក់ខែ​តិច​តូច​ប៉ុណ្ណោះ​ពោល​ គឺ​ចាប់ពី​ជាង​ ១០០ដុល្លារ​ ដល់​ ៨00​ដុល្លារ​ ក្នុង​នោះ​មាន​ពលរដ្ឋ​មួយ​ចំនួន​ ជំពាក់​បំណុល​ធនាគារ​ផង​ដែរ​។ លោក​ថា​ ភ្ញៀវ​ទេសចរ​ធ្លាក់​ចុះ​ខ្លាំង​ នឹង​ធ្វើ​ឱ្យ​ពួកគេ​ប្រឈម​ បាត់បង់​ការងារ​ បង្ខំចិត្ត​ចំណាកស្រុក​ទៅក្រៅ​ប្រទេស៖ «បុគ្គលិក​ភាគ​ច្រើន​នៅ​សៀមរាប ប្រាក់ខែ​ស៊ីមផល ស្ដារ (Simple Stare) អត់​ប្រាក់​ខែ​ច្រើន​ទេ។ អ៊ីចឹង​ទៅ​ដល់​សណ្ឋាគារ​បិទ​មួយ​ចំនួន​ហ្នឹង ប៉ះ​ពាល់​ជីវភាព មែនទែន។ អ៊ីចឹង​ទៅ​គាត់​ធ្វើ​ការ​នៅ​ប្រទេស​ថៃ ច្រើន​ទៅ​កូរ៉េ និង​ទៅ​ជប៉ុន»

របាយការណ៍​គ្រឹះស្ថាន​អង្គរ​បង្ហាញ​ថា រយៈពេល ៧ខែ​ ក្នុង​ឆ្នាំ២០១៩នេះ​ មាន​ភ្ញៀវ​ទេសចរ​ជិត ១លាន​ ៤សែន​នាក់​ ធ្លាក់​ចុះ​ជាង ១០ភាគ​រយ​ បើ​ធៀប​រយៈ​ពេល​ដូចគ្នា​នៅ​ឆ្នាំ២០១៨។

អ្នក​រត់​ម៉ូតូ​កង់​បី​ ក្នុង​ក្រុង​សៀមរាប​ លោក គឹម ណៃ​ ចាត់​ទុក​ឆ្នាំ២០១៩ នេះ​ ជា​ឆ្នាំ​អាក្រក់​បំផុត​មិន​ធ្លាប់​មាន​ ទាក់ទិន​ការ​ធ្លាក់​ចុះ​ភ្ញៀវ​ទេសចរ​បរទេស។ លោក​ថា ក្រុម​អ្នក​រត់​ម៉ូតូ​កង់​បី​ កំពុង​ជួប​វិបត្តិ​សេដ្ឋកិច្ច​ធ្ងន់ធ្ងរ​ ដោយសារ​ខ្សត់​ភ្ញៀវ​ និង​មាន​អ្នក​ខ្លះ​ បង្ខំ​ចិត្ត​បោះ​បង់​មុខ​របប​នេះ​ ធ្វើ​ចំណាក​ស្រុក​ទៅក្រៅ​ប្រទេស​ ដើម្បី​ដោះ​បំណុល៖ «អត់​ភ្ញៀវ​ក្នុង​មួយ​ខែ ហើម ១៥ថ្ងៃ អត់​មាន​ភ្ញៀវ​ដឹក។ ខាង​អូតែល HOTEL ខាង​អី គេ​ជម្រុះ​បុគ្គលិក​ខ្លះៗ ហើយ គេ​ជម្រុះ​ពាក់​កណ្ដាល​សិន​អ៊ីចឹង។ អត់​ភ្ញៀវ»

អ្នកនាំពាក្យ​ក្រសួង​ទេសចរ​ លោក​ តុប​ សុ​ភ័ក​ បដិសេធ​ធ្វើ​អធិប្បាយ​រឿង​នេះ​ទេ​ ហើយ​លោក​បាន​បង្វែរ​ឱ្យ​អាស៊ី​សេរី ​សួរ​អ្នកនាំពាក្យ​ក្រសួង​ទេសចរ​ លោក ជុក ជំនោរ​វិញ៖ «លោក ជុក ជំនោរ គាត់​អ្នក​នាំ​ពាក្យ​ដែរ​ដោយសារ​ខ្ញុំ​សុំ​ច្បាប់​បេសកកម្ម។ បេសកកម្ម​នៅ​ក្រៅ​ប្រទេស »

អាស៊ី​សេរី​បាន​ព្យាយាម​ទាក់ទង​ លោក ជុក ជំនោរ តែ​លោក​មិន​លើក​ទូរស័ព្ទ​នៅ​ថ្ងៃ​ទី២ កញ្ញា។

តែ​យ៉ាង​ណា​ លោក លោក ជុក ជំនោរ ប្រាប់​វិទ្យុ​បារាំង​អន្តរជាតិ​ថា រដ្ឋាភិបាល​កម្ពុជា​កំពុង​ពិចារណា​ លើក​លែង​ទិដ្ឋាការ​ដល់​ទេសចរ​បរទេស​ បន្ទាប់ពី​វិស័យ​ឯកជន​បង្ហាញ​ពី​កង្វល់​ នៃ​ការ​ធ្លាក់​ចុះ​ភ្ញៀវ​ទេសចរ​ មកកាន់​ខេត្ត​សៀមរាប​ ក្នុង​ឆមាស​ទី១ ឆ្នាំ២០១៩ នេះ។ លោក​បញ្ជាក់​ថា មូលហេតុ​នៃ​ការ​ធ្លាក់​ចុះ​ភ្ញៀវ​ទេសចរ​ មាន​កត្តា​ជា​ច្រើន រួម​មាន បញ្ហា​ទិដ្ឋាការ​ឥទ្ធិពល​ពី​ខាងក្រៅ​ និង​ការប្រកួត​ប្រជែង​ជាមួយ​ប្រទេស​ជិត​ខាង។

ប្រធាន​សមាគម​សេដ្ឋកិច្ច​ក្រៅ​ប្រព័ន្ធ លោក វន់ ពៅ មើល​ឃើញ​ថា ជម្លោះ​នយោបាយ​ និង​ការ​ធ្លាក់​ចុះ​ប្រជាធិបតេយ្យ​ គឺជា​មូលហេតុ​សំខាន់​ ធ្វើ​ឱ្យ​បាត់បង់​ភ្ញៀវ​​ទេសចរ​ ប្រទេស​លោក​ខាង​លិច​ ជះឥទ្ធិពល​អាក្រក់​ដល់​សេដ្ឋកិច្ច​ប្រជាជន​ក្នុង​តំបន់​ និង​កន្លែង​ផ្ដល់​សេវាកម្ម​ទេសចរ​ជាដើម​។ លោក​បារម្ភ​ថា​ ប្រាក់​ចំណូល​​​ពលរដ្ឋ​ក្រីក្រ​ ដែល​ប្រកបមុខរបរ​តូចតាច​ និង​មធ្យម​នឹង​ជួប​វិបត្តិ​ធ្ងន់ធ្ងរ​ ប្រសិនបើ​បញ្ហា​ទាំងអស់​នេះ​នៅតែ​អូស​បន្លាយពេល៖ «ការ​ព្រួយ​បារម្ភ​របស់​ខ្ញុំ​គឺ ប្រាក់​ចំណូល​របស់​ពលរដ្ឋ​ប្រកប​មុខ​របប​តូចតាច ខ្នាត​តូច និង​ខ្នាត​មធ្យម អ្នក​ដឹក​ជញ្ជូន​ភ្ញៀវ​ទេសចរ អ្នក​លក់​ដូរ​វត្ថុ​អនុស្សាវរីយ អ្នក​ប្រកប​មុខ​របប​ផ្សេងៗ ទៀត។ ជា​ពិសេស​ម្ចាស់​សណ្ឋាគារ​មួយ​ចំនួន​ធំ បាន​បង្ខំ​ចិត្ត​ជួល​សណ្ឋាគារ​ឲ្យ​ទៅ​ជន​ជាតិ​ចិន។ សណ្ឋាគារ​គាត់​ខ្លះ​អត់​មាន​ភ្ញៀវ។ នេះ​ជា​ការ​ព្រួយ​បារម្ភ អ្វីៗ ការ​ទទួលទាន វិស័យ​ទេសចរ ត្រូវ​បាន​បាត់បង់​ទាំង​ស្រុង»

ប្រធាន​អង្គការ​សម្ព័ន្ធ​គណនេយ្យ​ភាព​សង្គម​កម្ពុជា​ លោក​ សន​ ជ័យ​ ផ្ដល់​មតិ​ថា​ ការ​រៀបចំ​សណ្ដាប់ធ្នាប់​ សន្តិសុខ​ ហេដ្ឋារចនាសម្ព័ន្ធ​ និង​អភិបាលកិច្ច​ល្អ​ គឺជា​កត្តា​សំខាន់​ ទាក់ទាញ​ភ្ញៀវ​ទេសចរ​មិន​ចេះ​រីងស្ងួត​។ លោក​ចង់​ឃើញ​ រដ្ឋបាល​ខេត្ត​ ក្រសួង​សាធារណៈ​ការណ៍​ ក្រសួងទេសចរណ៍​ និង​ក្រសួងបរិស្ថាន​ សហការ​គ្នា​ល្អ​ រក​មធ្យោបាយ​ស្ដារ​មុខមាត់​ខេត្ត​នេះ​ឱ្យ​ល្បីល្បាញ​ផ្នែក​ទេសចរ​ និង​ជា​ខេត្ត​គំរូ៖ «បរិយាកាស​នៃ​ការ​រស់​នៅ​ទំនាក់ទំនង ការ​រស់​នៅ​ក្នុង​ភាព​ជា​គំរូ​មួយ​ជាង​គេ នៃ​អ្នក​ស្រុក​សៀមរាប​នេះ និង​របៀប​ដែល​ពួក​គេ​មាន​ទំនាក់ទំនង​ជាមួយ​ភ្ញៀវ​ទេសចរ រួម​ផ្សំ​ជាមួយ និង​រូបភាព​ទាក់ទាញ​ផ្សេងៗ ទៀត ដូច​អភិវឌ្ឍន៍​​ខេត្ត​នេះ​ឲ្យ​ក្លាយ​ជា​គំរូ​មួយ រួម​ទាំង​ជា​ខេត្ត​ទទួល​បាន​ការ​អនុវត្ត​ល្អ​ផ្នែក​អភិបាលកិច្ច»

មន្ត្រី​សង្គម​ស៊ីវិល​ ពលរដ្ឋ​ និង​ក្រុម​មគ្គុទ្ទេសក៍​បារម្ភ​ថា ប្រសិនបើ​ជម្លោះ​នយោបាយ​នៅ​តែ​អូស​បន្លាយ​ពេល​រហូត​ផ្ដាច់​អនុគ្រោះ​ពន្ធ EBA នឹង​បង្ក​ផល​ប៉ះពាល់​ធំធេង​ដល់​ប្រព័ន្ធ​សេដ្ឋកិច្ច​ប្រជាជន​ទាំង​មូល ជា​ពិសេស នឹង​ផ្ទុះ​ឡើង​ នូវ​វិបត្តិ​សង្គម​នានា រួមមាន​ រឹបអូស​ដីធ្លី​ ផ្ទះ​សម្បែង​ពី​សំណាក់​ ធនាគារ និង​មីក្រូហិរញ្ញវត្ថុ​ជាដើម៕

ទិដ្ឋភាព​ភ្ញៀវទេសចរ​នៅខ្លោង​ទ្វារ​ចូល​ប្រាសាទ​បាយ័ន កាល​ពី​ចុង​ខែ​សីហា ឆ្នាំ២០១៩។ រូប៖ RFA

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល