កសិករ​នៅ​ខេត្ត​ភាគ​ឦសាន​ថា អឺរ៉ុប​យក​ពន្ធ​​អង្ករ​កម្ពុជា ​គឺសម្លាប់​​ចំណូល​របស់​កសិករ

ដោយ ថន ថារ៉ូ
2019-01-20
អ៊ីម៉ែល
មតិ
Share
បោះពុម្ព
កសិករ​នៅ​ខេត្ត​សៀមរាប ប្រមូល​ផល​កសិកម្ម​កាល​ពី​ខែ​វិច្ឆិកា ឆ្នាំ២០១៨។
កសិករ​នៅ​ខេត្ត​សៀមរាប ប្រមូល​ផល​កសិកម្ម​កាល​ពី​ខែ​វិច្ឆិកា ឆ្នាំ២០១៨។
Photo: RFA

កសិករ និង​ជនជាតិ​ដើម​ភាគតិច​រស់នៅ​ខេត្ត​ភាគ​ឦសាន ព្រួយចិត្ត​ពី​វិបត្តិ​នយោបាយ ដែល​នៅតែ​អូស​​បន្លាយ ​​ធ្វើ​​ឱ្យ​ប៉ះពាល់​ជីវភាព​ពួកគេ​កាន់តែ​ធ្ងន់ធ្ងរ ជាពិសេស​ការស្វែងរក​ប្រាក់​ចំណូល​កាន់តែ​ធ្លាក់​ចុះ​ខ្លាំង។ ក្រុម​កសិករ​បាន​ចាត់​ទុក​ការ​សម្រេច​យកពន្ធ​គយ​របស់​សហភាព​អឺរ៉ុប​ចំពោះ​ការ​នាំចេញ​អង្ករ​របស់​កម្ពុជា​ទៅកាន់​ទីផ្សារ​អន្តរជាតិ គឺជា​បន្ទុក​បន្ថែម​ទៀត បាន​រុញច្រាន​​ឱ្យ​ជីវភាព​ពួកគាត់​ធ្លាក់​ចុះ​ខ្លាំង ដែល​ជា​មូលហេតុ​នាំ​​ឱ្យ​តម្លៃ​ស្រូវ​ធ្លាក់​ថ្លៃ ក៏​ជា​បន្ទុក​បន្ថែម​ទៀត នាំ​​ឱ្យ​ពួកគេ​កាន់​តែ​ផុងខ្លួន នឹង​បំណុល​ធនាគារ និង​មីក្រូហិរញ្ញវត្ថុ។

កសិករ និង​ជនជាតិ​ដើម​ភាគតិច នៅ​ខេត្ត​ស្ទឹងត្រែង និង​ខេត្ត​មណ្ឌលគិរី ត្អូញ​ថា ផល​វិបាក​​នៃ​​​ឥទ្ធិពល​​​​វិបត្តិ​​​នយោបាយ​ គឺជា​ឃាតក​បំផ្លាញ​ប្រាក់ចំណូល​ពួកគេ ស្រប​​ពេល​​ដែល​​របប​​ក្រុង​ភ្នំពេញ នៅ​តែ​​មានៈ​មិន​បន្ទន់​ឥរិយាបថ ស្ដារ​លទ្ធិ​ប្រជាធិបតេយ្យ​ឡើងវិញ​នោះ​ទេ។ ពួកគេ​បារម្ភ​ថា បំណុល​ធនាគារ និង​ការស្វែងរក​ប្រាក់ចំណូល​ធ្លាក់​ចុះ​ខ្លាំង បង្ក​​ឱ្យ​កសិករ​ខ្លះ​បាក់​ទឹកចិត្ត បោះបង់​របប​កសិកម្ម និង​លក់​ទ្រព្យសម្បត្តិ​សង​ម្ចាស់បំណុល។ រីឯ​កសិករ​ខ្លះ​ទៀត​រត់ចោលស្រុក ព្រោះ​គ្មាន​​ប្រាក់​បង្វិល​សង​ម្ចាស់បំណុល នៅ​គ្រា​ដែល​មុខ​របប​កសិកម្ម និង​ការស្វែងរក​ប្រាក់ចំណូល​របស់​ពួកគេ​ត្រូវ​បរាជ័យ និង​គ្មាន​ទីផ្សារ​កសិផល​ជាដើម។

កសិករ​ជា​ជនជាតិ​ដើម​ភាគតិច​កួយ រស់នៅ​ស្រុក​ថាឡាបរិវ៉ាត់ ខេត្ត​ស្ទឹងត្រែង លោក ថាន់ វ៉ន ឱ្យ​ដឹង​នៅ​ថ្ងៃទី១៩ មករា​ថា គ្រួសារ​របស់​លោក​បាន​ខ្ចី​ប្រាក់​ពី ធនាគារ ៥ពាន់​ដុល្លារ ដោយ​ពឹងផ្អែក​ទាំងស្រុង​លើ​ផល​កសិកម្ម តែ​បើ​តម្លៃ​កសិកម្ម​មាន​បញ្ហា​ហើយ​នោះ​គ្រួសារ​លោក នឹង​ខ្វះ​ប្រាក់​បង្វិល​សង​ម្ចាស់បំណុល​វិញ។ លោក​កត់សម្គាល់​ថា មុន​ឆ្នាំ ២០០៨ ជនជាតិ​ដើម​ភាគតិច​មាន​ជីវភាព​ពឹងផ្អែក​ការស្វែងរក​អនុផល​ព្រៃឈើ ដូចជា ដង​ជ័រទឹក រក​ថ្នាំ​បុរាណ និង​រក​ឃ្មុំ​ជាដើម តែ​នៅ​រយៈ​ពេល​ប៉ុន្មាន​ឆ្នាំ​ចុងក្រោយ​នេះ​ព្រៃ​សហគមន៍​ដែល​ជា​កន្លែង​ពួកគេ​ប្រមូល​ផល ត្រូវ​គេ​កាប់​បំផ្លាញ​អស់ទាំង​ស្រុង ហើយ​បច្ចុប្បន្ន​នេះ ពួកគេ​បាន​ចាប់​យក​មុខ​របប​ធ្វើស្រែ​ចម្ការ ចិញ្ចឹមជីវិត​តែមួយ​មុខ ក៏ប៉ុន្តែ​បើ​តម្លៃ​ស្រូវ​ជួប​បញ្ហា​ហើយ​នោះ សេដ្ឋកិច្ច​របស់​កសិករ​ចៀស​មិន​ផុត​នឹង​ជួប​ការ​លំបាក​នោះ​ទេ៖ «ប្រសិន​បើ​ប្រទេស​សេរី​គេ​ទទួល​ស្គាល់ បាន​លុយ​ពី​ប្រទេស​គេ​ចូល​មក​ច្រើន មាន​ន័យ​ថា វា​អាច​នឹង​រក​លុយ​ធូរ។ ចុះ​បើ​លុយ​វិល​តែ​ប្រទេស​ឯង វា​បាន​ស្អី​ហ្នឹង​ចំណេញ​ទៀត។ ប្រសិន​បើ​រក​លុយ​អង្គការ ដោយហេតុ​ទៅ​តាម​សង្គម។ មិន​គួរ​ខ្ញុំ​ទៅ​យក​ទេ លុយ​អង្គការ​នោះ មាន​ន័យ​ថា សង្គម​ជឿនលឿន បើ​សង្គម​ជឿនលឿន មាន​លទ្ធិ​ប្រជាធិបតេយ្យ​ចូល​មក​ហើយ ខ្ញុំ​ទៅ​ខ្ចី​លុយ​អង្គការ ដើម្បី​ស្ថាបនា ក្នុង​ក្រុម​គ្រួសារ និង​ជួយ​ប្រទេស។ កាល​ណា​ប្រទេស​មាន​បាន​ដឹក​នាំ​ប្រទេស​រីក​ចម្រើន»

បុរស​ដដែល​បន្ថែម​ថា កាលពី​ដើមឡើយ ជនជាតិ​ដើម​ភាគតិច​មាន​ជីវភាព​ក្រីក្រ អាច​ស្វែងរក​អនុផល​ព្រៃឈើ ដូចជា បោច​វល្លិ រក​បន្លែ​ផ្លែឈើ និង​ដង​ជ័រទឹក​ក្នុង​ព្រៃ ព្រោះ​ត្បិត​តំបន់​ពួកគេ​រស់នៅ ហ៊ុមព័ទ្ធ​ដោយ​ព្រៃឈើ រីឯ​ទឹកអូរ​ធម្មជាតិ និង​ទន្លេ​ក៏​សំបូរ​ត្រី​សាច់ ផ្ទុយ​ពី​បច្ចុប្បន្ន​ព្រៃ​ឈើ​​ត្រូវ​​គេ​​កាប់​​អស់ ទឹកអូរ​ធម្មជាតិ​រីង​រាក់ គ្មាន​ត្រី​ ដោយសារ​អស់​ព្រៃ រីឯ​ទឹកទន្លេ​ក៏​​ពុំ​​សូវ​​មាន​​ត្រី​​ដែរ ដែល​ជា​មូលហេតុ នាំ​​ឱ្យ​សេដ្ឋកិច្ច​របស់​ជនជាតិ​ដើម​ភាគតិច​ជួប​ការ​លំបាក។ លោក​​ថា ប្រសិន​បើ​អ្នក​នយោបាយ​​​នៅ​តែ​​មានៈ​​មិន​​ចាប់​​ដៃ​​គ្នា​អភិវឌ្ឍន៍​​ប្រទេស​​ជាតិ​​​ស្មោះ​​ត្រង់​​​ទេ ពលរដ្ឋ​​ក្រីក្រ​​នឹង​​ជួប​​ការ​​លំបាក​​ផ្នែក​​សេដ្ឋកិច្ច​​កាន់តែ​​ធ្ងន់ធ្ងរ​​​ថែម​​ទៀត៖ «កាល​មុន​វា​មាន​គណបក្ស ប្រជាជន និង​គណបក្ស​ប្រឆាំង មិន​នឹក​ស្មាន​ថា គេ​គ្រាន់​តែ​ប្រកួត​ប្រជែង ដើម្បី​​កសាង​​ប្រទេស តែ​​បើ​​ខ្​ញុំ​ក្រឡេក​មើល​ទៅ​យូរៗ ពុំ​មាន​គណបក្ស​ណា​មួយ ដើម្បី​កសាង​ប្រទេស​ជាតិ​អី​ណា ប្រែ​​ទៅ​​ជា​​ប្រកួត​​ប្រឡង​​គ្នា ដើម្បី​អំណាច​បុគ្គល​ម្នាក់ តែ​បើ​រឿង​រាស្ត្រ​មាន​បញ្ហា​អី​មិន​ខ្ចី​ខ្វល់»

ជនជាតិ​ដើម​ភាគតិច​ម្នាក់ទៀត រស់នៅ​ខេត្ត​មណ្ឌលគិរី លោក ក្រើង តុលា ឱ្យ​ដឹង​ថា បច្ចុប្បន្ន​តម្លៃ​ស្រូវ​បាន​ធ្លាក់​ចុះ​ត្រឹម ៥០០​រៀល ទៅ ៦០០រយ​រៀល ក្នុង​មួយ​គីឡូក្រាម ដែល​ជា​ហេតុ​ធ្វើ​​ឱ្យ​កសិករ​ខ្លះ​បាក់​ទឹកចិត្ត ព្រោះ​ពួកគេ​បាន​ចំណាយ​ធនធាន​ច្រើន ទិញ​ជីគីមី​ដើម្បី​បង្កើន​ទិន្នផល​ស្រូវ។ លើស​ពី​នេះ កសិករ​ភាគច្រើន​បាន​ខ្ចីបុល​ពី​ធនាគារ​មក​ធ្វើ​កសិកម្ម ដែល​រំពឹង​ថា ផល​កសិកម្ម​នឹង​បង្វិល​សង​ម្ចាស់បំណុល​វិញ ក៏ប៉ុន្តែ​បើ​ស្រូវ​ធ្លាក់​ថ្លៃ​ខ្លាំង​ហើយ​នោះ នឹង​​ធ្វើ​​ឱ្យ​ពួកគេ​ខាត់​បង់​ច្រើន។ លោក​គិត​ថា នៅ​គ្រា​ដែល​សហភាព​អឺរ៉ុប​សម្រេច​យក​ពន្ធគយ នាំចូល​អង្ករ​របស់​កម្ពុជា​ទៅ​ទីផ្សារ​អន្តរជាតិ មិន​ត្រឹមតែ​ធ្វើ​​ឱ្យ​ជីវភាព​កសិករ​ធ្លាក់​ចុះ​ទេ បទល្មើស​ព្រៃឈើ​នឹង​កើតមាន​ច្រើន​ឡើង ដោយសារតែ​កសិករ​ខ្លះ​បោះបង់​របប​ធ្វើស្រែ​ចម្ការ ចូល​ព្រៃ​កាប់​ឈើ​ចិញ្ចឹមជីវិត៖ «បើ​គិត​ទៅ ៩៩% សូម្បី​តែ​មួយ​ផ្ទះ​ចូល​ទៅ ២ ទៅ ៣ ស្ថាប័ន​ហិរញ្ញវត្ថុ​ហើយ​ហ្នឹង តិច​បំផុត​ក៏​មួយ​ស្ថាប័ន​ដែរ។ យ៉ាង​ហោច​បំផុត​ចាប់​ពី​មួយ​លាន​រៀល​ឡើង​ទៅ​តាម​ខ្ញុំ​ដឹង​ទិន្នន័យ។ ធ្វើ​ស្រែ​បើ​មិន​ប្រើ​ជី​ទេ ស្រូវ​ទៅ​មិន​រួច​ទេ ដោយសារ​ដី​ហ្នឹង​វា​យូរ​ហើយ។ ឥឡូវ​ជី វា​ថ្លៃ​ដើម្បី​ឲ្យ​មាន​លុយ​ទិញ​គាត់​ខ្ចី​ធនាគារ​ហិរញ្ញវត្ថុ»

លោក ក្រើង តុលា អំពាវនាវ​​ឱ្យ​របប​លោក ហ៊ុន សែន ពិចារណា​ឡើងវិញ​ក្នុង​ការ​ពូន​ជ្រំ​លទ្ធិប្រជាធិបតេយ្យ និង​​ដោះ​ស្រាយ​​វិបត្តិ​​នយោបាយ តម្កល់​​ប្រយោជន៍​​ជាតិ​​ជា​ធំ ចៀសវាង​​មានៈ​​យក​ឈ្នះ​​តែ​​ខ្មែរ​​គ្នា​ឯង ដោយ​​មិន​​គិត​​ពី​​ទុក្ខ​វេទនា​​ពលរដ្ឋ។ លោក​​យល់​ថា ដំណោះ​​ស្រាយ​​​បញ្ហា​​​នេះ គ្មាន​​អ្វី​​ពិបាក​​ទេ ប្រសិនបើ​អ្នកនយោបាយ​ខ្មែរ​មាន​​ឆន្ទៈ​​ដោះ​ស្រាយ ព្រោះ​​​ទណ្ឌកម្ម​​​អន្តរជាតិ គឺ​​ឋិត​​ក្នុង​​កណ្ដាប់​ដៃ​ថ្នាក់ដឹកនាំ​រដ្ឋ។ លោក​ថា តម្លៃ​កសិផល​ត្រូវ​​ឈ្មួញ​​ទម្លាក់​​តាម​​អំពើ​​ចិត្ត ចុះ​​ទម្រាំ​​សហគមន៍​អឺរ៉ុប​​សម្រេច​​យក​ពន្ធ​​អង្ករ​​ថែម​ទៀត នឹង​​ធ្វើ​​​ឱ្យ​​កសិករ​​កាន់​តែ​​លំបាក​​មួយ​​កម្រិត​​ទៀត៖ «ខ្ញុំ​គ្រាន់​តែ​ស្នើ​សុំ​ឲ្យ​រដ្ឋាភិបាល​ពិចារណា​ឡើង​វិញ​ពាក់ព័ន្ធ​ស្ថានភាព​នយោបាយ សូម​គិត​ជាតិ​ជា​ធំ សូម​កុំ​គិត​តែ​បុគ្គល។ កុំ​ឲ្យ​គិត​ថា ខ្លួន​បាន​ឋានៈ​ប៉ុណ្ណឹង​ហើយ ពី​​ណា​​ចង់​​ធ្វើ​អី​ធ្វើ​ទៅ។ មូលហេតុ​ដែល​ប៉ះពាល់​វិស័យ​ព្រៃ​ឈើ​ដោយសារ​កាល​មុន គាត់​សង្ឃឹម​ថា បាន​ស្រូវ​ទៅ​លក់ ដល់​ពេល​ឥឡូវ​ស្រូវ​លែង​មាន​ពី​ណា​ទិញ​ហើយ ថៅកែ​ល្មមៗ គាត់​លែង​ទិញ មាន​តែ​ថៅកែ​ធំៗ ហ៊ាន​ទិញ​ខ្លះៗ នេះ​ជា​ចំណុច​មួយ គឺ​គាត់​បាន​អី​ធ្វើ​ហ្នឹង បទ​ល្មើស​ក៏​គាត់​ធ្វើ ចោរកម្ម​ក៏​គាត់​ធ្វើ​ដែរ»

ឆ្លើយតប​រឿង​នេះ អ្នកនាំពាក្យ​ទីស្ដីការ​គណៈរដ្ឋមន្ត្រី លោក ផៃ ស៊ីផាន ប្រាប់​អាស៊ីសេរី​ថា កម្ពុជា​នឹង​តវ៉ា ចំពោះ​សេចក្ដី​សម្រេច​ដំឡើងថ្លៃ​ពន្ធគយ​នាំ​អង្ករ​ចេញ​នេះ តាមរយៈ​អង្គការ​ពាណិជ្ជកម្ម​ពិភពលោក ក្នុង​បំណង​តម្កល់​ប្រយោជន៍​ជាតិ។ តែ​ទោះ​យ៉ាង​ណា លោក​មិនបាន​បញ្ជាក់​លម្អិត​ថា កម្ពុជា​នឹង​តវ៉ា​របៀប​ណា​នោះ​ទេ៖ «ពិភព​លោក​នេះ អន្តរជាតិ​បាន​បង្កើត​អង្គការ​ពាណិជ្ជកម្ម​ពិភព​លោក យើង​នឹង​ប្រើប្រាស់​សិទ្ធិ​ជា​សមាជិក​នៃ​អង្គការ​ពាណិជ្ជកម្ម​ពិភព​លោក​តវ៉ា​ក្នុង​ការ​ដំឡើង​ថ្លៃ​ពន្ធគយ គំហុក ដែល​យើង​មិន​អាច​ទទួល​យក​បាន»

កាលពី​ថ្ងៃទី១៧ មករា ក្រសួង​ពាណិជ្ជកម្ម បាន​ចាត់​ទុក​ការ​យក​ពន្ធ​អង្ករ​របស់​អឺរ៉ុប​ថា​មិនបាន​ឆ្លុះបញ្ចាំង​ទាំងស្រុង​លើ​ទិដ្ឋភាព​ច្បាប់​ពាណិជ្ជកម្ម​អន្តរជាតិ បទដ្ឋាន​បច្ចេកទេស និង​សច្ចភាព​នោះ​ទេ​។ លើស​ពី​នេះ វិធានការ​នេះ​មាន​ឥទ្ធិពល​ដកហូត​ចំណូល​កសិករ​ក្រីក្រ​កម្ពុជា និង​ជា​អាវុធ​ធ្វើឃាត​ជីវភាព​កសិករ ដែល​កំពុង​ជាប់​បំណុល​ជាមួយ​ស្ថាប័ន​ឥណទាន ផ្ដល់​ប្រាក់​កម្ចី។ ទន្ទឹម​នឹង​នេះ ក្រសួងពាណិជ្ជកម្ម​អះអាង​ថា ក្រសួង​កំពុង​ផ្ទៀងផ្ទាត់​សេចក្តី​សម្រេច​នេះ ដោយ​ផ្អែក​ទៅ​លើ​ទិដ្ឋភាព​ច្បាប់ និង​វិធាន​ពាណិជ្ជកម្ម​អន្តរជាតិ ដើម្បី​បន្ត​ការ​តវ៉ា ចំពោះ​សេចក្តី​សម្រេច​នេះ ដែល​ក្រសួង​ចាត់ទុកថា គ្មាន​សុក្រិតភាព។

ទោះជា​យ៉ាង​នេះ​ក្តី មន្ត្រី​ជាន់ខ្ពស់​ក្រសួងពាណិជ្ជកម្ម​ថា របប​ក្រុងភ្នំពេញ នឹង​ត្រៀម​ទប់ទល់​បាតុភាព​នេះ ដែល​អាច​​ឱ្យ​កម្ពុជា​ខាតបង់​ប្រាក់ ៥០លាន​ដុល្លារ​អាមេរិក​ក្នុង​មួយឆ្នាំៗ​។ ការ​ឆ្លើយ​តប​របស់​មន្ត្រី​របប​លោក ហ៊ុន សែន មិនទាន់​ធ្វើ​​ឱ្យ​សង្គម​ស៊ីវិល​អស់​ក្តី​បារម្ភ​នោះ​ទេ។

ប្រធាន​អង្គការ​សម្ពន្ធ​គណនេយ្យភាព​សង្គម​កម្ពុជា លោក សន ជ័យ ចាត់​ទុក​សេចក្តី​សម្រេច​របស់​សហភាព​អឺរ៉ុប​នឹង​ប៉ះពាល់​ដល់​ក្រុម​កសិករ​ជាច្រើន ខណៈ​ផលិតផល​កសិកម្ម​ចាំបាច់​ត្រូវ​នាំចូល​ទៅ​កាន់​ទីផ្សារ​អន្តរជាតិ ព្រោះ​ទីផ្សារ​អង្ករ​អន្តរជាតិ​គឺជា​មុខសញ្ញា​ដ៏​សំខាន់ ក្នុង​ការ​នាំ​អង្ករ​ចេញ ផ្ដល់​ប្រយោជន៍​ដល់​កសិករ និង​សេដ្ឋកិច្ច​កម្ពុជា។ លោក​គិត​ថា ការ​យកពន្ធ​អង្ករ​របស់​សហភាព​អឺរ៉ុប គឺ​ស្រប​ពេល​ដែល​កម្ពុជា មាន​វិបត្តិ​នយោបាយ ដែល​អាច​ជាប់​ទាក់ទិន និង​ទម្រង់​ដែល​សហគមន៍​អឺរ៉ុប គ្រោង​ដកហូត​ប្រព័ន្ធ​អនុគ្រោះ​ពន្ធ EBA ចំពោះ​ការនាំចេញ​ផលិតផល​សំលៀកបំពាក់ និង​ស្បែកជើង​ជាដើម​ពី​កម្ពុជា ដែល​លោក​ចាត់ទុកថា នឹង​បង្ក​ផល​ប៉ះពាល់​ធំធេង​ដល់​ប្រព័ន្ធ​សេដ្ឋកិច្ច​ប្រជាជន​កម្ពុជា​ទាំងមូល៖ «យក​ពន្ធ​នាំ​អង្ករ​ចេញ​ទៅ​សហភាព​អឺរ៉ុប នឹង​មាន​ការ​យកពន្ធ ផល​ប៉ះពាល់​រយៈ​ពេល​ខ្លី​មាន​ន័យ​ថា ជា​ការ​ខាត​បង់​មួយ​របស់​កសិករ​សម្រាប់​ឆ្នាំ​នេះ តែ​យើង​សួរ​ថា តើ​ការ​ធ្វើ​កសិកម្ម​ហ្នឹង ពួក​គាត់​បាន​ខ្ចី​លុយ​ពី​ធនាគារ និង​មីក្រូហិរញ្ញវត្ថុ​សម្រាប់​ការ​ផលិត​ដែរ​ឬ​ទេ? ប្រសិន​បើ​មាន​ការ​ខាត​បង់​ឆ្នាំ​នេះ បំណុល​របស់​គាត់​អាច នឹង​មាន​ការ​ខាត​បង់​នៅ​ឆ្នាំ​បន្ទាប់​ទៀត ព្រោះ​លុយ​ខ្ចី​គេ​គាត់​យក​មក​ប្រើប្រាស់ មាន​អត្រា​ការ​ប្រាក់​មួយ ដែល​បាន​កំណត់​ដោយ​ស្ថាប័ន​មីក្រូហិរញ្ញវត្ថុ និង​ធនាគារ»

ចំណែក​ប្រធាន​សមាគម​សម្ព័ន្ធ​និស្សិត​បញ្ញវន្ត​ខ្មែរ លោក មួង សូនី យល់ថា ការសម្រេច​របស់​សហភាព​អឺរ៉ុប​បែបនេះ នឹង​នាំ​ក្ដី​លំបាក​ដល់​ប្រទេសជាតិ​កម្ពុជា​ទាំងមូល ជាពិសេស​កសិករ​កម្ពុជា ដែល​អាច​ប្រឈម​នឹង​វិបត្តិ​សង្គម​ផ្សេងៗ​ ទៀត ​នៅ​ថ្ងៃ​ខាង​មុខ។ លោក​ថា បើ​ប្រមុខ​ដឹកនាំ​រដ្ឋ​នៅតែ​មានៈ​រឹងរួស មិន​ព្រម​បន្ទន់​ឥរិយាបថ រុញច្រាន​កម្ពុជា​​​ឱ្យ​​មាន​​ប្រជាធិបតេយ្យ​​ឡើងវិញ​នោះ​ទេ ប្រជាជន​កម្ពុជា​នឹង​មិន​​ទទួល​បាន​ការ​រីកចម្រើន​សេដ្ឋកិច្ច​ពិតប្រាកដ​នោះ​ទេ៖ «វិបត្តិ​នយោបាយ គឺ​ជា​គន្លឹះ​សំខាន់។ យើង​មើល​ស្ថានភាព​បច្ចុប្បន្ន​នឹង​នាំ​ឲ្យ​មាន​វិបត្តិ​សេដ្ឋកិច្ច និង​វិបត្តិ​សង្គម ព្រោះ​ពលរដ្ឋ​ខ្មែរ​ជំពាក់​លុយ​ធនាគារ​ជាង ៦០ភាគ​រយ នៃ​ប្រជាជន​សរុប ហើយ​ភាគ​ច្រើន​ទូទៅ គឺ​កសិករ និង​កម្មករ​ហ្នឹង​ហើយ​ដែល​ជំពាក់។ ប្រសិន​បើ​គាត់​មិន​អាច​លក់​អង្ករ​បាន​ទេ និង​មិន​អាច​មាន​ការងារ​ធ្វើ​រោងចក្រ​ទេ តើ​គាត់​មាន​លុយ​ណា? បង់​សង​ធនាគារ ហើយ​ធនាគារ​នឹង​រឹប​អូស​ទ្រព្យ​ក្ស័យធន ហើយ​វា​នឹង​អាច​កើត​វិបត្តិ​ចោរកម្ម​ផ្សេងៗ ទៀត។ ខ្ញុំ​គិត​ថា រឿង​ហ្នឹង​រដ្ឋាភិបាល​គាត់​ដឹង​ហើយ បញ្ហា​ទាំង​អស់​ហ្នឹង តែ​វា​អាច​ជា​កត្តា​ធំ​មួយ ដែល​គាត់ (របប​ក្រុង​ភ្នំពេញ) មិន​ហាន​បើក​ឲ្យ​គណបក្ស សង្គ្រោះ​ជាតិ ដំណើរ​ការ​វិញ និង​ទទួល​យក​សំណើ​របស់​សហគមន៍​អឺរ៉ុប»

លោក មួង សូនី យល់ថា ការ​ចាប់​ដៃ​ចិន មក​វិនិយោគ​នៅ​កម្ពុជា​កាន់តែ​ច្រើន​ឡើង មិនមែន​ជា​ដំណោះ​ស្រាយ​​នយោបាយ​​ត្រឹម​ត្រូវ​​ពេញលេញ​ស្របតាម​បន្ទាត់​ច្បាប់​នោះ​ទេ ផ្ទុយ​ទៅ​វិញ​​នឹង​​ធ្វើ​​​ឱ្យ​​កម្ពុជា​កាន់​តែ​​ផុង​ខ្លួន​​នឹង​​អន្ទាក់​​បំណុល​​បរទេស ដែល​​​លោក​​បារម្ភ​​ថា គឺ​ជា​ដើម​ហេតុ​នាំ​​ឱ្យ​​កើន​​ឡើង​​អយុត្តិធម៌​​សង្គម វិបត្តិ​​ដីធ្លី និង​​ការ​រំលោភ​​សិទ្ធិ​មនុស្ស​​ជា​ដើម។ លោក​​ថា សហភាព​​អឺរ៉ុប​​បាន​​កំណត់​​ពន្ធ​​ប្រមាណ ២០០​ដុល្លារ សម្រាប់​​អង្ករ​​មួយ​​តោន​​ក្នុង​​ឆ្នាំ​​ទី​១ និង​​បាន​​ទម្លាក់​​ពន្ធ​​មក​​នៅ​​ត្រឹម​​តែ ១៣២​ដុល្លារ នៅ​​ឆ្នាំ​​ទី២ និង​​នៅ​​ត្រឹម ១០៩​ដុល្លារ នៅ​​ឆ្នាំ​​ទី៣ ធ្វើ​​​ឱ្យ​​កម្ពុជា​ខាត​​បាត់​​ចំណូល​​សេដ្ឋកិច្ច​​រាប់​​សិប​​លាន​​ដុល្លារ​​ក្នុង​​មួយ​ឆ្នាំៗ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល